_هيدا سلام حار و خاص من سامر يا قليل الشرف
فقت بالمشفى التابع للسجن انا و عم اتوجع من مكان الجرح ،قرب لعندي الممرض
_ رح اعطيك مسكن و ريح حالك هالفترة
اياد:بدي قدم شكوى بالناس يلي عملت فيني هيك
اطلع فيي الممرض و هز راسو
الممرض:انت شكلك جديد هون ما هيك؟
اياد:ايه
بقيت بالمشفى 5 ايام لتعافيت شوي و قدرت امشي على رجلي و رجعت على السجن ،انزويت بتختي بدون رغبة مني لاحكي و اتواصل مع حدا حتى قرب واحد من المسجونين لعندي ،اسمو حبيب الاسمراني لون بشرتو سمرة و قامتو طويلة و نحيف وشعرو اسود ،كان تختو تحت تختي
حبيب:لحمدلله على سلامتك
اياد:الله يسلمك
حبيب:شو تهمتك ؟
تجاهلت كلامو و سندت ضهري على التخت انا و عم اتوجع
حبيب:شو مشكلتك مع جابر؟
اياد:مين جابر؟
حبيب:هيداك المشراني يلي قاعد بالاخير،عم يطلع فيك من اول ما فتت ،هو يلي شك السكينة ببطنك ؟
اطلعت فيه لجابر ،كان قاعد عم يدخن و يزورني و رجعت اطلعت بحبيب
اياد:ما بعرفو
حبيب:بس هو بيعرفك
اياد:شو بدك مني انت؟
حبيب:شبك عصبت،ما بدي منك شي ،عم ندردش بس
اياد:ايه ما بدي دردش ،اتركني بحالي
حبيب:ايه على راحتك
بقيت عم اتفادى جابر و جماعتو بأي مكان ممكن التقي فين لحالي و اتفادى اي حدا تاني يفكر يختلط معي ،كنت عايش بعالم لوحدي ،بس حبيب ما كان يتركني ابدا ،دخل فيني متل السوسة حتى شفتو رفيق لوحدتي و سجني
اياد:شو تهمتك انت ؟
حبيب:محسوبك قتال قتلة
اياد:مين قتلت؟
حبيب:قتلت مرتي فتحية الخاينة الساقطة بس ما ندمان ابدا ...خود
اعطاني سيجارتو ،اخدت منا شحطتين و رجعتلو اياها
حبيب:و انت ؟
اياد:انا اذا بقلك قصتي ما رح تصدق و يمكن تفكرني عم اكذب
حبيب:جربني
اياد:طيب
خبرتو قصتي لحبيب و نحن عم نتشارك نفس السيجارة
حبيب: ايوا يعني البنت بتكون اختو لسامر الاشرس ما غيرو
اياد:انا ما بعرفن و ما بعرف هيك عالم ؛كل القصة صارت صدفة
حبيب:يا زلمة على هالحظ يلي عليك ،معناها منيح انك عايش لهلأ
اياد:هاي بتسميا عيشة
حبيب: هدول الجماعة كتير مشرانين ،هن اربع شباب كل واحد اوسخ من التاني و جابر صحبة مع الكبير ،لهيك ضربك سكينة باول يوم الك
اياد:ايه بس انا قدمت شكوى
انفجر حبيب بالضحك علي
حبيب:اسمع ...خود لقلك هالسيجارة و اشرب منا شحطتين و ركز معي ... بتعرف انو البشر ما بيختلفو عن الحيوانات بشي
نفخ اياد دخنة السيجارة بوجهو لحبيب
اياد:الله انعم علينا بالعقل و انت بتقول ما منفرق عن الحيوانات
حبيب:صح بس 90 بالمية من البشر ما بستخدموه لهل العقل و ال 10 بالمية البقيانين تعبانين منو ،شوف فيه بشر متل البقر همن ياكلو ليعيشو و حتى بتشوف البقر اكتر منفعة منن و بتشوف بشر متل الكلاب طول الوقت عم ينبحو عليك حتى تزتلن شقفة عضمة بلتهو عنك و بيسكتو و بشر متل الارانب هدول الدراويش يلي بمشو الحيط الحيط و بقولو يا رب السترة و بشر متل الاسودة عاملين حالن قوايا و يا ارض اشتدي ما حدا قدي و هن اضعف من برغشة و فيه بشر متل الحمير هدول بتركبن و بتندل رجليك علين بس فيه بشر متل الذئاب و هيدا اخطر نوع هدول الكل بهابن بس ما بيهابو من شي ،بياخدو حقن و لقمتن من تم السبع لهيك من هاللحظة بدك تنسى انك انسان لانو هون بالذات بعاملوك على انك حيوان بس بدك تكون شاطر و تختار اي حيوان حابب تكون .. . يعني من الاخر بدك تعمل حسابك انك قاعد بغابة القوي بياكل الضعيف فيا ،و ان لم تكن ذئبا اكلتك الذئاب
اياد:انا ما بيمشي معي هالحكي ؛انا انسان متعلم و ...
حبيب(مقاطع):علمك و شهادتك الجامعية انقعا و اشرب ميتا لانو ما بتفيدك بشي ،لو فادتك بشي ما كنت قاعد هلأ عم دخن سيجارة حشيش و انت مفكرة سيجارة عادية
قام اياد السيجارة من تمو فورا و ضحك حبيب عليه
حبيب:لسا ما اخد مفعولا معك ،اول درس الك حقك بتاخدو بأيدك و قوتك هون و اما القانون و هالشغلات الفاضية بدك تنساها تماما لانو لو موجودة ما كنت انت هون ،كنت برا و سامر و اخواتو جوا ،انت باينتك شب نظيف للاسف و مانك خبرة بس انا بوعدك انو بهالسنين يلي بدك تقعدن هون ،رح تصير حدا تاني رح تصير وحش... رح تتعلم انو سندك هو حالك و بس ،رح تتعذب و تتعب اول فترة بس بعدين رح تصير قوي و ما فيه شي بوقف بوجهك ؛اوعى تصدق و تفكر انو الحبس ممكن يقيم سلوك الانسان او يعاقبو على عملتو و انو يطلع ندمان و تايب بالعكس بيطلع حاقد على المجتمع و على القانون و على كل شي ، بيطلع ما بيعرف حالو و لا حتى يلي حوليه بيعرفوه لهيك بتشوف كل يلي بيطلعو من السجن بيرجعولو مرة تانية و حط براسك هون لو شافونا عم نقتل بعض ما بيدخلو ،بالعكس اريحلن منوفر علين لقمة الاكل
اخد السيجارة مني و سحب سحبة و بلعا