📚قصص||روايات||منوعة📚

(اكلت معو لما حسيت بإحساس الراحة يلي حسو عدي عرفت من عيونو انو نغم بخير ﻻنو عنجد كان خايف عليها متلي وماكان عم ياكول بهناوة كتير مع انو كان ضد وجودنا عند ليث وماكان واثق مين نحن بس إنسانيتو غلبت عليه مابعرف شلون قدر يضحكني بس انا يلي بيضحكني بكون عندو كمية عفوية مو طبيعية المهم خلصنا اكل وركبنا بالسيارة)

جوري: قلي طيب وين لقوها لنغم
عدي: اااه والله قصتها قصة
جوري: لك خلصني حكالك ياها بدقيقة ع التلفون ح تعمل فيها حكواتي
عدي: ههههه اجت لحاﻻ ع الصيدلية تبع ليث بالصدفة ﻻتخافي مافيها شي ابدا بالعكس منيحة وليث عرفا وجابها ع البيت
....................
ماكتت مصدقة ايمتى اوصل لهنيك
كنا مبعدين عن المنطقة شغلة ساعة ونص
وبهالساعة ونص نغم كانت وحدة تانية
وصلت ع البيت شفتها عرفتا دغري رفيقتي وحبيبة قلبي نغومة
يلي كانت رافعة شعرا الخرنوبي وعيونا العسليات غزلو لما شافوني
كانت ﻻبسة كنزة وبنطلون كتيير حلوين ركدت عليها وضليت ضاممتا وصرنا نبكي

جوري:شبها ايدك؟
نغم: منيحة منيحة
ورجعت ضمتني

بعدين قعدنا انا وياها بالصالون وليث وعدي وام محمد طلعو لبرى

جوري: شو صار معك
نغم: حاول كتير بس انا ضربتو ع بطنو برجلي قام طلع السكين وصار بدو يطعني انا حاولت خلصو ياها هون نجرحت من ايدي وقتا استحكم انو يطعني بس ضربتو ضربة لتحت بشوي يعني بدي خلص حالي وهربت
جوري: ماقصرتي يبليني بقتلن هنن ال2
نغم: وانت؟
جوري: ركد ورايي الحيوان طخيت وعملت حالي اني تعبت مسكت حجرة من دون ماينتبه وطى لعندي كنت سافئتو ع راسو فجيتو وهربت ان شالله بكون صفي دمو ومات الواطي الندل
نغم: الله ﻻيقيم عن قلبهن شدة
جوري: لك شو هاد وليه كنزة وبنطلون وحركات
نغم: اول مااجيت كان منظري بأسي لبستني خالة ام محمد كيس نايلو ع ايدي لمايجيها مي وتحممت اااه ياجوري من ايمت مااحت مي سخنة عليي لك والشامبو والصابون ياربي ماشبعت منهن
جوري: متلي اتذكرت وقت كنت اتفئس ع اهلي وماارضى اتحمم الا بالماركات والشامبوهات الطبية الله وكيلك ماقرأت اسم الشامبو ع راسي فورا انحط
نغم: وانا كمان كتير ، كنت اعمل العمايل والله مشان شامبو وبلسم وكريمات واكل بحبو ومابحبو والله رفسنا النعمة كتير ياجوري
جوري: لحد ماانسحبت منا كلها دخيلك ياربي تسامحنا
نغم: امين المهم طلعت لقيت جايبة خالة ام محمد كنزة وبنطلون الي ﻻن تيابي انشقو من هاد الحيوان الغبي ووقعت انا وعم اركض كمان
جوري: منيح جابتلك ياها طويلة ومستورة ههههه
نغم: لك سكتي سكتي شو مضحكك اه؟ ونحن عند جماعة مامنعرفهن
جوري: بجننو يانغم بجننو ومناح وطيبين سمعي مو نحن عم ندور ع شغل؟
نغم: اي
جوري: منقلو لل د.ليث يدبرلنا شغل ومنام فيه مالنا غيرهن بدك ترجعي للشارع؟؟
وبهالفترة كمان منقدم ع هدول مراكز ايواء مدارس اي مكان تاني يعني
نغم: تمام تمام
.......................
بالرغم من كل هالنشاط الي فينا
الا انو التعب كان باين واضح
وطبعا طلعت نتيجة تحاليلي وبين انو معي فقر دم واتوماتيكيا نغم متلي كونا كتير كنا نوفر مصاري وماناكل منيح وغالبا ماكان اكلنا مفيد متل اكل البيت يعني

لهيك ليث كان معند انو نضل عندو ونبقى لنتحسن منيح ولنشوف شغل منيح وهيك
نحن كنا رافضين شكليا فقط وعملنا حالنا انو كتير زعلانين وانو مغصوبين ع القعدة بس الحقيقة كنا طايرين فرح
انتو متخيلين انو ح نام ﻻول مرة بعد ايام وليالي بغرفة بين سقف وحيطان متل كل البشر؟

.......................
ليث: عدي قلك مو؟
محمود: اي والله عم نعرف من هون وهون اخبارك ﻻنو
ليث: لك بس بدي افهم شو يلي زاعجو عم يدفع حق قعدتهن يعني وﻻ دفعتو حق التحليل لك شو دخلو هو مالو علاقة
محمود: لك ﻻاا مو هيك هو شوف كأنو كان مو رضيان وهلق رضي
ليث: سائل عليه ﻻنو انا يرضى وﻻ عمرو
محمود: مااختلفنا معناها الحكي صح
ليث: مليون % انا عندي تنتين بنات نفسهن يلي قلتلك عليهن ونحن عم نأسعف الوالد عم حاول ريح ضميري بس ﻻنو كان المفروض ساعدهن ومااتركهن
محمود: معك حق وانا كمان بحمل حالي المسؤلية ﻻنو كنا عم نأسعف ابي ومضطرين نمشي بسرعة انا كمان ضميري أنبني كتير
ليث: ﻻ انت وﻻ يهمك مالك علاقة بشي كان الحق معك بالنهاية هاد ابوك بس انت يلي كان المفروض انزل ومااتركهن
محمود: بس انجبرت ماتنزل ﻻنو نحن معك هلق المهم حكيلي عنهن تصرفاتهن هيك يعني
ليث: مابعرف لسى مالهن عندي يوم شو بدي لحق شوف بس بهالنهار شفت كتير تصرفاتهن عادية ومتزنة مافي شي مو طبيعي يعني
محمود: عدي قلي انو هنن من مناطق منكوبة يعني ضحايا حرب
ليث: مزبوط
محمود: كوني دكتور نفسي ورائد بالتنمية البشرية بقدر فيدك كتير ﻻنو في كتار اجوني متلهن ضحايا حرب عندهن اضطرابات نفسية مو طبيعية + فوبيات او هواجس غالبا من العتمة ومن الاصوات العالية ومن الاماكن الديقة ومن الاماكن المنخفضة وكل هاد بينحل ف انا بفضل تخليني شوفهن او اول ماتشوف بدر منهن شي مختلف فورا قلي خلينا نلاحق الموضوع وكل الاضطرابات بتنحل

سامر: الحمدلله ع سلامتك فقتي ....

جوري: شو عملت ؟

سامر: ولا شي ، ماعملت شي ، ومارح أعمل شي

جوري: وليش عملت هالحيلة الرخيصة هي ، كيف بتقدر تستغل قصة أهلي ، يلي كذبت فيهن أموات وألهن حرمتهن حتى الميت ما احترمت حرمتو أنت شو

سامر: بعرف إنِّك تحت تأثير المخدر لهيك أهدي
(قرب ونزل ع ركابو مقابيلي ومسحلي ع وجهي ورفع شعراتي)
سامر: مابدي أذيكي ياروحي ، أنا آخر واحد ممكن يفكر يأذيكي

جوري: بعد عني ، بعد مالي قدرانة شوفك ، عم قلك بعد معدتي قلبت

كنت تحت تأثير المخدر ماعم بقدر صرخ أو حرك راسي بسرعة لساتني دايخة وحاسة الارض عم دور فيني

بعد فترة نص ساعة او اقل مابعرف صحصحت منيح ، وبلشت طلع عليه نظرات حدّه ....

سامر: ههههه روّقي معلش .... شبك محتدة هيك ، مالك جوعانة ؟

جوري: لك الله يوفقك شو حيوان ، مارح تنفد بعملتك هي ، ليث ح يلاقيني ومارح يرحمك

سامر: طيب طيب خلص ليش عم تبكي ، خلص روقي مارح طعميكي ، طب سمعي هالنكتة قال وحدة بتحب الشطف بس الشطف ماحبا هههههههههههههههههه ........ أحم أحم ما حلوة ؟

جوري: مشان الله بكفي مشان الله رجعني ، سامر خلص أنت إلك ولادك ومرتك وعيلتك بكفي شو بدك فيني

سامر: بدي عيلة منك ، هلق صار فيكي تجيبي ولاد عدى عن إنك حليانة ، لك اااااااخخ شو حليانة

جوري: (غصيت ببكوتي) سا ... مر

سامر: عيونو .... طب ليكي غنيلي روق عليِّ شوي بفكلك أديكِ

ضمنياً عم قول عنو مجنون وغبي ، كنت خايفة منو خايفة يعمل شي ، ماكنت خايفة من الموت أبداً بالعكس كان الموت أملي بهالحالة ، وبنفس الوقت كنت حاسة أنو ليث موجود ، متأكدة أنو نغم خبرتو وهلق هو قالب الدنيا عليِّ

..........................
أم محمد: لك وين راحوو؟

نغم: ولا شي خالتي هي جوري كان دايق خلقها وطلعت لعند ليث ع الصيدلية وهو قلي انو اخدا مشوار هلق بيرجعو

أم محمد: قلبي قامطني يانغم

نغم: وحدي الله خالتي مابقى إلا يجو

أم محمد: لا إله إلا الله ، لك هنن بس لو يردو ويطمنوني بس
...........................
ليث: شو اسما الضيعة شو قلك

عدي: وادي الكرم

ليث: هاد زلمة وقف سألو

عدي: (قرب لعندو) السلام عليكم عم

الزلمة: وعليكم السلام

عدي: ضيعة وادي الكرم وين صارت؟

الزلمة: بضلك رويح دُغري دُغري المفرق ع إيدك اليسور شغلة دقيقيتين بتلاقى ليفتة مكتوب عليا وادي الكرم ترحب بكم

عدي: مشكور عم

ليث: بسرعة بسرعة أسرع
.......................
جوري: مو طالع .... صوتي .....

سامر: كرمالي
جوري: .....
سامر: طب كرمال فك إيدكي

حاولت غنيلو ليخرس بس

جوري: .......... روق عليّ ... شوي .. مشيني على ضو .... عطيتك أكتر مافيّ .... لا ماتقلي ....لو

............
ليث: ليكا سيارتو ليكا عدي

عدي: شفتا سماع ما ح نحسسو بوجودنا ، ح نزل نحاول نشوف إذا ماعم يأذيها ، ح نستنى عماد ، هو صار هون 10 د بس وبكون موجود

ليث: عم يأذيها وح أشرب من دمو

عدي: ليث لا تتسرع مابظن يأذيها ، سامر أضعف من هيك

وقف عدي ونزل ليث فوراً ، كان في شباك منخفض شوي وقف بِحَذر وشوي شوي الشي يلي خلا عدي يرتاح ، شافها مربطة بس مو صاير عليها شي والاكل قدامها وهو مقابيلها قاعد وعم يطلع عليها ، شافها عم تبكي وتحكي ماكان مبين أنها عم تغني عص ع إيدو ووقف يراقب

عدي: شو

ليث: دق لعماد مابقى عندي صبر

عدي: دقيتلو ليكو 5د بس
.................
سامر: كملي

جوري: أنتَ يلي فكرك سارح عايش ......... بالخيال .... لو نتفه بتنسى مبارح كان بيمشي الحال......

سامر: اي والله ، لو بتنسي امبارح بس ، كملي كملي يؤبرني هالصوت ، -سكتت وماحكيت ف صرخ- لك كمليييي -نئزت وكملت غصب -

جوري: سمعني حكياتك ... حاكيني بنظراتك

.............
أجى عماد

ليث: نعيماً سيادتك

عماد: ح نداهم فوت أنت ليث أول واحد

ليث مانطر ليكمل عماد الجملة ، وقف قدام الباب ودفشو دفشتين أنكسر
ضحكت وانا عم أبكي وقت شفتو
انتفض سامر ووقف واستعد للقتال بس أتفاجئ بالشرطة فايتين ومثبتينو
كان مصدوم وماكان عم يحكي ، قرب ليث لعندو كان بدو يضربو بس تراجع
أجى لعندي وفكني ونظراتو عتاب بتقهر ، مسك إيدي ووقفني قدامو

ليث: ضربيه إنتِ

ماترددت وضربتو كف أستغربت من القوة يلي أجتني ضربتو كف نزلتلو الدم من أنفو لدرجة أنا أستغربت من قوة هالكف، وكأنو حقد السنين كلا طلعت فيه

ولاختصرلكن ، رجعنا ع البيوت ، ماكنت قدرانة أحكي مع حدى حتى مع نغم ، فتت اخدت دوش وطلعت ، مابعرف شو كذبو ع خالة أم محمد
ندهولي ع الاكل مانزلت ، طلع ليث وفات لعندي
درت وجهي
جوري: مابدي آكل

قعد ع الارض مقابيلي

ليث: ولا أنا .................. حسيت بالفقد ، حسيت بإني عم أفقد جوهر مني ، مابدي أفقدك هيك مرة تانية

جوري: قلي رح يورجيني أهلي والله هيك قلي (بكيت) فكرت أمي عايشة ، قلت ح ضمني وتقلي متل ماقالت أما لنغم ، كانت حاسة فيني وبوجودي ، كانت عم تدعيلي ، لهيك مشيت معو ، لهيك

ليث: ولا يهمك ياعمري ، لا تبكي ولا يهمك