رسالة ...

لورا : اياد ! كيف وصلتلي ؟
اياد : يلي بيسأل ما بيتوه .
لورا : معقول سألت عليي اهل الجامعة ؟
اياد : اي .. بعتذر اذا زعجك هالموضوع .
لورا : لا ابداً بس تفاجأت .
اياد : بالمناسبة ابتسامتك حلوة كتير .
لورا : شكرا الك ، لازم سكر هلأ عن اذنك .
اياد : اذنك معك .
••••••••••••••••••••••••

#بقلم_فتاة_من_ورق
_________________________________________

بعد مرور 5 ساعات ... سمعت صوت باب البيت ...

شيراز : آرام وينك لهلأ ؟ ليش ماعم ترد عليي ؟
آرام : انا مو جاي لحتى اسمع صوتك انا جاي اخد تيابي .
شيراز : لك ليش هيك عم تتعامل معي شو يلي غيرك ؟
آرام : انا ما تغيرت انا صحيت بس .
شيراز : صحيت من شو ؟
آرام : صحيت من حبك كان معمي على قلبي ومو شايف انك مصدر شؤم لك بسببك مات اخي .
شيراز : بسببي انا ؟؟؟
آرام : لو ما تزوجتك ما كان مات .
شيراز : لا اخوك مات لانو انتهى اجلو انا ما الي ذنب ، آرام بترجاك لا تحملني ذنب مالي دخل فيه ، قبل ما تتصرف معي هيك روح حاسب يلي قوص اخوك بالغلط .
آرام : حاسبتو المحكمة و ما رح يخلص حسابي معو لحتى اقتل اخوه او اقتلو و هلأ لازم حاسبك على وجهك المشئوم .
شيراز : وجهي مشئوم !
آرام : انا ما بقدر كمل معك ولا عيش معك .
شيراز : شو قصدك ؟
#قيود_إجتماعية
#الجزء_الرابع
#بقلم_فتاة_من_ورق

شيراز : شو قصدك ؟
آرام : انتي طالق .
*وقفت مصدومة .. كانت صدمتي اكبر من اني رد على آرام رحت على غرفتي ضبيت تيابي و رحت لعند اهلي .

_________________________________________

لورا : شيراز !
ام حسن : بنتي شو صاير ؟
شيراز : تطلقت .
لورا : شو
ام حسن : ليش ؟ لك ليش فهميني .
شيراز : رح فهمكن كلشي .

*بلشت اختي تحكي .. كل كلمة عم تحكيها معها الف دمعة و غصة ؟ ما قدرت صدق معقول آرام يلي كان مغروم باختي يتصرف هيك ؟!

*طلع ابي من البيت بدون مل يحكي ولا كلمة ...

_________________________________________

ابو حسن : فتاح الباب فتااااح
آرام : اهلين عمي .
ابو حسن : الك عين تقول عمي ؟! امنتك على بنتي لترميها هيك ! و تحملها ذنب شي ما الها دخل فيه ! بس رح تدور الايام ولما يصير عندك بنت وقتها رح تعرف انا شو حاسس هلأ .
آرام : اذا اجتني بنت مشئومة بتبرى منها ما ببلي العالم فيها .
ابو حسن : بنتي يلي معتبرها بلوة بالنسبة الي هي نعمة و الله لا يحرمني من هالنعمة .

_________________________________________

شيراز : اكيد هو حكا معي هيك لانو مصدوم لسا بكرا بس يوعى من صدمتو رح يرجعلي .
لورا : رح تقبلي فيه لو رجع ؟
شيراز : اي طبعا رح اقبل فيه هاد حبيبي قبل ما يكون زوجي .
لورا : يا ريت انتي يلي تصحي من صدمتك يا اختي و تعرفي انو كرامتك فوق كلشي ، وينها شيراز القوية يلي ما بتسمح لحدا يهينها وينهااا ؟

*حضنتني اختي و صارت تبكي ...

#بقلم_فتاة_من_ورق
_________________________________________

بعد مرور 4 اشهر ...

••••••••••••••••••••••••
اياد : فيني افهم ليش ماعاد رديتي على رسائلي ؟ الك اسبوع بتقرأي رسائلي و ما بتردي .
لورا : انت شو بدك مني ؟
اياد : لورا تعبت وانا عم لاحقك من مكان لمكان تعبت وانا حاول الفت انتباهك تعبت وانا ابعتلك رسائل و ما تردي واذا رديتي تقولي منيحة ، شو يلي غيرك ؟
لورا : انت ليش عم تعذب حالك و تلاحقني ؟
اياد : لاني بحبك انا بحبك لورا .
لورا : شو اخر هالحب ؟
اياد : انتي مو متل ايا بنت وانا مو متل كل الشباب صدقيني انا بدي ياكي بالحلال ما بدي اضحك عليكي او اجرحك ، حبي الك ما الو نهاية لهيك رح توج هالحب بالزواج .
لورا : انا ماعاد اوثق بحدا كيف بدي صدقك انك ما رح تضحك عليي ؟
اياد : الايام بتثبتلك .
لورا : لنفرض تزوجنا و توفى اخوك بعرسنا رح تطلقني ؟
اياد : بعيد الشر الله لا يقدر لشو هالحكي .
لورا : جاوبني بصراحة رح تطلقني ؟
اياد : اكيد لا انتي شو ذنبك طلقك ، اصلا من وين جايبة هالحكي .
لورا :.......
اياد : والله بحبك واذا مو مصدقتيني الايام رح تثبتلك حبي .
••••••••••••••••••••••••

*ضليت طول الليل عم فكر بحكي اياد ... ما بنكر اني معجبة فيه و بشخصيتو بس خايفة من المستقبل المجهول .

#بقلم_فتاة_من_ورق
_________________________________________

*بصباح اليوم التاني ...

لورا : صباح الخير .
شيراز : صباح النور .
لورا : بدك تضلي حابسة حالك بغرفتك ؟
شيراز : شو بدك مني ؟ انا مرتاحة هيك .
لورا : بس انا مو مرتاحة هيك .
شيراز : مشان شو بدي اطلع ؟ مشان شوف امك مبوزمة انو بنتها رجعت مطلقة ولانو حسن لغا جيتو بعد ما سمع هالاخبار ؟ ولا مشان شوف الحزن بعيون ابوكي ؟ مشان شو فهميني ؟
لورا : طيب قومي بدلي تيابك خلينا نروح نشرب قهوة بشي مكان .
شيراز : مو جاي على بالي .
لورا : لو ضليتي مكتئبة هيك طول عمرك رح يرجعلك ؟
شيراز : لا .. لو بدو يرجعلي كان رجعلي من زمان .
لورا : معناها قومي نغير جو يلا .
شيراز : اوكي .

#بقلم_فتاة_

#إمسك_يدي
#الجزء_الرابع
#بقلم_فتاة_من_ورق_بسمه_السباعي

*بعد مرور ساعة من غياب بناتي قررت روح عند ياسمين...وصلت على بيتها فتحت الباب بهدوء و فتت...

*دورت عليها بكل الغرف ما لقيتها .. وقفت بنص البيت وبلش الشك يدخل لقلبي .. بعد لحظات طلعت ياسمين من الحمام ...

ياسمين : حبيبي انت هون .
*شردت بعيونها و تندمت لاني شكيت فيها و استبعدت فكرة انها تكون بالحمام....
ياسمين : حبيبي شبك ؟
سليم : ولا شي اعمليلي فنجان قهوة .
ياسمين : من عيوني .

*دخلت عالصالون ، شلحت جاكيتي و رميتو ، تمددت على الكنبة و حطيت ايدي على راسي ...

#بقلم_فتاة_من_ورق_بسمه_السباعي

ياسمين : هي اطيب فنجان قهوة لتاج راسي .
سليم : يسلم ايديكي .
ياسمين : يا حبيبي ليش مهموم ؟
سليم : ما كنت متوقع الامور توصل لهون ، ما تخيلت بيوم اني طلق نهاد .
ياسمين : شو كنت متوقع ؟ نهاد مرة مجروحة لانو زوجها تزوج بعد كل هالسنين ، ردة فعلها طبيعية .
سليم : اول مرة بشوف وحدة واقفة مع ضرتها .
ياسمين : مو هيك القصة ، انا مرة و بعرف شو احساسها هلأ .
سليم : يعني انا غلطت ؟
ياسمين : بنظرها و بنظر كل المجتمع انت غلطت لانو مافي سبب تتزوج عليها ، بس بنظري انا ، انت الشمس يلي ضويتلي عتمة ايامي ، صارت حياتي الها معنى بعد ما تزوجنا ، نهاد اختارت تتركك لانك تزوجت بس بالنسبة الي لو تتزوج غيري مستحيل اتركك او اتخلى عنك .
سليم : لهالدرجة بتحبيني ؟
ياسمين : انت كل دنيتي كيف ما بدي حبك هيك ؟ تأكد لو بتطلب مني موت بموت حالي هلأ و بدون ما ناقشك .
سليم : بعيد الشر عنك .
ياسمين : قلي هلأ وين بناتك ؟ تاركهن بالبيت لحالهن ؟
سليم : لا اجا ابو نهاد اخدهن يشوفو امهن و رح يرجعهن اليوم .
ياسمين : يعني نهاد ما بدها البنات يعيشو معها ؟
سليم : يلي فهمتو انو ابوها ما بدو ياهن يعيشو عندو .
ياسمين : طيب انت حاولت تحاكيها لنهاد ؟ جربت تصالحها ؟
سليم : لساتو الخبر جديد عليها لو حاولت حاكيها ما رح ترد .
ياسمين : بناتك ما خبرتهن انك متزوج ؟
سليم : اكيد امهن بتكون خبرتهن .
ياسمين : سليم ما تشيل هم شي ، اذا نهاد و ابوها ما بدهن البنات انا بدي ياهن ، انا بحطهن بعيوني و مستعدة اعمل أيا شي لرجعلك السعادة الك و لبناتي .
سليم : بناتك ؟
ياسمين : اي بناتي .

*استغربت من كلام ياسمين ، وحدة غيرها بتطلب اني اترك البنات مع امهن ، صرت اسأل حالي يا ترى ياسمين صادقة بكلامها ولا بس عم تحكي هيك ليزيد حبي الها ... ؟!
________________________________________
#بقلم_فتاة_من_ورق_بسمه_السباعي

غسان : اختيارك للموتور كان موفق ، هاد من احسن النوعيات .
أوس : اي عملت بحث عن كل الانواع لهيك اخترت هاد .
غسان : يوم الجمعة رح سوقو و بلش علمك عليه .
أوس : ليش انت بتعرف تسوق موتور بابا ؟
غسان : ههههه اي طبعا بعرف ، فيك تقول ضليت 7 سنين عالموتور .
أوس : اول مرة بتحكيلي شي عن حياتك .
غسان : انا كنت متلك ، هلأ بشد عليك و بحقق كل طلباتك لاني بشوف حالي فيك ، انت كتير بتذكرني بحالي .
أوس : ناطر يوم الجمعة بفارغ الصبر لشوفك عالموتور .
غسان : بس ما تنسى وعدك الي .
أوس : اكيد مستحيل انسى .
________________________________________
#بقلم_فتاة_من_ورق_بسمه_السباعي

ياسمين : حبيبي صار لازم تروح عالبيت قبل ما يرجعو البنات .
سليم : ما حابب اتركك .
ياسمين : هلأ نهاد صارت تعرف و لما يعرفو البنات وقتها ماعاد في سبب نضل بعاد عن بعض ، يا بتجي بتعيش هون انت و البنات يا اما انا بجي بعيش معكن .
سليم : ان شاء الله .
ياسمين : انا طبخت بامية مشان تاخدها معك تتغداها انت و البنات .
سليم : اليوم جبتلهن غدا جاهز .
ياسمين : هي اخر مرة بتجيب غدا جاهز انا كل يوم بطبخلكن بتجي بتاخد الطبخة من عندي قبل ما يرجعو البنات من المدرسة .
سليم : الله يرضى عليكي .
ياسمين : ومع هيك هلأ خود البامية معك تعشى منها انت و البنات .
سليم : يسلم ايديكي .
ياسمين : الله يسلمك وما يحرمني منك .

*طلعت من البيت بس قلبي ضل عند ياسمين .. كلماتها كانت ساحرة و حبها واضح من عيونها .. كيف هالمرة قدرت تأثر فيني بهالشكل ...؟!
________________________________________
#بقلم_فتاة_من_ورق_بسمه_السباعي

ابو سهيل : يلا جدو روحو لبسو جواكيتكن مشان ترجعو عالبيت .
رنيم : لا خلينا نضل مع الماما او خلي الماما ترجع معنا .
ريما : اي ماما ارجعي معنا انتي صرتي منيحة .
ابو سهيل : الله يجيبك يا طولة البال .
نهاد : لا حبيباتي ما رح تبقو هون وانا ما رح روح معكن ، البسو جواكيتكن و اسمعو كلام جدو .
رنيم : ليش ما بدك يانا ؟
نهاد : حبيبتي بدي ياكن بس حرام البابا يضل لحالو مو ؟
ابو سهيل : انا ناطركن بالسيارة ما تتأخرو .
ريما : حاضر جدو .

*بوسنا أمي و طلعنا لعند جدي .. طول الطريق ساكتين انا و رنيم و عم نتطلع من الشباك .. يمكن هي حاسة متل ما انا حاسة انو امي ماعاد بدها تكون معنا .. او يمكن بدها ترتاح مننا...

#بقلم_فتاة_