(الجزء الثاني)
@rwayate
صفيت بهالدنيي مع ولادي التنين وبنتي.. ما النا غير رب العباد .. ابي وامي ميتين
من سنين .. واخواتي كلن متزوجين ..
حمايي وحماتي كمان ميتين .. واخواتو لزوجي كلن متزوجين وعندن عيلة .. يعني
كلن عندن يلي مكفيهن وزيادة ..
ويا ريت لو وقفت الحالة ع هيك .. ما تركوني بحالي لا اخواتي ولا اخوات زوجي..
ربيع (اخو زوجي) : وانت كيف رح تبقي لوحدك من غير رجال .. هالشي ما
بصير عناا
هداية: انا عندي شباب تنين .. وهني معي .. وانتو كلكن حواليي .. ما فيني
اترك بيتي .. ولا الي حدا روح لعندو
ربيع: الك اخواتك.. روحي لعندن
اخدت نفس طويل لتهدي حالا.. واطلعت بربيع ..
هداية: ربيع .. انت شو يلي بدك ياه .. ايا اخوة يلي بدك ياني روح لعندن ..
انت مانك غريب وكلشي عندك واضح .. وبتعرف منيح اخوتي ونسوانن .. عند مين
بدك ياني روح .. لا تزيدا علي ربي يخليك ويحميلك ولادك .. ماني حمل هم زيادة
.. تركوني ببيتي ربي ولادي .. ما بدي منكن شي .. بس تركوني مع ولادي
وقت بلشت احكي معو دموعي نزلو لوحدن .. وما قدرت امسك حالي .. كنت من
جديد مخلصة العدة ولساتو الحزن بقلبي ..
قرب مني ربيع .. وقعد حدي ع الكنبة ..
ربيع: خلص .. خلص.. لا عاد تبكي .. اهدي
هداية: (تبكي) ربيع بترجاك .. انت بتعرف قديش محبتي لخالد .. وبتعرف كيف كانت علاقتي فيه.. موت خالد كسر ضهري يا ربيع .. ترك فجوة كبيرة بقلبي .. ماني قدرانة اتحمل اكتر .. بترجاك..
حط ربيع ايدو ع كتفي وكمل حكي ..
ربيع: طيب خلص اهدي .. وانسي لخالد
انا نقزت وقت ربيبع عمل هيك ووقفت بسرعة ..
هداية: (بعصبية) خالد ما بينتسا .. مستحيل انساه
وقف ربيع مقابيلي واطلع فيني بعيون شيطانية..
ربيع: انا بنسيكي ياه .. بس انت قولي اي
قلبي بلش يدق من الخوف.. وما صدقت يلي عم شوفو واسمعو..
هداية: ربيع .. انت اخو زوجي.. وع طول بعتبرك متل اخي .. وانت اكتر
واحد بفشلك قلبي .. ورح تضل هيك .. رح تضل اخي لاخر نفس بعمري
ربيع: اخوكي!! .. هداية .. انا بدي ياكي .. وبالطريقة يلي بتحبيها ..
ازا بتحبي من هاللحظة بتبلش علاقتنا وازا بتحبي بكتب كتابي عليكي بكتاب براني ..
المهم مرتي ما تدرى .. والك علي ما نقص عليكي وع ولادك شي ..
وقتا جسمي كلو صار يتنتفض .. وما عرفت كيف بدي اتصرف ومن غير وعي ..
هداية: لك تفووووووو عليك يا قليل الشرف.. لك شو مفكرني .. بنت شوارع ..
لك عم قلك انت اخي .. لك لك .. لك وربي ماني عرفانة شو بدي قلك .. لك تربة
اخوك لساتا خضرة.. لك شو طينتك انت شوووووووو
وقت صرت صرخ هو كتير تلبك ..
ربيع: ولييي خرسيييي .. خرسي بلا ما حدا يسمع .. وربي ازا حدا درا لقصو
للسانك .. ومن بكرة بتلمي تيابك وبتنقلعي من هون
وقتا ربنا عطاني القوة ..
هداية: اي لااااا ... ما حزرت انت يلي نقلع من هون .. واياك شوفك عندي مرة
تانية .. يا قليل الشرف .. والا وربي لخبرا لمرتك
كنت عم احكي وجسمي كلو عم ينتفض .. ماني قدرانة اتحملو ابدااا .. ما في اصعب
من هيك موقف ..
طلع ربيع من عندي وهو يتوعد ويتهدد..
هداية: لك اي رووووح .. ربي يسطفل فيك .. ربي يسطفل فيك
طالعتو لبرا البيت وبلشت بكي ..
هداية: وينك يا خالد .. وينك رحت وتركتني .. وينك يا ضو عيوني .. يااا
ربي ساعدني لاقدر اتحمل .. يااا ربي ساعدني يا الله
حياتي كانت كتير صعبة من غيرو لخالد .. الكل صار يطلع علي وكانو انا فريسة ..
والشاطر يلي بدو يقدر يكسبني..
ليالي ما نمتا من خوفي شي واحد يدخل بيتي وانا غفيانة.. كنت تم فايقة لوش الصبح
لحتى عيني تغمض لوحدا ..
ما حدا رحمني ولا قدر كسرتي .. ربيع من وقت يلي صار بينا ما رجع لعندي ابدا
وبلش يحرض الكل علي .. كلن قلبو ضدي فرد مرة ..
ما حدا فيهن ساعدني بشي غير عن الحكي يلي كانو يطالعوه علي بالحارة..
داقت علي الدنيي كتير .. ما كان الي معيل غير رب العالمين وشوية مصاري كانت
تطالعلي ياهن الدولة لولادي اليتامى..
لبنى: امييييييي
هداية: يا روحا لامك
لبنى: امي.. بنت عمي ربيع اشترت فستان كتير حلو .. وكانت عم تجالكني ..
بدي فستان متلا
وقت حكتلي هيك حسيت بسكينة غرستا بقلبي .. وقتا ما كان معي غير كام ليرة
مصمدتن للاكل والشرب ..
هداية: حاضر يا روحي
قضيت هديك الليلة ع بكي وانا فكر كيف بدي امن لبنتي يلي بدا اياه .. وكيف هالكام
ليرة رح يكفوني لاخر الشهر..
ومن ع بكرة الصبح .. فتحت خزانتي ولميت كلشي تياب عندي .. تركت بس كام
قطعة والبقية كلن اخدتن ورحت ع السوق الحرة..
هداية: مرحبا اخي
الرجال: اهلا يا اختي.. تفضلي
هداية: عندي هالكام قطعة .. بدي بيعن
الرجال: اي ماشي.. هاتي لشوفن
عطيتو اياهن وانا كتير خجلانة من حالي..
الرجال: اي تمام اختي
اخدن وعطاني حقن .. مسكت المصاري بئيدي ونزلو دموعي .. ضميت ايدي عليهن
وامشيت.. مشيت وانا ماني ع الدنيا.. كلشي حواليي كان اسووود .. اسوود
وضباب وما في غير صوت البكي والنوااح ببالي ..