#_____________________HELP__________________

#زهرة_الشام
@rwayate
#المقدمة

تائهه هي حروفنا وكلماتنا
تائهه هي عيوننا واحزاننا
نبحر في زمن الخذلان
في زمن تمنينا انه ما كان
اقرب من فيها خان
وتركنا نغرق في بحر الاحزان
نطلب الرحمه في هذا الآوان
وندعو يا ليت الذي كان ما كان.

#HELP_بقلم_زهرة_الشام
#الجزء_الاول
ماسكت ابني بحضني يلي عمرو لسا ما صار 5 أشهر والنفس عم يطلع وينزل بصعوبة من اصوات الرصاص برا وجوزي قدامي عم يلفني انا وابني بأيديه وعم يطمني انو مافي شي

جهان: كيف مافي شي يا خالد ..مشان الله طالعني ما بدي موت

قرب مني وحط ايديه الثنتين ع وجهي وقال : مارح نموت ... رح تكونو مناح بوعدك

وفجأة أندق الباب بقوة وكان جاي من وراه صوت سلفي عمر عم ينادي لأخوه: يا خالد ...طلعو بسرعة

خالد : خليكي هون ما تتحركي...اي جهان

تركني وطلع لعند اخوه وفتحلو الباب وطلب منو يدخل بسرعة ..

خالد : فوت ...فوت عمررر

فات عمر بسرعه وجوزي سكر الباب وقفلو 3 قفلات

عمر : اخي جهز غراضكن بسرعه البلد قايمة ومو قاعدة ونحنا لازم نطلع من البلد بسرعه

مسك خالد ذقنو بتوتر وقال: لك وين بدنا نروح بهل ليل

عمر : اخي طالعين ع تركيا يلا بسرعه جهز الاغراض ما عنا وقت

خبط خالد ع راسو وصار يهمس : يا ربي كيف بدي اترك بيتي ورزقي هون وروح ....كيييف

عيط عمر بصوت عالي : اخي اذا ما بدك تشوف ابنك ميت قدام عيونك اترك كلشي واطلع

انا وقت سمعت هيي الكلمة غصني قلبي وضميت ابني لصدري بقوة وصرت اتأمل ملامح وجهو البرئية وهوي نايم ودعيت انو خالد يوافق

ألتفت خالد علي والدمعة مجمعة بعيونو وقال : قومي يا مرة ضبي شوية اغراض ع السريع وجيبي المصاري والذهبات

ورجعت أندرت ورجع عمر وقفني : مرت اخي المصاري والذهب ضبيهم بمكان ما حدا يقدر يوصلهم

هزيت براسي وطلعت جبت شوية تياب الي ولابني ولجوزي وجبت الذهب والمصاري ونزلت بسرعه

عمر : يلا انا رح خبرهم انو نحنا جاهزين

أخذ التلفون من جيبتو وخبرهم وما لحق يسكر التلفون وألا السيارة كانت قدام البيت وكان قاعدين فيها بيت حماي وسلفي ومرتو ركبنا فوق بعضنا لانو ما كان فيي وسع كثير ومشينا وكنا عم ندعي تمرق هيي الليلة ع خير ونستغفر لوقت وصلنا لعند مهرب وهربنا كلنا بنفس الليلة ع تركيا وهونيك طلعت شوية من المصاري لحتى اخذنا شقة مفروشة وقعدنا كلنا سوا وصرنا نصرف من المصاري يلي معنا لوقت ما ضل معنا ولا ليرة

وبيوم كان الكل مجتمع عم يحضرو أخبار وانا كنت بالمطبخ بدي اطبخ وما لقيت مونة كان كلشي خالص عنا رحت لعندهم وخليتهم يندارو علي وقت قلت : يا جماعة ماضل شي يتاكل بهل بيت شو بدنا نعمل ؟؟

جهان بعصبية : اي واذا بدك تعا شوف البراد فاضي ومافي لا رز ولا عدس ولا أي شي

حماة جهان (غفران ) : يا ولاد حتى المصاري يلي كانو معي ما بقدو فترة طويلة لازم تلاقو شغل

خالد: ما شفتي يا امي انو كل يوم عم نطلع ع امل نلاقي شغل وعم نرجع أجر من ورا وأجر من قدام

جهان : وهلق الحل؟؟؟

عم الصمت لدقائق والكل كان مبين عليه مشوش وكسر الصمت مرت عمي بأقتراح
*حماة جهان : شو رأيكم نطلع ع المانيا ؟؟؟

انا فتحت عيوني ع وسعهم والكل ستغرب وحكينا بصوت جماعي : شووووووو؟؟

#HELP_بقلم_زهرة_الشام
#الجزء_الثاني
@rwayate
نا فتحت عيوني ع وسعهم والكل ستغرب وحكينا بصوت جماعي : شووووووو؟؟

حماة جهان : اي كل الناس عم تطلع ومكيفين رواتب وأمان ومافي جوع ولا خوف وولادكم بيدرسو وعلى الاقل ماعد نسمع صوت قذائف تطرح مرتك يا عمر وتحرمك من شوفت ابنك .. وانتي جهان ماعد تشوفي كوابيس وتصحي بنص الليل عم تصرخي ابني ..ابني ..وانت خالد ع الاقل بتروح وبتجي وانت مأمن انو مرتك وابنك بخير وما تتوقع انو تجي تلاقيهم ميتين ....يعني بس هاد يلي بريدو الإنسان

خالد : لا يا امي نحنا اتفقنا نجي ع تركيا وقت قصير لحتى بس تفرج ومنرجع ...انا ما بدي اترك بلدي وارضي

حماة جهان : يا ابني ارضنا وبلدنا خلص راحت بين الاجرين...واذا ضلينا فيها رح نستنا كل يوم نهايتنا او صاروخ من شي طيارة يبيدنا كلنا

خالد : لا امي انا مارح اترك بلدي ع الاخر ويقولو علي خاين او باع بلدو وراح ع أوربا

حماة جهان : يا ابني يحكو يلي بدهم ياه و
أيا واحد مكانك رح يعمل نفس الشي ..انت عندك مرة وولاد ومن حقك تخاف عليهم

قربت ع اذن خالد وهمست : اي خالد الله يخليك مرت عمي معها حق بكل كلمة عم تحكيها

خالد : يا الله ...يا الله

عمر : خالد والله معهم حق خلينا نطلع الكل عم يسافر

خالد : طيب ومنين بدنا نجيب مصاري والمهرب كيف بدنا ندبرو

حماة جهان (غفران ) : منبيع كل املاكنا يلي بسوريا وهيك منطلع مصاري حق السفرة

وقف عمر وقال : وانا رفيقي بيعرف مهرب بحكي

معو ومنطلع ( وبعدها ألتفت ع مرتو وسألها : شو رأيك ديمة )

أومأت ديمة براسها وقالت : اي بطلع بس بدي خبر اهلي بلكي بيطلعو معنا

عمر : طيب..

واخذ التلفون عمر من جيبتو وطلع يحكي مع رفيقو وخالد كان لسا عابس وماعم يحكي ولا حرف بس حماتي ما سكتت وهيي تحاول تقنعو ...وبعد دقائق فات عمر وقال : يا جماعة بعد اسبوع في رحلة شو رأيكم نطلع فيها

ديمة : بس يا عمر بهي الفترة اهلي ما فيهم يطلعو

عمر : انتي احكي معهم هلق واذا بدهم يحاولو يطلعو بأسرع وقت

وقف خالد وقال بعصبية : وكيف بدنا نلحق نبيع البيت والأرض والسيارة

عمر : السيارة رفيقي هون بيومين ببيعها والبيت مندين ومنرهنو ...

خالد : ومين معو يدينا ؟؟؟

عمر : ما تاكل هم انا رح دبر هدول الشغلات بس انت عليك تزبط الاوراق يلي لازم ناخذها

وبلشنا بنفس اليوم ونحنا نزبط المشوار وندبر حالنا بالمصروف حتى نقدر نوفر حق الطلعة وثاني يوم الصبح كنا قاعدين عم نضب بالاغراض دخل علينا عمر وهوي ومبسوط وقال والابتسامة ع وجهو : مشي الحال يا جماعة

ابتسمنا مع انو ما كنا عارفين شو هوي يلي مشي حالو وغلبت حيرتنا حماتي وسألتو: شو هوي يلي مشي حالو يا ابني

رد عمر والبسمة ع وجهو: مشي الحال امي لقيت واحد يشتري بيتنا وبيت اخي بسعر منيح والسيارة بكرا باذن الله بتكون منباعة كمان

حماة جهان : الحمد لله يا ابني ... وايمتا استلام المصاري

اخذت نظرة على خالد كان ماسك سعد (ابن جهان) بأيدو ومبين عليه علامات الانزعاج باين عليه عدم الرضا بس ما كان طالع بأيدو شي

رجعت أتطلعت ع عمر وقت جاوب مرة عمي وقال : تسلم المصاري باذن الله بكرا والرحلة باقي عليها شي اربع ايام

ألتفت عمر على خالد وقال : شو اخي هيك منيح

الكل ألتفت على خالد وشافو ع وجو علامات الحزن الواضحة على وجهو واكتفا خالد الهز براسو وقال : اي اخي منيح

عمر : طيب هي كلشي جاهز وان شاء الله الرحلة بعد اربع ايام ...اهم شي ما تاخذو كثير غراض لانو الشوفير قال لازم غيار واحد تياب والمصاري حطوهم بكياس ولفوهم والنسوان بتخفيهم والذهب بيعوه او خبوه لانو اذا كان في ذهب يمكن ننسرق

مرة عمي : انت ما تاكل هم يا ابني انا رح دبر هل شغلات ومن اليوم رح نبلش تجهيز

بعد ما خلص عمر حكي راح لجنب اخوه وصار يحكي معو ويأشر بأيديه ويشرح ما فهمت من حكيهم شي بس اتوقعت يكون عم يحكيلو عن بيعت البيت

وفجأة انا وصافنة بخالد هزتني حماتي من كتفي بهدوء وقالت : جهان يلا روحي على غرفتك وختاري طقم تياب واحد لحتى يضل معك بالرحلة ولا تنسي طقم لسعد ولخالد

هزيتلها براسي ورحت جهزت يلي حكتلي عنهم ولفينا الذهب والمصاري بكياس مثل ما حكا سلفي وبس صار وقت الرحلة كان كلشي جاهز كان الدنيا شتوية والجو بارد ونحنا واقفين عم نستنا تكسي تاخذنا على نقطة يلي رح يجمعونا فيها حتا ياخذونا على الشاطئ

ورغم انو لابسين ثياب ثقيلة بس كنا حاسين بالبرد لانو حرارة الجو كانت تحت الصفر وانا كان كل همي انو ابني ما ياخذ برد وصرت لفو بالجاكيت يلي لابستها انا لوقت اجت سيارة الأجرة وركبنا فيها وعطينا العنوان ومشي على مكان العنوان

كان الدنيا برد وعتمة وانا حاملة ابني بين ايدي وعم ادعي لربي يسر وبس وصلنا شفنا سيارات لتحميل الغنم والبقر وكان فيي مثل خزانات المي والناس متخبية وراهم

نزل سلفي عمر من السيارة وراح لعند رجل واقف قريب شوي ع سيارة وصار يحكي معو قريب العشر دقائق وبعدين رجل لعنا وقال : يلا انزلو وصلنا

#HELP_بقلم_زهرة_الشام
#الجزء_الثالث
@rwayate
ونحنا نبسطنا كثير انو ألنا الأولوية ونحنا ماشين اجا شب عمرو ب16 سنة ومسك ايد خالد وصار يقول : امانة يا عمر قولو انا معكن خلي يركبني ...مشان الله

خالد : اي اي يا عمو تعال وقف جنبي تعال

اجا الشب الصغير ووقف معنا ووقت وصلنا ع باب السيارة وو

قت شاف الشوفير انو معي ولد صغير وقفني وقال : انتي وابنك وهيي الختيارة تعالو ركبو قدام

رجع نزل خالد من السيارة ووقف قدام الرجل وقال : شو يا اخي ...شو عم تحكي

مجهول : اي اخي بدنا تنتين حريم يقعدو قدام مشان ما حدا يشك فينا

ورد خالد بصوت عالي : وما لقيت غير مرتي

مجهول : والله يا اخي اذا ما بدك ارجع انزل

وقف عمر قدام اخوه وصار يهديه: لك اخي شو فيها اذا قعدو قدام بالعكس احسن ..مانك شايف شوفي جوات السيارة لك مافي ولا فتحة صغيرة يفوت منها هواء

وقف خالد وصار يفتل راسو وكأن عم يفكر بالموضوع وبعد دقائق صمت قرب خالد لعندي وقال : ديري بالك عالولد وخليكي قوية شو فهمانه

هزيتلو براسي وطلع هوي وعمر من ورا وطلعت انا ومرت عمي من قدام وقعد الشوفير بعد ما سكرو السيارة وشغل السيارة ومشي وبهل الوقت كانت الساعة شي 5 الصبح ومشينا من طريق جبلي وكنت كل ما زاد السرعة قلبي يصير دقاتو 1000 من الخوف لانو الطريق كان كثير بخوف وكلو جبال ووديان وكنت حس انو السيارة عم تمرق بصعوبة لانو الطريق كان كتير ضيق

وبعد ما مر شي نص ساعة صرنا نسمع من ورا الرجال عم عيطو وكأن صار معهن صعوبة بالتنفس وعم يطلبو الباب ينفتح وكل ما طلع صوت يخبط الشوفير ع السيارة ويطلب منهم يسكتو بس زاد الصوت وقت صارو الناس تعيط لانو في مرأة بالسيارة اغمى عليها من قلت الأكسجين وانا خفت وصارو ايدي يرجفو من الخوف وحماتي تهديني واخذت سعد مني لانو فقدت السيطرة على حالي من الخوف

جهان : مشان الله يا مرت عمي مسكيه لسعد منيح لانو حاسة بعد شوي السيارة رح تقلب فينا

حماة جهان : ما تاكلي هم يا بنتي

اخذت نظرة على ابني يلي كان عم يطلع يمين وشمال ومو عارف هوي وين او شو عم يصير

_
جهان: مرت عمي سامعة هاد الصوت

حماة جهان : انو صوت يا بنتي

صرت أتلفت واخذ نظرة ع شبابيك حتى اعرف منين جاي هل صوت وصرت اهمس بهدوء: كأنو شرطة يا مرت عمي

حطت مرت عمي ايدها على تمها بتوتر وتردد بهدوء المعوذات وتدعي والناس عم تضوج اكثر واكثر ورا

وصار يقرب صوت زمور الشرطة ولاحظ الشوفير سيارات الشرطة يلي وراه وصار يصيح : بوليس ... بوليسسسسس

وصار يتمتم كلام ما افهم عليه لانو كأن عم يحكي تركي وصارت تقرب سيارة الشرطة علينا والشوفير صاير يتهور بسواقتو وانا كنت عم حاول احمي ابني يلي بحضن حماتي وصرت صيح: خالد .....ااااه خالد

وخالد من ورا يصيح على اسمي وكأني بحلم بهديك الليلة صرت حس انو نهايتنا قريبة وحسيت انو خلص رح تكون وقت الشوفير خبط سيارة الشرطة وفجأة صارو اربع سيارات ورانا ولما حس الشوفير انو بخطر فضل حالو على أربعين نفس محطوطين بالسيارة وفتح باب السيارة وزت حالو منها

قربت منو وحاولت امسكو من كنزتو وانا عم قول بصوت عالي : مشاااان الله وين رايح ...

بس هوي تجاهلني وخبط ايدي بقوة وزت حالو من السيارة وهيي ماشيت وانا صرت صرخ ومرت عمي تصرخ وقرب خالد وصار يصرخ من جوا السيارة : لك شوفي...

جهان : مشان الله يا خالد الشوفير زت حالو من السيارة وهيي لسا ماشية بلا شوفير

صارت الناس تصيح من جوا بس حاول خالد يهديهم وصار يقول بصوت عالي : جهان قعدي مكان الشوفير بسرعة

جهان : كيف بدي اقعد

خالد: لك عم قلك اقعدي

قربت من مكان الشوفير وقعدت وكان لسا سيارات الشرطة عم تلاحقنا وتطلب منا نوقف وانا قعدت وطلبت من خالد يحكيلي شو اعمل كمان

#HELP_بقلم_زهرة_الشام
#الجزء_الخامس
@rwayate
جهان : يااا الله يعني مارح نطلع اليوم

وقت شافنا خالد من بعيد قاعدين عم نحكي وعلامات الحزن على وجوهنا قرب وقال : شوفي يا جماعة

حماة جهان: مافي شي يا ابني بس عم يحكي عمر انو الرحلة يمكن تتأجل شوي لانو رح تعتم الدني وخفر السواحل عم يفتل بالبحر

كان واضح ع وجه خالد انو رح يفقد اعصابو وانو عم يمسك حالو بصعوبة وقال بنبرة هادية وحادة بالوقت نفسه : وين بدنا ننام بين هل عالم يلي ما بنعرفهم ومعنا حريم ...كييييييف

حاولت مرة عمي تهدي بخالد وردت عليه بصوت حنون : معلش ابني مثلنا مثل غيرنا ..شو بدنا نعمل

هدي خالد شوي وقعدنا تحت شجرة وحطينا شيى تحتنا وحتى ندفي حالنا من البرد صرنا ندور بين التياب المرميت على الأرض قطع حتى ندفي حالنا فيه لوقت يطلع الصبح وابني اخذ برد ومرض وصرت حاول أهديه وهوي ما سكت من المغص يلي صابو من البرد

جهان : يا الله يا مرة عمي شو بدي اعمل؟؟ ...ما عم يسكت الولد

قربت مني مرت عمي واخذت الولد من ايدي ومسكت قطعت قماش ولفتها على بطنو حتى يروح المغص ولو شوي

تطلعت لوراي كان خالد جاي وحامل قناني مي فاضية قرب لعندي وقال بصوت حزين : يا الله لك حتى مي ما ضل شو نعمل

ردت عليه حماتي بدون ما تلتفت عليه وبصوت صارم : اي خالد طول بالك بعد شوي اكيد رح نطلع

جاوبها خالد بهدوء : يا امي لك واذا ما مشي الحال رح نموت جوع هون

ردت عليه مرت عمي بلا مبالة: اي يلي ألو عمر ما بتهينو شدت لك امي ..الله يرضى عليك توكل على الله وروح دور ع حدا عندو قنينة مي زايدة استعارها بدال ما تندب حضك قدامي

قربت لعند خالد وحاولت تهدئة الحزن الباين على وجهو وقلت : يا خالد يا حبيبي يلا بقيان عضت كوساية ومنكون باليونان وبعدها منطلع على المانيا منعيش احلا عيشة انا وياك وابنا ووقتها مارح نتذكر كل يلي مرقنا فيه

هدئت ملامح وجه خالد وحسيت انو اقتنع من حكي وحط ايدو على راسي وهمسلي : الله ياخذ من عمري ويعطيكي 💙

ورديت عليه بسرعة وكأن ما بدي يلفظ هاد الحكي على لسانو : من غير شر ياعمري

وبعد ما باسني من جبيني وقرب من ابنو وباسو راح يدور على قنينة مي لحتى تساعدنا نضل عايشين ليصير دورنا بالرحلة

حماة جهان: تعي يا بنتي نيمي ابنك تحت الشجرة وانتبهي لاتيجي شي حشرة عليه

جهان : طيب مرت عمي يسلمو ايديكي

اخذت سعد من بين ايديها ونيمتو تحت الشجرة وقعدت جنبو وصرت العب بشعرو وهوي مو حاسس على شي من كثر تعبو

جهان : يلا يا ماما على الأقل مارح تكبر وتوعى على الحرب وتوعى على الخوف وعلى الجوع رح نروح لنعيش حياة أفضل( ورفعت راسي وايدي على السماء ودعيت ربي يحميك ويحمي خالد من كل شر ويسر هل رحلة على خير
وقبل ما انزل ايدي قرب خالد لعندي وقال بحماس : يلا جهان جهزي حالك هلق دورنا

وقفت على اجري ورديت بسرعة للتأكد : عنجد خالد

خالد : اي قلبي استعجلي

وتركني خالد عم ضب الاغراض وراح لعند حماتي خبرها تساعدني واجت حماتي وسلفتي وضبينا كل الاغراض ومشينا ووقفنا عند الشط وحطو البلم(القارب) على الشط وطلب منا صاحب القارب نطلع كانت الساعة شي 7 المسا وكانت الشمس بعدها عم تغيب

ركبنا البلم وقعد صاحب البلم يعطينا شوية معلومات مثل انو في معنا 3 شوفيرين على البلم واذا من غير شر وقع البلم بالبحر او وقف المتور نتصل بخفر السواحل للإنقاذ وبس خلص مشي الشوفير فينا بأعماق البداية أو النهاية ..

#HELP_بقلم_زهرة_الشام
#الجزء_السادس
@rwayate
يا اما بداية جديدة ..او اما رح تكون هي النهاية

مشينا بهالبحر الكبير والكل عم يهمس بذكر الله ووقت بعدنا شوي عن الشط صار شوفير القارب يفتل فيه بالمكان نفسو وضاجو الناس___ ومنهم يلي عم يقول خليك ماشي عاليمين _وناس يلي تسب لانو كانو بيعرفو انو هوة مو شوفير بس قال انو شوفير مشان يوفر شوية مصاري

و طلع من بين الركاب واحد ابن حلال وقال : لك يا اخي باين عليك ما بتعرف تسوق ..تعا لهون لحتى اجي علئ مكانك تسوق عنك

( بهل لحضة الكل خاف وصار يصيح من الخوف وهاد يلي صار يقول : لا ...خليه يسوق بس انتو لا توتروه... وهاد يلي صار يقول : مشان الله يا اخي خليك مكانك ما بدنا نموت وصار حالة خوف وضوجان بالقارب

...بس الزلمة هداهم وقال بصوت هادي : يا جماعة صلو على النبي .. انا شوفير قارب وسواقة القارب شغلي بس انا ما حكيت مشان ما حط برقبتي أرواح.. بس في ناس مشان المصاري بتحط برقبتها أرواح

ووقت حكا الزلمة هي الكلمة كل يلي عاملين حالهم شوفريه..سكتو ونزلو راسهم على الارض وما ردو ولا بأيا كلمة

ورجع الزلمة يلي كان عم يسوق لورا وقرب الشوفير الأصلي ويلي كان أصلو عراقي لمكان الشوفير وشغل المتور ببراعة ومشي بخط مستقيم للجهة المطلوبة

وطول الطريق وكل يلي عالقارب يهمس بذكر الله وكان واضح عالشباب يلي كانو قاعدين عطرف القارب أنهم عم يرجفو خوف وبرد وانا قاعدة قريب من خالد وحاطة سعد بحضني وعم لعبو لانو كان بهالوقت فايق من وجع بطنو وعم يبكي وكنت عم حاول ادفيه من قساوة البرد ...وكان شوي شوي عم يقوى البرد اكثر واكثر وجميع يلي على القارب صارو يرجفو من البرد

وبس قطعنا مثل ما بقولو (المي الإقليمية ) زاد البرد والهواء وحتى انو القارب وقف

جهان: يا ربي يا ربي ... خالد قلبي مو مرتاح

حط خالد ايدو ع كتفي ليهديني وقال : قولي يا رب . .قولي يا رب

حطيت ايدي علئ خد ابني وصرت حس بحرارتو المرتفعة وهمست : ياااااا رب

وضليت طول الوقت عم اهمس بذكر الله وادعي بقلبي تمرق هاليلة علئ خير .... وكل شوي اتخيل شغلات مو منيحة وتنزل دموعي شلال على خدي وامسحهم بطرف ايدي

عمر : شو يا اخي شو صار معك ...مو على اساس معلم وهيي الشغلة شغلتك ..... ااااه

الشوفير العراقي : طول بالك يا اخي..مشان الله

شد عمر على سنانو وقال : لا اله الا الله

ورغم صمت باقي الناس بس كانت عيونهم عم تعكس الخوف والقلق يلي جواتهم وشفافهم ما توقفت عن قول : لاحول ولا قوة الا بالله (( انك انت القوي والجبار ... انت القوي الذي تقدر على البحر وغدره ..))

وضلينا ساعة بالبحر عم نحاول نشغل المتور لوقت شفنا من بعيد ضو قوي وكأنو ضو لباخرة ...

وقفنا وصرنا نصرخ ونشغل ضو بوجه الباخرة لحتى ينتبهو علينا يلي بقلبها وصار تقرب لعنا وكان قاربنا الأمواج عم تاخذو لبعيد بس الحمد والشكر لله انو قربت الباخرة لصار قدامنا ووقف شب بيعرف يحكي انكليزي بطلاقة وصار يحكي معهم ويحكيلهم انو وقف الموتور والدنيا برد ومعنا ولاد

وطلع يلي راكب البخارة ابن حلال ووافق يوصلنا معو عاليونان والكل انبسط لانو ضمنا هل ليلة انو نبدأ حياة جديدة

قرب مني خالد وضمني بأيديه بحنان وهمسلي : يلا حبيبتي اطلعي انتي وسعد لانو لازم اول شي النسوان والاولاد

اخذت نظرة من عيونو يلي كانو عم يلمعو من دموع السعادة وقلت : طيب يا عمري

وطلعوني انا وابني وحماتي وسلفتي على الباخرة وكل النسوان يلي كانو موجودين على القارب وبعدها طلعو الرجال كلهم ونقلتنا الباخرة على اليونان وهونيك كان في استقبال فوري للاجئين استقبلونا وعطونا تياب لانو تيابنا كانت كلها ميي وعطونا اكل وحرامات وطلبو منا نروح ننام بالخيم لثاني يوم الصبح لحتى ياخدونا على مسكن تاني للبصمة...

فتنا على الخيم ويلي هيي كانت عبارة عن خيمة قماش وفوقها كيس نايلون كبير ليحمي الخيمة من حباة المطر والعواصف وكانو الرجال لحال والنسوان لحال

فتنا على خيمة النسوان وقعدنا على فرشتين كانو موجودين بالارض وعطيت دوا من يلي عطوني ياه لابني ورضعتو وحطيتو بحضني وصرت هزلو واحلم بالحياة الجديدة يلي ناطرتنا

وقطعتلي حلم اليقضة صوت مرت عمي وقالتلي: كيف صار سعد يا بنتي

#HELP_بقلم_زهرة_الشام
#الجزء_السابع
@rwayate
رديت عليها والبسمة على وجهي : صار منيح مرت عمي ...بعد ما اعطيتو الدوا حسيتو اتحسن شوي ونام

حماة جهان: اي الف الحمد لله

كان كل يلي بالخيمة نايمين من التعب بس انا وحماتي ما حسنا نام من الريحة الموجودة

حطيت ايدي ع انفي وهمست بهدوء لحماتي : لك كيف نايمين هدول .... الريحة لا تحتمل يا مرت عمي

حماة جهان : مطرين يا بنتي .... وشو جابرك على المر غير الأمر منو

جهان : اي والله اي والله

حماة جهان: يلا يا بنتي انتي كمان نامي

جهان : ما فيني مشان ابني

حطت مرت عمي راسها على مخدة وراحت لعالم الاحلام وانا رجعت صفنت بأبني وحطيتو بين ايدي وصرت اتحركشو ليفيق ... وضليت هيك لحتى صار الصبح

وثاني يوم الصبح صفينا على طابور طويل لنأخذ وجبة الفطور وعطونا قطعتين خير مع جبنة وعلبة صغيرة زبدة وعسل وكاسة شاي سخنة لتعطينا شوية دفا بهل البرد القوي

اخذنا فطورنا وقعدنا مواجيه البحر الكبير وصرنا نتأمل طبيعة اليونان الساحرة وصرنا نفطر لوقت اجو الباصات يلي لازم تأخذنا على كامب خاص للبصمة ..

ركبنا بالباصات واخذونا على الكامب يلي كان عبارة عن غرف صغيرة وكان في خيم ..

نزلنا من الباصات وركض عمر قدامنا حتى يلحق غرفة قبل ما يضل غرف ننستر فيهم والحمد لله انو لقا وحدة

عمر : تعو ....تعو ... هي الغرفة فاضية

حط كل واحد شنتو على ضهرو ومشينا بأتجاه الغرفة
وكانت غرفة صغيرة وفيها شباك واحد والأرض كانت تراب بدون بلاط او سيراميك او خشب

ديمة : بدنا ننام على التراب 😐

حماة جهان: منجيب قماش منحطو تحتنا

اخذت نظرة على غرفة وصرت فكر شو لازم اعمل لحتى لمعت فكرة حلوة براسي وقلتلهم : جيبو كرتون ومنفرد على كل الارض كرتون

طلع خالد جاب كرتون ومد الارض كلها كرتون لحتى نام براحة وجبنا بطانيات زيادة وحطينا بطانية فوقنا وبطانية تحتنا لحتى ندفي حالنا

وثاني يوم الصبح الساعة 7 ..

صار يندق الباب وكان في وحدة برا عم تحكي بلهجة غريبة فقنا كلنا ع صوتها مع انو النوم لسا بعيونا

فركت عيوني وجلست حالي وانا عم اهمس لخالد : خالد حباب شوف مين

قام خالد وفتح الباب وكان في وحدة يونانية حاملة تياب وغراض خالصة لألنا

وضلينا يومين باليونان عم نحاول ناخذ البصمة حتى نكمل رحلتنا والحمد لله اخذنا البصمة وبوقت الناس كانو يطلعو بالباخرة طلعنا نحنا بالسيارة من اليونان وصلنا ع مقدونيا وصرنا نقعد بكل دولة ليلة وكنا نتحمل البرد والنومة على الأرض واكل السردين مع مربى البندورة وعم الدخول للحمامات لانو كأن أبشع شي بالرحلة هي الحمامات ...وتحملنا كل هاد لحتى نبدأ الحياة يلي ضحينا كرمالها

وبعد عناء وتعب ومشقة...وصلنااااا😍 وصلناااا على المانيا

وقعدنا بكامب بس لخلصنا وراقنا وأخذنا بيت كبير وقاعدين كلنا منعمين ومرتاحين

وحسيت دولتهم رغم البرودة يلي فيها بس قلب شعبها دافي ... ناس بسطاء وكرمين ..

بس شو ما صار وقد ما كبرنا بالغربة سوريا رح تضل بالقلب .. رح تضل بالبال .

يا بلاد الياسمين ..يا بلاد النرجس والفل عطشوكي ..ذبلوكي ... شتقنالك يا قاسيون .. شتقنالك يا حميدية و يا نواعير ... ويا حمص ويا حماة ...شتقنالك يا سوريااااا واوربا حتى نبقى فيها اول شرط شرطوه علينا انو ما نشوفك انو ما نزورك ...... بس انشالله مارح نطول عليكي يا أم الدنيا رح يرجعو كل ولادك يبوسو ترابك ويرجعوكي مثل الاول وأحلى ....


#تمت