قصة واقعية: #غربة_الروح
............
قراءة ممتعة🦋💙"
#ⴅÂÐЄĦÂ

#غربة_الروح
#قصة_واقعية
#الجزء_الأول
#بقلم_فتاة_من_ورق

*الحلم اهم شي بالحياة ، لما منحلم منسعى لنحقق حلمنا ، لما منحلم كل يوم بيكون عنا شي ننفذو لنوصل لحلمنا ، لما منحلم منحقق ذاتنا بتحقيق حلمنا ، الانسان عايش لأجل حلمو يلي ناطرو يتحقق والانسان يلي ما بيحلم هو انسان ميت ، جسد بلا روح .

*بهداك اليوم (5/8/2016) كان كل البيت متوتر أبي و أمي و أخواتي وأكتر شي أنا ، تعبت و سهرت و بكيت و حلمت ، البيت هادي وأمي عم تتمتم بالدعاء لحتى كون من الناجحين وانا عم دخل رقمي السري على موقع نتائج البكلوريا تذكرت ((انتي الكبيرة انتي اول بكلوريا عنا بالبيت لازم ترفعي راس ابوكي و امك الكل ناطر نتيجتك القرايبين و رفقاتك ورفقات العيلة)) هالجملة كانت عم ترن بأدني كل ثانية تسارعت دقات قلبي لما انفتحت صفحة قدام عيوني (الاسم : مايا عبد الرحمن) رميت التلفون من ايدي بدون ما شوف النتيجة مسكت أختي تلفوني وصرخت بصوت عالي...

مرح : نااااااجحة .
*ما قدرت احكي ولا كلمة بس ابكي من الفرحة يا الله شو حلو شعور انو دموعك تنزل من الفرحة .
ام خالد : الف مبروك يا روحي .
ابو خالد : الحمدلله يا بنتي رفعتي راسي .

*كان يوم حلو كتير خاصة لما شفت مجموعي انو طلعلي الفرع يلي حلمت فيه طول عمري (صيدلة) وشفت نظرة الغيرة بعيون الناس يلي كانو ناطرين يشمتو ، و بنفس الوقت زعلت كتير من رفقاتي يلي كنت مفكرة انهن صديقات عمري بس تركوني بسبب غيرتهن مني لانو معدلي اعلى من معدلاتهن ...

*اسمي مايا انا اول مولود لأهلي الكبيرة ويلي شايلة المسؤولية مواليدي (1998) عندي اخين و اختين ، بشهادة الكل انا بنت حلوة و ناعمة بيضة وعيوني لونهن بني ، كل القراب مني وصفو شخصيتي طيوبة ، مهضومة ، ذكية ، متفائلة بالحياة و واثقة من نفسي...

ام خالد : جهزتي ميوش ؟
مايا : اي حبيبتي جهزت .
ام خالد : خلينا نروح عالسوق و نرجع قبل ما يجي ابوكي بدي لحق اطبخ .
مايا : اوكي .

*رحنا عالسوق بعد نتيجتي بأسبوع اشتريت تياب جديدة مناسبة للجامعة "تياب طويلة و محتشمة" .

مايا : شو رأيك بهاد القميص ماما .
ام خالد : اي حبيبتي قيسيه لنشوف اذا مناسب .
ام وائل : يييييي ام خالد هي انتي .
ام خالد : اهلا وسهلا ام وائل .
ام وائل : شو ما الك بالعادة تتسوقي بهالوقت .
ام خالد : بتعرفي سجلت حبيبة قلبي ميوش بالجامعة و عم اشتريلها تياب مناسبة الها .
ام وائل : اي مبروك .
ام خالد : الله يبارك فيكي و عقبال ابنك وائل .
ام وائل : ياااا رب الله يسمع منك ، مبروك ميوش .
*ابتسمت ابتسامة صغيرة...
مايا : الله يبارك فيكي خالتو .
((ام وائل رفيقة امي من سنين ههه مشهورة بانو عينها ديقة وما بتتمنى الخير لحدا و النتيجة ابنها الو سنتين بيقدم البكلوريا و بيرسب))
ام وائل : ليكي حبيبتي مايا اوعك ترافقي بنات بالجامعة .
مايا : ليش خالتو ؟
ام وائل : اسأليني انا لك حبيبتي بنات الجامعة روح قلبهن المشاكل .
مايا : اول مرة بسمع هالحكي خالتو انا بعرف مجتمع الجامعة كلهن بنات واعيات .
ام وائل : انا و اختي درسنا بالجامعة والله يا حبيبتي 4 سنين ما حكينا مع حدا .
مايا : اوكي خالتو ان شاء الله خير .
ام وائل : بالتوفيق حبيبتي .

*ما بايدي حسيت بالخوف من حكيها خاصة انو هي مرة كبيرة و دارسة بالجامعة معناها اكيد حكيها صح ، كملنا تسوق و رجعنا عالبيت .

مروة : مبروكين اختي .
مايا : الله يبارك فيكي .
مرح : مايا معلش استعير منك هاد القميص .
مايا : هههه ولي لسا انا ما لبستو لتستعيريه .
مرح : اي واذا انتي اكبر مني بسنتين منقدر نستعير من بعض حتى لو قطعة جديدة .
مايا : اوكي حبيبتي بس يكون عندك مناسبة بيليق عليها هالقميص استعيريه .
ام خالد : يا بنات تعالو ساعدوني بتحضر الاكل رح يجي ابوكن .
مايا : يلا امي جايين .

*مضى الاسبوع الاخير من العطلة غمضت عيوني لنام بما انو بكرى اول يوم دوام ، شعوري ما بينوصف خايفة من المجتمع الجديد بسبب حكي ام وائل و فرحانة اني وصلت للي بدي ياه ...

*باليوم التاني صحيت الصبح لبست على مهلي طلعت حلوة كتير و مرتبة فطرت و ودعت ابي و امي .

ام خالد : الله يحميكي و يبعد عنك ولاد وبنات الحرام .
ابو خالد : اتصلي فيني اذا احتجتي شي ابي .
مايا : حاضر بابا الله يخليلي ياكن ، باي .
ام خالد : الله معك .

* بالجامعة سألت الموظفة عن مكان المحاضرة ومشيت متل ما دلتني ، لما وصلت كان الدكتور موجود و مبلش يحكي .

مايا : صباح الخير .
الدكتور : صباح النور ، اول و اهم شي رح احكي فيه هو التأخير ما بسمح لأي واحد فيكن يجي بعدي ولو اجا رح يبقى عند الباب ، تفضلي على مقعدك .
مايا : شكرا .
الدكتور : تاني شي الحضور مهم كتير واذا بتغيب عن أي محاضرة لا تسألني شو اخدنا لانك بهالسؤال رح تحمل المادة وانت عم تضحك ، تخصصكن صعب ولازم تسمعو شرحي بنفسكن لتفهمو .

*حسيت بمسؤولية كبيرة من خلال حكي الدكتور و قررت كون ملتزمة لجيب الاولى على دفعتي ...
#غربة_الروح
#قصة_واقعية
#الجزء_الثاني
#بقلم_فتاة

_من_ورق

*حسيت بمسؤولية كبيرة من خلال حكي الدكتور و قررت كون ملتزمة لجيب الاولى على دفعتي ...

*طلعت من المحاضرة و قعدت على كرسي بحديقة الجامعة وصرت اتأمل هالمجتمع الجديد .. و بعدين رحت على محاضرتي التاني كملت يومي و رجعت عالبيت ...

ام خالد : اهلا وسهلا حبيبتي .
مايا : كيفك ماما .
ام خالد : مشتاقتلك .
مايا : وانا كمان اشتقتلك كتير .
ام خالد : يلا حبيبتي روحي بدلي تيابك وتعالي مشان تتغدي .
مايا : حاضر .

*دخلت على غرفتي لقيت اختي مروة واقفة قبال المراية وعم تقرص خدودها .

مايا : مروة شو عم تعملي ؟
مروة : عم حاول اعمل غمازات متل غمازاتك مشان صير حلوة متلك .
مايا : ههههه ما فيكي تعملي غمازات .
مروة : ليش ؟
مايا : هدول الله بيخلقهن بوجه الانسان من لما بينولد .
مروة : يعني ما رح يطلعلي غمازات متلك ؟
مايا : لا حبيبتي انتي حلوة بدون غمازات .
مروة : وانتي حلوة كتير بس اكبر بدي ادرس متلك و روح عالجامعة .
مايا : هههه ان شاء الله حبيبتي .

*مضيت ايام جامعتي يوم بعد يوم و اسبوع ورا اسبوع كنت ادرس ساعات طويلة لحتى جيب اعلى العلامات اعتمد على حالي بدون ما اسأل حدا و بأوقات الفراغ بالجامعة كمان كنت ادرس بما اني وحيدة بدون رفقة ... بعد شهر ونص من دوامي قعدت جنب بنت دايما بتاخد معي محاضرات بس ولا مرة حكيت معها .

مايا : مرحبا .
اية : اهلا وسهلا .
مايا : شو اسمك ؟
اية : اسمي اية وانتي ؟
مايا : اسمي مايا .
اية : عاشت الاسامي .
مايا : كيف كانو علاماتك بالامتحان الاول ؟
اية : تمام الحمدلله كتير مناح كبداية .
مايا : موفقة .
اية : وانتي كيف علاماتك ؟
مايا : الحمدلله كلهن عاليين متل ما طلبت من ربي واحسن .
اية : بقدر اخد رقمك اذا احتجت اسألك شي عن المواد ؟
مايا : اي اكيد سجلي عندك .

*اية اول صديقة الي بالجامعة صرنا نقعد مع بعض بأوقات الفراغ هي بنت طيوبة كتير وهادية ما بتحب المشاكل همها دراستها متلي تماماً ...

مايا : اية بقدر خلي كتبي معك بدي روح اشتري رصيد .
اية : اي ولا يهمك .
مايا : شكرا الك .
اية : العفو .
مايا : بتحبي جبلك معي شي ؟
اية : لا تسلمي .

*رحت على الكفتيريا الخاصة بكليتي ...

مايا : يعطيك العافية .
مالك : الله يعافيكي .
مايا : لو سمحت بدي اشتري رصيد .
مالك : تفضلي يا انسة .
مايا : شكرا .
مالك : اهلا وسهلا .

*رجعت لعند اية وبلشنا نحكي عن حياتنا ...

مالك : امجد .
امجد : ايوا .
مالك : دورك ترك هالكتاب وتعال وقف محلي انا بدي روح على محاضرتي .
امجد : ماشي الله معك .

اية : مايا .
مايا : نعم .
اية : بما انو النا 3 اسابيع صديقات في سؤال حابة اسألك ياه وجاوبيني بصراحة .
مايا : اي تفضلي .
اية : انتي بتآمني بالحب ؟
مايا : هههه بالحب ؟!
اية : اي .
مايا : شوفي بصراحة انا ما بآمن بالحب مافي شي اسمو حب غير حب الاب و الام لاولادهن وهي علاقة متبادلة .
اية : لا بالعكس الحب شي حلو كتير يمكن لانك ما عشتيه هيك عم تقولي انتي .
مايا : ما عشتو ولا بدي عيشو وما بظن في حدا ممكن حبو بهالدنيا غير اهلي ، يلا خلينا نروح بعد 5دقايق رح تبدأ المحاضرة .
اية : اوكي .

*بلشت حس بتعب من الطريق كان ياخد معي الطريق من البيت للجامعة ساعة و احمل معي كل كتبي و محاضراتي لانو مافيني ارجع عالبيت بأي وقت اذا نسيت شي ...

بصباح اليوم التاني...

مايا : اية اسبقيني على المحاضرة انا بدي خلي كتبي بالكفتيريا عنجد عم اتعب بحملهن .
اية : اوكي لا تتأخري .
مايا : اي اكيد .

*دخلت على الكفتيريا...
مايا : يعطيك العافية .
مالك : الله يعافيكي انسة .
مايا : بقدر صير خلي كتبي هون و بنهاية دوامي اخدهن ؟
مالك : اي بتقدري اعطيني ياهن .
مايا : تفضل ، شكرا الك .
مالك : ولو اهلا وسهلا .

*مشيت و لأول مرة بحياتي برجع بلتفت ورايي ما بعرف شو يلي خلاني التفت ابتسمت و كملت طريقي ...

مالك : امجد لو اجت هالصبية بدها كتبها وانا ما موجود بتلاقيهن بهي الخزانة اعطيها ياهن .
امجد : ماشي تكرم .

اية : تأخرتي .
مايا : اينو تأخير هاد اذا لسا الدكتور ما اجا شو نسيتي مسافة الطريق .
اية : حليتي الواجب ؟
مايا : اي حليتو مسكي شوفيه .
#غربة_الروح
#قصة_واقعية
#الجزء_الثالث
#بقلم_فتاة_من_ورق

*بعد مرور اسبوعين صرت كل شوي اتحجج بدي شغلة من الكفتيريا لشوف مالك و احكي معو ...

اية : وصفيلي ياه أي واحد منهن يلي بيخبيلك الكتب ما عرفتو .
مايا : الشب الاسمراني النحيف مو طويل ولا قصير عيونو لونهن بني متل لون عيوني .
اية : اي عرفتو .
مايا : تمام .
اية : مايا شو القصة .
مايا : أيّ قصة ؟
اية : شفت لمعة بعيونك وانتي عم تحكي عنو .
مايا : يمكن معجبة فيه .
اية : حبيتيه ؟
مايا : لا شو حبيتو قلتلك قبل هالمرة انا ما بآمن بالحب .
اية : اي متل ما بدك لا تآمني .
مايا : المهم هلأ خلينا نبلش ندرس الامتحانات عالبواب .
اية : معك حق .
مايا : ليكي في سؤال بهي المادة بدي تساعديني فيه .
اية : من عيوني .
مايا : شكرا اية لولاكي انا ما كنت عرف

ت شو بدي اعمل .
اية : لا تحكي هيك ولي انا وانتي ما صديقات انا و انتي خوات لا تشكريني هاد واجبي .

*رجعت عالبيت تغديت مع اهلي و رحت على غرفتي لحتى ادرس ... كل ما افتح الكتاب شوف صورتو بعيوني ...
مايا : شبك يا مايا ليش عم تفكري فيه كل هالقد امتحاناتك قربت ركزي بالدراسة ركزيييي .
*ضليت كل الليل ادرس شوي وفكر بمالك شوي ...

بصباح اليوم التاني...

مايا : صباح الخير .
مالك : صباح النور .
مايا : كيفك .
مالك : تمام انتي كيفك .
مايا : تمام ، كالعادة بعد اذنك بدي خلي كتبي هون .
مالك : وكالعادة تكرم عينك .
*وقفت اتأمل عيونو بدون وعي !
مالك : شو ؟ لازمك شي ؟
مايا : اه ولا شي شكرا الك ، باي .
مالك : الله معك .

*طلعت من الكفتيريا خجلانة كتير ...
مايا : يا رب ما يكون انتبه عليي .
اية : مين هو ؟
مايا : شو ؟
اية : على مين عم تدعي انو ما يكون انتبه ؟
مايا : ما على عحدا .
اية : اممم .
مايا : شبك ؟
ابة : ولا شي بس انتي متغيرة .
مايا : متغيرة ! امشي عالمحاضرة امشي انا ما بتغير .

*كان عندي محاضرتين ورا بعض ، مضيت اول محاضرة و لما صار وقت المحاضرة التاني...

مايا : ليكي اية انا ما بدي احضر المحاضرة .
اية : ليش ؟ ما الك بالعادة ما تحضري .
مايا : في مادة ما درستا مبارح و بدها كتير دراسة رح ادرسها لبين ما تخلص المحاضرة .
اية : طيب على راحتك .

*هي كانت اول مرة بترك محاضرتي كرمال مالك كرمال شوفو واسرق نظرة من عيونو ، ما بعرف ليش هيك كنت عم اتصرف بس بعرف اني بحس بالامان لما بتطلع بعيونو او بسمع صوتو ...

*بهداك اليوم اشتريت دفتر صغير من الجامعة و كتبت بأول صفحة ...
((لا أستطيع وصف قلبي بدقة عندما أحادثك ولكن أشعر بأنه يُضيئ...))

*خبيت الدفتر بشنتايتي لما شفت اية جاي باتجاهي .

اية : شو خلصتي دراسة ؟
مايا : اي هلأ خلصت .
اية : موفقة .
مايا : كيف كانت المحاضرة .
اية : عطانا كم شغلة مهمة تعالي اشرحلك ياهن .
مايا : اوكي .

*تحولت ايامي كلها للتفكير بمالك بعد ما كان تفكيري الوحيد هو دراستي ، هو كان رسمي معي بشكل كبير وانا رسمية معو كمان بس شي جواتي خلاني اتعلق فيه ولو اني بالنسبة لإلو مجرد طالبة متل باقي الطالبات بتتردد على الكفتيريا يلي بيشتغل فيها بس لتخلي كتبها عندو .

*بعد 3 اسابيع خلصنا الامتحانات و الحمدلله كانت علاماتي متل ما بدي...

مايا : بما انو علاماتي عالية قررت حليكي انتي اول وحدة .
اية : اي ليش لا يلا امشي حليني .
مايا : شو بتحبي تتحلي ؟
اية : على ذوقك .

*دخلت عالكفتيريا وانا مبتسمة و لحسن حظي كان مالك موجود بس بهي الفترة كلها ما كنت اعرف اسمو ...

مايا : مرحبا .
مالك : اهلا وسهلا .
امجد : مالك يا مالك .
مالك : ايوا نعم .
امجد : انا تأخرت على محاضرتي تعال وقف محلي .
مالك : اي ماشي ولا يهمك يلا روح .
امجد : سلام .
مالك : عن اذنك دقيقة يا انسة بدي شوف الزباين .
مايا : اي خود راحتك .
*فرحت كتير لما عرفت اسمو ، رجعت لعند اية عم اضحك و طلعنا انا وياها من الكفتيريا .

اية : شبك شوفي ؟
مايا : طلع اسمو مالك .
اية : اي شو يعني ؟!
مايا : لك عرفت اسمو .
اية : ليش كل هالشي فرحانة شو بتحبيه وعرفتي اسمو ؟!
مايا : اي اي بحبوووو .
اية : معقول انتي يلي ما بتآمني بالحب تحبي !
مايا : ما بايدي الله زرع بقلبي حبو .

"بالكفتيريا"
مالك : وين راحت هي معقول زعلت !!

ام خالد : بنتي الحلوة شو يلي شاغل بالها ؟
مايا : ولا شي ماما عم فكر بالامتحانات .
ام خالد : ايمتا بتبلشي الامتحانات النهائية ؟
مايا : بعد اسبوعين .
ام خالد : الله يوفقك يا بنتي و يجعلك من الاوائل .
مايا : امين ، تصبحي على خير حبيبتي .
ام خالد : وانتي بألف خير .

*دخلت على غرفتي وطالعت الدفتر كتبت فيه...
((أيقنت بأن الحب لغيرك لم يخلق وأن الشعور بلذة الحديث هو معك فقط...))
*سكرت الدفتر و نمت .
#غربة_الروح
#قصة_واقعية
#الجزء_الرابع
#بقلم_فتاة_من_ورق

مضيت الاسبوعين قبل الامتحانات وما كان في بيني وبين مالك غير السلام بس جوا قلبي كان في حب كبير لهالانسان حب ما بعرف ايمتا بلش وكيف بلش بمجرد نظرة من عيونو سرق عقلي و قلبي و صار تفكيري فيه وبس ...

*بلشنا الامتحانات النهائية ، مضى اول امتحان على خير بس كنت عرفانة انو علامتي قليلة بس بتاني امتحان طلعت عم ابكي...

اية : يا حبيبتي روقي بكفي بكي بالتكميلي بتنجحي لا تزعلي .
مايا : بدي روح اشتري رصيد لازم احكي مع امي .
اية : طيب امشي بس مسحي دموعك .
مايا : مو قادرة وقف بكي دموعي لحالهن عم ينزلو .

*كنت مخنوقة و زعلانة من علامتي ، دخلت عالكفتيريا و دموعي ما وقفو ...

مالك : شبك ؟
*وقتها ما قدرت احكي لانو صوتي ماعاد يطلع من زعلي .
مالك : ليش عم تبكي ؟ من الامتحان ؟
*هزيت براسي بمعنى (اي)
مالك : لا تبكي كلشي بيتصلح بالتكميلي بتجيبي علامة عالية ان شاء الله .
مايا : ان شاء الله .
*حسيت براحة لما حكا معي مالك فرحت كتير بسؤالو ونسيت زعلي ...

مايا : كيفك ماما .
ام خا

لد : طمنيني عنك حبيبتي كيف قدمتي .
مايا : ما بنجح بهالمادة .
ام خالد : معلش حبيبتي لا تزعلي بتعيديها و بتنجحي .
مايا : انتي ما تزعلي مني .
ام خالد : انا فخورة فيكي حبيبتي وما زعلانة منك انتي شاطرة و ما بينخاف عليكي .

*لما رجعت عالبيت دخلت على غرفتي حملت دفتري و كتبت فيه لمالك...
(( ما اخترت أن أحبك ، حبك كالاقدار التي لم تترك لنا مساحة ولو صغيرة للرفض او التفكير في ذلك...))
*سكرت دفتري و كملت دراستي ...

*مضيت باقي الامتحانات على خير ، عطلت و اشتقتلو كتير بعطلتي مع انها صغيرة ، درست لحتى انجح بالمادة وما خيب ظن امي فيني .. ساعدتني اية كتير بدراستي و قبل الامتحان بكم يوم اجت لعندي لنراجع المادة للمرة الاخيرة .

اية : فهمتي ؟
مايا : اي فهمت كلشي .
اية : لسا عندك اسئلة ؟
مايا : لا خلص هيك يسلمو ايديكي ، اية .
اية : نعم .
مايا : اشتقتلو .
اية : لمين ؟
مايا : شو لمين مافي غيرو يلي اخد عقلي و عطول بشتقلو .
اية : مالك .
مايا : اي .
اية : بدي افهم انتي ليش بتحبيه كل هالقد يعني هو ما بينلك انو بحبك اصلا مجرد شخص عادي .
مايا : بحبو لانو غير الكل لانو مانو شب صايع و همو التفاهة بحبو لانو شب شغيل عم يشتغل و يدرس بيطالع مصروفو لحالو مانو مستني من حدا شي واثق من نفسو ، انتي شفتي شباب هالايام شفتي كيف مناظرهن كلهن تافهين و بيستنو من ابوهن الليرة .
اية : بصراحة معك حق .
مايا : حتى طريقة لبسو ما متل شباب هالايام تسريحة شعرو كلشي فيه بيعبر عن شخصيتو ، شخصيتو يلي كلها رجولية و ثقة .
اية : يا ريتك تحفظي يلي شرحتلك ياه متل ما حافظة صفاتو و شكلو ههههه
مايا : ههههههه تضربي .
اية : انا بدي روح عالبيت ما بدي اتأخر .
مايا : الله معك حبيبتي شكرا الك على كلشي .
اية : ولو هاد واجبي قلتلك ، يلا باي .
مايا : الله معك .

*بعد 3 ايام رحت عالجامعة و انا مبسوطة كتير اني رح شوف مالك و قدم المادة وانجح فيها ، قدمت الامتحان و لما طلعت رحت عالكفتيريا بس ما كان مالك موجود صرت دور عليه بعيوني بين مئات الاشخاص وما شفتو مشيت بالاماكن يلي حافظتها بالجامعة على امل اني شوفو وللاسف كمان ما شفتو ، رجعت عالبيت مكسور خاطري زعلت لانو شوفتو بس يلي بتغير مزاجي و بتخليني صير مبسوطة لو حزن الدنيا كلو بقلبي ...

فتحت دفترتي و كتبت فيه ...
(( تلازمني ، وكأنك جزء مني وكأنك معتقد او فكرة من المستحيل أن تُنسى او يمحيها الوقت...))

*عطلت عطلة نهاية السنة و من شوقي الو صرت دور عليه بموقع التواصل "الفيس بوك" ما بعرف عيلتو بس حافظة اسمو من لما نادالو رفيقو كنت اقعد بالساعات اكتب اسمو بالبحث و دور عليه بين الاشخاص و للاسف ما كنت لاقيه ما كان بدي شي غير انو اتطمن عليه...

* ضليت دور عليه اسابيع و ما لقيتو وقبل ما تفتح الجامعة بكم يوم دخلت على كروب الجامعة لحتى اتأكد من الدوام بأيّ تاريخ بالتمام ، بالصدفة لقيت شخص منزل بوست والصورة الشخصية الخاصة بهالشخص هي نفس صورة وجه امجد رفيق مالك ... دخلت على صفحة امجد على امل اني لاقي مالك بين اصدقائو بس للاسف كان خافي الاصدقاء وما حدا بيقدر يشوفهن ... بعد تفكير طويل قررت ابعتلو و اسألو عن مالك .

*******************************************
مايا : مرحبا بس سؤال انت رفيق مالك ؟ مالك الشب يلي بيشتغل بالكفتيريا الخاصة بكلية الصيدلة ؟ واسفة عالازعاج .

بعد ساعة رد عليي امجد ...

امجد : اي انا رفيقو مين حضرتك ؟
مايا : انا طالبة بالجامعة وبس بدي اسألك مالك منيح ؟ وليش ما كان موجود بأيام الامتحانات التكميلية ؟
امجد : مالك تخرج و التحق بالجيش .

هالجملة كانت صعبة عليي كتير ، تخرج ! يعني ماعاد شوفو ؟! والتحق بالجيش رح ضل خايفة عليه كل ثانية و كل دقيقة لحتى يتسرح ...
ليش هيك القدر بيعمل فينا بيبعد عننا اغلى الناس على قلبنا ليش ؟

*رديت على امجد ..
مايا : هو بخير ؟
امجد : اي بخير الحمدلله .
مايا : بس تحكي معو قلو في بنت سألت عنك .
امجد : اي حاضر .
مايا : شكرا الك اخي .
*******************************************

صرت كل فترة اسأل امجد عن مالك وكان يتحملني و يجاوبني و يطمني عنو ، امجد بنظري هو صديق وفي لمالك ولا مرة بعتلي هو و ما سألني ولا سؤال ...

*******************************************
مايا : اخي كيفو مالك ؟
امجد : الحمدلله هو منيح .
مايا : شكرا وانا اسفة عالازعاج .
امجد : اختي الشغلة ما شغلة ازعاج بس انا برأيي تواصلي معو مباشرة حكيه انتي وتطمني عنو انتي مافي داعي تخلي واسطات لتعرفي اخبارو رح ابعتلك اسم حسابو واحكي معو انتي .
مايا : اوكي شكرا .
*******************************************

ترددت كتير بالبداية مع اني متعودة احكي معو بالجامعة ، وبنفس الوقت كانت دقات قلبي سريعة كتير لما قررت ابعتلو ، استجمعت قوتي و بعتلو ...
#غربة_الروح
#قصة_واقعية
#الجزء_الخامس
#بقلم_فتاة_من_ورق

ترددت كتير بالبداية مع اني متعودة احكي مع

و بالجامعة ، وبنفس الوقت كانت دقات قلبي سريعة كتير لما قررت ابعتلو ، استجمعت قوتي و بعتلو ...
اليوم يلي بعتت فيه كان يوم ثلاثاء بتاريخ 8/أيار ...

*******************************************
مايا : مرحبا .
مالك : اهلين .
مايا : كيفك .
مالك : الحمدلله ، مين حضرتك ؟
تجاهلت سؤالو و غيرت الموضوع...
مايا : كيف صحتك ؟
مالك : ما قلتيلي مين حضرتك ؟
*سكتت شوي و قررت ذكرو انو انا البنت يلي كانت تخبي الكتب عندك بالكفتيريا ...
مايا : ما عرفتني ؟
مالك : عرفت انك انتي البنت يللي ما رضيتي تقولي مين أنتي وعم تتهربي من هالسؤال .
مايا : اسمي مايا طالبة بالجامعة ، بعرفك و شايفتك كتير ولما لاحظت غيابك سألت رفيقك امجد عنك .
مالك : اي بعرف قلي امجد انو في بنت سألت عني ، وهلأ رح تقولي مين انتي ؟
مايا : اي رح قلك بس رح تعرفني ؟
مالك : ما بعرف ، بس انا اليوم نزلت اجازة و بكرى نازل عالجامعة ممكن شوفك .
مايا : بكرى ؟ معناها ما الك نصيب تعرفني انا ما عندي محاضرات يوم الاربعاء .
مالك : سجلي رقمي عندك و تركيها للصدفة واذا في نصيب منلتقي .
مايا : اوكي .
مالك : سلام .
مايا : سلام .
*******************************************

*خلصت حكي مع مالك وكتبت على دفتري...
((عندما احببتك ؛ احببت حروف اسمك ، احببت وطنك ، احببت صوتك ، احببت ضحكتك و احببت غضبك ، احببت كل ما يتعلق بك...))

*رحت يوم الخميس عالجامعة الساعة 11:08 كنت قاعد بالمحاضرة وصلتني رسالة من مالك ...

مالك : يا صباح الصدف انا بالجامعة ، لاقيني .

*صار قلبي يدق بسرعة من الفرحة مسكت ايد اية وخليتها تقرأ المحادثة ...
اية : اهدي و ردي عليه بهدوء .

مايا : انا بالمحاضرة هلأ بشوفك بعد المحاضرة بكليتي .
مالك : اوكي .

*خلصت المحاضرة و طلعت الساعة 12:41 وصلت لعند مالك ، كان عابس و عم يشتغل عالموبايل ...

مايا : مرحبا .
مالك : اهلين .
مايا : اسفة لاني تأخرت عليك بس لسا ما بعرف كتير هون ما لحقت احفظ الجامعة .
مالك : ولا يهمك .
مايا : كيفك .
مالك : الحمدلله تمام انتي كيفك .
مايا : تمام ، تذكرتني ؟
مالك : اي اكيد .
مايا : كنت حاسس اني انا هي البنت وقت حكيتك ؟
مالك : اي شكيت بالاول بس بعدين ترددت .
*سكتنا وصرت اتأمل عيونو ... ورجعت انا حكيت و كسرت الصمت ...
مايا : عيونك دبلانة ومبين عليك التعب و نحفان .
مالك : اي بالجيش مافي راحة .
مايا : لايمتا رح تضل تروح و تجي ؟
مالك : لحتى الله يفرجها او لحتى انتقل لمكان خدمة تاني .
مايا : ايمتا اجازتك الجاي ؟
مالك : عالعيد اذا بقيت عايش .
*حسيت بغصة بقلبي وقت قلي "اذا بقيت عايش" وبلهفة قلتلو ...
مايا : بعيد الشر
مايا : اديش عمرك ؟
مالك : 24 سنة .
مايا : العمر كلو .
مالك : بدك شي ؟
مايا : سلامتك انتبه على حالك .
مالك : ان شاء الله ، السلام عليكم .
مايا : وعليكم السلام .

*دار ضهرو ومشي و بقيت عم اتأملو لحتى اختفى ، كان اول و اخر لقاء بيناتنا و مدة اللقاء 7 دقايق بس احلى 7 دقايق بعمري ... مشيت و رحت لعند اية بعد ما اختفى مالك ...

اية : وجهك و خدودك حمر كتير .
مايا : ههههه .

*مشينا شوي وصلتني رسالة من مالك ...
*******************************************
مالك : تشرفت بمعرفتك انتي بنت كتير طيبة و اكابر .
مايا : تسلم ، الله يحميك .
*******************************************

*صرنا كل يوم نحكي لساعات طويلة خلصت اجازتو ورجع سافر على المنطقة يلي بيخدم فيها ، صرت اتطمن عليه كل شوي ، بالنسبة الي هو "حبيبي" بس انا بالنسبة الو "صديقة" مو اكتر ... بقينا نحكي شهور عرفت صفاتو بهالشهور (( هو عصبي كتير بس بنفس الوقت قلبو طيب انا حذرة كتير بالحكي معو لاني بخاف زعلو او ازعجو و كل هاد لاني بحبو ، بحبو من قلبي و كلمة حب قليلة كتير على الاحساس يلي بحسو اتجاهو ... مع انو واضح برودو اتجاهي و بيعتبرني صديقة ، صديقة وبس مو اكتر ))

#غربة_الروح
#قصة_واقعية
#الجزء_السادس_الأخير
#بقلم_فتاة_من_ورق

مايا : ماما .
ام خالد : نعم .
مايا : بدي اسألك سؤال .
ام خالد : سألي حبيبتي .
مايا : لو تقدملي شب من جامعتي اكبر مني ب4 سنين بتوافقو ؟
ام خالد : يا بنتي اهم شي انو يكون شخص منيح وقتا ليش لحتى ما نوافق .
مايا : انا رايحة نام تصبحي على خير حبيبتي .
ام خالد : وانتي بخير .

*بسبب عصبية مالك الزايدة كان دايما يصير بيني و بينو سوء تفاهم ولما يروق نرجع نصلح سوء هالتفاهم ... و مرة زعل مني بسبب صداقاتي و ماعاد حكا معي فترة...

*بهالفترة مرضت من زعلي و شوقي لمالك كان بس بدي منو كلمة وحدة لحتى اتحسن ... و بعد اسبوع تقريبا بعتلي مالك ...
*******************************************
مالك : انتي منيحة ؟
*فرحت كتير بسؤالو و رديت عليه بسرعة لاني بصراحة كنت ناطرة رسالة منو ...
مايا : لا مو منيحة .
مالك : ليش ؟
مايا : مريضة .
مالك : سلامتك .
مايا : الله يسلمك ، انت كيفك ؟
مالك