- فتون : هه بالمشفى ! وخطر اكبر قلتيلي ! لك بالمشفى في امن وحراسة وكل شي
- نور ؛ ليكي بلا لعي زايد وبلا ما توجعي راسي وتخليني وجعلك راسك .. اهتمي فيه منيح لان اذا بصرلو شي رح يكون قبرك تحت الشباك هاد
#طلعت نور من الغرفة وقعدت فتون جنب الشب وكان غفيان
- فتون : شو هالمصيبة يلي وقعت فيها هلأ .. حتى جزداني ضل بالسيارة معو
#ضلت قاعدة وكل شوي تعقملو وتطمن ع الجرح لحتى طلع الضو ورجع يمان ع البيت .. دخل ع الغرفة
- يمان : كيف صار
- فتون : مو منيح
- يمان : شبووو
- فتون : لازم يدخل المشفى.
- يمان : مشفى ما بقدر قوليلي اي شي تاني اعملو
- فتون : مافي
- يمان : ادوية اي شي اذا لزم بجبلو دكتور تاني
- فتون : الادوية رح تساعد لكم ساعة مو اكتر .. صدقني الصورة كتير ضرورية
- يمان : ما بقدر .. خليكي جنبو وعطيني اسم الادوية يلي لازمتك
- فتون : *****
- يمان : تمام
- فتون : جزداني ضل بالسيارة ممكن تجبلي ياه
- يمان : لا مو ممكن
- فتون : بس..
#طنشها وطلع بسرعة ليجيب الادوية .. وجابهن وعطتو المسكنات والادوية ورجع غفي .. وحتى فتون غفيت وهي قاعدة ع الكرسي وبعد كم ساعة صحيت فجأة لما الشب وقع كاسة المي وانكسرت
- فتون : انت منيح .. يا اخ يا اخ رد عليي لا لا تغمض عيونك .. خود نفس حاول تاخد نفس حاول حاول .. لكككك وينكنننن
#اول ما صرخت فتون وينكن دخل يمان ونور ع الغرفة
- يمان : شو صاااار
- فتون : خلال تلت ساعة لازم يكون بالمشفى والا ح يموت
- يمان : مستحيل .. وما لازم يموت
- فتون : فهمااام بقى لازمو عملية لازم يدخل المشفى للااازم شيل الرصاصة
- يمان : رح يقتلوه اذا بيعرفو انو بالمشفى
- فتون : تمام تمام اسمعني في باب تاني للمشفى والو طريق من هون مندخل منو ورح سجل العمليات والغرفة وكل شي باسمي او اسم اي شخص بدك ياه وهيك محدا رح يعرف واذا بدك بشدد الحراسة عليه بس لازم يدخل المشفى لازمممم
#سكت يمان ما عرف شو يعمل.. تطلع ب اخوه يلي عم يحاول ياخد نفس وما عم يقدر
- يمان : طيب
- فتون : يللاا
- يمان : بس اذا بصرلو شي انتي المسؤولة
- فتون : تمام
#اجو رجال من برا وحملوه للشب وحطوه بالسيارة وطلع يمان بالسيارة .. اجت نور بدها تقعد قدام مسكت الباب فتون
- فتون : بعتقد انتي ما الك شغل ومافي داعي تروحي
#بعدتا عن الباب وركبت ومشي يمان بالسرعة من الطريق يلي قلتلو عنو .
- فتون : وين جوالي
- يمان : ليش
- فتون : لازم احكي مع المشفى ليجهزوا كم شغلة
- يمان : رح تفتحي مكبر الصوت
- فتون : حاضر
#مسكت الجوال من ايدو ودقت ع المشفى
- مشفى الحياة تفضل
- فتون : ادم
- ادم : دكتورة
- فتون : ادم جهز غرفة العمليات بسرعة وجهز غرفة التصوير لازم اخد صورة قبل ما بلش العملية
- ادم : حاضر دكتورة
- فتون : مين موجود من الفريق
- ادم : انا وشيرين بس
- فتون : ومناوبة مين اليوم
- ادم : الدكتور زياد
- فتون : خليكن جاهزين وناطرين عند الباب الخلفي
- ادم : الباب الخلفي ؟؟
- فتون : ادم اعمل اللي عم قلك عليه وبس وحاول قد ما فيك ما تخلي زياد ينتبهلكن تمام واتصل بعلي يمكن احتاجو
- ادم : حاضر دكتورة
#سكرت الخط
- يمان : لا تنسي اي شي بصير انتي يلي بتتحملي المسؤولية
- فتون : ماشي
#بعد شوي وصلو للمشفى ودخلتو فتون من الباب الخلفي واخدوه الفريق منها واجى يمان بدو يفوت
- فتون : لوين
- يمان : ما بوثق فيكن
- فتون : لو بدي اقتلو كنت قتلتو من لما كنتو حواليه اتطمن وانطر برا رح مشي وراقو واعمل العملية
#قعد يمان ع مقعد وراحت فتون مشت الاوراق ودخلت ع العملية ويمان يقوم يمشي ويروح ويجي ويرجع يقعد لحد ما طلعت فتون وركض لعندا
- يمان : وينو
- فتون : هلأ رح ياخدوه ع الغرفة
- يمان : هو منيح
- فتون : منيح ولحقناه ب اخر نفس
- يمان : هلأ بنشوف اذا هو منيح او لا
#راحت فتون وضل يمان ناطر لحتى طالعو اخوه من غرفة العمليات ومشي معن للغرفة .. حطوه وتطمنو عليه وطلعو وهو قعد جنبو .. دخل دكتور تاني
- يمان : شو بدك
- عفوا ؟ انا جاي افحص المريض
- يمان : طيب
#بلش يفحص وبعدين مسك ابرة وبدو يحطها بالسيروم
- يمان : شو عم تعمل
- انا الدكتور هون
- يمان : طلاع لبرا مو انت المسؤول عنو
- عم قلك انا الدكتور لا تتدخل بشغل مو شغلك
#هجم عليه يمان ومسكو من الجاكيت وطالعو لبرا الغرفة
- فتون : شو عم بصير هون !! يمان
- يمان : مين هاد
- فتت لافحص المريض واعطي الابرة يلي قلتيلي عنا وهجم عليي
- فتون : زياد انا ما قلتلك الك.. انا قلت لادم
- زياد : ادم كان مشغول قلت بجي يعطيه الابرة انا
- فتون : تمام فيك تطلع
- يمان : ليش تقولي لحدا تاني

- فتون : دكتور متلي متلو وين المشكلة
- يمان : مشكلة كبيرة ما حدا رح يفوت ع هي الغرفة غيرك حتى الممرض ممنوع يدخل
- فتون : هاد مشفى ح يدخل كتير ع هي الغرفة
- يمان : قلت ممنوع يعني ممنوع والا بعبي الغرفة والممر والطابق وحتى المشفى كلو رجال ومسلحة عندي حياتو اهم من كل شي
- فتون : طيب
#قربت فتون لعند المريض وفجأة دخلت نور ومعها شب
- نور : يمااان
#ضلت ماشية طول لعند يمان وضمتو .. تطلعت فيها فتون وانزعجت
- فتون : احححم نحن هون بمشفى يا ريت تكوني محترمة
- نور : انتي ما الك علاقة شوفي شغلك وانقلعي لبرا
- فتون : عفوا منك بس انا الدكتورة وانا يلي بقلعك مو انتي
- نور : ااا قلتيلي انتي يلي بتقلعيني اي انا بورجيكي
#هجمت نور ع فتون بكل همجية ووحشية
- فتون : يا ااامن
#دخل الامن فورا وبعدها لنور
- فتون : يخرب بيتك شو انك همجية وما بتعرفي شي اسمو احترام ..طالعوها برا المشفى وممنوع تدخل لهون
- يمان : مو ضروري تركوها
- فتون : لبرا
- نور : يمااان .. يمان احكي شيي
#طالع الامن نور وهي عم تصرخ وتقول تركوني
- يمان : ما كان في داعي
- فتون : بس كان في داعي تهجم عليي
- يمان : القصة ان..
- فتون : خلصنا .. انا رح اطلع ع البيت ساعتين اي شي بصير فيك تخبر الممرضين وهنن بيتصلو فيني
- يمان : ممنوع
- فتون : ما دخلك
- يمان : انتي كيف بتتجرأي
- فتون : متل ما تجرأت انت .. حبيت تضل قاعد هون ضل ما حبيت فيك تروح الامن ما رح يترك الغرفة
- يمان : لك انتي شووو ..
#طنشتو فتون وطلعت بدلت تيابها وراحت ع بيتها .. فتحت الباب كالعادة كان البيت هدوء دخلت عالصالون لقت ابوها نايم وكالعادة سكران
- فتون : الله يصبرني بس
#مشت ع غرفتها
- خالد : اجيتي يا بنت الكلب
- فتون : لا حول ولا قوة الا بالله
- خالد : تاركتيني طول اليوم بلا مصاري يا حيوانة وحتى بالبيت مافي مصاري
- فتون : ما معي مصاري
- خالد : كذابة ولي
- فتون : عم قلك ما معييي ما معييي فهام بقى
- خالد : وعم تعلي صوتك علييي
#ضربها كف بقوة
- فتون : هه وعم تضربني
- خالد : انا ابوكي وبكسر راسك
- فتون : ابي وااااو شكرا انك قلتلي ما كنت بعرف انا يلي عم اصرف عليك ومو بس هيك انا يلي اشتريت هاد البيت ومعيشتك فيه بعد ما حضرتك رهنت بيتنا وخليتنا بالشارع لك في اب هيك ؟؟ جاوبني في اب هيك ؟ بحياتك ما كنت اب ولا ح تكون
#طلعت فتون بسرعة برا البيت وهي عم تبكي وراحت قعدت بالحديقة وبلشت تبكي وتبكي ..
وضلت هيك لبعد ساعة .. اجاها اتصال من المشفى انو المريض صحي بس موجوع كتير .. راحت فتون ع المشفى ودخلت ع الغرفة
- يمان : قلتلك مافي روحة بس عندتي
#تجاهلت يمان وتطلعت بالمريض
- فتون : كيف صرت
- منيح بس في شوية وجع
#عصب يمان من تجاهلها
- يمان : هي اخر مرة
#ما ردت عليه
- فتون : تمام هلأ بفحصك وبعطيك شوية مسكنات ما تخاف اعراض طبيعية بعد العملية
#مسكها من ايدها وفتلها لعندو
- يمان : عم احكي معك
- فتون : انا حرة برد او لا
- يمان : اخرتك رح تكون ع ايدي مافي مجال
- فتون : اا والله بتكون عملت معروف كبير
- خلص يمان اهدا
- يمان: طيب .. فحصيه
- فتون : ما دخلك وانت ما بتأمرني ع شي
#تركها يمان وراح وقف عند الشباك وهي رجعت تفحصو
- فتون : بالمناسبة انا فتون وانت
- يوسف
- فتون : تشرفنا .. فيك تخبرني يا يوسف كيف انصبت هيك ؟
- يمان : لا ما فيه
- فتون : شو يوسف
- يوسف : فيكي تقولي رصاصة طايشة وكانت من نصيبي
- فتون : امم .. ع كلن سلامتك ..
- يوسف : الله يسلمك
- فتون : وهلأ تجلس شوي بس لحتى تشرب الادوية
- يوسف : بالمناسبة شكرا
- فتون : ع شو
- يوسف : لو ما اجيتي مبارحة يمكن كنت متت
- فتون : لا ولو هاد واجبي اكيد لازم اجي .. اكيد ما خطفني اكيد
#تطلع يوسف ب يمان
- يمان : لا تطلع فيني هيك كنت عم تموت شو ناطر مني اعمل يعني
- يوسف : بعتذر بالنيابة عنو
- فتون : مو مشكلة .. معافاية

#طلعت فتون من الغرفة
- يوسف : ليش الخطف
- يمان : الوقت كان كتير متأخر ومافي دكتور بعرفو رضي يجي .. اجيت ل هاد المشفى لقيتا طالعة منو وكذبت عليها وخطفتا
- يوسف : وخلينا نتفرض انو راحت وخبرت الشرطة
- يمان : ما بظن هدتا
- يوسف : كماان
- يمان : اي والله
- يوسف : ادعي البنت ما تعمل شي
_________
#مضي اليوم ..
المسا دخلت فتون اتطمنت عليه
- يمان : ايمت فينا نطلع
- فتون : بكرى اذا كانت كل فحوصاتو منيحة
- يمان : اي ساعة
- فتون : م بقدر حددلك بس اذا اتحسن فيه يطلع بكرى
- يمان : اسمعي..
- فتون : عن اذنك انا خلص دوامي ولازم روح ع البيت
- يمان : لحظة..
#طنشت وطلعت من الغرفة بسرعة ويمان عصب وضرب ايدو عالطاولة وصحي يوسف ع الضربة

- خالد : منيح كتير منيح يوم خير علي وع بنتي كيف ما بدي كون منيح
- فتون : تمام بس بدي خبرك انو صار عندي وضع طارئ ويمكن اتأخر اليوم او يمكن ما اجي اذا تأخر الوقت كتير
- خالد : عنجد بس .. انا شفت مناوبتك بكررى
- فتون : اي مزبوط بس اليوم وضع طارئ .. ليه في شي ؟
- خالد : كنت .. خلص انسي مافي شي بس ترجعي منحكي
- فتون : ماشي
#سكرت الخط وشلفت الجوال ل يمان
- يمان : كان نكسر
- فتون : اخر همي
- يمان : همجية
- يوسف : مطولين انتو التنين
- فتون : هه
#وقف يمان قدام بيت فخم كتير.. بالحقيقة قصر مو بيت والحراسة بكل مكان نزل يمان وساعد يوسف لحتى ينزل وانا نزلت وقفت جامدة بمكاني ما عرفانة شو اعمل وكيف امشي .. طلعت وحدة منيحة بالعمر ومبين عليها هيبة وركضت لعند يوسف وضمتو وما تحكيلو غير يا ضناي .. لحقوها اكتر من وحدة منهن اكبر ومنهن اصغر وكمان ضموه وبوسوه وكل شي كان ريلاكس لحد ما اجت العفريتة " نور " ريتو الله ما كان جابا وركضت لعند يمان وضمتو وتحكيلو كنت خايفة عليك كتير هالحقيرة! وما بعرف ليش انا مزعوجة وعم فور واغلي وبعد ما خلصو حبن واهتمامن قررو بجلالة قدرن يلتفتو ويسألو عني
- مين هي ؟
- يمان ؛ هي الدكتورة يلي عالجت يوسف
- يوسف : يعني لولاها انا ما كنت عايش
- بعيد الشر لا تحكي هيك .. بنتي عنجد شكرا الك انقذتي ابني وحيدي
#تطلعت فيا وقلت بيني وبين حالي وحيدك ! كيف وحيدك وطول الوقت يمان بناديلو اخي وما بعرف شو !!
- فتون : ولو هاد واجبي يا خانم
- تفضلي تفضلي ما تواخذينا ما النا بالعادة ننسى ضيوفنا
- نور : ضيوف .. هه الله يبعد هيك ضيوف عنا
- عيب بنتي ليش هيك عم تحكي
- نور : ولا شي عمتي
- عيب تحكي هيك مع شخص واقف ببيتنا
- نور : بس عمتي
- بلا بس بلا شي يا ريت ما يتكرر هالموقف فهمانة
#ضحكت ضحكة استفزازية بوجها ودخلت لجوا معهن .. ضيفوني ورحبو فيني وحبوني واهتمو فيني واخر دلال ونور اعصابا عم تحترق .. الصراحة ما بعرف ليش بس كنت مبسوطة بهاد الشي.. مبسوطة كتير
#المسا
#كل واحد انشغل بحالو وانا قاعدة بالصالة مع نور وختيارة كبيرة بالعمر ونور وهالختيارة عم يحكو بمواضيع وع ناس وانا متل الاطرش بالزفة .. انتبهت ل يمان كان قاعد بالحديقة . وقفت وبدي روح لعندو
- لوين لك بنتي
- فتون : طالعة شم شوية هوا وارجع
- لا تطولي لان السفرة رح تجهز
- فتون : ماشي
#مشيت فتون وتطلعت نور وشافت يمان بالحديقة وعرفت انوو رايحة لعندو وقفت وبدها تروح توقفا
- بنتي وين رايحة انتي كمان
- نور : ستي هلأ بجي
- تعي كمليلي شو صار بعدين انقلعي
- نور : بس ستيي
- اقعدييي
#قعدت نور وهي عيونا ع الحديقة بس مو قدرانة تعمل شي غير تطلع من بعيد
____
#وصلت فتون لعند يمان كان قاعد ع الكرسي وعم يدخن وهي واقفة وراه بدون اي صوت
- يمان : شو بدك
- فتون : كيف عرفت اني هون
- يمان : حاسة سادسة
- فتون : ااا قلتلي
- يمان : صار شي
- فتون : بدي ارجع ع البيت
- يمان : تأخر الوقت .. اصلا اهلي ما رح يخلوكي تطلعي الليلة
- فتون : بس انا بدي اروح ومتل ما خطفتني لازم ترجعني
- يمان : فتون بلا نق
- فتون : ما بشتغل عندك لتحكيني هيك
#قام وقف قبالا وتطلع بعيونا
- يمان : بلا نق
#ضلت فتون واقفة مكانا وهنن التنين عم يتطلعو ببعض وهدووء .. نور كانت معصبة بعدين ما عاد تتحمل وقامت فتحت باب الحديقة وشافت ضو احمر ع يمان ..
- نور : يمااااااااان
#تطلع يمان فيها وبعدين انتبه ع الضو ع فتون وفتون عم تطلع ع نور بعدين ضمها وفتل بسرعة بعد عن المكان وطلع صوت رصاصة وصرخت فتون
- فتوون : شو هااد
#الشب فورا هرب .. ونور نادت للحراس مشان يلحقوه وركضت لعند يمان
- نور : انت منيح
#طنشها وتطلع بفتون
- يمان : صرلك شييي
- فتون : لا انا منيحة
#انقهرت نور كيف تجاهلها وتطمن ع فتون
- يمان : هالندل صار يشتغل غدر
- فتون : ممكن تفهموني شو صااار
- يمان : ولا شي
#مشي يمان بدو يروح ورا الحراس مسكتو فتون من ايدو ونور واقفة عم تطلع بس .. التفت يمان وتطلع ع ايدها بعدين رفع راسو وشاف عيونها كلها دموع ورجع بلهفة
- يمان : شو في ؟؟ صرلك شي
- فتون : لا
- يمان : ليش عم تبكي
- فتون : بدي ارجع ع بيتي
- يمان : تمام بس ارجع باخدك
#نور كانت عم تحترق وبدها تصرخ وتبكي بس مسكت حالهاا .. مسكت ايد يمان وسحبتا من بين ايدين فتون
- نور : لازم تلحقن
#انتبه يمان انو انزعجت من يلي صار بس ما حكا شي وراح .. ورجعت فتون ع البيت لقت امو ليمان واقفة ع باب الحديقة وشافت نور عيونها مليانين دموع
- جليلة : نور !
#خبت نور دموععا فورا وضحكت
- نور : ايي
- جليلة : شو يلي صار ؟
- نور : ولا شي

- يمان : لسه ما خلصت كلامي
- فتون : شو بدك
- يمان : انا خبرتو انو رح نتزوج بكرى وهو اجى لحتى يحكي معك.. اولا هو ما بيعرف بشغل المافيا انا خبرتو عن الشركات يلي مترأسها وتانيا اخي تصاوب وانتي عالجتيه وحبينا بعض وقررنا نتزوج .. تالتا من هون لحتى يخلص العرس دائما رح يكون في واحد بمجرد ما تحكي اي شي رح يصوب السلاح بنص راس ابوكي ويقتلو وما يتركلك مجال حتى تحاولي مجرد محاولة صغيرة انك تنقذيه
- فتون : لك انت شو شو فهمنييي الله ياخدك لاخلص وارتاح
- يمان : انا مجرم ووحش هيك وصفتيني من شوي وهلأ نزلي وبدون لعي ودراما زايدة
#نترها ع الارض ووقعت ونزلو دموعها .. مسحتن بسرعة وقامت ونزلت لتحت ونزل هو وراها .. اول ما دخلت ع الصالون انتبهت ع الشب يلي واقف مقابيل ابوها . التفتت لورا واتطلعت بيمان ابتسملها . تجاهلتو وراحت لعند ابوها وقعدت جنبو
- خالد : شغلتي بالي
- فتون : اسفة كان لازم خبرك انا
- خالد : مو مشكلة يا بنتي المهم تكوني مبسوطة
- فتون : مبسوطة كتير صدقني
- خالد : يمان مبين شب منيح ورح يسعددك وواضح من حكيو انو كتير بحبك
#تطلعت بيمان نظرة قرف وابتسمت غصب عنها
- فتون : مزبوط بابا مزبوط هلأ قلي انت كيفك
- خالد : انا منيح يا بنتي
- فتون : و ..
- خالد : اتطمني لا .. من الشغل للبيت ومن البيت للشغل
- جليلة : يه معقول خالد بيك بنتك دكتورة وتشتغل
- خالد : انا ما عم اشتغل مشان المصاري .. انا عم اشتغل منو بعبي فراغي وانا يلي بدي اشتغل لو يرجع الامر لفتون ما بتخليني وصرلها سنين بتصرف عليي وع البيت
- فتون : بابا من اليوم ورايح رح تسكن معي هون ما رح خليك هنيك لحالك وما عاد في داعي تشتغل ابدا
- يمان : مزبوط عمي .. حتى انو فتون ما عاد تشتغل
#تطلعت فيه فتون وهي فاتحة عيونها ع ملاتهم
- فتون : اناااا !!!
- يمان : اي حبيبتي انتي يعني ما عاد في داعي لتروحي وتجي وتعذبي حالك وتعلي قلبك
- فتون : انا بحب عل قلبي
- يمان : ما بتحبي
- فتون : بحب
- يمان : ما بتحبي
- فتون : بحببب
- يمان : مااا بتحبييي
- جليلة : خلص يا ولاد شبكن
- فتون : هه
- يمان : عيديها مرة تانية وشوفي
- فتون : هه هه هه هه
#عصب يمان ومشي لعندها
- فتون : وليي شكلي جنيت ع حالي
#قامت فتون وبلشت تركض بالبيت وهو يركض وراها تطلع من باب وتدخل باب وهو لاحقها
- فتون : عنجد ما عاد عيداااا
#ما كان عم يرد عليها وضلت تركض لوصلت لغرفتو ودخلت عليها ودخلت طول ع الحمام وقفلتو
- يمان : افتحي
- فتون : ما حذرت .. محدا بقول لملك الموت تعا اقبض روحي
- يمان : فتون افتحيييي
- فتون : ما رح افتح يعني ما رح افتح
- يمان : ح تضلي جوا ؟ اخرتك رح تطلعي وناطرك هون انا
- فتون : اي ح ضل هون ورح أسس حياة حلوة لحالي هون وانطر لتشبع ما رح اطلع
#قعد يمان جنب الباب وفتون واقفة ع المراية وعم تزبط شعرها .. بعدين قعدت ع الارض وسندت ضهرها ع الباب وكل شوي تنادي ع يمان ويقلها لسه ناطرك وضلت هيك للمسا .. اندق الباب ودخلت الخادمة
- العشا جاهز يا بيك
- يمان : مو جوعانين ما رح ننزل
- فتون : احكي عن حالك
- يمان : روحي انزلي بس انا لسه ناطرك
- فتون: ما بدي
- يمان : تسطفلي .. فيكي تروحي وتقوليلن مو جوعانين
- حاضر يا بيك
#طلعت الخادمة وفتون بالحمام عم تحكي مع حالها
- فتون : يا ربي من مبارحة بلا اكل رح ممموت من جوعي
- يمان : حكيتي شي
- فتون : عم احكي مع الحيط انت ما دخلك
#ضلت حابسة حالها ومرق الوقت نادت ع يمان بس ما رد عليها.. نطرت شوي ورجعت نادت كمان ما رد .. ضلت ساعة واقفة ومترددة تفتح الباب او لا
- فتون : اكيد صار بسابع نومة رح افتح الباب وانزل ركض ع المطبخ وبروح بعدا ع غرفة الضيوف
#تشجعت فتون وفتحت الباب شوي شوي وتطلعت عليه فعلا كان نايم ع التخت ومبين انه بسابع نومة
- فتون : الف الحمدلله
#طلعت من الحمام عم تركض اول ما فتحت باب الغرفة فجأة ..
#يتبع .