#قلبي_علينا #الجزء_4
@rwayate
تزوجت ياسر وسافرت لعندو ع تركيا سكنت ببيت كبير ومرتب ، حياتي كانت حلوة بيت كبير وعايشة لحالي انا وياسر بدون مشاكل وهموم لا في اهل و لا عيلة معنا مشاكلنا مابتزيد عن طبخة او اكلة
ياسر شب كتير منيح معاملتو معي خلتني بلش حبو

كان حنون كتير معي ويحبني ويعطيني شو مابدي وماينقص عليي شي خصوصا انو هو مقتدر ووضعو منيح ..

مضو اول اربع شهور من زواجي وكانت حياتي عم تتحول من بنت متعزبة لمدام واعية ومسؤولة عن بيت وزوج
طلعت حامل كان هالخبر هو السعادة بحد ذاتا بالنسبة الذي ولزوجي كل تفكيرنا كان ع هالبيبي يلي رح يجي ويعمل شي جديد بحياتنا انا و ياسر ، الاهتمام و الدلال و الحنان كان مملي حياتي عليي

بعد الاوضاع يلي زادت بالشام خبرت انو حسن سافر ع تركيا اختي مرح هي يلي عرفت وقالتلي
بس حسن ماعاد بحياتي الا ذكرى عابرة ، كان شي حلو حرك مشاعري و اخد قلبي بس هالشي كان بوقت معين ..

صرت بالشهر السابع من حملي و انا عم انطر البيبي على نار ، كنت حاسة انو عم يكبر جواتي ويتنفس من نفسي
يوم ورى يوم مضو التسع شهور ..
وخلفت بنتي ألين فعلاً ملاك شقرا بعيون خضر وشعر ناعم وبياض التلج ..

هي كانت فرحتنا انا و ابوا ونور عيوني ..
طبقت الين السنة ، وحتفلنا بعيد ميلادا سوا

( بصبح فيه ضباب وغيومو رمادية )
كانت الساعة 7 الصبح ، اعدت انا وياسر ع البرندا عملنا قهوة لنشرب قبل مايطلع ع شغلو
الجو كان غايم وشكلو رح يمطر ، صوت فيروز عم يرن بأداني ..
كيفك قال عم بقوولو صار عندك ولاد ..
أنا والله كنت مفكرتك برات البلاد ..
شوبدي بالبلاد ..
الله يخلي الولاد ..
اييييه .. كيفك انت .. ملا انت ..

ياسر : فرح انا رايح ع شغلي ديري بالك ع الين
انا بحبك كتير ، خليا بعيونك

فرح : ياسر ليش هيك عم تحكي روح ع شغلك وبلا زناخة هالكلام

اتطلع بألين وفيني بنظرة غريبة وكأنو عم بقلي مارح ارجع ..
ضمني وباسني ، قرب من ألين وباسا ..
طلع ع شغلو ، و انا رحت نضفت بيتي و بلشت بتجهيز الغدا ..
( رن التلفون )

عامر : كيفك فرح

فرح : اهلين عامر

عامر : ياسر بالمشفى عمل حادث بسيارتو رح اجي اخدك انتي و الين ..

زتيت الموبايل من ايدي و الدموع معبية عيوني لبست بسرعة و حملت بنتي ونزلت استنا بالشارع لحد ماوصل عامر لعندي ، طلعنا بالسيارة ووصلنا للمشفى ..
ناولت الين لعامر و صرت اركد لعند السكرتيرة : جوزي وينو مشان الله وينو ياسر

لسكرتيرة : هدي مدام ، هو بقسم العمليات ( طبعا هي عم تحكي بالتركي )

طلعت ع قسم العمليات ، كان هلئ الدكتور طالع من الغرفة ، شال الكمامة عن تمو وعم يلقط نفس ، ركدت لعندو : مشان الله ياسر وين وين

الدكتور : روقي ، الاعمار بإيد الله

فرح : شوووو شو يعني شو عم تقول لك .. لا لا

عامر : فرح اهدي

وقعت ع الارض وماحسيت ع حالي الا ع سرير بغرفة بالمشفى صحيت و انا عم ببكي و اصرخ و اضرب الغراض يلي حوليي وقعت السيروم ع الارض و الابرة جرحتلي ايدي .. كنت عم اخبط و اضرب كلشي حوليي ..
اجو الدكاترة ، اعطوني ابر وماعد حسيت ع حالي ..

الدكتور حلل الحالة يلي صابتني بالانهيار العصبي نتيجة الصدمة القوية يلي اكلتا ، ضليت بالمشفى اسبوع بدون حركة وكلام او اي تصرف

عامر هو رفيق زوجي وشريكو بالشغل ، وقف معي وماتركني لحالي لا هو ولا مرتو طول الوقت عندي بالمشفى ومرتو صارت تدير بالا ع الين يلي نسيتا انا و نسيت انو عندي بنت اساسا ، صارت ترضعا مع ابنا و تغيرلا وتهتم فيا و انا لا حس ولا خبر .. وحتى دموع ما عد نزل وماعد بكيت بس مفتحة عيوني وعم اتطلع بالسقف

اجا الدكتور لعندي ، وصار يحكيني ..
علاجي كان الحكي بقساوة وقوة ، والدكتور صار يقلي : جوزك مات الله يرحمو بس الطفلة يلي عندك شو ، بدك تموتيا مشان جنانك انتي ام اومي ديري بالك ع بنتك وبلا كزب وتمثيل يلله تحركي هون ماعد نستقبلك ..

بعد لحظات من كلامو انفجرت بالدموع و الصوت .. وقتا الدكتور اتطلع بعامر وقلو مشي الحال ... اليوم المسا خرجوا من المشفى ونشالله معافاية ..

طبعا كلشي حوارات مع المشفى و الدكاترة كانت عم تدور باللهجة التركية ..

خرجوني المسا و اخدوني لبيتي ، كنت متحسنة عن قبل صرت اهتم ببنتي ولاعبا ، زبطت بيتي و حاولت قوي حالي مشان ماحسس بنتي اني ضعيفة ومو حمل مسؤولية ..

اهلي لما خبرو صارو بدن ياني انزل ع الشام مشان ماضل عايشة لحالي ، بس هاد الشي كان مستحيل لان شغل جوزي كلو صار برقبتي صرت انا متوكلة فيه ولبين ما انهي شغلو و زبط الوضع و انقلو للشام بدي لايقل عن سنة خاصة انو عندي عدة وفاة الزوج لبين ماتخلص لابدا بشغلي ..

#قلبي_علينا #الجزء_1

ابتسملي وهو عم يأشرلي بإيدو بمعنى " لفي كمان " ..
حط السيكارة بين شفايفو وحرك حواجبو وهو عم يقلي : لابقلك الفستان

اعدت ع طرف الكنباية يلي هو اعد عليها : يعني اشتريه ؟

- اممم حلو ، او قلك لا لا بلالك ياه ، شايفك سمنانة شوي
اشرلي بأصبيعو بمعنى اتركيه و الحقيني ..

غيرت تيابي و اخدت جزداني وطلعنا من المحل : شو صرلك فجأة بالاول كنت عم تقلي عجبك كتير شو عدا مابدا !! انا كتير حبيتو

حسن : اي ماعجبني وبس خلص امشي بلا كتر حكي رح وصلك ع البيت و انا رايح ع شغلي

فرح : طيب متل مابدك

" وصلني ع البيت بعدين راح ع شغلو "

مرح : اجيتي فوفو ، تعي طمنيني كيف كان مشوارك مع صهري المستقبلي ههههه

فرح : مجنون بعد مائست الفستان وعجبني ماخلاني اشتريه قلي غيري تيابك والحقيني وطلعنا وعصب فجأة وتغيرت ملامحو

مرح : ههههه طولي بالك بكون عندو شي ضروري ..

___________
___________

( بعد اسبوع ) ..

كنت اعدة عم ادرس ، قام اتصل فيني حسن
حسن : كيفا فرحتي

فرح : مشتاقتلك ، و انت كيفك

حسن : مشتقلك كتير
فرح بكرى بتنزلي ع الحديقة يلي بشوفك فيا بالعادة بدي شوفك دبري حالك

فرح : طيب رح حاول

حسن : فرح اكيد بتجي مشان الله ، شتقتلك كتير وبدي شوفك

فرح : و انا شتقتلك خلص رح اجي بوعدك

" تاني يوم "

فئت من بكير لبست ونزلت ع الحديقة يلي بشوفو فيا بالعادة لقيتو اعد ع كرسي ماحوليه حدا وعم يستناني ، قربت لعندو بشوق ولهفة وقلتلو : شتقتلك

حسن : تؤبريني ايمتا وصلتي

فرح : من شوي ، حسيتك مكتئب شبك ؟

حسن : ولاشي ، ثواني لاتصل بالمعلم
( رفع تلفونو و رن ع حدا بعدين سكر الخط وكملنا حكي )

خلال كم دقيقة اجا شب لعندي اعطاني باقة ورد حمرا ودبدوب احمر وكيس شيك ، كان في جواتو هداك الفستان يلي حبيتو .. تفاجئت بالكياس والشغلات يلي صارت بين ايديي وقتا عرفت انو هدول هدية ..

التفتت لعند حسن و انا مبسوطة : حبيبي يس..

حسن : كل سنة و انت الدقات لقلبي

فرح : يعني الفستان كان مفاجآة ؟

حسن : هههه اضطريت مشان اعرف شو القياس

كان هاد احلا يوم بحياتي احلا مفاجآة بتصير معي
رجعت ع البيت و انا مو عاطية فرحتي لحدا بإيد ماسكة الوردات و بالتانية الدبدوب والكيس

فتحت الباب وسكرتو برجلي وفتت و انا عم دندن ..

سوسن ( مرت ابي ) : الله الله الله ، دب ورد كيس نرتب ، وعم تغني ، الله يسمع ابوكي الاخبار الطيبة

فرح : رفقاتي حبو يحتفلو بعيد ميلادي بكون غلط ولا عيب ؟

سوسن : ههههه مذوقين رفقاتك

تركتا ورحت ع غرفتي و انا معصبة من تصرفاتا الباردة حطيت الغراض ع تختي ورتبت كلشي بمكانو ، غيرت تيابي وتمددت ع تختي و السماعات بأداني و انا عم فكر بحسن .. لحد ماغفلت وماعد ةعيت ع شي

صحيت بنص الليل ع صوت رنة موبايلي < اتطلعت ع الشاشة >
كان رقم حسن ..
- الووو

حسن : فرحتي قومي طلعي ع البرندا شتقتلك كتير ، هلأ خلصت شغلي قلت بمرئ بلمحك

- فرح : لك مجنون انت ، يلله طالعة

لبست ع حالي جاكيت ووقفت ع البلكون ، الشارع هدوء والسما صافية من كلشي مافيا غير ضو القمر يلي عاكس ع بلور سيارة مواجه غرفتي ..
وقفت انا وحسن نتطلع ببعض وعم نحكي ع التلفون ..

وقتا كنت حاسة بحنية و امان من هالعالم البشع ، كلماتو الحنونة اخر الليل بتعطيني امل بكل يوم عم عيشو
وقت يحسسني اني اهم وحدة بحياتو ، وقت يحكيلي اديش بحبني و اديش حياتو عتمة بدوني ..

بحس حالي خلقت مو بس لعيش انا لحالي ، خلقت لعيش وعييش معي روح تانية ..

بقينا اكتر من ساعة عم نحكي مع بعض بعدين هو راح و انا فتت نمت ..
اول ربع ساعة بغفلتي حلمت بكابوس ، كانت دقات قلبي عم تتسرع ونفسي عم يضيق حسيت كأني مربطة ومحطوطة جوات صندوق ماعم بقدر اطلع منو كل ما حاول ارفع ادي حس في شي ثبتني من جديد ، لحد ماشفت شب ابيض بدقن وشعر من سواد الليل ، قرب عليي وحط ايدو ع راسي بعدين شفت حسن من بعيد عم يهز براسو وكأنو عم يعبرلي عن رضاه بخصوص شي ، هون قدرت اصحا و انا عم اشهق و اسعل ..
فقت و انا عرقانة و تيابي مبللة بالمي ..
غسلت وشي و رجعت لغرفتي ، فتحت موبايلي وبعتت لحسن ، كنت مفكرتو نايم قام رد عليي حكينا شوي بعدين كملت نومتي ..

فئت الصبح ع صوت سوسن : يلله ياست بدور وراكي مدرستك ياطالبة البكلوريا و ابوكي متعشم تصيري دكتورة ههههه اومي اومي نئبري ع مدرستك بس ترجعي عندك تعزيل ، لكن سهرانة لنصاص الليالي الله بييعلم مع مين

فرح : خالتي شبك شبك شو صايرلك مشان الله

سوسن : يلله وليه اومي

لبست ولملمت غراض مدرستي وطلعت ، اول مانزلت من البناية لقيت حسن واقفلي ع الطرف التاني وهو مرتكي ع الشجرة : حسن شو جابك

حسن : اشتقتلك يادبة

فرح : و انا شتقتلك ، الله ينزع صباحا سوسن

حسن : شو عملتلك اليوم كمان

فرح : مابتعرف معاملتا معي

حسن : اخخخ على ما احرقلك ياها وريحك منا

فرح : هههههه ، يلله انا فايتة ع المدرسة و انت طير ع ش

#قلبي_علينا #الجزء_2
@rwayate
ليش هيك عيشتي وحياتي ياربي ، امي ماتت و انا لساتني صف اول نحرمت من حنيتا ووجودا ابي تجوز مرة ظالمة بتعاملني كأني خدامتا ، سوسن جابت اختي مرح يلي بحبا كتير وبعتبرا كلشي بحياتي اصغر مني بسنتين
و محمد اخي الصغير عمرو 7 سنين

كنت اعدة ومكتئبة حاسة كل الدنيا سودة بوجهي
اتصلت بحسن وطلبت شوفو ، لبست وطلعت من البيت وطبعا ادام مرت ابي عأساس رايحة ع درس خصوصي

فرح : حسن لايمتا هيك رح نضل

حسن : اخخخ والله رح يطئ قلبي عليكي بس مو طالع بإيدي شي

فرح : بس انا مليت صرلي سنتين معك و رح نصير بالتالتة ، انت املي لاخلص من الظلم وعييشتي مع اهلي والله عم بشتقلك مافيي عيش بدونك

حسن : هه يمكن انا ماكان لازم حب وعلقك فيني يلي متلي غلط يحبو ، ابي عاجز و امي مريضة و شغلي يادوب مكفي مصروف البيت ويلي دراستي وويلي شغلي وويلي انتي

فرح : ندمان لان حبيتني ؟

حسن : مو ندمان لان حبيتك ، ندمان لاني علقتك فيني و انا وضعي هيك بس والله بحبك والله انتي اثرتي فيني

فرح : كل يوم عم بدعي ربي يعطيني ياك لانو مافيني عيش بدونك مافيني اتخيل حالي لواحد تاني هاد العذاب بحد ذاتو ، مشان الله ياحسن حاول احكي مع اهلك جرب

حسن : خلص رح شوف شو بصير معي ، اومي طلعي ع البيت بلا ما مرت ابوكي تعملك مشكلة هلئ لان تأخرتي

تركت حسن وطلعت ع البيت
اول مافتحت الباب حسيت كأني دخلت ع شي فرع امن
طلعت سوسن بوشي : وين كنتي ؟

فرح : يعني مابتعرفي انو بدرس الرياضيات عند منال

سوسن : منال اتصلت وبدا منك شوية دروس وقالتلي انك مو عندا ، كنتي معو

فرح : مع مين شو عم تخبصي

مرح : خلص ماما كانت عند منى اليوم الدرس ببيتا

سوسن : لاتستري عليها ، الله ياخدك يافرح بدك تفضحينا

صارت تعلي صوتا عليي هيك لحتى سمعا بابا اجا ع صواتنا : شوفي ليش عم تصرخو

فرح : عم نتخانق مم مشان شغل البيت

سوسن : اي مشان الشغل فرح ماعم تساعدني

ابي : وليه ماتعينيا لخالتك

فرح : خلص رح صير ساعدا انا اسفة خالتي

تركتن وهربت ع غرفتي سكرت الباب وصرت ابكي ، برات البيت قرف وجوات البيت ظلم وقرف وخناق و حسن يلي هو املي الوحيد بهالدنيا كمان قصتي معو ماعم تتحرك

تسطحت وغمضت عيوني و انا عم امسح دموعي من ع المخدة هيك لحتى غفيت ، فقت الصبح ماكنت قدرانة احكي ولا ارفع راسي يمكن اد ماغصيت وخنقت قبل بيوم التهب حلقي ونزلو لوزاتي وراح صوتي
ضليت متسطحة كل الوقت ..

رن موبايلي ..

حسن : كيفك فرح

( جاوبتو بصوتي المبحوح ع الاخر ) : منيحة

حسن : شبو صوتك شوفي

قلتلو مو ادرانة احكي ، سكرت وحكينا ع الواتساب

تواعدنا نشوف بعض المسا وقت يكون بابا بالسهرة ..
لبست ونزلت بدون مايشوفوني اتفقت انا ومرح تغطي عليي ..

حسن : لك شبو وشك ليش هيك مريضة هالقد نشالله بموت ريتني انا ولا انتي ياعمري

فرح : بعيد الشر عنك ، هلأ تحسنت شوي عن قبل ، بس مافيني اتأخر قلي بسرعة ليش بدك ياني اجي

حسن : اول شي كنت بدي اتطمن عنك ، تاني شي انا حاكيت اهلي بموضوع الخطبة

فرح : اي ؟

حسن : رفضو رفض تام ، ابي قلي مامعك ولا ليرة لمصاريف الزواج والخطبة وشغلك مو ثابت ونحنا مو خرج نساعدك ، بس يسالك ابوها شو عندك شو رح تقلو ؟ وين بدك تسكنا ومنين رح تعيشا ..
و امي قالتلي حق خاتم مامعك سكر ع القصة

فرح : ياربي ( حطيت راسي ع رجليي وصرت ابكي ) ..

حسن : الدنيا مسكرة بوشي ، رزقتي قليلة و يادوب مكفية و اهلي مامعهن وبحب بنت العالم ريتو الله ياخدني ويريحني ..

التفت عليي وشافني كيف طابة راسي وعم ببكي ، قرب عليي رفع راسي لعند كتفو وضمني وهو عم بقلي : خلص حبيبتي لاتبكي الله يجعلك من نصيبي لاتبكي

فرح : ماعد اقدر اعد اكتر وماعد اتحمل موجوعة ، انا طالعة ع البيت

حسن : طيب روحي وطمنيني عنك

طلعت ع البيت والحمدلله سوسن مانتبهت ع غيابي ، ماعملت شي تسطحت ونمت و انا عم ادعي بحرقة

- صعب الانسان يحب شخص ويتعلق فيه ومايضمن يكون الو بيوم من الايام
الحب حلو بس وقت يتحول لتعب وخوف ووهم بصير بيوجع وببكي .. ساعات بقول خلص علاقة مو معروف نهايتا مسحيا من حياتك وبلشي من جديد وساعات بقول مافيني عيش بدونو هو نفسي وكملي يابنت مع الشخص يلي قلبك ختارو كملي مع يلي بحبك وبتحبيه ..

مر يومين بدون ما احكي مع حسن كان موبايلو معطل وماقدر يحكيني غير مرة وحدة دقيقتين ، شتقتلو كتير مو بالعادة هيك يغيب عني

لما كنت مريضة غبت تلت ايام عن مدرستي ، واليوم تحسنت شوي قمت لبست وطلعت بس بدال ماروح ع المدرسة رحت لعند حسن ع شغلو
( هو كان بيشتغل بمكتب سياحة وسفر وماعندو حدا )
اعدنا حكينا وتسلينا وشربنا قهوة ، الاوقات يلي بكون فيها معو بحسا بتمضا بسرعة مع اني بتمناها ماتخلص ..
____________
( بالبيت )

ابي : اهلا وسهلا .. اي هون بيت فرح خير

المديرة : انا مديرة مدرستا لفرح
بدي اتطمن ع فرح خير ليش ماعم تجي صرلا 4 ايام عم تغيب

#قلبي_علينا #الجزء_3
@rwayate
ضليت محبوسة بالغرفة تلت ايام يزتولي الاكل ويطلعو ويقفلو عليي ، مرح كانت تحاكيني من ورى الباب وتخبرني شو عم يصير ، بابا راح ع المدرسة وقلن انو انا مريضة كتير هالفترة مارح داوم ، وهنن ماحكو شي عطوه عذر

كل يوم كان عليي اصعب من يلي قبلو حسن مابيعرف شي عني و انا مابعرف شي عنو ، اكيد هو خايف عليي لانو ماعم احكي معو ومنقطعة عنو ، طلبت من مرح تاني يوم تروح لعندو ع المحل وتحكيلو يلي صار ..
__________
( مرح التقت بحسن بمكان قريب من شغلو )

مرح : كيفك حسن

حسن : تمام ، قليلي شو صاير مع اختك ليش ماعم تحاكيني

مرح : بابا عرف انو هي غابت عن المدرسة وراحت لمكان تاني ، كزبت عليه وعلى امي لهيك عصب منا كتير وضربا وحبسا بغرفتا ومنع عليها كلشي

حسن : نشالله بموت انا ، يبعتلي حما لك كيف هيك كيف بدا تتحمل

مرح : والله بابا كسرا تكسير جسما كلو مورم ومعلم عليه الضرب

حسن : ياربي يالله يالله دخيلك .. خلص روحي انتي بس طمنيني عنا مشان الله

مرح : حسن بس سماع هالكلمتين ؛ فرح بتموت فيك ، كون رجال معا وتعا خلصا من هالمصيبة يلي حلت عليها لان بابا ماعد يتركا بحالا ..

مرح تركت حسن بعد ماحكت هالكلمتين ومشيت ، اجت لعندي خبرتني شو صار ماكان طالع بإيدي شي كأني عايشة بعالم تاني ، انا منفصلة عنهن تماماً ..

مافي شي تغيير انا لساتني محبوسة بالغرفة وكل يوم بسمع كلام بشع هاد اذا ما بابا كان معصب وفات تفشش فيني
( بعد يومين ) ..

سوسن طلعت تجيب غراض ، وتركت مرح بالبيت ومعها المفتاح نبهت عليها انو ماتخليني اطلع الا اذا مضطرة ، مرح قدام اما كانت تحسسا انو هي بتكرهني ومعاملتا شيئة بس مشان اما تأمنلا ..

بعد ماطلعت سوسن ، مرح فتختلي الباب وطلعت اعدت برات الغرفة ، اتصلت بحسن ..

فرح : الو حبيبي
حسن : فرحتي كيفك شتقتلك ياعمري

( صرت ابكي ) : انا رح موت ، يلي صار رح يموتني ساعدني مشان الله

حسن : سامحيني بسببي صار معك هيك ، تطمني تؤبريني رح ساعدك ، حكيت مع ابي وجنيت عليه ورضيو يخطبولي ياكي

فرح : عنجد عم تحكي

حسن : اي والله المسا رح تتصل امي وتاخد موعد وتجي لعندكن هي وخالتي وعأساس انا وياكي مامنعرف بعض من قبل ، هيك حدى دلنا عليكن

فرح : حسن بحبك .. هلئ رح سكر قبل ماتجي خالتي لاتتصل لهون ، يلا باي .....

سكرت التلفون ومسحت الرقم من الكاشف ، ركدت لعند مرح ضميتا و انا عم امسح دموعي ..
رجعت ع غرفتي وهي سكرت الباب عليي وقفلتو

غرقت بالاحلام والفستان الابيض والامان يلي رح عيش فيه ، صرت فكر بكلشي بعدين ونسيت انا هلئ وين وشو صاير فيني

اجا المسا و انا كنت ناطرة اسمع صوت رنة التلفون ع أحر من الجمر ، ابي وسوسن و اخواتي اعدين بالصالة عم ياكلو ويضحكو و انا جابلو صينية فيا صحنين اكل ع غرفتي بس نسيت كلشي وكل تقكيري كان متركز ع التلفون ، اعدة بالارض ومنسندة ع التخت ايديي محاوطين ركبي يلي مقربتن ع صدري و مخي مو معي ..

بعد شوي رن التلفون ، انتفضت برجفة ..
سوسن : اهلا وسهلا ، اي هون تفضلي
اي دلوكن ع فرح ؟ ممم طيب شرفونا بكرى العصر ع الساعة 4 .. وسكرت الخط

صرت نط ع تختي و ع الخزانة و اضحك وزت المخدات ع الارض ، فرحتي لاتوصف ..
سمعت سوسن شو حكت مع بابا : خطابين لفرح
بابا : مين هنن
سوسن : مابعرف قالتلي حدا داللن
بابا : يلله منيح خلينا نخلص من هالهم

اجا تاني يوم ، طلعت من غرفتي تحممت وغيرت تيابي ، لبست بنطلون جينز وبلوزة مشلحة حمرا وفردت شعراتي وحطيت مكياج ناعم ..
وصلت امو وخالتو استقبلتن سوسن منيح ورحبت فيهن
اعظو بالصالة ، بعد شوي دخلت وبإيدي صينية القهوة و ايديي عم يرجفو

فرح : مرحبا

ام حسن : اهلا وسهلا حبيبتي

فرح : كيفك خالة

ام حسن : الحمدلله و انتي

فرح : الحمدلله

اعدت شوي ، وبعدين ئمت لبرى وضليت عم اسمع شو عم يحكو ، سوسن سألتا عن شغل حسن و دراستو .. و ازا عندو بيت وهدول الشغلات ..
لما راحو الجماعة اعدنا مع بعض ماحكت معي ولا كلمة

لما قرب موعد رجعة بابا ، فتت ع غرفتي ورجعو قفلو الباب
سوسن صارت تحكيلو لبابا عن الجماعة .

سوسن : شغلو موظف بمكتب ، عمرةدو 23 ، السكنة عند اهلو ، مافي شي خاص فيه ، بيدرس اعلام سنة تالتة

ابي : اييييييي شو صرلك ماعد سكتتي

سوسن : عم احكيلك عن عريس بنتك شبك

ابي : يعني انتي مافيكي نظر معقول جووز بنتي لواحد مابيملك قشة ، بالنهاية هي بنت مابرميها كيف ماكان شو جنيت سكري ع القصة وبس يتصلو قليلون مافي نصيب

رجعت لورى خطوتين دموعي ع خدودي بدون صوت ، تمسكت بغطا الطاولة وحسيت حالي دايخة ، بعدين ماعد توازنت وقعت ع الارض انا والغراض يلي ع الطاولة ..

اهلي سمعو صوت الفازة وقت انكسرت وصوت شي تقيل وقع ع الارض فتحو الباب عليي ، وفاتو لما شافوني هيك حملوني حطوني ع التخت وصارو يصحوني ..

فتحت عيوني و انا ماعم اتحرك ومصدومة بس عم اتطلع بالسقف وحجر عيني جامد ..

قصة تانية☹️💚

#قلبي_علينا
.............
قراءة ممتعة🦋💙"
#ⴅÂÐЄĦÂ

#قلبي_علينا #الجزء_5
@rwayate
عامر : الو مرحبا

فرح : لك اهلين عامر كيفك

عامر : الحمدلله ، ليكي اليوم جايين نسهر عندك انا ومنال

فرح : يامية اهلا وسهلا

جهزت البيت وطبخت و جهزت ضيافة ، حياتي صارت فاضية كتير ، ياسر كان مملي عليي البيت وقت مل انطرو ليجي بس هلأ ولاشي ..

( المسا )

فرح : اهلا وسهلا والله نورت

منال : تسلميلي بوجودك

عامر : فرح في شي صار ولازم تعرفي فيه

فرح : هير نشالله

عامر : المشروع يلي كنا عم نشتغل فيه انا و ياسر فشل ، وترتبت علينا ديون كبيرة ، و انا رح اترك الشغل و اطىع ع اوروبا ، و المفروض انك توقعي ع الوراق متلي

فرح : شو يعني ؟ لك شو عم تحكي

عامر : متل ماسمعتي

فرح : يعني مصاري ياسر وتعبو كلو راح ع الارض

عامر : اخخ تعبنا وشقى عمرنا راح

فرح : يالله دخيلك ..
_______
وقعت ع الوراق وصفيت بلا شغل ووارد شهري ، معي شوية مصاري كان مخبيهن ياسر .. اهلي ماخبروا بشي من يلي صار ولا انو خسرت شغل جوزي ، كنت متحملة كلشي ولا اني ارجع لحياة اهلي وظلم سوسن وعيشتون

( بعد خمس شهور ) .. < الحوار بالتركي >

- لعما شو ما بتفهمي انتي ، صرلك تلت شهور مادفعتي اجار البيت نقلعي طلعي ، صرت جاييكي خمس مرات

فرح : الله يوفقك بترجاك خليني بل بيت بس كم يوم لدبر اموري

- ولا سااعة تانية ، انا هون معك ساعة بتضبي اوعيكي وبتنقلعي غير هيك بجبلك الشرطة

فتت ع البيت و انا عم بتقطع ، ضبيت غراضي و انا عم ابكي كل ذكرياتي بهل بيت ، ريحة جوزي و التفاصيل الصغيرة و الحب وكلشي هون معلق ، مابعرف وين بدي روح ، يمكن نام بالشارع ، يمكن انسرئ ..

لملمت غراضي وطلعت و انا خاطري مكسور .. سكرت الباب و التفتت لآخر مرة اتطلعت ع البيت و البرندة يلي كانت اخر مكان بيجمعني انا وجوزي ..
حملت بنتي ورميت ذكرياتي ورايي و انا عم بحترق ..

رحت ع البحر اعدت ع كرسي انا وبنتي بحضني ، تفكيىي واقف مخي متعطل ، الدموع عم تنزل بهدوء ..
بلشت تغيب الشمس وبلشت اصحا ع حالي وين بدي روح ، وين رح نام ..
السما بلشت تغييم غيوم رمادية وتبخبخ .. حطيت بنتي بحضني و غطيتا بالجاكيت ..

اتذكرت انو حسن بتركيا ، مابعرف يمكن ماكان قدامي حل غير انو اتصل فيه يجي يساعدني ..
فتحت فيسبوك ، ودخلت ع بروفايلو ، عملت اتصال ..
قلبي مع كل رنة كان عم يخفق .. لحد ماسمعت صوتو : الو

فرح : الو

سكتنا للحظات ..

فرح : انا فرح ، حسن انت بتركيا صح

حسن : اهلين فرح كيفك ، اي بتركيا

فرح : مشان الله ساعدني انا واقعة بمشكلة كبيرة

حسن : خير احكي شبك

فرح : بتقدر تجي لعندي ..

دليتو ع المكان يلي انا فيه ، ووعدني انو هلال ساعة رح يكون عندي .. اعدت انطرو ، كانت المطر عم تنزل بقوة و انا ضامة بنتي ومغطيتا بحرام وبإيدي التانية شمسية ..

بعد شوي شفت حسن من بعيد ، صوت فيروز كان عم يعلا من شي مكان ..
قرب عليي شوي شوي و انا قمت من ع كرسيي و قربت خطوتين ..
وصوت فيروز عم يقول :
كيفك انت .. ملا انت ..
بتذكر اخر مرة شفتك سنتا ..
بتذكر اخر كلمة قلتا ..
وماعدت شفتك ..
وهلأ شفتك ...

اتطلعنا ببعض للحظات ، يمكن تذكرنا الماضي او يمكن هي نظرة عادية .. مابعرف

حسن : كيفك

فرح : تمام

حسن : حملي بنتك وتعي ع السيارة اوام هنيك منحكي حرام بلا ماتمرض

فرح : معلش تحملي شنتايتي ..

حسن : اي يلله روحي ، اوام السيارة هديك السودة

فتحت باب السيارة وطلعت اعدت وسندت راسي ع الكرسي ومسحت دموعي ..

حسن : شو صاير

فرح : تعبتني الايام ، وحملتتي فوق طاقتي

حسن : روئي ، وين منروح ؟

فرح : حسن انت وين ساكن

حسن : انا مستأجر غرفة وصالون بمكان قريب من شغلي

فرح : معك حدا بالبيت ؟ خرج تستقبلني ؟! اصدي فيني نام عندك ؟ مابعرف يالله

حسن : طيب ، رح نروح ع البيت وهنيك منحكي

وصلنا ع البيت ، بيتو كان مرتب كتير ونضيف صغير وململم ، غرفة وصالون و المنافع ..
حطيت بنتي ع الكنباية وغطيتا و اعدت ع الارض ، وهو اعد جنبي ع الارض

حسن : مارح تحكيلي شوفي ؟

فرح : جوزي توفا

حسن : ها الله يرحمو يارب من ايمتا

فرح : من 9 شهور بحادث سيارة ، خسر المشروع يلي كان يشتغل فيه وهسرت كل المصاري و الوارد يلي كان يجيني ، ماعد دفعت اجا البيت لانو معد معي و صاحب البيت العني رفيق ياسر يلي كان يساعدني سافر ع اوروبا و هي مختصر حياتي

حسن : يالله دخيلك شو عم بسمع فرح سمعيني انتي رح تضلي ساكنة هون بهل بيت لحتى الله يفرجا ونلاقي حل ، بغض النظر عن معرفتي فيكي من قبل بس بهيك وضع انتي بتضلي بنت بلدي و المفروض ساعدك و بيتي هو بيتك

فرح : عنجد حسن شكرا الك ، بس مابدي أثرك فيني وببنتي

حسن : ولايهمك بكل الاحوال انا عايش لحالي بالبيت ومابرجع لاخر الليل يعني اجارو بس لنام فيه مو اكتر ..

فرح : مو عرفانة كيف بدي اشكرك

حسن : مافي داعي هاد واجبي ..
________

#رند_محمد يتبع

#قلبي_علينا #الجزء_6_الاخير
@rwayate
الين : ماما بدي اكل

فرح : اي ماما ، روحي نادي لحسن يلله حطيت اكل

راحت الين لعندو وصارت تلعب بين رجليه و ايديه : تعا يلله نينة

ضحك حسن حملا و اجا لعندي : هي البنت رح تجنني مااشالله حولا شو حبيتا

فرح : هههه هلأ طالما هي حبتك فمعناتا الله يعينك ماعد تتركك

حسن : مو مشكلة دخيل ربا

اكلنا وشلنا الاكل وخلصنا ، هي اول ليلة الي بالبيت قبل كم ساعة وصلت لهون ولسا ماني عم خطط لشي ولاعم فكر ببعدين ..
الين نامت ع الكنباية و انا صرت اتتاوب ..

حسن : اومي خدي بنتك ع الغرفة وناوليني الحرام و المخدة يلي بالخزانة

فرح : وين بدك تنام ؟

حسن : هون ع هي الكنباية

فرح : لا مستحيل ، انت صاحب البيت و اخر شي تنام هون ماني قليلة ذوق لهل درجة نام انت بالغرفة و انا وبنتي هون

حسن : انتي قلتيا انا وبنتي ، يعني برأيك انت وبنتك بتوسعو ع هي الكنباية خلص فوتي نامي جوى

فرح : طيب

فتت زبطت نومة بنتي ع التخت ونمت جنبا يمكن هي اول ليلة من بعد ما مات جوزي بنامها و انا مرتاحة بالعادة بقضي الليل سهرانة وخايفة وعم يتهيألي اشكال و اصوات من الرعبة ..
فئت الصبح ، كان حسن بعدو نايم عملت قهوة و فيقتو

حسن : صباح الخير

فرح : صباح النور ، نحنا اسفين يمكن تكسرت بهالنومة

حسن : لك لااا والله متعود

فرح : يبعتلي حما

حسن : خرسي يالطيف شو نقاقة

فرح : ههههه ماتغيرت مو ؟

حسن : لا لا ابدا النق لساتو متل ماهو .. هههههه

سكتت شوي ، وابتسمت ..

الين : ماما وينو بابا

فرح : ماما كم مرة بدي فهمك انو بابا راح ع الجنة

الين : يعني ليش انا ماعندي بابا ، ماعد يرجع من الجنة ؟ طيب خليه ياخدني معو ع الجنة ؟

فرح : لك بعيد الشر عن قلبك ، ماما بابا مارح يرجع

الين : طيب بدي يصير عندي بابا

حسن : الين ، انتي مو حبيتيني ؟

الين : مبلا

حسن : طيب قوليلي بابا

الين : عنجد ماما

حسن : من بعد اذنك فرح ، زعلت عليها

فرح : اي ماما قوليلو لحسن بابا ...

الين : ياااااي يعني صار عندي بابا
_________

حسن راح ع شغلو و انا اعدت رتب البيت وحضر الطبخ ..
شوي روح ع المطبخ شوي ع الغرفة شوي كنس شوي لاعب الين ، حاسة بفرحة وراحة نفسية ..

المسا اجا حسن حطيت الغدا اكلنا ، انا رحت جليت و حسن اعد يلاعب الين .. اجيت ع الصالون و بإيدي صينية الشاي .. اتطلعت ع الين وحسن وهنن عم يلعبو ويضحكو
مبعرف ليش تعبو عيوني بالدموع .. تذكرت ياسر وقت كان يلاعبا وهي صغيرة ، وكيف كان عم يستناها تكبر شوي
تخيلت لو انو تزوجت حسن بالماضي وهي بنتنا ، تذكرت احلامي وواقعي تنيناتن تدمرو ..
مسحت دمعتي و كملت

فرح : يلله الينو بعدي عن عمو ليشرب الشاي

الين : لك بابا مو عمو

فرح : ههههه اي طيب بعدي عن بابا

هي راحت تلعب و انا وحسن اعدنا نشرب شاي ..
فرح : حسن معلش اسألك سؤال

حسن : اي سألي

فرح : انت ليش ماتزوجت لهلأ ؟

حسن : بزماني ظلمت معي بنت عشقتا وعشقتني بس ماقدرت اتجوزا ، راحت من ايدي وتجوزت متت من بعدا ..
وضعي بقرف ماني خرج جواز ، ومابدي اظلم بنت تانية معي .. يلي متلي مالازم يتجوزو ويحبو انا سافرت لهون لاقدر اسند اهلي شوي نسيت الجواز كلو من همومي الاكبر .. راتبي هون دوبو اجار هالبيت و مصروف اهلي كيف بدي اتجوز بنت العالم ، وعيشا و اسعدا والله تعبت

فرح : بعين الله

حسن : ييي نامت الين ع الارض قومي حطيا ع التخت بلا ماتاخد برد ..

حطيتا ع التخت و رجعت لعندو ، كان واقف جنب الشاشة وعم يدور بأشرطة الفيديو ..

فرح : شو عم تعمل

حسن : بتشوفي فيلم رعب ؟

فرح : لا مشان الله بكفيني الرعب يلي عشتو

حسن : هههه رح حط هاد الفيلم التركي ، رومنسي درامي حزين بس حلو

فرح : هات لنشوف

اعدنا نشوف الفيلم كان بيحكي عن تنين عشاق حبو بعض كتير عاشو احلا اللحظات وبعدين فترقو عن بعض بعد سنين طويلة اجتمعو من اول وجديد ، لما رجعت ايام الحب بيناتن ورجعو يحبو بعض من اول وجديد .. مات هو ورجعت تعاني البطلة لحالا وتتعذب من اول وجديد ..

من بداية الفيلم و انا بلشت ابكي كلشي كنت عم حس حالي عايشتو ، حاولت مايشوفني حسن انو عم ابكي بس ماقدرت يتطلع فيني ويقلي لك مجنونة حاج تبكي ، هاد تمثيل

فرح : لا مو تمثيل ، هاد الواقع و الحقيقة ..

سكت وشدني حطلي راسي على كتفو وقلي خلص لاتبكي ..
بعد شوي مسحت دنوعي وبعدتو عني : تاني مرة حطلي فيلم رعب معلش

حسن : طيب خلص بكرى ، قومي نامي هلأ
_________

وقفت بالمطبخ انا عم شوف تاريخ اليوم ..
6 / 7
يالله اليوم في مناسبة !! شو هي بس !
بتذكر في شي بهاليوم ... امممم : لااااا اليوم عيد ميلاد حسن ..
فكرت انو لازم اعمل شي خليه يفرح فيه بعرفو اديش مكتئب وحاسس بوحدة ، حبيت اعمل شي يفرحو ..

قررت اعملو مفاجئة ، حضرت اكلات ظريفة ( كاتو ، تبولة ، بطاطا ، وجاج مقلي ، و جيليه )
زينت البيت ونفخت بولين .. اذا انا يلي حضرت كلشي كنت مبس