قصة جديدة: #التائه
.............
قراءة ممتعة🦋💙"
#ⴅÂÐЄĦÂ

#التائه
#الجزء_الأول
#بقلم_فتاة_من_ورق

*صرنا بعمر ال16 سنة كل واحد فينا اجتمع مع امنا ريما لحالو بغرفة خاصة لتحكيلو حقيقتو مين هو ومين اهلو وشو جنسيتو .. حقيقتو يلي كانت تخفيها امنا ريما ورا حكاية اهلكن ماتو بحادث سيارة و نحنا جبناكن على دار الايتام لنربيكن و نكون اهلكن وبالفعل امنا ريما و امنا امينة و امنا سحر و غيرهن كتير ما بينعدو كانو النا اهل عوضونا عن الحنان و حسسونا بالامان و الحب ..

*ناطر دوري عم اتمشي بالممر رايح جاي متوتر و متحمس لحتى اعرف مين انا .. وخايف بنفس الوقت لاني عم شوف ردة فعل رفقاتي منهم عم يطلعو الدمعة بعينهن و منهم مبسوطين و منهم مكتئبين و وجههن اصفر ..

ريما : وائل .
وائل : نعم امي .
ريما : تفضل حبيبي خلينا نحكي .
وائل : اي .

*مشيت و بلشت دقات قلبي تتسارع قعدت على الكرسي و سكرت الباب امنا ريما و قعدت عالكرسي التاني قبالي .

ريما : وائل بدك تركز معي و تكون هادي .
وائل : اي انا مركز و عم اسمعك .
ريما : وائل انت مو متل باقي رفقاتك انت اهلك مو معروفين .
وائل : كيف يعني ؟ كيف مو معروفين ؟
ريما : انا لقيتك بلفة كان عمرك ايام على باب دار الايتام حملتك و دخلتك على الدار و عرفت انو اهلك وراهن قصة لحتى تخلو عنك بهالطريقة .
وائل : يعني انتي ما عندك اي معلومات عن اهلي ؟
ريما : لا
وائل : انا مو معروف ابن مين بكون طيب رفقاتي معروفين ولاد مين ولا كلن متلي ؟
ريما : ما بقلك كل رفقاتك انا بقلك اغلب رفقاتك معروفين مين اهلن بس كل واحد الو قصة بتختلف عن التانية .

*نزلت راسي و دمعو عيوني اهلي يلي كنت ادعيلهن بالرحمة صرت ادعي عليهن .. ليش عملو فيني هيك ؟ ليش تركوني و راحو ؟ شو ذنبي انا ؟

وائل : انا بدون ام و بدون اب و بدون هوية انا مين ميييين .
ريما : وائل اهدى كرمالي امسحلي هالدموع وقلي مين يلي رباك ؟
وائل : انتي .
ريما : مين يلي عطاك قوة الشخصية و درسك واهتم فيك ؟
وائل : انتي .
ريما : مين كان يسهر جنبك وقت تكون مريض ؟
وائل : انتي انتييي .
ريما : معناها انا امك انت ما لازم تبكي انت رجال و قوي خليك متل ما انت و ركزلي على دراستك بدي شوفك دكتور .
وائل : ان شاء الله .

*غسلت وجهي وطلعت من الغرفة ...

نضال : وائل يا وائل .
وائل : نعم .
نضال : انا كتير مبسوط لك طلعو اهلي عايشين .
وائل : الله يخليلك ياهن .
نضال : اول ما اطلع من الدار بدي روح زورهن .
وائل : طالما هن عايشين ليش رموك بدار الايتام ؟
نضال : امنا ريما قالتلي انو اهلي فقرا كتير ما قدرو يربوني جابوني انا و توأمي و ندمو لانو مرض توأمي مرضة قوية و ما قدرو يجيبولو الدوا وتوفى وانا مشان ما موت حطوني بدار الايتام بتعرف وائل انا ما زعلان منهم لانو هن عملو هيك لمصلحتي .
وائل : نيالك يا رفيقي .
نضال : وانت مين اهلك ؟
وائل : اهلي اهلي طلعو ميتين .

*كملت طريقي و صادفت رفيقي التاني كمان كان مبسوط و عم يضحك ...

ايوب : وائل .
وائل : نعم ايوب .
ايوب : بشرني عرفت مين اهلك ؟
وائل : اي عرفت بس ما بفيد لانو طلعو ميتين .
ايوب : ما رح تكمل فرحتنا يا رفيقي .
وائل : لا تخاف رح افرح لفرحك انت عرفت مين اهلك ؟
ايوب : اي عرفت ليك بتتذكر العيلة يلي كانو ياخدوني كل شهر 3 ايام و اقعد عندهن و يجيبولي العاب و تياب و كلشي اطلبو .
وائل : اي .
ايوب : هدول طلعو اهلي .
وائل : الله يخليلك ياهن ، بس ليش تركوك بدار الايتام ؟
ايوب : ما رضيت ستي ام ابي و حتى لما كانو يجيبوني على بيتهن يجيبوني بالسر و بدون ما حدا يدرى .
وائل : طيب ليش ؟
ايوب : هه لاني خلقت مشوه وقالت ستي هاد الولد شؤم عليكن و عطت اهلي حلين يا بيدفنوني يا اما يرموني بدار الايتام و اذا بخلوني عندهن رح تغضب ستي على ابي تركوني بدار الايتام و ناطرين ستي تموت ليرجعوني ، صحيح شكلي متل المنغوليين بس والله عقلي مافيو شي .
وائل : انت مافي منك يا رفيقي و الله ياخد ستك لتجتمع مع اهلك .
ايوب : امين يا رب .

*مشيت و وقفت جنب السور يلي بيفصلنا عن قسم البنات حملت بحص و رميتهن لجهة البنات .. السور ما كان عالي كتير ..

كندا : وائل اشتقتلك .
وائل : شو كمان اليوم طالعة على كتف رفقاتك ؟
كندا : لا واقفة على 6 كراسي هههه
وائل : قوية
كندا : بتعرف انا اليوم كتير مبسوطة .
وائل : كمان انتي عرفتي مين اهلك .
كندا : خبر احلى بكرى ابي رح يجي ياخدني من الدار .
وائل : شو هالحكي زيارة صح ؟
كندا : لا رح ياخدني لحتى عيش معو باقي عمري .
وائل : ليش ليييش .
كندا : شو ليش وائل يعني ما فرحتلي ؟
وائل :........
كندا : ليك بصراحة انا اليوم سمعت شي بيقهر بس عم حاول اتغلب عليه .
وائل : شو الشي ؟
كندا : طلعت امي ميتة و مرت ابي هي يلي جابتي لهون لما كان عمري سنة بس هلأ مرت ابي هي يلي طلبت اني ارجع لانها ندمت .
وائل : هه منيح تذكرت تندم بعد 15 سنة .
كندا : وائل لا تخرب فرحتي .
وائل : الشي الوحيد يلي كان مصبرني هو وجودك كندا رح اشتقلك كتير .
كندا : وانا كمان رح اشتقلك ، ليك وائل

مسيك هي الميدالية هي نصين نص معي و هاد النص التاني معك ما رح انساك .
وائل : انتبهي على حالك و خليكي متل ما انتي بتتغلبي على كلشي بيقهرك .
كندا : انا صار لازم روح خايفة امنا امل تشوفني بتعصب عليي بعدين .
وائل : الله معك .

*لمحت دمعة بعين كندا وهي نازلة قد ما رح يوجعني بعدها رح ادعيلها بالسعادة .. رجعت على الغرفة قعدت على تختي و صرت اتأمل وجوه رفقاتي ...

اسماعيل : وائل شبك ؟
وائل : ولا شي شو انت كمان عرفت مين اهلك ؟
اسماعيل : هه الله لا يسامحهن مين ما كانو وائل انا ما عرفت اهلي ولا رح اعرفهن وحتى ريما ما بتعرفهن جابني لهون رجال ختيار قال لقاني على باب الجامع .
وائل : ههه وانا لقتني ريما على باب دار الايتام وما بتعرف مين اهلي .
اسماعيل : نيالك عالسريع عرفو وين يرموك انا لا خلوني اعمل جولة عند الجامع اول هههه .
وائل : شوف ماهر عم يبكي امشي لنشوف شو قصتو .

اسماعيل : ماهر .
ماهر : شو بدك .
اسماعيل : ليش عم تبكي لك الرجال ما بيبكو .
ماهر : لاني عرفت مين اهلي .
وائل : اي و عم تبكي اكيد هي دموع الفرح .
ماهر : لا هي دموع حزن و حرقة قلب لانو اهلي طلعو ميتين عنجد وانا يلي كنت مستني هاليوم على امل انو شوفهن .
اسماعيل : احمد ربك يا ماهر انو بتعرف مين اهلك ما متلي لقيط .
ماهر : ليش انت طلعت لقيط .
اسماعيل : اي بس لقيط شريف عند باب الجامع .
ماهر : ههههه
وائل : شر البلية ما يضحك ههههه .
اسماعيل : يلا قوم غسل وجهك و ادعيلهن بالرحمة .
ماهر : حاضر .

*بهاليوم حسدت بعض يلي حواليي لانو عرفو حالن مين هن و ولاد مين وشو جنسيتهم و تجدد املهم بالحياة ... بس انا مين و ابن مين طيب اهلي عايشين ولا ميتين الله لا يسامحهن اذا كانو عايشين ليش رموني هيك ليش تركوني مجهول الهوية ليش ؟؟؟
#التائه
#الجزء_الثاني
#بقلم_فتاة_من_ورق

*مضيو سنتين و بفضل دعم امنا ريما قدرت اخد شهادة البكلوريا هي وقفت جنبي بكل مراحل عمري و قوتني عالحياة عطتني الشجاعة لإتغلب على كل همومي و مشاكلي ...

وائل : امي بصير احكي معك على انفراد ؟
ريما : اي اكيد حبيبي تفضل و سكر الباب وراك .
وائل : حاضر .
ريما : عم اسمعك .
وائل : امي انا صار يحقلي اطلع من دار الايتام .
ريما : اي .
وائل : انا بدي اطلع .
ريما : عالاقل خود شهادة جامعة و بعدين طلاع .
وائل : امي لو سمحتي لا تضغطي عليي ابقى هون انا بدي اطلع بدي شوف الدنيا و بدي انسى همي .
ريما : وين بدك تقعد ؟ شو بدك تشتغل ؟
وائل : ما بعرف بس يلي بعرفو انو لازم اطلع .
ريما : ليك خلي هاد العنوان معك ممكن يفيدك .
وائل : متأكدة ؟ معقول ممكن حدا يفيدني بهالدنيا ؟
ريما : اي متأكدة هاد عنوان المرة يلي رح تساعدك ويلي طول عمرها بتساعدك .
وائل : طول عمرها بتساعدني ؟
ريما : هي متكفلتك من صغرك و هي يلي بتدفعلك مصاري لنجبلك شو ما بدك .
وائل : هه قالت بتكفل يتيم بكسب ثواب ما تعرف اني لقيط .
ريما : وائل حبيبي ما تحكي هيك انت احسن انسان بالدنيا .
وائل : شكرا الك امي .
ريما : رح تضل تزورني ؟
وائل : اكيد .
ريما : خلي هالمصاري معك رح تحتاجهن .
وائل : شكرا .

*حضنت ريما و بست ايدها و طلعت من الدار .. هي كانت اول مرة بطلع فيها من الدار لحالي ...

وائل : لو سمحت فيك توصلني على هاد العنوان ؟
الشوفير : اي تفضل .

*مشيت السيارة و انا صرت اتأمل الدنيا ناس كتير و سيارات كتير معقول اهلي بين هالناس ؟ انا عندي اخوة ؟ الف سؤال ببالي ما كان الهن جواب ..

الشوفير : وصلنا .
وائل : يعطيك العافية .

*حاسبت الشوفير و نزلت وقفت قبال بيت حر متوسط الحجم تشجعت و كملت خطواتي و دقيت الباب .. فتحتلي الباب بنت عشرينية بعدين توضحلي انها الخادمة ...
داليا : اهلا مين حضرتك ؟
وائل : انا وائل هون بيت الست
*تطلعت عالورقة و رجعت ابتسمت و قلت...
وائل : هون بيت الست نهال ؟
داليا : اي تفضل معي .

*دخلت عالبيت و صرت اتأملو من جوا كان بيت مريح و هادي ...
نهال : اهلا وسهلا يا وائل .
وائل : اهلين فيكي يا مدام .
نهال : حكت معي ريما من دار الايتام و قالتلي انك رح تجي لعندي مشان ساعدك .
وائل : اي صحيح .
نهال : طيب خلينا نتغدى و بعد الغدا منحكي .
وائل : شكرا الك .

قعدنا حوالي السفرة 5 دقايق صمت ما حكيت معها ولا هي حكت معي نهال مرة ختيارة وانا كان بالي مشغول بمستقبلي شو رح اشتغل ؟ ومن وين بدي بلش ؟ .. خلصنا غدا و صار وقت نحكي ...

وائل : مدام نهال انا ما بعرف من وين بدي بلش .
نهال : انا رح بلش انت بس اسمعني .
وائل : تفضلي .
نهال : بما انك متربي بدار الايتام انت بتجهل كتير شغلات بالحياة وانا بما اني كفلتك من صغرك لازم كمل معك لحتى يشتد عودك .
وائل : بتكوني فضلتي عليي .
نهال : بدي ياك تكمل دراستك هلأ بلشت حياتك و الحياة صعبة كتير الحياة معركة ولازم يكون معك شهادة لتقدر تفوز بهالمعركة .
وائل : بس انا ما بعرف شو بدي ادرس .
نهال : رح تدرس ادارة اعمال و بفترة دراستك رح شغلك عندي بالمصنع انا صاحبة مصنع اجبان و

البان بالبداية رح تكون مجرد عامل لتطالع مصروفك و اجار بيتك و بس تاخد شهادتك رح رفعك .
وائل : شكرا الك يا مدام جميلك ما رح انساه طول عمري .
نهال : حاليا في شقة صغيرة للاجار قريبة على بيتي رح تنام فيها الليلة .
وائل : كيف قررتي رح نام فيها الليلة ونحنا ما حكينا مع صاحب الشقة ؟
نهال : ابني بكون صاحب الشقة بس هو مسافر هلأ لهيك انا باخد الاجار منك .
وائل : اديش بدك اجار انا معي هلأ مبلغ منيح .
نهال : هلأ ما بدي منك اجار بس تشتغل و تقبض اول راتب بصير باخد منك والمبلغ يلي معك اشتري فيه يلي ناقصك لبيتك .

*بلشت حياتي بشكل جديد صرت داوم الصبح بالجامعة و بعد الضهر بالمصنع انشغالي بالحياة خلاني انسى همي و ما فكر انا مين .. صار عندي رفقة جدد بالمصنع و رفقة بالجامعة غيرو نفسيتي للأحسن .. بس في ناس بتضل تحاول تزعجك مهما حاولت تتجنبهن .

وائل : يا شباب تعالو ارتاحو من الشغل جبتلكن معي فطاير .
محمد : وانت بأي حق بتعطينا استراحة .
وائل : اي استراحة صغيرة يعني بتاكلو فيها و منرجع منكمل شغل .
محمد : ههه انسى بدك نهال خانم تعلق مشنقتنا ترك الفطاير من ايدك خفف من ولدنة الحرام يلي ماشية بدمك و تعال بلش شغل .
وائل : شو قصدك
محمد : اه نسيت انو ما فيك تخفف ولدنة حرام لانو خلقت معك ، بالله ما عرفت مين ابوك ومين امك ؟
وائل : انت كيف بتسمح لحالك تحكي معي بهالطريقة .

*مع انو كان عم يحكي الحقيقة بس انا ما قدرت امسك حالي مشيت باتجاهو و بلشت فيه ضرب الكل حاولو يبعدوني عنو بس ما قدرو ، من القهر يلي فيني فقدت الاحساس و تحولت لوحش .. ضليت اضربو لحتى اغمى عليه .

نهال : كيف بتضرب عامل عندي .
وائل : ما قدرت امسك حالي لك انا فكرت حالي عامل منيح قلت خليهن ياكلو و يرجعو لشغلهن هاد العامل استغل معاملتي المنيحة لحتى يهيني ، اصلا هو شو عرفو بحقيقتي ؟!
نهال : شو ما كان انت بمكان شغل و ما بحقلك تمد ايدك ولا على اي عامل انت بتعرف بهيك ظرف انا فيني افصلك من الشغل لك لسا ما كملت الشهر و ضربت عامل الو سنين عندي .
وائل : اسف ما رح تتكرر .
نهال : طلاع شوف شغلك .
وائل : حاضر .

*نزلت لتحت و بلشت شغلي .. قلت لحالي خليني ساكت لحتى اتخرج بلاقي شغل احسن .

فادي : وائل .
وائل : ما بدي احكي مع حدا .
فادي : وائل انا حاسس كلشي صار معك بسببي انا حاسس بالذنب اتجاهك .
وائل : ليش ؟
فادي : لانو انا يلي خبرت محمد حقيقتك بس والله بدون قصد يعني ما بعرف كيف حكيت .
وائل : لا والله ما الحق عليك الحق عليي انا يلي اعتبرتك رفيقي المقرب و حكيتلك حقيقتي بكل الاحوال كل شباب المصنع عرفو حقيقتي هلأ و يحكو شو ما بدهن رح اعمل حالي ما سمعان مشان ما اخسر شغلي .
فادي : وائل استنى وائل .

*رجعت على بيتي اكلت و بلشت دراسة مشان انسى يلي صار معي تمنيت لو انو ما طلعت من دار الايتام تمنيت لو انو ما عرفت هالعالم تمنيت لو ما خلقت بالاساس بس الله لا يسامح اهلي .
#التائه
#الجزء_الثالث
#بقلم_فتاة_من_ورق

نهال : اكيد عم تسألو حالكن ليش جمعتنا المدام نهال .
فادي : اي .
نهال : مشان وائل جمعتكن لحتى الكل يفهم انو هالانسان خط احمر و ما بسمح لأي واحد فيكن يتعرضلو او يزعجو .
محمد : بدال ما تفصليه لانو ضربني .
نهال : بتستاهل الضرب انت يلي بلشت فيه .
محمد : على شو حاببتيه .
نهال : استحي على حالك ولا قلك انت مفصول من المصنع .
محمد : فصلتيني كرمال هالحشرة ؟
نهال : فصلتك لانك قليل ادب انقلع لبرا يلااا .
محمد : ماشي .
نهال : و اي واحد فيكن رح يغلط متل محمد رح ينفصل كمان يلا كل واحد على شغلو .
سامر : حاضر يلا قومو شباب .

مضيت الشهور و اجت الشتوية و قسوتها كنت واقف عم اتفرح عالدنيا من الشباك و المطر غزير ابتسمت لما شفت ولد صغير عم يركض جنب امو رفع جاكيت امو وصار يمشي تحتو ليحمي حالو من المطر .. اختفت بسمتي لما تذكرت انو امي و ابي تركوني وما سألو عني ولا مرة شو كان صار لو انا متل هالطفل .. رنة تلفوني قطعت تفكيري ...

وائل : اهلين مدام نهال .
نهال : وائل شغالة الصوبيا عندك ؟
وائل : اي شغالة .
نهال : بردان شي ؟
وائل : لا لا ابدا .
نهال : طيب انا بعتت الشوفير لعندك جايبلك معو اكل .
وائل : بس في عندي اكل .
نهال : هاد الاكل انا طابختو وفي شوربة كمان بتدفيك بهالبرد .
وائل : شكرا الك .
نهال : اذا بتحتاج اي شي اتصل فيني .
وائل : مدام نهال .
نهال : نعم .
وائل : الله يخليلي ياكي .
نهال : يلا انا بدي سكر هلأ بكون وصل الشوفير لعندك ، سلام
وائل : سلام .

* بهالليلة حسيت بحنية صغيرة من نهال ذكرتني بحنية ريما و صرت استنى يطلع الضو مشان روح و زور ريما ..

*بصباح اليوم التاني و عالساعة 10 بالزبط كنت واقف عند دار الايتام ..

كندا : انت وائل ؟
وائل : كندا ماعم صدق عيوني .
كندا : كيفك .
وائل : يا الله شو مشتقلك .
كندا : وانا كمان مشتاقتلك كتير متغير شكلك انا شبهت عليك لهيك سألتك انت وائل .
وائل : بس انتي لساتك متل ما انتي حلوة .
كندا : كيف ع

م تقضي ايامك .
وائل : دراسة و شغل وانتي .
كندا : دراسة و شغل ههه شغل بالبيت طلعت مرت ابي بدها ياني ارجع مشان كون خدامة .
وائل : طيب ليش ما طلبتي من ابوكي يرجعك على دار الايتام .
كندا : ما رضيت مرت ابي خلص انسى شو مين جاي تزور ؟
وائل : بدي زور ريما .
كندا : انا جاي زور رفقاتي انبسطت بشوفتك .
وائل : وانا كمان .

رجعنا افترقنا بهدوء متل اخر مرة ..

وائل : اف كيف ما اخدت رقمها خلص وانا طالع باخد رقمها يمكن صادفها عالباب مرة تانية .
ريما : وائل .
وائل : امي كيفك .
ريما : هيك ماعاد سألت عني .
وائل : الحياة يا امي شغلتني عن التفكير حتى .
ريما : يلا احكيلي من اول ما طلعت لهاللحظة .
وائل : حاضر .

*ودعت ريما و طلعت من الدار نطرت كندا اكتر من نص ساعة وما شفتها فقدت الأمل و مشيت ..

فادي : تأخرت وائل وينك لهلأ .
وائل : كنت بدار الايتام .
فادي : هلأ الخانم بتبهدلك .
وائل : خلص سكوت ما حدا منتبه .
سامر : ومين قلك ما حدا منتبه بس اصلا شو رح يصير الخانم بتحبك و ما رح تحكيك شي بس بتجتمع فينا و بتقلنا ما نزعجك .
وائل : شو .
فادي : اهدى وائل .
وائل : انت كيف بتحكي هيك عالخانم .
سامر : انا عم احكي يلي شايفو .
وائل : هي عم تعاملني كأني ابنها وما بسمحلك لا انت ولا غيرك تحكو عنها .
سامر : اي طلاع من هالبواب .
وائل : يا واطي .

* كمان هالمرة ما قدرت امسك حالي وكان مصير سامر متل مصير محمد .. كترت اخطائي و مشاكلي و زاد خجلي من نهال ..

الساعة 8 المسا..
وائل : نعم مدام .
نهال : تعال لعندي عالبيت هلأ .
وائل : حاضر .

*شو بدها مني اكيد رح تقلي انها فصلتني من الشغل .

وائل : ما تحملت اسمع حكيو عليكي يا مدام انتي مفضلة على راسي .
نهال : بس انا شو نبهتك .
وائل : خلص انا رح استقيل .
نهال : لا قصدي لا ما تستقيل مسامحتك هالمرة .
وائل : انا خجلان منك يا مدام انتي بس كفلانتيني و انا هلأ صرت كبير وانتي ما مجبورة تضلي عم تعتني فيني و سقطت عني الكفالة اصلا ، فضلك ما رح انساه بس ما رح ابقى بالمصنع ما بدي جبلك وجع راس انا مجرد لقيط
نهال : سكوت وائل انا ما بسمحلك تحكي عن حالك لقيط وما بسمح لحدا يقلك لقيط .
وائل : هي حقيقة بدنا نكذب الحقيقة ؟
نهال : لا مو حقيقة انت حفيدي انت ابن بنتي بكفي تقول عن حالك لقيط .
وائل : حفيدك ؟
نهال : اي اي حفيدي يلي ما قدرت ربيه بعد وفاة امو حفيدي يلي انجبرت انحرم منو 18 سنة بعد ما نحرمت من امو ماعاد اقدر خبي لانو بدي احضنك بدي شم ريحة بنتي فيك .
وائل : شووو شو عم تحكي انتي انا ماعم اقدر استوعب هالحكي انتي ماعم تمزحي معي صح ؟ اذا مزحة قولي بسرعة .
نهال : حبيبي والله مو مزحة هي حقيقة ، تعال خليني احضنك يا روحي انت .
#التائه
#الجزء_الرابع
#بقلم_فتاة_من_ورق

وائل : طيب فهميني انا ليش تربيت بدار الايتام ليش ما ابي رباني او انتي .
نهال : عيلة اهل ابوك من اغنى الناس بهالبلد و بما انو جدك الله يرحمو صاحب مصنع و املاك و من عيلة راقية اجو اهل ابوك و خطبو امك لانو اعتبروها من نفس الطبقة مع انو املاك جدك ما بتجي نقطة ببحر املاك اهل ابوك .. تزوجت امك و راحت عاشت بقصر العيلة كل الدلال الها لانها مرت الكبير ولا مرة حدا زعجها ولما طلعت حامل فيك من فرحة اهل ابوك ضلو سبع ايام يدبحو خواريف و يوزعو للناس ولما صارت امك بالشهر السابع اجت لعندي عم تبكي ...
*******************************************
نهال : يا بنتي شبك ليش عم تبكي بس فهميني .
اسيل : كنت عند الدكتور من شوي .
نهال : الجنين فيه شي ؟
اسيل : لا الجنين كتير منيح بس انا يلي رح موت لما اولد .
نهال : بنتي ما تخافي كلنا ولدنا وما صرلنا شي .
اسيل : انا غير الكل خبرني الدكتور انو ضعف ضربات قلبي رح تتسب بموتي لما اولد .
نهال : شو شو هالحكي اكيد هاد الدكتور ما بيفهم امشي بدي اخدك على دكتور تاني .
*******************************************
نهال : و الدكتور التاني و التالت و الرابع كلهن اكدولنا هالحكي .
وائل : يعني امي كانت مريضة قلب ؟
نهال : ضربات قلبها كانت ضعيفة بس فرحة بيت جدك هي يلي خلتها تستمر بحملها و تنسى موضوع قلبها .. ولما صارت بالشهر التامن ...
*******************************************
اسيل : ماما بدي اطلب منك طلب .
نهال : طلبي حبيبتي .
اسيل : بس اولد طالعي شهادة وفاة من المشفى انو ولدتو ميت و خدي الولد و حطيه على باب دار الايتام ابني ما لازم يعيش مع اهل ابوه وما لازم يعيش معك لانو رح يعرفو انو هاد ابنهن .
نهال : ليش ؟
اسيل : لانو زوجي و اهلو اكبر تجار مخدرات بهالبلد .
نهال : شووو وانتي من ايمتا بتعرفي بهالشي .
اسيل : من اسبوع و اليوم لحتى لقيت هاد احسن حل ليعيش ابني بأمان و يتربى ترباية صالحة و بعيدة عن مال الحرام .
نهال : اخ يا بنتي اخ والله عقلي ماعاد يتحمل .
اسيل : اعتبري هالحكي وصيتي لما موت .
نهال : يا عمري انتي يا ريت انا ولا انتي .
*****************

: ههه يا ستي امي الله يرحمها وانا قلتولو متت و ابي كان شب يعني شي طبيعي يتزوج .
نهال : خلص سكوت و كمل اكلك قال شي طبيعي قال .

*صرت كل اسبوع روح و شوف ابي من بعيد لبعيد ، خالي استلم المصنع و صار عندي وقت كتير للدراسة مضيت السنين و تخرجت بدرجة ممتاز من الجامعة .
#التائه
#الجزء_الخامس
#بقلم_فتاة_من_ورق

قدمت اوراقي لاتوظف بشركة ابي و بعد اسبوعين بعتولي انو انقبلت و بلشت دوام .. اول يوم دوام الفروقات الطبقية كانت واضحة بالشركة مكتب المدير ابي حوالية مكاتب اخواتي و ولاد عمي كل واحد فيهن رئيس على قسم معين بما انو الشركة شركة ادوية و الباقي مجرد عمال عاديين ...

وائل : يعطيكي العافية .
دانة : الله يعافيك انت الموظف الجديد ؟
وائل : اي قالولي اطلع لعند رئيسة قسم المضادات الحيوية حضرتك رئيسة هالقسم ولا انا غلطان ؟
دانة : وصلت ، احكيلي عن حالك .
وائل :اسمي وائل عمري 22 دارس ادارة اعمال و متخرج بدرجة ممتاز .
دانة : ممتاز .
وائل : بدك تعرفي شي تاني ؟
دانة : لا لما بتطلع من مكتبي اول مكتب على ايدك اليمين هاد مكتبك .
وائل : ليش انا الي مكتب ؟
دانة : وظيفتك تكون مساعدي و تشتغل شغلي لانو انا ما بجي غير ساعة باليوم .
وائل : بس هاد شغل و الدوام الرسمي 6 ساعات .
دانة : عمي المدير هون انت ما بحقلك تحاسبني يلا تفضل على شغلك .
وائل : حاضر .

*دخلت عالمكتب حجمو صغير و متواضع...
وائل : هه والله شو الدلال للقرايبين يا ابي بيجو ايمتا ما بدن و بروحو ايمتا ما بدن بس شو هالبنت عمك يا وائل شي بياخد العقل .
*ربع ساعة و رن التلفون يلي بالمكتب ...
وائل : ايوا نعم .
دانة : تعال لعندي عالمكتب .
وائل : حاضر .
الله يصبرني شو خدام عندك انا من اولها هيك .. طلعت من المكتب و دقيت الباب .

دانة : تفضل وائل .
وائل : نعم .
دانة : مسيك هي الملفات .
وائل : شو كل هاد .
دانة : ملفات خاصة بالموظفين الموجودين بهاد القسم وفي الملف الاسود ايام غياب كل موظف بدي ياك تسجلهن بالملفات الخاصة .
وائل : حاضر في شي غيرو مدام ؟
دانة : عفوا شو هي مدام قول انسة ، انسة دانة .
وائل : ماشي انسة دانة .

*حملت الملفات و رحت على مكتبي فوق ال60 ملف و بلشت اشتغل .
وائل : 4 سنين دراسة و امتياز مشان بالاخير اكتب ايام الغياب للموظفين معلش وائل لازم تصبر لتوصل لأبوك .

*مضى شهرين بشغلي وانا ولا مرة صادفت ابي .. اكتشفت انو الو باب خاص بيطلع منو عامل لحالو حصانة من شو خايف ما بعرف ؟

جلال : ماعم اقدر اوثق بالناس يلي حواليي بدي واحد اقدر اوثق فيه ماعم لاقي .
دانة : عمو انا بعرف واحد بتقدر توثق فيه .
جلال : مين هو .
دانة : موظف اسمو وائل وظفتو عندي من شهرين بينوثق فيه .
جلال : بكرى بعتيه لعندي عالمكتب .
دانة : حاضر عمو .
جلال : ما رجعو ايهاب و ايمن ؟
دانة : لا عمو .
جلال : الله يصبرني على هالولاد و اخوكي ايمتا راجع من السفر ؟
دانة : لسا ما مبين .
جلال : تصبحي على خير .
دانة : وانت بخير عمو .

وائل : ما بعرف ليش خايف على حالو كل هالشي يا ستي .
نهال : ما لمحتو ولا مرة ؟
وائل : ابدا حتى هو بيطلع من باب خاص الو لحالو .
مهيب : اي خال لانو ابوك خايف على حياتو تاجر المخدرات ما بيعرف حالو ايمتا بينقتل .
وائل : انا رايح نام تصبحو على خير .

*حكي خالي شوشني و خلاني خاف على ابي وقررت انو تاني يوم بلش اتقرب منو لو شو ما كان التمن ..

وائل : صباح الخير انسة دانة .
دانة : صباحك ورد .
وائل : انتي الورد بذاتو انسة .
دانة : قلي دانة بدون انسة .
وائل : اه موافق .
دانة : المدير بدو بشوفك .
وائل : المدير جلال ؟
دانة : اي ليش مستغرب تفضل معي .

*بلشت تزيد فرحتي بكل خطوة عم امشيا لحتى اوصل على مكتب ابي فرحتي انو رح شوفو عن قرب فرحتي انو رح اسمع صوتو فرحتي انو رح كون جنبو ولو لدقايق .

جلال : تفضل .
دانة : كيفك عمو .
جلال : اهلين حبيبتي .
دانة : هاد هو الموظف يلي حكيتلك عنو .
جلال : ماشي تركينا لحالنا .
دانة : حاضر عمو .
جلال : اسمك .
وائل : اسمي وائل .
جلال : انا ما بحب المقدمات يا وائل خبرتني بنت اخي دانة انو بقدر اوثق فيك رح حطك تحت التجربة اسبوع و رح تقعد بالمكتب يلي جنب مكتبي وفي باب بين مكتبك و مكتبي واذا نجحت بهالاسبوع رح تصير ايدي اليمين .
وائل : اي بس شو طبيعة الشغل ؟
جلال : بعدين منحكي بهي التفاصيل هلأ اهم شي لازم تعرفو انو روح الانسان بالنسبة لجلال بيك كتير رخيصة اذا حاولت تلعب بديلك رح تطير رقبتك .
وائل : هه ولو جلال بيك ان شاء الله رح كون عند حسن ظنك .
جلال : شايف هاد الباب .
وائل : اي .
جلال : افتحو رح تلاقي حالك صرت بمكتبك .
وائل : حاضر .

*فتحت الباب شفت مكتب كبير كتير و فخم بس شو شغلتي ما بعرف ...

جلال : عجبك المكتب ؟
وائل : اي بس لهلأ ما خبرتني شو شغلتي ؟
جلال : رح تستلم كل حسابات المعمل و تدير كل اعمالي العامة مع باقي الشركات درجة ممتاز مو سهلة .
وائل : بأكدلك رح كون قد هالحمل .

*بعد يومين اشتريت جها

ز صغير مشان اسمع شو عم يصير بغرفة الاجتماعات حطيت الجهاز بقفا الطاولة و شغلتو و مشيت .. الحمل صعب عليي كتير كيف بدي خلي ابي يترك شغلة التجارة و يتوب .

*الساعة 12 كنت عم اشرب القهوة بمكتبي الجديد اشتغل الجهاز يلي معي و بلشت اسمع كلشي عم يصير بقلب غرفة الاجتماعات ...

جلال : بعد بكرى رح تكون اخر عملية بتجارة المخدرات انا خلص تعبت من هالشغلة ختيرت و قررت اتركا.
جهاد : شووو اخي شو عم تحكي ؟
#التائه
#الجزء_السادس_الأخير
#بقلم_فتاة_من_ورق

جلال : بعد بكرى رح تكون اخر عملية بتجارة المخدرات انا خلص تعبت من هالشغلة ختيرت و قررت اتركا.
جهاد : شووو اخي شو عم تحكي ؟
جلال : متل ما سمعت .
جهاد : بس هاد مصدر رزقنا .
جلال : منفتح معمل تاني و منضاعف رزقنا بس تجارة المخدرات خطرة على حياتي ، انتهى الاجتماع .

*فرحت لما سمعت قرار ابي .. وقبل ما سكر الجهاز بشوي سمعت حدا عم يحكي بصوت واطي عليت الصوت و رجعت اسمع ...

سمير : انا ما عجبني قرار البيك .
مرهف : والله ولا انا يا سمير بس شو بدنا نعمل .
سمير : بتعرف مرهف اذا البيك بيترك تجارة المخدرات انا و انت رح يقل راتبنا .
مرهف : طيب شو العمل ؟
سمير : القتل لازم نقتل البيك مشان اخوه جهاد يستلم محلو و يضل عم يتاجر بالمخدرات .
مرهف : ك كيف بدك تقتلو ؟
سمير : بيوم العملية الاخيرة رح روح متلتم انا و بقوصو من بعيد و بهرب وهيك منخلص منو بكل سهولة .
مرهف : بس في حرس حواليه .
سمير : انت بتبعدهن على طريقتك .
مرهف : اتفقنا .
سمير : يلا خلينا نطلع مشان ما يشكو فينا .

وائل : هيك لكن سمير و مرهف اي بعيدة عن سنانكن .
*سكرت الجهاز و طلعت من مكتبي عالسريع مشان فك الجهاز الموجود بغرفة الاجتماعات .. وانا راكض خبطت بدانة ...

وائل : اسف اسف ما انتبهت .
دانة : وائل شبك ؟
وائل : اعذريني مشغول شوي ما انتبهت .
دانة : كيف الشغل مع عمي ؟
وائل : اه حلو حلو .
دانة : بتعرف وائل انا يلي خليت عمي يشغلك معو مشان تتقربو من بعض ومشان تسهل عليي العملية .
وائل : عملية شو ؟
دانة : وائل رح احكي معك بصراحة .
وائل : اي تفضلي .
دانة : انا انا .
وائل : انتي شو ؟
دانة : بحبك خلص مو قادرة ضل ساكتة نار حبك عم تحرقني من جوا وانت مو حاسس فيني .
وائل : اهدي مين قال مو حاسس فيكي ؟
دانة : يعني انت كمان بتحبني ؟
وائل :........
دانة : انا كلشي عملتو كرمالنا مشان عمي يحبك لانو انا بحبك و مشان عمي يوثق فيك متل ما انا بوثق فيك ومشان اذا في امل نكون مع بعض عمي يوافق عليك .
وائل : دانة انا انا هلأ بدي روح مشغول كتير منحكي بعدين .
دانة : وائل استنى .
وائل : اسف دانة مشغول .

*تركت دانة و كملت طريقي لوصلت على غرفة الاجتماعات فكيت الجهاز و رجعت على مكتبي .. وبلشت فكر كيف بدي احمي ابي من هالناس .

بيوم تنفيذ اخر عملية .. نطرت ابي لحتى طلع و انا مشيت وراه بدون علمو وصلنا على كراج ضخم كان فيه ابي و كم شب بس دقايق قليلة و وصلت شاحنة ضخمة كتب ابي شيك و عطاه لصاحب الشاحنة و صارو ينزلو كراتين من الشاحنة .. بعد ساعة مشيت الشاحنة عملت نظرة سريعة للمكان انتبهت لوجود شخص ملتم رفع المسدس و وجهو لجهة ابي بهاللحظة ما لقيت غير حل واحد لحتى احمي ابي .. ركضت و وقفت قبالو و بنفس الوقت نطلقت الرصاصة و اجت فيني...و وقعت بالارض .

جلال : شو عم يصير هون وائل واااائل .
*تطلعت بعيون ابي و ابتسمت تيابي تعبت دم و غبت عن الوعي .
جلال : حملوه خلينا نوديه عالمشفى بسررررعة .

بعد ساعات...

جلال : شو دكتور صرلو شي ؟
الدكتور : الرصاصة كانت قريبة من القلب بس رب العالمين كتبلو عمر جديد صحيح فقد دم كتير بس الحمدلله هو هلأ بخير .
جلال : شكرا الك دكتور .
الدكتور : بتقربو شي ؟
جلال : لا ما بعرفو
الدكتور : كيف صار هيك اكيد حدا متقصد يقتلو نحنا لازم نخبر الشرطة .
جلال : للحقيقة انا ما بعرف عنو شي انا كنت ماشي بالسيارة و شفتو مرمي بالارض استنو لحتى يصحى هو بخبركن بكلشي وبتعرفو ساعتها اذا بدكن شرطة .
الدكتور : ماشي .
جلال : يعطيك العافية .

ضليت ناطر عند باب غرفة وائل لحتى صحي و دخلت لعندو ...

جلال : الحمدلله على سلامتك .
وائل : الله يسلمك ، شكرا لانك جبتني عالمشفى لولاك انا كنت متت .
جلال : انا يلي بشكرك لانك انقذت حياتي اكيد الرصاصة كانت موجهة الي .
وائل : هاد واجبي ما تشكرني .
جلال : انت ليش عرضت حياتك للخطر كرمالي ؟
وائل : حياتي فداك .
جلال : بس ليش ؟ يعني انت مجرد موظف عادي ومافي موظف بيفدي مديرو بحياتو .
وائل : لما المدير بكون ابو الموظف وقتها الموظف رح يكون مبسوط لما يفديه بحياتو .
جلال : شو عم تحكي انت الك موظف 3 شهور لحقت تعتبرني متل ابوك .
وائل : انا ما اعتبرتك متل ابي انت ابي .
جلال : شو شو انا ابوك ماعم افهم عليك انا ما عندي غير صبيين .
وائل : انا ابنك البكر ابن اسيل .
جلال : ابن اسيل ؟ بس انا دفنت اسيل و ابنها بايديي كيف عم تقلي انت ابن اسيل .
وائل : يلي دفنتو ما ابنك ابن حدا تا

ني انا ابنك يلي عشت طول عمري بدار الايتام ابنك يلي عشت طول عمري ما بعرف مين اهلي و مفكر حالي لقيط .
جلال : لا مستحيل انت عم تكذب عليي .
وائل : بصير احكي من تلفونك ؟ لو سمحت تلفون صغير .
جلال : تفضل احكي بدي شوف اخرتا معك .

*حكيت مع ستي و خليتها تجيب شهادة الميلاد و رجعت ستي تحكي الحقيقة لابي .. حرق قلبي ابي لما صار يبكي بقهر عليي .

بعد مرور يومين ...

جلال : بس تتعافى انت رح تستلم مكاني ادارة المعمل .
وائل : ما حدا بياخد مكانك ابي .
جلال : انا تعبت و اخواتك صايعين ما حدا غيرك بيقدر يمسك مكاني .
وائل : اذا هالشي بريحك انا من بكرى رح امسك مكانك .
جلال : بس لو اعرف مين يلي قوصك .
وائل : سمير و مرهف .
جلال : شووو سمير و مرهف انت شو عرفك .
وائل : كنت حاطط جهاز بغرفة الاجتماعات مشان اسمع كلشي و باليوم يلي قلت فيه انو هي اخر عملية سمير و مرهف خططو لقتلك انا عرفت و لحقتك مشان احميك ما بدي اخسرك بعد ما لقيتك ، ابي نحنا ما منقدر نخبر الشرطة عنهم لانو يمكن يحكو انك كنت تتاجر بالمخدرات انت بتعرف لولا كذبتي على الشرطة انو ما بعرف مين قوصني كنا دخلنا بسين و جيم .
جلال : شو العمل ؟
وائل : منعطي كل واحد شيك قيمتو عالية و منسفرهن برات البلد ومنخلص منهم .
جلال : كيف بدك تسفرهن ؟ يمكن ما يقبلو .
وائل : التهديد و المصاري هالايام اكتر شي بيعمو على قلب الانسان .

*سفرت مرهف و سمير برات البلد و استلمت ادارة المعمل مكان ابي بس بقيت عايش ببيت ستي ...

وائل : دانة تعالي لعندي عالمكتب .
دانة : حاضر .
*جهزت باقة الورد و الخاتم دقايق و صارت دانة عند الباب .

دانة : شو بدك وائل انا عندي شغل .
وائل : مفكرتيني نسيانك ؟
دانة : ما بهمني اذا نسيان او متذكر انا ندمت انو حكيت معك اصلا .
وائل : له يا بنت العم سمعيني دانة انا كنت مشغول وانتي صرتي تعرفي ليش بس هالشي ما بيعني انو ما بحبك .
دانة : انو شو ؟
وائل : انو ما بحبك .
دانة : شو يعني ؟
وائل : يعني بحبك و بموت فيكي و عشقتك من اول نظرة .
دانة : وائل .
وائل : عيون وائل و روحو .
دانة : وانا كمان بحبك .
وائل : معناها هاتي ايدك البسي هالخاتم انتي مرتي غصب عن الدنيا كلها .
دانة : انا كتير فرحانة وائل .
وائل : بوعدك طول ما انا جنبك تضلي فرحانة .

*تزوجنا انا و دانة حسيت انو هلأ حياتي بلشت ، جو العيلة مافي احلى منو يلي عايش بين امو و ابوه هو اكتر انسان محظوظ بهالدنيا بغض النظر عن الظروف المحيطة .. جو العيلة كتير اطفال محرومين منو بسبب غلطة او قضاء و قدر استغل الفرصة انك عايش مع اهلك و حاول تكسب رضاهن قد ما فيك لانو لما تخسرهن رح تحس حالك كنت عايش بنعمة كبيرة و فقدتها ...

#التائه
#إنتهت
#بقلم_فتاة_من_ورق