📚قصص||روايات||منوعة📚

rwayate

نغم: ليكو الخطة حلوة بس خلونا مانخاطر معلش منلاقي غيرا
جوري: شبكن خفتو؟ نحن ال3 مع محمود ح نكون مع بعض لنخلصو ﻻ تاكلو هم ح تزبط طالما عم تقول انو البنت هالئد مادية وعم تستغلو بشكل واضح بس هو معمي عن هالشي ....

وانا كمان كنت معمية ، مجرد مادق قلبي انعميت ، انعمى عقلي وتفكيري وكل شي فيني انعمى ....
كل تركيزي صار على ليث
كيف بدي جيبو؟
كيف بدي خليه يحبني؟
طب هو شو حابب فيها؟!
جمالها! ... هلق انا صح مو ع نفس قدر الجمال بس كمان انا حلوة ومكلتمة يعني عندي نسبة جمال منيحة ﻻبأس فيها
هضامتا! ... الله أعلم إذا مهضومة أصلا أما أنا فعلا روحي مرحة ومهضومة
أخلاقها! ... مبين ماعندا أخلاق أصلا من طريقة تصرفاتا معو وماديتا المفرطة ع حسب ماحكى عدي عنها
"هاد فعلا مو حابب فيها الا جمالها"
هي الجملة الي طلعت معي بعد كتير تحليلات لهالموضوع
............................
اما ليث يلي قرف من مادية واستغلال ﻻنا ﻷلو ﻷول مرة ، طبعاً ﻷنو لما عطاها الهدية الي جايبا انفردت معو اكتر وصارت تدللو أكتر وانقلبت معو فورا
كأنها عم توصلو فكرة انو ع قد مابتدفع ع قد مابتاخد ....
خلصت حفلتو معها ووصلها ع البيت
ودق ل عدي

عدي: ذكرو القط بيجي نط ...
نغم: هههه هاد ليث اي رد
عدي: اتصوري سكر بوشو ، الو اي حبيب
ليث: وينك انت؟! -كان صوتو تقيل-
عدي: انا ونغم وجوري ع الطريق للبيت
ليث: نغم وجوري معك ليش؟ وليش لهلق ؟لهلق برا البيت مخلين؟
عدي: طلعنا من المعهد ورحنا مشوار لنغير عن جو البكلوريا ماصار شي ليكنا ع الطريق ح نوصل ع البيت ماصار شي ، شبك انت ليش هيك صوتك
ليث: ﻻتحكي شي قدامن ، مخنوق ياعدي جبل على صدري ، لك انا ﻻعم اقدر آخد خطوة لقدام ، وﻻ عم بقدر ارجع من هالطريق ، ماعم بقدر ، مرة عم شوفا ملاك مرة عم قول لأ حكيك صح
عدي: اذا بدك ترجع وتترك هالدوا هاد يعني ماعاد تجيبو ع صيدليتك بتقدر بس بدها إرداة وأنا معك...
ليث: يبعتلك ئرفك على هالتمويه الغبي مشي الحال فكروني مدمن هلق لعمى مااغباك انقلع من وشي روح وقلن اني مدايق من ﻻنا معلش اهون مايفكروني مدمن يبعتلك اتلك شو حمار انقلع

عدي فرط ضحك وحط الجوال من ايدو ونحن صرنا نضحك ع الخفيف ع ضحكتو ووقت قلنا ضحكنا كتير
جوري: اتو عنجد تمويهك غبي
عدي: لك هاد اذا دل على شيء بدل على اني زلمة صريح مابعرف اللف وﻻ الدوران مباشر بتعاملي
...................
#يتبع🌍🌸

📚قصص||روايات||منوعة📚

rwayate

وصلنا ع البيت بعد شوي لقينا ليث موجود بالحديقة قعد عدي معو ونحن طلعنا لنبدل وننزل
بدلت نغم وخلصت وانا صرت بطئ او متل مامنقوﻻ بلهجتنا اتمهيص باللبس لتنزل نغم قبلي كان بدي ركز حالي اكتر وحط بخة مكياج خفيفة وارفع شعراتي شوي يعني مابدي يشوفني بنفس شكلي بالمعهد

نغم: شبك ليث من شو مدايق
ليث: ﻻ تشغلي بالك ضغط شغل مو اكتر
عدي: اي نغم قليلنا صوتك حلو متل جوري؟؟
نغم: هههه ﻷ أبداً صوتي مو حلو
عدي: اي غني لنحكم
نغم: لك شو غني مو حلو ابداً صحي خالتي أم محمد وينها
ليث: أخدت الدوا ونامت نطرتنا كتير بس طولنا كلنا قام نامت
نغم: اي منيح الي نامت خير ماعملت
عدي: وينا جوري
نغم: فوق هلق بتجي

كانو عم ينطروني بس مانزلت وقتا ﻻنو ليث الي طلع لعندي لما صرخت بشكل عالي وقت انطفت الكهربا فجأة وماكان في تقنين معين لهالطفي
نغم كانت قدام عدي يلي فوتها لجوا دغري مشان صوت البكا مايسمعو الجيران يحسبو شي يعني

نغم: برى أضوى من جوا مشان الله طلعني
عدي: بطلعك لتهدي بس الجيران رح يجو عم شغلك الفلاش اهدي
نغم : ياربي ....

ماكان عدي عم يضيع فرصة انو يكون قريب ع نغم كتير او ضامما وعم يهديها
متل ماانا كنت ناطرة ليث يوصل لعندي كنت قاعدة وضامة رجليي وعم هز وابكي ومسكرة عيوني
لما فات ليث شافني بنقس الحالة يلي كنت فيها بالحديقة قاعدة تحت الشجرة وبوقتا رفضت مساعدتو وصرخت عليه ورجعت لورى وخفت منو كتير بس هالمرة وقت نادى بإسمي ركدت عليه دغري وضميتو

هنن بلشو يتذكرو حكي محمود وانو شو ﻻزم يعملو وشو ﻻزم يحكو
عدي ماطلع منو الحكي كل يلي قدر يعملو انو يضما كتير ويطمنا انو هو معا ومارح يتركا وهي بقلبو وبعيونو ﻻنو بحبا ماكان قدران الا انو يوصلا هالمشاعر هي

ليث: اهدي جوري، سحبي نفس ليكي اتحمليها هلق بتجي
جوري: ..... ح موت والله ...... ح موت بهي العتمة طلعني لبرى شغل اي شي .....
ليث: بعيد الشر عنك ، طيب اهدي لنطلع لبرا في مولدة عندي لهيك مو مركب لدات ، المولدة تحت بالطابق الي تحت خلينا ننزل نشغلا شو رأيك

أتذكرت انو المولدة موجودة بغرفة صغيرة وديقة بآخر الممر تحت ف ضميتو اكتر رفضا للفكرة ﻻني بكره الاماكن الديقة بعكس نغم ﻻنو من الاساس بيجيني ديق تنفس منها
احتار ليث كيف يهدني ﻻن ماهديت
بس نغم هديت شوي عني

عدي: كل الشغلات الحلوة بتصير بالعتمة ع فكرة
نغم: انا ماصار معي شي بهالعتمة الا البشع
عدي: طيب هلق قعدتنا هي مو حلوة؟؟

كان عم نسيا العتمة بطريقة توصلا فكرة انو بحبا
بس ليث كان عم يشغل عقلو كتير بالعلم

ليث: طيب غنيلي شي غنية انت بتحبيها

قبل ماجاوبو وقلو انو اصلا صوتي مو طالع ونفسي متقطع خلقة أجت الكهربا....
الغريب اني ضليت بحضنو ﻻني ماحسيت فيه اصلا من خوفي من العتمة بس لما اجت واستوعبت الوضع حسيت احساس تاني اول مرة بحياتي بحسو

ليث: هي اجت الكهربا انبسطي ، ﻻزم ركب لدات
بعدت دغري عنو وكنت خجلانة هزيت براسي ومسحت دموعي

جوري: بعتذر منك بس مابتمالك حالي وقت كون بالعتمة
ليث: وﻻ يهمك ويعني معك حق هي العتمة مو حلوة وانا بديق خلقي منا كمان

بعتدت نغم عن عدي وهو ادايق وانقلب وجهو ونفخ
نغم: الحمدلله الي اجت الكهربا
عدي: اي
نغم: بدي اشكرك كتير انو لوﻻك عنجد كنت رح خاف اكتر
عدي: يعني بتحسي معي باﻷمان ولو كان نسبيا؟؟!

نغم اتفاجئت بالسؤال وكانت ردة فعلها ضحكة
عدي: ليش عم تضحكي
نغم: تفاجئت من سؤالك بس
عدي: لا عادي مجرد سؤال يعني بحكم رفقتنا
نغم: اي بحس بالامان (سكتو ثواني وبعدين) انا قايمة شوف جوري

#يـــتــبـــع🌍🌸

📚قصص||روايات||منوعة📚

rwayate

📚قصص||روايات||منوعة📚

rwayate

#البارت التاسع
#نــــســمــة

🌸🌸🌸🌸🌸

عرفتُ الحبَّ لأوّل مرة في حياتي.. إنّه كالموت تسمعُ عنه كلَّ حين خبراً ولكنّك لاتعرفه إلا إذا حضر!

#نجيب_محفوظ
🌸🌸🌸🌸🌸🌸

جوري: عدي لازم تبلش بالخطة مافي غير هالحل انكشفها ع حقيقتا
عدي: خايف من الفشل والله وقتا ليث مارح يطلع بوشي
جوري: لك كلنا معك وكلنا مشتركين بهالقصة معك وكلنا رح نشهد لصالحك إذا لاسمح الله فشلت
عدي: بعرفو لليث منيح مارح يهمو الا يلي طلع مني
جوري: أنت مو قلت أنها مادية؟؟
عدي: كتير
جوري: معناها بلش مارح تخسر شي أنا واثقة

بس لأ ماكنت واثقة كنت خايفة تكون بتحبو لليث وماتوقع كنت خايفة ماأقدر أوصل لليث كنت خايفة يضيع مني كنت خايفة من كل شي الا من ربي .....
وهاد أكبر غلط عملتو بحياتي
سبق وقلتلكن إني عميت
عميت لما حبيتو ومابقى شايفة شي
صرت بدي أجذبه ميكب أواعي شوي ع الموضة البايخة او بصراحة كتير
تسريحات الشعر
هاد الجزء خجلانة شارككن فيه
بس كان لازم وكان لابد لأنو منه عبرة قصتي كلها
نسيت أنو ممكن جيبو بدعائي وبحشمتي وبأخلاقي وبإختلافي
ماكان مطلوب مني إني البس جلباب بس المطلوب انو خلي قلبي يحتشم
لأنو إذا القلب أحتشم رح يحتشم الجسد
مابعرف ليش هيك كنت عم أعمل
يمكن لأنو ليث بهديك الفترة كان حبو ل لانا عاميه ومغمض بصره وبصيرته وماعم يشوف حدى قدامو ولا عم يسمح لوحده تنافس لانا حتى
والي دابحني انها مابتستاهل

صرت أتعمد الشغلات يلي بحبا
اللون النيلي ؛ رفعة الشعر نص ونص ؛ المسكرة ؛ المنكير ؛ الأكلات الي بحبا ؛ وحديقة البيت💜

بس عبث كل هاد وماكان عم يطلِّع

نغم: انتِ منتبهة إنك صايرة لعبة جوري؟
جوري: مابدي أخسره نغم
نغم: طيب قولي إنّك بتحبيه وخلصينا
جوري: يعني بكل شي عم أعمله ومو مبين إني بحبه؟؟ نغم لاتستفزيني
نغم: ماعم استفزك أنا بس بدي أسمعها منك
جوري: وهي سمعتيها أتحفيني
نغم: جوري إنتِ كتير كتير متغيرة عن أول مابعرف متغيرة من جوا ومن برا كمان ليث مارح يحبك ليث هلق غرقان فيها ارحمي حالك ارحمي قلبك ارحمي مشاعرك واصبري وانطري لنشوف شو رح يصير مع عدي ومحمود وبعدين بتحددي طريقك ، بس هدِّي من هون لوقتها أرجعي لعقلك رجعي لطبيعتك وخففيلي هالمسكرة هي يلي ماعم يجيكي من وراها شي ، الشغلة بالقلب لأنو مو برموشك

رن جرس الفرصة وفتنا ع حصة الفلسفة الصعبة ....

كنت عم اغلي وانا ناطرة عدي يبعتلي مسج ويخبرني شو صار وإذا وافق محمود ولا لأ

وصلني المسج💌
قرأته وابتسمت ابتسامة النصر لانو كان بيحمل خبر موافقة محمود على الموضوع مع سوية تعديلات بدو ياها محمود
وقتا قلت يعمل يلي بدو ياها ان شالله يغيرالقصة كلا المهم وافق يعمل شي تجاه هالموضوع

~بعد مرور أسبوع~

المفروض بهاد النهار يكون النهار الحاسم يلي رح تزبط فيه خطتنا
كنت ع نار أنا ونغم
نغم: لا إله إلا الله شبك شبك قعدي حاج عم توتريني أكتر
جوري: لازم تقتنع أنو عدي أغنى من ليث لازم تقتنع بهالشي يارب ليث مايخربط يارب محمود مايخربط
نغم: لك شو ولاد هنن ليخربطو يعني؟ خلص قعدي كلو محبوك وممدوح رح يدق ليبعد ليث عن القعدة قعدي ولو
جوري: طيب
#يتبع 🌍🌸

📚قصص||روايات||منوعة📚

rwayate

قعدت وانا عم أتخيل منظر ليث وهو شايفها مع عدي انها عم تخونو وعم يشوف المشهد يلي رتبنا أنا وعدي وعم أتخيلو بالحزافير
بس مابعرف شو الي صار
مرق نص ساعة ومابعتو شي
ف اتصلت أنا

جوري: شو صار معكننن
عدي: لسى ما أجو ع المطعم عم دق لليث جوالو مطفي
جوري: وينن وين بكونو؟
عدي: مابعرف بس يجي مندقلك او ببعتلك مسج ماشي؟
جوري: تمام ....
.................
تركت نغم عم تكتب ونزلت لعند خالة أم محمد
كنت متوترة أنو ممكن أنكشف انا وعدي
انو كيف اختفى فجأة ليث وماراح ع المطعم أكيد عرفان شي
أم محمد: أهلين حبيبتي
جوري: عملت استراحة من الدراسة قلت لأجي ساعدك شوي
أم محمد: أي الله يرضى عليكِ
لبست مريول المطبخ وبلشت شغل معها جلي وشغل بالطبخة وهيك

لبعد ربع ساعة اندق الباب غسلت اديي ورحت فتحت الباب
كانت متل القمر واقفة قدامي وعم اطلّع فيني من فوق لتحت .....
جوري: مين حضرتك؟
لانا: أنا ولا أنتِ لمين؟ ااه هههه انت بنت أم محمد طب بعدي بعدي انا لانا خطيبة ليث بعدي شبك واقفة متل الصنم .....

بعدت وأنا مصدومة ومرعوبة بذات الوقت ليكون ليث حس بشي كنت شاااكة بس تأكدت أنو عرف بعد ماشفتو فايت بعد لانا ومعصب ومحتد
ليث: مرحبا جوري (من دون نفس)
جوري: أهلين ليث

برمت لانا بسرعة
لانا: ليث؟؟ أسمو الأستاذ ليث عاطي وش كتير للخدم ليث بيك

ليث: لانا _بصراخ بس قطعتو وكملت_

لانا: خلص ماشي لازم احترم الكل روحي حبابة عملي كاسة عصير وسلميلي ع ماما كتير قليلا لانا اجت تسلم عليكِ

انجرحت فعلاً ودمعو عيوني
جوري:عن أذنكن

ليث: جوري أستني (مارديت طبعاً) لك أنت شو عملتي لانا شو

لانا: أي شو عملت يعني كلو لأنو قلتلا عمليلي كاسة عصير يعني وندهي لأمك

ليث: مالا خدامة عندك ومافي خدم بهالبيت 100 مرة فهمتك وقلتلك لا تغلطي ع خالتي بهالطريقة

لانا: خالة مين؟؟؟ بعدين انا غلطت بشو ؟ ودخلك لو مالها خدامة لكن مين هي يلي ببيتك؟؟

ليث: لا تطلعي عن موضوعنا الأساسي في عنا قصة ماكملناها وأجينا لهون نحكي فيها أحسن من الفضايح برا قعدي يلا

لانا: مارح أحكي ربع كلمة لاعرف مين هي ....

تنهد ليث وقعدت وقعدت لانا ماعرف من وين بدو يبلش خاف تفهمو غلط هو فعلاً بحبا ومابدو يخسرها وبذات الوقت مابدو يخسر جوري ونغم بأول
#يتبع 🌍🌸

📚قصص||روايات||منوعة📚

rwayate

فترة وجودهن حس أنو عم يعمل حسنة لله وشي منيح بس بعد هيك حَسّهن أخواتو ورفقاتو وجودن بالبيت خلا في جو حلو ومرح وعطا نكهة غير
بلش يحكي وكان حَذر بطريقة الطرح حاول مايحكي بإهتمام قدامها كتير مشان ماتفهمو غلط
وبعد ماخلّص كانت مصدومة ....

لانا: وايمتى كنت ناوي تخبرني؟ ايمتى أنا كان لازم أعرف ؟ بركي ان شالله وقت نتزوج ، انو اي بفوت ع هالبيت بلاقي هي ورفيقتا التانية هون وكنت حكيتلي قصتن بليلتنا الأولى وين القصة يعني!
لا عنجد مو حقك شلون هلق لجبتني وخليتني أعرف ؟

ليث: ع فكرة ح نرجع لنفس موضوعنا لو في منك جزء أهتمام ولو معتبرة أم محمد مثلاً مرت عمك متل ما أنا بعتبرها أمي كنتِ أجيتي لهون من زمان وعرفتي من زمان إنتِ الي مُصّرة تبقي بعيدة هيك عن حياتي

لانا: لا تسخدم معي هالأسلوب جاية تقلب الطاولة عليِّ والحق راكبك من فوق لتحت؟ شو دخل أهتمامي بالموضوع المفروض أنا أول وحدة دقيتلا وقلتلا عنن لهدول

ليث: وطي صوتك عيب هيك

لانا: عيييب؟ خايف ع مشاعرها للسينيورة تبعك ماكان المفروض ع الاقل تستأجرلها بيت وين ماكان تروح تقعد فيه

ليث: لانا أنا لهلق عم اضبط أعصابي

لانا: أي هي الحقيقة شو مقعدن مع شب عزابي بالبيت لحالو يروحوا ينهفوا بشي مكان

رفع إيدو وضربها كف ، سمعت صوتو أنا ونغم لانو كنا واقفين ع راس الدرج وعم نسمع انا كنت عم أبكي بس نغم أبداً مابكيت ولا رفلها جفن مابعرف ليش
وخالة أم محمد أستغربت من عدم تدخلها أبداً وحتى لما ليث ضربها أتوقعت تطلع بس ماطلعت

لانا: عم تضربني ليث .... عم تمد إيدك عليِّ كرمال وحدة ما(قطعها)

ليث: قصري لسانك عنها للبنت لانو مابدي أعمل شي يزعجك أكتر

لانا: ليش أنت رح تقدر تعمل أصلاً ...... (علّت صوتا) رح أسمحلك تعمل أصلاً ، رح ضل واقفة عم اتفرج عليك ع أساس وأنطر رحمتك

ليث: لازم نحكي بوقت تاني اطلعي لوصلك

اتفاجئت لانا من هالبرود هاد المفاجئ ماكان يقدر يقاوم دموعها ولا كان يقدر يزعلها
اطلعت عليه بنظرة غضب عارم ومشيت طلع وراها ليوصلها ماردت عليه وبقيت ماشية دغري وعم تقطع
الشارع كانت جاية سيارة وبلشت تزمرلها كتير
......................
عدي: وينو يالله بدي مَثّل
محمود: هههه هلق بس يجي منختبر قدراتك التمثيلية
#يتبع🌍🌸

📚قصص||روايات||منوعة📚

rwayate

رن جوال عدي وكانت نغم
رد وكان عم يقدر يسمع صوت جوري وهي عم تبكي

عدي: قليلي نغم شوفي؟
نغم: لا سلامتك بس ليث وخطيبتو كانو هون وشافت جوري واتخانقوا وهيك
عدي: عم تمزحي ما ؟ نحن أتأكدنا أنو ليث حاجز طاولة هون
نغم:اي حاجز صح بس هنن من الاساس متخانقين أجو متخانقين وبدن يكملو هون قام شافت جوري لانا
عدي: اي وتشوفا تتشرف بشوفتا أصلاً
نغم: اي مو هاد الي صار لان صوتها وصل لآخر الشارع وهي عم تعيط وانا لازم أعرف وإيمت كنت ناوي تقلي وحكي كتييير حكو
.......................
مادعستا السيارة ركضت بسرعة للطرف التاني وسمعت الشوفير عم يقلا : عميا عميااا

كان ليث قلبو بين رجليه عليها ركض لعندا وضمها كان خايف عليها وحتى صوتو عم يرجف ضمها بقوة وهي صارت تبكي وتبعدو عنها بس هو ضل ضامما دقيقتين لحد ماهديت

ليث: طيب تعالي مو نحن حاجزين لنتغدى بالمطعم؟مناكل ومنحكي لا تزعلي خلص أنا آسف

لانا: خلص ليث بدي أرجع ع البيت

ليث: لأ مارح ترجعي ع البيت هيك .... لك ماعندي أغلى منك والله ..... والله بحبك ، خلص تعي مناكول ومنحكي ع رواق

باسا من خدا ومشي معها ع السيارة وطلعوا فيها
.................
عدي: والمعنى نغم؟

نغم: معنى شو؟ خلص يعطيكن العافية مارح يجو

عدي: طيب خلص بشوفك المسا بدنا نقعد نحكي نحن ال3

محمود: ال4

عدي: ال4 هههه ماشي يلا انتبهي ع حالك وهديها لجوري مو مستاهلة القصة لرجلا قليلا ......... ماشي يلا ........ سلام سلام

محمود: شكلها فقست ....

عدي: وفقسة بخناقة يامعلم ..... تمشي ؟

محمود: منمشي ....

...........................
نغم: يعني وحدة صرماية متل هي تبكيكي والله مشكلة

جوري: نحن لازم نمشي من هون نغم

نغم: اي منمشي بس لوين؟ لك حتى الحي تبعنا لسى مافتحو أبداً

جوري: مابعرف مابعرف أنا حاسة حالي عم اختنق نغم عم اختنق

نغم: لا تخلي كرامتك تنأح عليكِ كتير ، لأنو عنجد ماعنا مكان نرحلو جوري ، مافي .... إلا إذا طلبنا من ليث أو عدي يطلعونا ببيت لحالنا .... وأكيد مارح نكلفهن أكتر من هيك

مابعرف ليش كنت حاسة أنو نغم بدها ضل عند ليث ومابدا تطلع من عندو أبداً بس سكتت ماكان بقدر أعمل إلا إني أسكت
.....................
طلبو الغدا وقعدو ياكلو

عدي: غدا طويل عريض اي كنا قمنا تغدينا سوا عندي بالبيت أهنى وأريح

محمود: أي شو أجينا ع الفاضي يا أخي بدنا ناكول ، كول خلصني

عدي: لأ أكيد مالي خجلان لا تخاف

بعد 5 د بس صار يسعل محمود عطا عدي كاسة مي شربا

عدي: طول بالك الأكل مارح يهرب

محمود: أجى ليث

عدي: بحياة دينك؟

محمود: وحياة الله شوف ليكو قعد ع طاولتو

عدي: أي شو يعني

محمود: شو شو يعني خلينا نفذ يلا

عدي: نفذ شو لك غبي متخانقين ال2 وشافت جوري شوف النكد لقدام هلق إذا بتمطر حجار رح تقلك جوري

محمود: أنا قايم سلم عليهن تصطفل أنت

قام محمود
واضطر يلحقو عدي ، زبط حالو وقام

#يتبع🌍🌸

📚قصص||روايات||منوعة📚

rwayate

📚قصص||روايات||منوعة📚

rwayate

#البارت العاشر
#نــــســمــة
🌸🌸🌸🌸🌸🌸🌸
قربو عدي ومحمود لعندن

محمود: مسالخير
ليث: لك أهلا وسهلا أهلين شريك كيفكن
عدي: مسالخير (ل لانا)
لانا: مسالنور
عدي: عم نتغدى هون وشفناكن قلنا لنجي نسلم عليكن
ليث: تفضلو تفضلو قعدو بعرفكن خطيبتي لانا
حبيبتي هدول رفقاتي عدي ومحمود
لانا: تشرفنا أهلا وسهلا

كانت لانا لسى مهزوزة ومو مصدقة أنها مضروبة كف لهلق ومالها قدرانة تسامح أو تستوعب الموقف
مالا طايقة ليث لأنو هي أساساً مابتحبو ، بس يعني ماشية ع مقولة الحب بيجي بعد الزواج

قعدو وبلشو يحكو شي عن شغل وشي عن طلعات وهالقصص ، لحد ما انتحنح عدي وسعل فهم محمود وأستأذن منن ليروح ع الحمام
راح ودق ل ممدوح وكان متفق معو أنو يدق ل ليث ويبلش يسألو كتير ويلهي شغلة 10 د بس مو أكتر

رجع محمود وقعد ودق ممدوح فصل ليث ل ممدوح

عدي: مين عم دقلك
ليث: ممدوح أكيد ك عادتو شغل ومالي بمود شغل هلق

عدي ضحك ع تعبو يلي شافو عم يضيع قدامو من تخطيط وتمثيل
ليث: شبك؟
عدي: ههههه لا سلامتك
ليث: شبو؟
محمود: والله مدري هههه انا عم اضحك ع ضحكتو
عدي: أي يعني شبني بلد مافيها خير قال مالي مود شغل مفكر حالو خضرجي ولا سمَّان
لانا: ههههههه
ليث: أي ضحكي أنتِ عجبك الحكي
لانا: ههههه لا بس مهضوم ، أنو معو حق أنت دكتور وأكيد ياعم يدقلك كرمال دوا أو حالة أجتو يعني الموقف أنساني أكتر منو شغل لهيك عم يقلك مالك خضرجي
عدي: يسلم تمك هون الفهم قوم رد قوم عم يتصل
ليث: ههه ماشي

وأخيراً قام ليث ورد......
كان مبدأ الخطة بس أنو يشدو لانا ويوقعوها بس
محمود رفض فكرة أنو عدي يحاكيها وقال لو هي يلي أجت لعند عدي ح تكون اللعبة أحلى وأزبط

محمود: لك نسيت قلك حكى معي اليوم الصبح المهندس محسن

عدي: مين هاد ؟؟

محمود: لك المهندس محسن ولو

عدي: والله في براسي 100 مهندس
معماري ومدني وديكور بقا زكرني

محمود: مهندس الديكور مشان تغيير ديكور مطعمك تبع المزة

عدي: اي اي شبو

محمود: ح يبلش التغيير من بعد بكرى ان شالله اليوم قلتلن للشباب يفضو المطعم اليوم وبكرى يفضو مشان بعدو يبلشو بالديكور

لانا: ههه ولو بدي أدخل ؛ حضرتك عندك مطعم

محمود: سلسة مطاعم يا آنسة
#يتبع🌍🌸

📚قصص||روايات||منوعة📚

rwayate

عدي: ههههه الله عليك يامحمود دائما بتالغ هنن كلهن 3 مطاعم وبناية 6 طوابق مأجرهن

لانا: ايواا اي الله يباركلك ، اي بس طالما عندك مطعم ليش جاية عم تتغدى هون

طلع عدي ب محمود نظرة سريعة وضحك

عدي: ههههه الله يسلمك ، لو مني وعليِّ والله مابفوت الا ع مطاعمي بس محمود هون هو يلي جابني لهون

محمود: ليش شبو المطعم راكز ومرتب

لانا: اي اكيد مو هاد القصد بس استغربت شوي هههه

محمود: _رجع وجه الحكي ل عدي عن الشغل _طيب لسى في -قطعو-

عدي: اخي خلص بكرى ع الساعة 2 الضهر انا هون رح استناك منيح منقعد منحكي ع رواق

محمود: انا 2 مشغول كتير خليها 3 ونص او 4

عدي: انا ع ال2 هون وانت تعى ايمت مابدك المهم نجي انا بدي ريح راسي شوي

(اجى ليث)
ليث: دوخني هالممدوح تقول هلق متخرج مدري شبو

عدي: طيب رح نترككن لحالكن ازعجناكن لا تواخزونا

ليث: لسى مااكلنا شي

محمود: سبقناكن صحتين وهنا والله ورانا كومة شغل وخاصة عدي بيك بتعرف أشغالو انت

ليث: هههه اي طبعاً طبعاً

بعد ماراحو عدي ومحمود

لانا: كانو عم يحكو عن الشغل وكأني فهمت انو عدي عندو مطاعم؟

ليث: اي عندو ليش؟

لانا: لا استغربت مو مبين عليه

ليث: كان أشطر واحد بين أخواتو وأشتغل بالورتة صح وأسس حالو ، لك ومع ذالك بتلاقي داير بالمطاعم بس غالباً محمود يلي بياخده محمود غيرنا دائماً بحب التغيير الا عدي لو الشغلة إلو ماكان طلع من مطعمه ، _ساكتة لانا ف كمل_ بس هو مابحب لا يحكي عن حالو ولا يفرجي حياتو للعالم حتى الماركات مابحبا مو متلنا

لانا: شكلو بخيل

ليث: بالعكس عدي أكتر إنسان ممكن تعرفيه وتبهدلي ع إيدو الفاروطية ع قد مو كريم بس كتير بيكره المظاهر هيك طبعو

لانا: اممم

كان لسى بدا تسأل عن البناية وعن إذا مرتبط أو لا بس مارح تسترجي تسأل أكيد هي سألت عن المطعم بحجة أنو ليش عم ياكل بمطعم تاني وأجاها الجواب
وليث ماكان مصدق ينفتح موضوع ليحكي ويطري الجو كان عم يحكي كتير ليحاول يضيع الشي يلي صار قبل شوي ويمكن لو سألتو كان ح يجاوب ع كل شي ليروق مودها وترجع تضحك وتسامحو ع قد ماكان بحبا وع قد ماندم ع ضربها بس هي كمان استفزتو
طبعاً ماسامحتو تماماً بس ضحكت معو كان زعلها تقيل فعلاً وقولاً وتقيل ع قلب ليث كمان
#يتبع🌍🌸