اجا العرس وستي صارت تصرخ وتبكي بعد ماقامت من مكانها ووصلت الساحة اللي جنب اللوج وطلبت مني أنزل.. والكل سكت وأنا ماعرفت شو بدي أحكي حكتلي ياولد العيلة هاي ملعونه.. البنت هاي ملبوسه.. الصالة هاي رح تتدمر بعد شوي.. خلينا نطلع بحكيلك انا حاسه رح يصير شي.. ولأول مرة حسيتها صادقة بكلامها وحاسة منيح شو بده يصير.. بس نتالي حكتلي ستك مجنونه.. شو اللي عم بصير بدك تخربي حياتي طلعوها برا
حكتلها انتي بتسكتي ضحكتي على الولد وانتي واهلك عيلة لاحقيتكم اللعنة والموت.. انا عرفت كل شي عنك وبطريقتي الخاصة.. وحكيت مع قرين كل واحد فيكم.. انتو عيلة ملعونه.. انا صرت اصرخ وماما صارت تسكت بستي.. وسحبتها من ايدها بس هيه رمت حالها على الارض ومارضيت تقوم.. وقالت مابطلع من هون الا لما تطلعوا الصالة رح يصير فيها اشي.. انا بعرف..بهاللحظة قلت لازم اتصرف.. اخدت ستي من ايدها وطلعت برا الصالة وماما اجت معنا وصرنا نتفاهم برا ونتالي ضلت على اللوج.. حكيتلها لاتخربي حياتي لو حاسة بشي مابدي أعرفه ومابهمني اعرفه.. انا بدي اتزوج البنت اللي حبيتها.. حكتلي يا ابني انت ابن ابني وبخاف عليك ومابدي أذيتك هالعيلة مش سليمين مش طبيعين.. هالعيلة فيها شي سيء انا عرفت.. حكيتلها انا داخل عند نتالي مابدي اعرف شي.. ولسه بدي ادخل على الصالة.. انفجرت وصار في صوت انفجار ودخان ونار وأنا صرت أصرخ وحاولت ادخل الباب بس ماقدرت من الدخان والدمار اللي صاير وصرت اصرخ نتالي.. اتطلعت عستي وقلتلها شو اللي صار؟ انتي شو عملتي شو حسيتي احكيلي.. حكتلي يا ابني قلتلك اللي رح يصير سيء.. هالعيلة نحس ودمار لألك والله حماك شفت قلتلك.. بس انا مارديت عليها قلتلها انتي خرفانه.. وجرحتها اكتر وحاولت ادخل لكن النار منعتني واجو الدفاع المدني والاطفائية وبعد مافتحو الباب دخلت .. كانت نتالي على الارض اخدوها.. وكان فستانها كله دم.. أنا صرت ابكي وانهرت من المنظر ولما وصلت على المستشفى حكولي انها لسه عايشة ومافيها شي.. أنا انبسطت ونردتلي الروح وصرت ادعي مايصير فيها شي حتى اعيش انا وياها ونحقق كل اللي بنتمناه واعمللها البيت اللي بنحلم فيه.. بس الفرحة ما كملت..بعد ساعات من لما دخلوها غرفة العمليات.. قالولي انها ماتت.. أنا نصدمت وقلت مستحيل.. نتالي وعدتني تضل معي مستحيل هالشي.. اجا بابا اخدني من المستشفى ودخلني على البيت.. وقلي هاد المكتوب.. قلتله شو اللي صار بالصالة.. حكالي نفجر مولد كهربا وعمل حريق وحرق السجاد وانفجرت كل المولدات اللي بالصالة وماحد قدر يتحكم فيهم.. دخلت عند ستي حكيتلها انتي شو حسيتي؟ حكتلي انت اهنتني وجرحتني ومع هيك انا قلتلك وعملت المستحيل واجيت على العرس حتى بعد اللي قلته حتى انقذك.. واللي برجع بحكيلك ياه انه هالعيلة دمار والله حماك منهم والبنت معها سر ويمكن هيه ماحكتلك ياه بس انا فضحتها وعرفت بطريقتي واحساسي اللي فيها وبعيلتها.. قلتلها شو حسيتي احكيلي شو عرفتي؟ قالتلي هاي البنت ملبوسة بجن.. وهوه اللي بحركها ومش بس هيه الملبوسه.. امها وابوها وعيلتها كلها.. هدول فيهم شي عامل فيهم هيك وزارع مصايب بعيلتهم
يتبع...
Mahmoud Salloum
الكاتب 👆 👆