الجزء الثالث
أخدت نرجس موبايلها وطلعت لبرا.. بس أول ما خطت خطوة وحدة برا شارع الشركة.. انحطت كمامة على وجها وفقدت الوعي فورا
_________________________________________
مراد: لكك معااذ.. رح جن.. موبايلها مسكر
معاذ: أنا قلتلك عم تغلط
مراد: مو وقت هالحكي هلأ.. قلي شو أعمل
معاذ: خبر الشرطة
مراد: مستحيل
معاذ: إذا بدك أختك تروح من إيدك عكيفك
مراد: إذا عرفوا هويتي الحقيقية رح يحبسوني
معاذ: مافي داعي يعرفوا هويتك
___________________________________________
بشارع بعيد عن المدينة بمنطقة نائية يادوب فيها كم شخص.. تأكد من عدم وجود أي كاميرا بالشارع واتصل من الهاتف يلي موجود بالطريق
- الو.. مركز الشرطة معك تفضل
مراد: بدي بلغ عن حالة خطف
- أول شي عطيني اسمك الكامل
مراد: فاعل خير.. الخطف صار بحدود الساعة 2 الضهر.. المخطوفة اسمها نرجس الوليد بعمر ال 25.. شعرها خرنوبي عيونها عسلي.. كانت لابسة تنورة طويلة بيج وفوقها بلوزة بأكمام طويلة لونها أبيض.. بتحط نضارات.. عملية الخطف صارت بشارع **** قريب على شركة الزاهر
- وشو بيضمنلي أنك ماعم تلعب معي
مراد: معي فيديوهات بتثبت هالشي.. بظن الشرطي جبلك الظرف.. سلام
- لحظة لا تسگ - -
مراد: معاذ لازم نرجع فورا وندور عليها.. نديم الكلب أكيد بكون خبر الكبير.. نرجس ما لازم تضل بين ايديهن.. رح ينهوا حياتها أنا متأكد
معاذ: امشي امشي
____________________________________________
بغواصة بعمق كبير جوا البحر.. بمستودع شبه سجن.. كانت مربوطة وعلى عيونها في قماشة بتحجب الدنيا عنها
نرجس: ميين في هون.. حدا يرد عليي.. أناا هووون
بعد بفترة دخل شخص لعندها ووراه مرافقتو
جمال: حاج تعوي.. لو بتمسكي المايكروفون وبتعيطي محدا بيسمعك هون
نرجس: مين أنت.. ليش مغطيين على عيوني
جمال: عم نلعب غميضة
ضحكوا الشباب يلي وراه مع أنو هنن عرفانين أنو الرد بايخ جداً بس مضطرين يجاروه
نرجس: طيب فيك تشيل هالبطيخ من عيني..
جمال: صعب شوي
نرجس: شو بدك مني
جمال: مشكلتك الوحيدة أنو مالك ذنب.. ومابدي منك ولاشي
نرجس: لكن ليش أنا هون
جمال: بسبب أخوكي الخاين
نرجس: وائل؟ وائل مستحيل يعمل شي
جمال: كم أخ عندو هالحيوان
نرجس: مين هو
جمال: ابن اختي.. مين هو يعني.. مراد
نرجس: م - - مراد
جمال: مفكرتيني مابعرف أنكن عم تشوفوا بعض من زمان
تبدلت ملامحها فورا وهمست بفرح
نرجس: مراد عايش؟
جمال: لك هالحركات مو عليي
نرجس: والله كنت عرفانة أنو ما مات.. وينو بتحب الله.. خليني شوفو مرة وحدة بعدو اقتلوني
- معلم شكلها صادقة
جمال: معقول يكون لسا ما حكالها.. لازم نتأكد
- شلون
جمال: الحقني لشوف
____________________________________________
مراد: معاذ رح طق.. شلون بدي أعرف الأخبار من الشرطة
معاذ: مراد أنت كل حياتك مشربكة.. اشتهيت يوم يمر بدون مشاكل
مراد: أنا لازم أحكي مع نديم
معاذ: أوعا مراد.. وقتها نديم رح يتأكد أنو أنت بتعرف أنو هي نرجس من زمان
حط ايديه على راسو وصار يبكي
مراد: كلو مني.. أنا يلي بلشت بكل هاد
____________________________________________
// 2004 //
نديم: شو يا حلو.. من وين جاييني أنت
- نديم بيك هاد الولد يلي حكيتلك عنو
نديم: ممممم.. شكلو فتح وبيلقطها عالطاير.. شو كان اسمو
- مراد يابيك
نديم: اسمعني منيح يا مراد.. من يوم ورايح بتنسى شي اسمو عيلتك.. ومجرد ما تقرب منهم فأنت عم توقع فرمان موتهم.. شوف يا حلو.. إذا قررت تخوني وتنقلب ضدي وتكشف كلشي عم اعملو.. فيني لبسك كل القصة بمنتهى السهولة.. لاتفكر تتذاكى عليي أبدا.. أنا لحمي كتير مر
مراد: ليش أنا بالذات
نديم: مو أنا يلي اخترتك.. أنت يلي اخترت حالك
جمال: نديم بيك.. اجا الوالد وعم يسأل عنك.. سمع أنك ماعم تداوم بالجامعة
نديم: يا كلاب ماقلتلكن بتغطوا عليي.. كيف سمع
جمال: والله مابعرف
_________________________________________
// 2019 //
جمال: ألو
نديم: كيف المحروسة
جمال: صرلا ساعتين عم تعوي
نديم: ههه زتلا عضمة.. ما علينا.. بدي دفع مراد التمن غالي.. مفكرني ولد صغير يضحك عليي.. بدي إياك تجهز يلي اتفقنا عليه من 20 سنة.. أجا وقتو ولك جملو
جمال: ههههه أحلى طلب
__________________________________________
وهنن قاعدين أجا إتصال لمعاذ.. فتح الخط بدون ما يحكي ولا كلمة واطلع بمراد.. ختم المكالمة بكلمة (( أمرك سيدي )) وفتح السبيكر
نرجس: مشان الله لا تقتلني
وقف مراد على رجلو أول ما سمع صوتها
جمال: ههههههههه صعب شوي
نرجس: لكك انا ماعملت شي.. شو بدك مني
جمال: في واحد حيوان عم نصفي حسابنا معو.. وانتي الأداة مع الأسف
نقز أول ما سمع صوت رصاصة وانكتم صوت نرجس.. رجفت ايدو ونزلت دمعتو
مراد: نرجس
معاذ: لا تبكي كتير.. رح تلحقا بعد شوي
يتبع..