#أيام_الفزع_قصص
#أيام_الفزع_8 #أيام_الفزع
الحلقة الثامنة
@rwayate
حكالنا نحنا رح نتبين اذا كلامك صحيح ولا لأ.. ورح نعرف ليه كنتي هناك.. وليش بهديك المنطقة بالتحديد.. لأنه كلامك مبين كله غير صحيح.. كان فيكي تطلعي رحلة بأي مكان تاني بس مش بهالقرية بالذات !!.. طلعنا من المغفر وعلى بيتنا فوراً.. أنا بهاللحظة صابني اكتئاب قوي وضليتني أبكي بصمتي.. وخايفه تغفى عيني وارجع اشوف كوابيس متل اللي بشوفها.. باسل راح بسبب ماما.. لأنها فكرته عن طريق أم الرمادي.. وقالتله احكيلها ماتتدخل فينا.. بنتي مارح تروح لهناك ومارح يصير فيها شي !!! فاهمني.. هوه مشي معها وراح بطريقه.. بس سجود ضلت جنبي وصارت تحكيلي ماتخافي أنا رح أحل الموضوع.. ورح نروح عالبيت.. حكيتلها كيف ؟! قالتلي رح تروحي ومارح يصير معك شي.. ولا روح ولا جن ولا انسان رح يقرب عليكي.. قلتلها شو رح تعملي.. حكتلي استني مكالمة مني أو من باسل.. أنا رح أتكفل بكل شي رح يصير ومسؤولة عن كل شي رح يصير.. بس بدي منك ماتخافي وتضلي هون بغرفتك.. لأنه ماضل معك وقت.. وام الرمادي قالت الشي السيء رح يصير معك بعد موت أبوكي.. وهاد الوقت لحتى ننجز كل شي.. ما كنت عارفة سجود شو ناويه تعمل بس انا كل اللي بدي ياه اني اخلص من الشي اللي صابني بدون ذنب وبأي وسيلة.. طلعت سجود من البيت.. وانا ضليتني بين اربع حيطان مع نظرات ماما الصعبة لألي.. مر الوقت كامل وأنا أفكر.. وخايفه اغفى.. عيوني دبلت وبين جفوني صار اللون أسود.. رن تلفوني بعد تلات ساعات.. كان باسل على الخط.. حكالي رح نروح على البيت مرة تانية ماتحسسي امك بهالشي واحكيلها انه سجود عازمتك على الغدا.. حكيتله كيف بدك نروح ماسمعت الراعي شو حكا.. قلي انزلي انا بستناكي تحت بالسيارة.. نزلت بسرعة وماما كانت بالصالة.. حست انه في شي.. نادت عليه وانا مارديت.. تركتها ورحت.. واخر شي سمعته صوت خواني بحكولها وين راحت مايا.. وماما بتحكي لليث وخالد الحقوها بسرعه.. أنا ركبت السيارة وطلعت.. كانت رؤى وهيا بالسيارة.. أنا فبالي كان سؤال واحد.. كيف سجود قدرت تقنعهم.. بس ماقدرت احكي.. سجود غمزتني.. باسل صار يحكي رح نطلع كلنا نحتفل برجوع مايا بالسلامة.. صارت هيا تحكي وأخيراً هلأ عرفت ليش باسل جايبنا بالسيارة.. الحمد لله على سلامتك حبيبتي.. ورؤى حكت شفتي انه ماصار فيكي شي.. حكيتلك هاي تهؤات وكلام المره هاد كله غلط.. انا ماعرفت شو ارد.. بس تلفوني ضل يرن.. وخواني يرنولي وانا معصبة.. كل شوي بطفيه.. كان باسل ماخدنا على القرية بدون مايعرفو البنات.. بس رؤى شكت انه الطريق صار يبعد.. وحكت في شي مو طبيعي.. وين المحل اللي رح نروح عليه ماحكيتولنا.. باسل صار يحس انه في شرطة رح تراقبنا متل ماصار الصبح.. لهيك غير طريقه لمحل قريب من الطريق.. وحكالهم هاد المحل كتير مرتب خلينا ننزل نحتفل.. هيا اتطمنت وقالت خوفتوني.. نزلنا كلنا واحتفلنا بشي وهمي.. جبنا كيكة وعملت نفسي مبسوطه بس تلفوني ضل يرن وأنا تركته بالسيارة.. رؤى قالت الجو بلش يتغير وانا نسيت شالي بالسيارة خليني اروح اجيبه.. اعطاها باسل المفتاح وراحت تجيب شالها.. سمعت تلفوني برن.. ردت عليه كان اخوي خالد بقلها وينكم حكت معه وقلها انه مايا رايحة على القرية مع الشب.. احكيلنا وين انتوا لنيجي لأنه الشرطة عنا وبتسأل عن مايا.. رؤى حكتله عن المكان وبعد دقايق كانت جايبة تلفوني وجاي وبتقول انا اخدت تلفونك ورديت على اخوكي.. انتو خطفتونا.. حكيتلها اعطيني تلفوني بسرعه.. كان بدي اطفيه عشان مايعرفو المكان.. بس هيه اخدته مني بقوة بعد مارجع رن.. ولما سكر الخط صارت تهدد بباسل وتقله لو اخدت التلفون رح الم الناس عليك واحكي هاد اعتدى عليه.. صارت تفتش فيه وشافت الصور اللي صورتهم بالقرية وصور البيت وحكت لهيا شفتي لهون بدها توخدنا.. بدها توخدنا على الموت.. وتخلي الأرواح يسكنو فينا متل ما سكنو حياتها.. خلينا نمشي.. وبهاللحظة قام باسل وضربها على وجهها أغمى عليها.. وسجود كان معها شي حطته على انف هيا وحكتلي كنت ناوية من الأول اعمل فيهم هيك بس ماصار فرصة.. الناس انتبهو على باسل وحسو في شي.. هوه حمل رؤى للسيارة وأنا وسجود جرينا هيا وطلعنا بسرعه.. كبيت تلفوني ومشينا بأسرع سرعه ممكنه لنوصل القرية.. وبعد ساعه ونص وصلنا.. حكيت لباسل وهلأ شو ؟ قلي مابعرف.. أنا علقت نفسي بقصة كبيرة بس عشان بحبك ومابدي اتخلى عنك ولاني عارف انك صادقه واحلامك صحيحة.. بدي أنقذك لو بدي انسجن.. حكالي أنا رح افتح الباب وانتوا بتدخلوا البيت بسرعه.. حكيتله خايفه.. كان الوقت غروب.. والليل رح يصير.. والجو الصبح بالمكان اقل رعب من هالوقت.. طيب شو بدي اعمل.. الجو عاصف ورح تظلم بعد شوي.. باسل قلي مارح اترككم.. نص ساعه بتعملوا اللي قالت عليه ام الرمادي جوا البيت وبتطلعوا.. حكيتله ولو ماطلعت عايشة.. قلي رح تعيشي اوثقي فيني.. مشينا كلنا لعند البيت.. كان هدوء ومافي ولا أي صوت بالمكان..

#أيام_الفزع_9 #أيام_الفزع
@rwayate
الحلقة التاسعة
صارت تحكيلهم بتتذكروا الحلم اللي حلمتوه ؟ كان نفس الحلم اللي حلمته مايا.. بس بإختلاف بسيط أنه كل وحدة شايفه حالها بهالحلم ولما قررت تحكي معكم عرفتو انه في سر وقررتو تيجو لتخلصوا من هاللعنة.. بس أول ماعرفتو بالمخاطر اللي لازم تعملوها خفتو وهربتو.. حتى ماتساعدوها.. انتو مفكرين انكم بتعملوا هالشي بس عشانها ؟! حكتلها هيا شو قصدك ؟! ورؤى وقفت عن البكا وركزت معها.. حكتلها سجود.. حبيباتي أنا اليوم كنت عند أم الرمادي.. حكيت معها.. وكان معي باسل.. قبل لنخطفكم.. حكت انه الكل رح يموت من خلال هاللعنة لو ماوصلتوا البيت هاد وحكيتوا مع روح أبو مايا.. لأنه اللعنة على الكل مش بس عليهااا !!!.. حكيت لسجود انتي شو عم تحكي!! شو هاد الحكي ليه ماحكيتيلي !! قالت انا ماقدرت احكي شي.. لأنه كان بدي الخطة تمشي متل مابدي أنا وباسل.. وباسل قرر يساعدك لأنه بحبك.. هيا ورؤى خافو وصارو يحكو شو رح يصير فينا هلأ.. شو لازم نعمل احنا رح نموت.. حكتلهم سجود.. السر تحت بالغرفة القديمه اللي كان يصير فيها القتل والموت.. حكيتلها بدي باسل معي انا خايفه انزل تحت سجود.. باسل وين.. بدي ياه.. بهاللحظة فتحت الباب وصرت انادي على باسل بس ماكان في حدا والجو بلش يمطّر ورعد وعواصف ومافي غير سيارته برا وهدوء تام والأصوات المرعبة اختفت من البيت وضل بس الهدوء وصوت المطر.. حكتلي سجود أنا معكم ورح اموت معكم.. من أول ماعرفت هالشي وماقدرت اقنعكم تيجو.. كان لازم اعمل هيك.. حتى تنفك اللعنة عنا كلنا.. حكت هيا كيف صار هالشي وليش روح أبوها بدها تنتقم منا نحنا ليش!! حكت سجود هاد الشي اللي ماعندي جواب لأله.. خلونا ننزل لأنه عم نضيع وقت.. انا كان الخوف بقلبي كبير ومش قادره امشي خطوة اكتر من اللي مشيته.. وواقفه عند الباب انا ورؤى وهيا.. وسجود عم تقلنا يلا لتحت.. بلشنا نمشي كلنا بصمت.. والهدوء بالبيت وريحة الغبره والعفن كانت بتقتل وحتى ريحة الحيوانات الميته والحشرات.. كل شي كان بموّت.. بلشوا البنات يرجفو.. ومش عارفين يمشو من هزهزة رجليهم بسبب الخوف والقلق وشادين بأدين بعض.. أنا قلت مش شايفه شي عتمه.. سجود قالت معي قداحه باسل.. كان لازم جبت معي مصباح بس نسيت بسبب اللي صار.. شعّلت سجود القداحه وبلشنا نشوف أحسن.. كان البيت مخيف لدرجة فظيعه.. الجدران متآكله وعوشك تنهار.. وكلها عفن ورطوبة.. وصلنا لعند الدرج.. كان خشب وطويل واخره عتمه مش معروف شو اخرها.. سجود قدامنا وانا وراها وهيا ورؤى خلفنا.. ننزل خطوة خطوة.. بلشنا نسمع صوت تحت.. كان الصوت خافت بس عم بعلى تدريجياً.. كل بنت فينا كانت عم ترجف وشوي ورح نوقع عن الدرج.. كل خطوة كانت توخد معنا دقيقة لنخطيها.. بحكيلهم سامعين هاد صوت شو؟ هيا بتحكي صوت بني ادم عم يصرخ بصوت واطي وحاسه في حدا كمان.. البيت مسكون يا جماعه.. هاد البيت مسكون خلونا نطلع نحنا نازلين عالموت.. سجود قالت لهيا اسكتي مابدنا صوت.. ام الرمادي قالت بس تنزلو لتحت ماتحكو ولا حرف وخليكم عم تسمعو وبس.. انا حكيتلها خلص اهدي.. نزلنا نص الدرج وكل ماكنا ننزل الصوت يقرّب علينا.. ودقات قلبنا تزيد.. الصوت يعلى ونحنا رجل لقدام ورجل لورى.. كنت عارفه ومتيقنه انه البيت مسكون وفي جن وشياطين عايشة فيه وبالذات بالغرفه اللي حكالي عنها وشرحلي عنها بابا.. انه كان زوج امي يطلع جثث من المقبرة ويمثّل فيها تحت.. طيب ليش كان يعمل هيك هاد اللي ما شرحلي ياه ومات قبل لأعرفه.. بس يمكن اللي عرفته من كلامه انا بابا كان مجنون وماما هربت مع زوجها عشان تخلص منه ومن جنانه بس ماكانت عارفه انه المشعوذ اللي متزوجيته رح يهلكها بلعنه بعد مايموت ويهلك بنتها بعد سنوات.. وصلنا تقريباً لأخر الدرج.. القداحه صارت تطفي.. حكيتلها شو صار !! حكتلي اسكتي!!! ماتحكي شي..!! وصارت تقلنا بصوت واطي.. بلا ما نولعها خلينا نمشي شوي شوي ونتحسس على الحيطان لنعرف وين الباب.. كلكو امسكو الحيط وماتحكو.. بلشنا نتحسس الحيطان.. بس كيف حنعرف الباب.. اذا نحنا مش شايفين بعض ؟ نزلنا اخر درجة وكنا حاسين انه خلص نحنا قطعنا كل الدرج وصرنا بالطابق الأرضي.. من كلام بابا قلي انه في باب بهاد الطابق اللي حاول يدخل منه وماقدر لهيك طلع من الاسطوح على الشباك.. كان بدي اعرف وين الباب بهالطابق ولو بنقدر نهرب منه بعد مانفوت الغرفة ونحكي مع روح بابا.. بس ماكنا شايفين شي ولا حتى بعض.. سمعت صوت رؤى بتحكي انا حاسه هاد باب.. امسكو هون.. مسكت محل ماحكت.. كان فعلاً متل أيد باب وشي خشب غير عن الحيط.. هيا قالت الباب مفتوح ياجماعه.. فعلاً الصوت كان قريب كتير.. أشخاص بتتألم وأصوات غريبة لبني ادمين كأنهم بتعذبو جوا بالغرفة بس انا حاسه انه المكان هون مسكون والأصوات أصوات الجن.. بلشنا ندخل كلنا.. كان صوت سجود مختفي.. أنا خفت وقلت سجود وينك ؟ البنات حسو متلي.. صوت سجود اختفى.. وما عاد سمعنا صوتها.. بس رجلينا عم تدخلنا محل ما عم نسمع..

#أيام_الفزع_قصص
#أيام_الفزع_10 #أيام_الفزع
الحلقة الأخيرة
@rwayate
كان معي وطول الوقت عم بحكي معي وجالس ببيتنا وعم يخطط.. سجود هيه بابا !! روحه فيها.. طيب كيف !! الهروب كان صعب لأنه الباب ماعاد فتح.. والغرفه بلشت تولع من كل مكان.. ونحنا عم نكح ونستنجد.. أنا بترجاه وبقله بنتك أنا كيف تأذيني!! مايرد والأصوات تزيد من كل مكان.. ماقدرت اضل واقفه وأنا بشوف صاحباتي بموتوا وهوه مبسوط.. قررت أتحداه.. بس الغرفة قبال الباب عم تولع.. وأنا تفكيري مشلول.. بس حكيت مارح اموت.. عدت كل الكلام اللي حكاه بابا زوج امي.. انه اخر الغرفه في ممر طويل مسدود.. يعني هيه كبيرة.. والغرفه كانت عتمه.. تركته وتركت صاحباتي وهربت بالعتمه لآخر الغرفه.. وبلشت اختفي وأنا مش عارفه ليش عم بعمل هيك.. صرت أختفي شوي شوي بالعتمه وحاسه الأصوات قريبة مني أكتر.. كأنه أرواح الناس اللي قتلهم عم تصرخ من ألمها.. كانت النار مش واصلة لآخر الغرفة اللي هربت عليها.. وسمعت صوت رؤى وهيا بصرخو والنار بتقرب منهم أكتر.. كانو بنادوني وفكروني هربت وتركتهم.. بس أنا كنت عارفة أنه بآخر هالعتمه في حيط والغرفة مسكّرة متل ماقال بابا.. ضليت اهرب لحد ماوصلت آخرها.. وهوه كان يدوّر عليه وحاسه بجسمه الجهم عم بقرّب مني وعيونه الحمر عم تلمع بالليل وبتدوّر عليه.. أنا رميت نفسي بالزاوية وكان بدي بس ما يأذي رؤى وهيا.. بس الغرفة كانت عم تحترق وريحة الدخان واصلة للآخر.. بلشت أفقد تنفسي.. وصوتهم عم بكحو وبنادوني من بعيد.. أما هوه فوصل لعندي ومسكني.. كنت حاسه أديه متل الأموات.. كأنها أيد شيطان.. عظام وقاسية وكل ماكان يشد عليه أحس بأني عم بتألم.. كان ماسكني وبده يقتلني وبنفس الوقت عم بلف راسه لصاحباتي وبده يتخلص منهم.. كنت متوقعه نهايتي رح تكون هون بس بصيص أمل صغير كان بقلي يمكن يكون في بقلبه رأفه ويتركني.. يتركني أعيش.. أنا مالي ذنب بشي!! مالي ذنب ليحكم عليه بالقتل.. عيونه كانت بعيوني.. أول ماحطهم بعيوني حسيت في شي تغير فيه.. كان صافن بوجهي وكأنه في شي عم بمنعه يأذيني.. مش لأني بنته بس في شي تاني كان عم بمنعه وبقله اتركها.. هالبنت مالها ذنب.. فلّت إيده عني.. وأنا كان بدي أتوهه بالعتمه بس ماعرفت انه بسهولة رح يوصلي.. تركني بالزاوية عم برجف وبتألم والأصوات من جنبي عم تزيد الخوف بقلبي أكتر.. بس مش شايفه شي غير النار اللي ولعانه عند الباب ورؤى وهيا بحاولو يطلعو وأنا ببكي.. تركني وراح وقف بنص الغرفة.. كلنا سكتنا.. وللحظة الأصوات بلشت تخف.. شو اللي رح يعمله.. وقف وصفن فيني من بعيد.. وفجأة صار يصرخ بصوت عالي وكأنه في جواته ألم.. تألم بشدة وصار يعصر بنفسه وعيونه رح تنفجر.. شايفه انسان ميت.. بس ملامحه شيطان على هيئة بني ادم.. مفزع لدرجة ماكنت قادرة أضل حاطه عيوني عليه.. حسينا البيت عم بهز وكل شي رح ينهار.. الباب بلش يهز والسقف نفس الشي.. بهاللحظة عرفنا انه خلص هاي النهاية.

#أيام_الفزع_قصص
#أيام_الفزع_2 #أيام_الفزع
الحلقة الثانية
@rwayate
قلي الدينار كان تحت السجادة.. اتطلعت عليه مصدومه والكلام ضاع مني وأنا بسأل نفسي.. اللي شفته مش حلم يعني ؟ كان خالد ماسك الدينار بإيده وموجهه لعند وجهي وأنا واقفه وساكته وجسمي كله برجف.. ماما بتطلع عليه وحاسه اني عم برجف وخايفه بس مش عارف احكي شو شفت.. ضليتني ساكته وماما تسأل.. أخدت ماما الدينار من إيد خالد وحكتلي هاد هوه حبيبتي شو بدك فيه.. قربته من عند وجهي وفعلاً كان مكتوب عليه بخط أحمر.. أخدته منها وطلعت بسرعة على غرفتي وهمه ضلو يسألوا.. سكرت الباب بالمفتاح وماما اجت تحاول تعرف شو في بس ماقبلت أفتح وحكيتلها بدي أنام.. كنت عارفة انه الدينار مش لحد.. هاي علامة لحتى أعرف اللغز اللي شفته بحلمي شو.. بس شو سر الحلم ومين الشخص اللي كلمني.. بلشت أعيش لحظات رعب بيني وبين نفسي وأفكر مع نفسي شو ممكن أعمل.. مابدي تخلص حياتي وأنا لسه صغيرة أو أنحرم من حدا بحبو.. كنت بفكر وبتطلع على الدينار.. بتأمل بالرقم وشاكه اني شايفه هالرقم من قبل.. فتشت بكل تلفوني عليه بس مالقيت ولا رقم بشبهو.. ولأنه مافي صفر والرقم كتير قديم مابقدر أني أرن ومع هيك حاولت ومارن.. دليل انه هاد الرقم ملغي تماماً لأنه صرله سنين يعني هاد الدينار من سنين محطوط تحت السجادة ولو ماصارت الصدفة ماكنت شفته.. صوت الزلمه لسه براسي والمشاهد المخيفه اللي شفتها لسه ببالي.. طيب شو ممكن أنه أعمل.. قلت أنا لازم أتصل مع صاحباتي سجود وهيا ورؤى واحكيلهم شو شفت.. يمكن يكون صاير معهم شي يقدر يوصلني لشي اله علاقة بالحلم اللي شفته.. صحيح هاد أحسن حل.. اتصلت أول شي مع سجود.. بالبداية ماكانت ترد بس بعدين ردتلي.. قالتلي انها مروحه من شغلها ومزعوجه كتير وانبسطت بمكالمتي.. حسيت صوتها غريب أو للحظة حسيتها انها مابدها تحكي معي.. بس قلت لازم احكيلها على اللي صار.. هيه سمعت بالحلم وانصدمت.. حكيتلها انا لازم احكي مع هيا ورؤى واحكيلهم كمان.. لأنه الحلم اللي شفته انتو كنتو المحور الرئيسي فيه وشفتكم.. وكلمتوني بصوت هاد الزلمه اللي قلي انه روح ميته جاي تنتقم مني.. بس اللي استغربته اني سمعت صوته فيكم بالآخر.. انهيت مكالمتي معها وحكيت مع هيا ورؤى وقلتلهم على كل شي.. اللي خلاني اخاف اكتر انه كلهم كانو متوترين عالخط وخايفين حتى من قبل لأحكيلهم شي عن المكالمة.. يعني كأنهم بعرفو اني بدي أحكي معهم أو عندهم خبر قبل بوقت.. هاد الشي شككني أكتر.. خبيت الدينار بصندوق صغير بغرفتي.. واحترت انه شو بدي أعمل.. صرت اتواصل مع البنات على النت وعملنا جروب سوا وصرنا نحكي.. وبلشنا نحكي مع بعض.. كل وحدة تحكي شي.. لحد ما اجت الصدمة الكبرى.. إنه سجود اعترفت انها شافت نفس الحلم.. بس بتفاصيل مختلفة.. وشافت نفسها هيه الميتة.. رؤى وهيا اعترفو بعدها.. وقالو انهم شافو نفس الحلم.. بس كل وحدة شايفه نفسها ميته.. يعني مش أنا لحالي اللي شفت هيك !! الكل شاف نفس الحلم وبنفس التوقيت.. سألتهم عن الدينار.. انه شفتو باخر الحلم عم بحكيلكم عن دينار.. قالو لأ .. ماكان في شي هيك وانتهى الحلم بس دخلو البيت.. سألت نفسي ليش أنا اللي نبهني وقلي عن الدينار وانه لحتى اصدقه لازم الاقيه.. معناته انا مختلفة عنهم بهاد الشي.. بس ليش !؟ قررنا كلنا قرار وانه كلهم يجو ونجتمع سوا.. سجود قالت انه فيها تروّح لأنه هون بيت جدها أما هيا قالت انه اهلها رح يروحو من برا وبدهم يستقرو هون ورؤى موجودة بس مابنشوف بعض بسبب شغلها.. قررنا نلتقي ونحكي عن اللي شفناه.. يمكن نوصل لشي وشو سر هالتزامن اللي صار بأنه كلنا نشوف نفس الحلم بنفس التفاصيل بس إلا أنا لشي مختلف.. مرت الأيام وماكنت بشوف شي بس بتطلع على الدينار وبتتغير تصرفاتي وكل البيت انتبه عليه.. بابا كان شبه منفصل عن ماما.. قرر يتزوج وحدة بس هيه قالتله لو تزوجتها بتطلع من البيت.. أنا كرهته وهوه صار يجي كل فترة وبطّل متل الأول من بعد ماتزوج بس لسه مانفصل عن ماما.. هوه كان شديد كتير بس من بعد ماتزوج وبطّل يجي حسيت انه فيه اخد راحتي أكتر من الأول.. وصرت اطلع مع الشب اللي بحبه باسل .. بس من بعد الحلم اللي شفته تغير كل شي واهملته وماعدت رديت عليه وهوه حس بهالشي.. اجو البنات وقررنا انه نطلع كلنا طلعه ونحكي فيها على الشي الغريب اللي شفناه.. طلعنا على مطعم وبعدين مشينا بحديقة هادية وفتحنا الموضوع لأنه من البداية ماكانت ولا وحدة قادره انها تبدا وتحكي بالقصة.. قلتلهم على التفاصيل وإنه قلي أنه هوه روح ميته ورح يحكي معي من خلال حدا بعرفه ويتلبسه.. كان ممكن اتجاهل الموضوع بس من بعد مالقيت الدينار صرت خايفه اكتر وخوفي زاد أكتر وأكتر من بعد ماحكيتولي عن الحلم اللي شفتوه وانه نفس حلمي.. معقول هاي صدفه.. كلنا نشوف نفس الحلم بنفس التفصيل ؟! حكولي لأ وأكيد في شي رح يصير لازم نكون مستعدين لأله.. طيب السؤال شو بدنا نعمل ؟!

#أيام_الفزع_3 #أيام_الفزع
@rwayate
الحلقة الثالثة
ضليت عم بستنى بابا يرد ويحكيلي شو قصده بالكلام اللي حكاه.. مين اللي بقصده بكلامه؟!! عيوني كان كلها علامات إستفهام حتى صاحباتي.. بالآخر أعترف وقال.. أنا مش أبوكي.. الحقيقة اللي لازم تعرفيها من زمان انه امك كانت متزوجة شخص قبلي وانتي بنته.. متل ما أنا متزوج من مرة تانية حالياً ولسه بعرف أمك.. انصدمت!! وماعرفت شو بدي أجاوب.. بس سؤال واحد كان علساني.. مين بابا الحقيقي ؟! قلي أنا قتلته ومثلّت بجثته ورميته بالبحر.. بعد هالكلام اللي قاله وبعد ماكان متوتر.. حاول أنه يهرب من البيت بس أنا اعترضت طريقه وسكرت الباب بالمفتاح بسرعه ورميته لسجود وحكيتله لو ماقلت كل شي أنا رح أفضحك وأحكي للشرطة عن كل اللي حكيته.. قلي مين بابا الحقيقي وليش قتلته وشو عملت فيه وبوعدك إني رح أسكت.. أمنلي بهاللحظة وبلش يحكي.. حكالي أبوكي كان متزوج من أمك قبل لتخلقي ويخلقو خوانك.. كانو ساكنين بحارة بعيدة بمنطقة بعيدة كتير.. أنا كنت بعرف أمك من قبل لتتزوج أبوكي.. حاولت اتزوجها بس أهلي رفضوا لأنه أبوها كانت سمعته سيئة وتوفى بعد ماخلقتي بأيام.. أنا ماتزوجت وفضلت بحب أمك بالسر برغم رفض أهلي.. اللي صار إنه اللي تزوجته أمك كان إنسان أعطل من أبوها.. كان بضربها وكان فيه شي بعقله كأنه مختل.. بس اللي أكتشفوه أهل الحي بعدين إنه الزلمه مبلوس من جن.. كان يصير شغلات بالبيت ماحد بشهد عليها غير أمك.. يمكن السبب أبوكي باللي صار فيه لأنه أمك اعترفت انه كان بأذي ناس بطرق شيطانية مخيفه.. ويمكن متل مابحكو أنقلب السحر على الساحر.. وفجأة بعد زواجهم انقلب وبعد ماكشفته بالشي الي بعمله جوا الغرفه الصغيرة اللي ببيتهم.. حكت أنه كانت تمر بلحظات سيئة كتير بالبيت بس ماكانت تقدر ترجع لبيت أهلها لأنه أمها تزوجت وبرضه زوج أمها طلع إنسان عاطل وماكان يخليها تتطلق منه فما كان الها مؤى غير ترجع عالبيت المشؤوم.. قررت أنها تقوي قلبها وتعيش اللحظات الصعبة بهالبيت.. خصوصاً انه كان بمنطقة بعيدة بالقرية والحارة مافيها كتير سكان..وكان جنبها مقبرة كبيرة كتير.. نص سكان القرية ندفنوا فيها وحتى أهل المدينة.. هالشي كان يزيد الخوف بقلب أمك حتى اللي كانت تحسه بالليل ماكان بتفسر.. بالقرية زمان ماكان في كهربا متل هالأيام.. كانت تقطع بعز البرد وأمك ماتعرف شو تعمل.. تولع شمعه وتصبر على فعائل زوجها.. بنص الليل كان يطلع على المقبرة بالتلة.. يفتح قبور ويرسل لعنات شيطانية لأرواح كانت عايشة حتى يبعد لعنات عن ناس بعرفهم متله.. صابهم الجنون نتيجة فعائلهم.. بس ماكان عارف اللي رح يصير فيه لبعدين.. كان يرجع على البيت ومعه طرف من جسم ميت.. كان يرجع على البيت ومعه طرف من جسم ميت.. أو راس بني ادم حتى ينفذ خططه المجنونة على أكمل وجه.. ماكانت امك عارفه كيف أله قلب يعمل هيك شي.. وكانت تحكي معي بالليل تقلي أنه جوزها كل ليلة بروح على المقبرة وبرجع معه شي بكيس أسود بحطه بالغرفة السفلية بالبيت.. وماكانت عارفه شو اللي بجيبه معه بس كانت عارفه انه بروح المقبرة لأنه كان يطلع طريق واحد مابودّي إلا لألها.. وهالشي خلاها تشك.. حكيتله انزلي على الغرفة وشوفي شو بجيب بس ينام.. قالت انها بتخاف وانها شاكه انه يكون بعمل شي شيطاني لأنه شكت فيه.. فهمتها تقوي قلبها وتنزل.. وبالفعل قررت تنزل.. تركته ينام ونزلت.. حملت شمعه وفتحت باب الغرفة.. وأول مافتحته كانت الصدمة.. كتمت صرختها بس شافت أفظع منظر ممكن الإنسان يشوفه.. شافت أعضاء لبشر وورق وشغلات تانية ماكانت عارفه شو هيه.. حكتلي كنت شاكه انه في شي غريب لأنه كنت بشم بريحة وسخه من فوق.. برغم انها كانت خفيفه بس كنت مفكرتها من الساحة اللي قبالنا.. ولما سكرت الباب وطلعت تحكي معي.. كان صوتها واطي وقالتلي على كل شي.. بس ماكانت متوقعه انه هوه بسمعها شو بتحكي.. وسمع انها على علاقة فيه.. بهاللحظة قرر يقتلها وسمعته لما سكر السماعه واخر شي سمعته صرخة خوف منها.. أنا ماكنت بقدر أجي على القرية لأنه كنت بقرية تانية بعيدة وكان بهالليلة هوا ورعد قوي والطرق مسكرة.. وأمك كانت بين ادين هالمجرم وكنت متأكد انه رح يقتلها بس ماكنت عارف شو حيصير.. مانمت كل الليل وتاني يوم الصبح كنت رايح على بيتهم.. كنت برا البيت بتطلع على أمل أعرف شي.. وماكنت قادر اجيب الشرطة لأله لأنه يومها كان في حرب وكان الوضع متأزم وحتى بالقرية كان صعب يكون في شرطة.. فما كان الي ألا اخد حقي بإيدي.. دخلت البيت بعز النهار.. كان الباب مسكّر.. حاولت ادخل من باب تاني اللي هوه باب الطابق السفلي.. كان برضه مسكّر.. طلعت على الأسطوح.. وكان في طريق بنزل لشباك غرفة.. نزلت منه وفتحت الشباك ودخلت.. قدرت ادخل البيت بهاللحظة.. حسيت بشعور غريب أول مرة بحسه.. كان البيت بارد ومخيف.. وحسيت فيه ناس ساكنينه برغم أنه أمك وأبوكي بس اللي ساكنينه.. أول مادخلت البيت سكّر الشباك لوحده.. وصار في هوا برا..

#أيام_الفزع_4 #أيام_الفزع
الحلقة الرابعة
@rwayate
طلعنا برا البيت وحاولنا ندوّر على الجثة بس ماكنا نلاقيها.. البيت كان بوحي بالخوف والرهبة وأنه في شي عم بصير مش طبيعي.. حكيت لأمك خلينا نطلع من البيت بسرعة قبل ليصير شي.. فتحنا الباب التاني اللي فوق وقررنا نطلع ونترك كل شي متل ما هوه بس في شي منعنا.. الصوت اللي سمعناه جوا البيت كان بقلنا ارجعوا.. رجعنا فتحنا الباب ودخلنا.. كان في صوت بنت صغيرة عم تبكي.. وعم تقول طلعوني.. حكيتلها في صوت بنت.. دورنا بكل الطابق اللي فوق بس مالقينا شي.. حكتلي الصوت جاي من تحت لازم ننزل نشوف.. قلتلها البيت أكيد مسكون يا هاله واذا فعلاً حننزل ممكن يصيرلنا شي.. يمكن هاد الصوت رجعنا لنرجع ننزل مرة تانية.. أنا حاسس انه مافي خير من نزلتنا مرة تانية خلينا نطلع من البيت.. قالتلي مارح أطلع من هون.. انا سامعه في صوت بنت عم تنادي.. بجوز دخلت من الباب اللي تحت وبعدين علقت بالغرفة.. خلينا ننزل نجيبها.. حكيتلها هاله بس أنا لما حاولت ادخل البيت من ورا الطابق السفلي.. كان الباب مسكّر.. وطلعت على السطح لأدخل من الشباك لانزل لتحت.. حكتلي شو يعني ؟! قلتلها اللي عم بنادي تحت مش بنت ! هيه بلشت تخاف.. بس الصوت كان عم بحرك مشاعرها أكتر وبخليها تقلي بدي أنزل وأنا ماكان بأيدي اني أمنعها ماتنزل لأنه اخفاء الجثة خلاني أشك انه في طرف تالت هون بالبيت سحبها واخفاها.. أو الجثة فعلاً فيها شي مش طبيعي !.. تركت ايدي وبلشت تنزل عن الدرج وهيه نازلة وقعت لآخر الدرج.. وصارت تصرخ.. تفركشت رجلها وصار ينزل منها دم.. وفجأة لقينا على الحيط اللي جنب الغرفة بصمات إيد لولد صغير مطبوعة بالدم..مع صوت ضحكة خفيفه.. حكيتلها حاسس انه في شي رح يصير.. خلينا نطلع من هون.. الضربة اللي وقعتها عن الدرج خلتها ماتقدر تقوم أبداً.. وبصعوبة لتمشي.. وكل ماكنت اخليها تقوم تشد على بطنها وتتألم مع أنه الضربة برجلها.. وتحكيلي في ألم ببطني بقتلني.. حاول أكسر الباب اللي تحت.. بس ماقدرت.. وللحظة حسينا أنه أيد الباب بالغرفة الصغيرة بلش ينزل لتحت وكأنه في حد عم بحاول يفتحه.. أنا خايف وأمك عم تبكي وبترتعش.. وبلش يطلع صوت البنت مرة تانية بالبيت وهالمرة من فوق.. حكتلها طلعني من هون.. بس أنا كل ماكنت أحاول أمسك إيدها وأمشيها تتوجع وماتقدر.. قلتلها بتنطريني أروح أجيب أسعاف واجي.. حكتلي مارح بقدر أضل هون لحالي.. مستحيل!! وقعت بحيرة وماعرفت شو بدي أعمل وبس خلصنا الحكي باب الغرفة فتح.. كانت جثة زوجها بين الجثث مرمية أنا نجنيت من المنظر اللي شفته.. نحنا رميناها فوق.. شو اللي خلاها تنزل لتحت ! وبنص الغرفة ويتسكّر عليها !!.. أمك صارت تصرخ وبزيادة تبكي.. وتحاول تزحف برجلها لفوق الدرج بس الألم عم بوقفها.. عيونه كانت فاتحه بشكل مخيف وعم بتطلع علينا وكأنه عايش وشايفنا.. وصوت البنت فوق مرة عم تبكي ومرة عم تضحك.. شو فينا نعمل! أنا فقدت أعصابي ودخلت على الغرفة وصرت أضرب بجثته برجلي.. وأمسك السكاكين والقطاعات اللي جوا عنده بالغرفه وأشرّح فيه بدون وعي ومن عصبيتي وجنوني بدي أخلص منه.. خليته عشرين شقفه.. مسكته وشديته لفوق الدرج.. وأمك لسه عم تتألم وتبكي.. طلعت وأخيراً ورميته لفوق.. وبعصوبة طلعت أمك وراه.. قدرنا نهرب لبرا.. وسيارتي برا.. طلعت أمك وحطيت الجثة من ورا.. كانت سيارتي قديمه ومفتوحه من ورا متل الشاحنه.. وأنا مغطي الجثة.. والقرية مافيها ناس كتير.. رحنا للبحر ورميت الجثة فيها.. وبعد هالشي رحت على المستشفى.. واللي اكتشفناه أنه أمك كانت حامل فيكي بهالوقت.. بس الدكتور قال انه في خطورة عليها ولازم تنزل الجنين.. هيه رفضت وقالت مستحيل ولو بدي اموت مارح أنزله.. مرت الأيام وبعدنا عن القرية.. تزوجت أنا وأمك وانتي اجيتي على الدنيا.. عشنا أيام رعب صعبة وكلها خوف وفزع ماكنا ندوق طعم الراحة.. والخيالات والهواجس تلاحقنا.. ومن هداك اليوم لليوم ونحنا عايشين بالمدينة واللي خلصنا من كل شي كنا نشوفه أنا وأمك هيه مرة أسمها أم الرمادي.. هاي خلصتنا من كل سيء كنا نشوفه.. انتي مو بنتي يا مايا.. انتي بنته لهاد الزلمه السيء.. خلص كلامه وأنا وصاحباتي بنتطلع بصدمة كبيرة من اللي سمعته.. ليش خبى عليه .. ليش ماقال من الأول انه انا مو بنته ! كان ممكن يقلي هالشي وانا صغيرة ويريحيني بس ليش لحتى يقول هلأ.. كنت حاسه انه في حلقة ناقصة.. واللي شفته بالحلم كان عم بتفسر من كلامه.. بس شو القصد من كلامه ومن اللي شفته أني رح أموت.. واني شفت صاحباتي بنفس الحلم.. وصوت الزلمه وبابا اللي بالقبر.. في شي مش مفهوم.. انا محوره وصاحباتي الهم علاقة فيه ! انا متأكده ولو كان هالشي مجرد حلم بس .. كان ماقدرت أشوف الدينار اللي قلي عليه الزلمه بالحلم وببتنا !! قلت لبابا عأحلامي.. حكيتله بدي أرتاح أنا مو مرتاحه.. وجبت صاحباتي لأعرف انت شو عامل وشو علاقتك بالحلم ! حكالي هاد كل شي قلتلك ياه أنا مابعرف أكتر من هيك..

قصة اليوم: #أيام_الفزع
.....
قراءة ممـتعه💙✨"
#ⴅმძ3Һค

#أيام_الفزع_قصص
@rwayate
#أيام_الفزع_5 #أيام_الفزع
الحلقة الخامسة
حكيتلهم المره ماقالتلي شي بس حكتلي تعالي انتي وياهم مرة تانية حتى اشوفكم واحكيلكم على كل شي.. همه خافو وماعادو يعرفو شو بدهم يعملوا متلي تماماً بس أنا ضليتني خايفه حكيلهم شي يخوفهم يخليهم يرفضو انهم يساعدوني لأنه الخلاص بإيدهم ولو ما وافقوا انا رح اموت وأكون ضحية كل شي عملوه بابا وماما مع هاد الزلمه.. قلت لماما بدي أروح عندها معهم لأنها هيه اللي خلصتكم زمان.. هلأ بدي أعرف شو بدها تحكيلي.. كل وحدة فيهم كانت خايفة وحاطة ميت سؤال براسها.. وطول الوقت بالسيارة ساكتين.. كنا بسيارة سجود والكل كان ملتزم الصمت لحد ماوصلنا البيت.. منظر البيت من برا كان بخوف.. ومن قبل ليشوفوها كانو عارفين انه رح تطلب شي غير معقول.. يمكن الكل حس بهالشي.. دخلنا على البيت.. دخلتلنا شاي.. شربنا بس سجود ماشربت يمكن لأنها كانت خايفه بس أنا استغربت من تصرفها.. رؤى وهيا ضلهم يتطلعوا على المره بشكل غريب.. ويمكن انتبهت عليهم.. قالتلهم انتوا خايفين مني.. أنا مابخوف.. بالعكس أنا الناس بيجو من عندي من بلاد بعيدة بس لحتى أحللهم مشاكلهم والله معطيني هالقوة بس لحتى أفيد البشر.. حكيتلها ياريت تحكيلنا اللي لازم يعملوه صاحباتي وبسرعه لأنهم على أعصابهم.. قالت متل ماحكيتلك انتي عم تتعاملي مع روح ميته من زمان.. وهالروح كانت سيئة وأذت أمك وأبوكي وبالمقابل أبوكي وأمك أذوها.. والضحية للشي اللي صار هيه انتي.. لأنك بنت هاد الشخص.. حكتلي كل شي شفتيه بالحلم رح يتحقق.. أبوكي رح تشوفيه بالقبر ويمكن أنتي تدفنيه بإيدك.. ورح يشهدو صاحباتك على موتك ويحضرو عزائك.. متل شفتي تماماً.. واللي حيسيطر عليكي هيه روح هاد الشخص اللي رح تخلص عليكي تماماً.. وبوجود صاحباتك.. حكيتلها انتي خوفتيني.. يعني مافي شي ينعمل وخلص أنا رح اموت!!! حكتلي لأ أنا بدي أخلصك وأحكيلك شو لازم تعملي حتى تخلصي من هاللعنة القديمة اللي ما الك ذنب منها.. حكيتلها تفضلي.. قالت بهيك قصص.. الأرواح بتكون منشئها المكان اللي أنتهت وماتت فيه.. انتي لازم تواجهي هاد المكان حتى تقنعي هالروح ما تأذيكي.. لأنها عم تتحكم فيكي من بعيد وانتي مابتشوفيها الا بأحلامك.. بس بالحقيقة هيه موطنها المكان اللي نقتلت أو انتهت فيه.. حكيتلها مافهمت وضحي أكتر.. حكتلي تذكرت اليوم اللي اهلك اجو حكولي عن اللي صار معهم.. وانه روح هالشخص ماعم تتركهم..وقتها حكيتلهم ارحلوا من القرية والمدينة كلها لأنه روحه رح تضل بالمكان.. وهمه عملوا شو حكيت.. بس الظاهر انه الروح لحقتهم وطلبتك انتي.. بدليل الأحلام اللي شفتيها.. حكيتلها كلامك كله الغاز ومافي شي مفهوم.. حكتلها هيا طيب هلأ نحنا شو لازم نعمل حتى نبعد هالروح عنها.. قالت هاد اللي بدي احكيه.. زبدة كلامي كلها.. هيه انه لازم تروحوا كلكم على المكان اللي انتهت فيها هالروح وتواجهوها.. هاد اللي فسرته من حلم مايا.. انتو التلاتة لازم تروحو على بيت زوج أمها وتعيشوا فيه.. روح هاد الزلمه رح تلاقيكم هناك.. رح تطلعلكم ورح تحكو معها ! وتقنعوها ما تقتل مايا.. انتوا بس بتقدروا تعملوا هيك.. هاد هوه تفسير الحلم.. يا أما رح تموت مايا.. وقبل لتموت رح تشهد على موت أبوها زوج أمها وعلى دفنه ويمكن أمها نفس الشي.. لهيك انتوا لازم تنقذوها وتنقذوا عيلتها قبل ليصير كل هالشي.. رؤى وهيا خافوا وصار وجههم مابتفسر.. ورفضوا فوراً.. قالوا نحنا مابنقدر نعمل هيك شي.. اسفين مايا.. مستحيل نخاطر بحياتنا ونحط نفسنا بهيك موقف ومكان.. حكيتلهم بتتخلوا عني !! ماتوقعت ردة فعلكم تكون هيك.. حكتلي هيا وأنا ماتوقعت يكون طلب المره هيك!!.. ماتوقعت انه تطلب منا نعيش فبيت مهجور وشاهد على جثث وشغلات كانت تصير انتي بتعرفيها منيح! حكيت للمره مافينا نغير المعادلة ونعمل شي تاني يقدر يخلصني من هالورطة.. حكت للأسف مافي.. رؤى وهيا طلعو.. وسجود ضلت ملتزمه الصمت حكيتلها ماعبرتي عن رأيك ليه ساكته! قالت أنا موافقة.. حكيتلها عنجد بتحكي! قالت موافقة ومستعدة أعيش بهالبيت حتى أنقذك.. حكيتلها حبيبتي انتي أكتر وحدة طلعتي صادقة فيهم.. ماتوقعت ردة فعلهم هيك تكون.. نحنا عشرة عمر وعشنا مع بعض من الطفولة على الحلوة والمره.. عارفين اني ممكن اموت والخلاص بإيدهم ومع هيك تركوني بهالمحنة وانتي الوحيدة اللي وقفتي جنبي.. أنا بتشكرك وكل عمري مارح اقدر واوفيكي غرضك.. انا فرحت وقلت للمره خلص الحمد لله مو مهم رؤى وهيا.. بيكفيني سجود وافقت وانا وهيه رح نتحدى الخوف بس لأنقاذ حياتي.. حكتلي للأسف مابزبط.. لازم انتي والتلات بنات تكونوا بالبيت.. قلتلها كيف بدي اقنعهم !! حكتلي حاولي.. بس ماتنسي انه الوقت ضيق ويمكن بنهاية هالشهر يكون أبوكي انتقم منكم.. طلعت عم ببكي من عندها ومافي شي قادرة أحكيه.. شو بدي أعمل ؟! كيف بدي أقنعهم! طول الطريق كنت بقنعهم وبترجاهم.. انا حياتي بإيدكم.. أرجوكم..

#أيام_الفزع_قصص
@rwayate
#أيام_الفزع_6 #أيام_الفزع
الحلقة السادسة
اخدت نفسي بدون وعي لعند بيت بابا التاني.. رنيت الجرس مالقيت حد.. سمعت في صوت جوا البيت.. حاولت اطق الباب ماحد رد عليه.. قلت طيب شو هاد الصوت اللي جوا البيت.. ومين ممكن يكون جوا.. بهاللحظة اجا ولد صغير قبالي طالع على الطابق اللي فوق.. حكيتله حبيبي بتعرف شو اللي صار اليوم بهالشقة ووين الناس اللي فيها.. حكالي هاي صاحبتها اليوم لقيوه مقتول بالشقه.. والشرطة سكرت الباب وطلعت الكل اللي فيه.. حكيتله بس انا سامعه في صوت جوا.. حكالي مستحيل الشرطة منعت أي حد يدخل.. حكيتله شكراً حبيبي وهوه راح.. بهاللحظة قربت داني على الباب منيح وصرت اسمع الشي اللي بصير جوا.. سمعت صوت حدا عم بمشي بالشقة والصوت كان قريب كتير مني لدرجة اني حسيته جنبي.. وبهاللحظة رنت عليه ماما بتحكيلي انه سجود اجت عنا وكانت بدها تحكي معي وخبرتها انه بابا توفى.. حكيتلها هلأ برنلها.. رنيتلها ماردت.. أنا صرت خايفه كتير على حالي وحاسه انه موت بابا كان لسبب خفي وفي شي بشقته غريب انا متأكده.. رجعت حطيت داني وأنا عم بسمع نفس الأصوات مرة تانية قريبة كتير مني.. بهاللحظة قلت أنا مش لازم اخبي على باسل شي وقلت لازم اتصل معه وخلص احكيله.. حكيتله بدي أشوفك تعال أنا عند بيت بابا.. ضليتني عم بستنى لأجى.. قلتله بابا مات قتل اليوم.. وهوه طلع مو بابا الحقيقي.. الشقة مسكرة كيف فينا نفتحها.. نصدم من كلامي وأنا فهمته كل شي بإختصار واللي صار كله بس أنا كان بدي حد أقوى مني ليفتح الباب أو يكسره.. حكالي مافينا نعمل هيك شي رح يشكو فينا خلينا نمشي.. حكيتله لو ماعملت هيك أنا رح اموت.. انت رح تفقدني خلال هالكم يوم اللي جايين.. بدك اموت ؟! قلي مستحيل أنا بحبك.. حكيتله اخلع الباب.. قلي ولو في شافنا.. حكيتله السكان بهالعمارة قلال.. اخلع الباب.. دقايق وكان باسل خالع الباب.. دخلنا الشقة وصرنا نمشي جواتها بكل مكان.. مافي شي غريب.. ومافي أي صوت بني ادم متل اللي سمعته.. قلي خلعناه عالفاضي.. مافي شي.. وثواني وسمعنا باب تسكّر من الغرفة اللي جوا.. حكيتله سمعت !! قلي معقول في حد بالشقة.. حكيتله يمكن مايكون في.. تعال معي.. رحنا لعند الغرفة وقربنا منها.. مديت ايدي لأفتح الباب باسل قلي لأ.. حكيتله بدي أعرف مين جوا.. فتحت الباب بسرعة لقيت دم على الأرض والفرش كله دم.. حكالي خلينا نطلع قلتله هون انقتل بابا.. بس أنا بدي أعرف كيف نقتل بنفسي.. وبهاللحظة رجعنا سمعنا باب تاني تسكّر.. كانت بواب البيت تفتح وتسكّر لحالها.. بهاللحظة باسل خاف.. قلي في شي غريب بهالشقة.. الشقة مسكونه خلينا نطلع.. حكيتلها مارح أطلع من هون.. الروح سكنت المكان وهيه موجودة بالشقة.. حكيتلها مارح أطلع من هون.. الروح سكنت المكان وهيه موجودة بالشقة.. أنا بدي اضل لوحدي هون.. ومش بحاجة صاحباتي.. اذا بدك روح أنا بدي ابقى.. قلي لأ مابخليكي لحالك شو بدك تعملي.. بدك تنقتلي متل ابوكي !! وقفت بالصالة وصرت اصرخ واحكي ياروح انا موجودة هون.. شو بدك مني! ليش بدك تنهي حياتي.. حكالي باسل وطي صوتك رح ننفضح.. أنا عصبت وقلتله اطلع برا.. لو ماعملت هيك انا رح انتهي خلال ايام فاهمني! هوه ماحب يتركني لحالي وانا عم بحكي وبسمع اصوات عم تتحرك جوا الغرف بس ماعندي جرأة افتح البواب.. بس بكلمها من برا.. وبلشت اعلي صوتي واطلب منها تروح وتتركني وماتقتلني وبهاللحظة دخلت الشرطة على البيت واقتحمته.. وحكولي شو بتعملي هون مين انتي.. اخدوني انا وباسل معهم وحققوا معي.. قلتلهم دخلت شقة بابا اشوف شو اللي صار لأني مابعرف شو صار.. الشرطة شكت فيني وفكرت الي علاقة بموت بابا.. اخدو اقوالي واقوال باسل.. وحكولي رح نخلي عليكي مراقبة مارح نتركك أبداً.. لأنك دخلتي بوقت غريب ولازم نعرف ليش دخلتي وكسرتي الباب كمان !! اللي عملتيه ما اله تفسير تاني الا انه انتي الك ايد بقتل ابوكي.. حكيتلهم مستحيل.. بس ماصدقوني.. وباسل نفس الشي.. حكالي شفتي شو عملتي فينا.. طلعت من المغفر ببكي ومحتارة شو حيصير.. قلتله خلص اتركني بحالي انا بدي اموت.. قلي مابتركك.. رنيت لسجود قلتلها بدي اشوفك.. تعالي انا وباسل طالعين.. قلنالها على اللي صار استغربت وحكت كيف فيكي تعملي هيك شي.. وانت كيف فيك تطاوعها.. قالت انا اجيت لعندكم ونصدمت البقية بحياتك بس ماحكولك الشرطة مين قتله.. قلتلهم حكو انه مافي اي دليل على القتل وحتى مرته ماكانت بالبيت بهالوقت هالشي اللي شكللهم علامة استفاهم ومافهمو شو اللي صار.. والدليل الوحيد اللي صار عندهم انه انا اللي قتلت لأني دخلت الشقة انا وباسل.. قلتلها لازم نقنع رؤى وهيا ليجو معي عالبيت اللي بالقرية لأنه لو ما اجو انا رح انتهي بنهاية هالشهر.. حكتلي انا رح اقنعهم لا تخافي.. تاني يوم حضرت دفن بابا وبكيت كتير برغم انه كان شخص بعيد عني واذى ماما نفسياً بزواجه من وحدة تانية بس بكيت عليه ونقهرت..

#أيام_الفزع_قصص
#أيام_الفزع_7 #أيام_الفزع
الحلقة السابعة
@rwayate
هاد ماكان مهم قد ما كان بدنا نعرف وين القرية بالزبط وموقع البيت.. حكتلنا انتوا مارح تعرفوا شي.. اللي رح يعرف بس هوه أنا.. رح اروح معكم.. ركبت ماما السيارة وطلعنا كلنا على المكان اللي حكت عليه.. مشينا كتير لحد ماوصلنا قرية قريبة من غابة وفيها جبال وبيوت صغيرة.. حكت ماما هاي القرية بس انا مستغربة انه لسه فيها بيوت كنت مفكرة انها تدمرت لأنه كنت بقرأ اخبار القرية من زمان وكان مكتوب انهم غيرو كل شي فيها.. وصلنا على اخر الجبل وقريب من البيت.. كنا نلف بالسيارة لندور على المقبرة بس ماكنا نلاقي شي.. سألنا شخص كان معه غنم.. حكالنا انتو وراها للمقبرة.. اتطلعوا وراكم.. المقبرة صارت فوق هناك وصار في توسعة كبيرة من بداية عام الالفين.. حكت ماما متل ماحكيتلكم.. من بداية هالسنة بلشوا فيها تغييرات.. بس كيف بدنا نلاقي موقع البيت.. طلعنا للمقبرة لفوق.. وصرنا ندور.. ماما قالت في شجرة سرو كبيرة كانت موجودة جنب البيت.. هاي الشجرة صعب انها تموت وبتطلع لو ماتت يعني لو قصوها اكيد بتكون طلعت.. خلينا ندور.. ضعنا وماعرفنا نروح يمين او شمال.. بس للحظة ماما بلشت تحس شعور غريب.. وصار تتغير ملامحها شوي.. قالت انا حاسه اني بنفس المكان اللي صارت فيه الحادثة.. قلتلها ماما وين.. قالت هون قريب بس مو عارفة احدد.. صارت تتعب وعيونها يدمعو.. ووقعت على الأرض.. قلتلها ماما شو عم بصيرلك.. قالت بنتي حاسة بشعور غريب مو عارفه اوصفه.. هاد الشعور كان غايب عني سنوات.. واخر مرة حسيته بس هربت مع ابوكي.. وبس نقتل ورميناه بالبحر.. حكيتلها شو الشعور.. قالت الخوف اللي كنت احسه قبل لتصير اللحظات المرعبة وقبل ليلحقني روح ابوكي.. انا تخلصت من هاد الشعور بعد ما ساعدتني ام الرمادي.. بس انا حاسيته رجعلي.. نفسه يا بنتي.. حكالي باسل خلينا نمشي.. قلتله مارح امشي.. قلي شوفي وجه امك تعبت ومش قادره رح تروح منا وهون مافي مستشفايات ننقلها.. سجود قالت خليكم.. نحنا وصلنا للمكان اللي بدنا ياه.. ودام شعور امك هيك معناته هيه حاسه صح.. ومعناته نحنا بالمكان الصح.. طلعنا بالسيارة مرة تانية وصرنا نلف.. لقينا حالنا بنص المقبرة.. منظر القبور كان مخيف وقاتل لدرجة مش ممكن يتصورها بشر.. يمكن لأني ماكنت متعودة ازور مقابر كتير.. ويمكن لأنه خوف ماما ورهبتها خلاني اخاف أكتر.. بعد مالفينا أكتر من مكان لقينا الشجرة.. ماما قالت هاي الشجرة أنا متأكده.. هالشجر بعمر ومابموت.. صدقوني هاي الشجرة.. طيب وين البيت.. لفينا ورا حيطان المقبرة وكانت الصدمة.. البيت قبال وجهنا تماماً.. ماما بس شافته صرخت وقالت مستحيل !! البيت متل ماهوه.. كيف هيك مستحيل