انو تعوا نتسلا بهالقصة متل العادة🙄☹️💚
#نبضي_أمل
.............
مشاركة من صديقة القناة🦋💙"

#ⴅÂÐЄĦÂ

#نبضي_أمل
#الجزء_الأول
#بقلم_فتاة_من_ورق

سلام : حبيبي .
مؤيد : نعم .
سلام : بدي تاخدني عالسوق جيب تياب جديدة .
مؤيد : تياب جديدة ؟ حبيبتي لسا النا شهر متزوجين و تيابك اغلبها جديدة و مو ملبوسة .
سلام : اي واذا يعني انا بدي تياب جديدة شو بدك العالم يقولو مرتو لمؤيد الها شهر عروس و لبست القطعة مرتين .
مؤيد : لبسي من الجدد ما بقولو العالم شي .
سلام : ما حبيتون لهيك ما لبستن انا بدي تياب جديدة و ناطرتك لتقلي جهزي حالك لحتى اخدك عالسوق ، تصبح على خير .

بهداك اليوم ما كان بقيان شي من راتبي انا موظف بالبلدية و راتبي قليل و بنفس الوقت ما حبيت اكسر بخاطر سلام و هي لساتها عروس ، ما نمت طول الليل و انا عم فكر من وين بدي جيب مصاري مشان حقق طلب سلام ...

بصباح اليوم التاني...

مؤيد : كيفك امي .
ام مؤيد : تقبر قلبي شو حلوة طلتك .
مؤيد : طمنيني عنك .
ام مؤيد : مشتاقتلك .
مؤيد : وانا اكتر امي .
ام مؤيد : شبك ابني ما على بعضك فيك شي ؟
مؤيد : لا لا
ام مؤيد : مبين من عيونك احكي لا تخبي عليي .
مؤيد : والله بصراحة يا امي ضايق خلقي مشان المصاري راتبي خلص وقت طلعنا عالبحر انا و سلام .
ام مؤيد : ولا يهمك معي كم ليرة مشي حالك فيون لوقت تقبض راتبك .
مؤيد : وانتي من وين بدك تصرفي امي .
ام مؤيد : لا تخاف عليي حبيبي اليوم اخوك مؤمن بيقبض راتبو .

اخدت المصاري من امي و كملت طريقي على شغلي ...

مؤيد : يسعدلي صباحك .
سلام : و صباحك .
مؤيد : شبو الحلو زعلان ؟
سلام : مافي شي .
مؤيد : طيب جهزي حالك بعد شوي برجع عالبيت و باخدك عالسوق .
سلام : عنجد .
مؤيد : اي عنجد .
سلام : بحبك كتير .
مؤيد : و انا بحبك .

سلام : والله لحتى ما خليك تتنفس لسا يا سيد مؤيد .

مؤيد احلى مني بكتير اشقر ابيض و عيونو زرق متل لون البحر لما تزوجنا كل رفقاتي و قرايبيني يقولولي زوجك احلى منك صرت غار عليه و خاف شي وحدة تسرقو مني لهيك قررت اتطلب كتير مشان ما خلي معو مصاري و خليه عطول مديون وما يفكر بوحدة غيري ...

مؤيد : مبسوطة حبيبتي ؟
سلام : اي كتير .
مؤيد : نرجع عالبيت ولا لسا بدك تشتري كمان تياب ؟
سلام : لا خلصت شري تياب بس معقول نرجع قبل ما نتغدى ؟
مؤيد : منتغدى بالبيت .
سلام : لا ما بدي ما حابة اطبخ مليت .
مؤيد : بس ما لحقتي تملي كل يلي طبختيون اربع طبخات .
سلام : اي قول ما بدك تفوتني على مطعم وبلا هالحجج .
مؤيد : مين قال هيك هلأ رح غديكي بأحسن مطعم .
سلام : بعرفك كريم و حنون و ما بهون عليك اتعب .

يوم بعد يوم بلشت طلبات سلام تزيد و الاغلب مو لازم ...

مؤيد : سلام حبيبتي .
سلام : اي مؤيد شو بدك عم احضر المسلسل .
مؤيد : تركي المسلسل و ركزي معي شوي .
سلام : اي مركزة احكي .
مؤيد : مو انتي معلمة و كويسة وعم تقبضي راتب منيح .
سلام : اي .
مؤيد : ونحنا النا 3 شهور متزوجين .
سلام : اي .
مؤيد : صار لازم تساعديني بالمصروف او عالاقل الاشياء يلي بتضلي تطلبيها مني جيبيها من راتبك انا ماعم اعرف وين بتروحي براتبك .
سلام : شوووو شووو سيد مؤيد انت شو دخلك براتبي بعدين مو انت رجال البيت معناها انت يلي لازم تأمن كل الطلبات ، شي حلو والله قدام المعلمات بالمدرسة عم اعطي راتبي لزوجي او هالقطعة جبتا من راتبي .
مؤيد : طيب وين عم تروحي براتبك فهميني .
سلام : هاد شي ما بخصك راتبي من شغلي و تعبي انشالله احرقو و اتدفى فيه ما دخلك .
مؤيد : بس انا زوجك .
سلام : زوجي معناها المسؤول عني معناها انت يلي بدك تأمن كلشي ، تصبح على خير اه و صحيح قبل ما انسى عيد ميلادي بعد يومين وكل المعلمات ناطرين يشوفو شو جبتلي حضرتك ، باي .
مؤيد : شو هالمصيبة يلي وقعت حالي فيها لو اخد نهال بنت خالتي احسن بس انا غبي عاندت امي وهي النتيجة .

طلعت الصبح على شغلي قعدت بالمكتب حطيت راسي على حرف المكتب و عم فكر بجملة سلام (بعد يومين عيد ميلادي و كل المعلمات ناطرين يشوفو شو جبتلي حضرتك)
مؤيد : طيب اذا ما جبت شي شو رح تعملي اصلا ما معي مصاري جبلك شي نتفتيني .

عادل : مؤيد مؤييييد .
مؤيد : ايوا نعم .
عادل : الساعة 9 ما بدك تطلع عالمدابح .
مؤيد : اف اي والله ما انتبهت انو صارت 9 يلا طالع .

طبيعة شغلي كنت اطلع الساعة 9 و روح عالمدابح اختم عاللحمة الصالحة لتنزل عالسوق و تنباع ل اللحاميين و اللحمة الفاسدة ما كنت اختم عليها .

حسام : اهلا بالسيد مؤيد .
مؤيد : اهلين فيك .
حسام : تفضل خلينا نكسبك على كاسة شاي .
مؤيد : مستعجل عندي لسا مشوار طويل .
حسام : مؤيد بدي حكيك كلمتين .
مؤيد : اي احكي .
حسام : امشي معي على اساس بدك تشوف اللحمة يلي جوا و منحكي .
مؤيد : بكل الأحوال رح شوف اللحمة يلي جوا .
حسام : تفضل .

يتبع...
#بقلم_فتاة_من_ورق

#نبضي_أمل
#الجزء_الثاني
#بقلم_فتاة_من_ورق

مؤيد : تمام وضع اللحمة ممتاز عندك رح اختم عليها .
حسام : مؤيد بدي اقترح عليك اقتراح .
مؤيد : تفضل .
حسام : شو رأيك تصير تأجر ختم اللحمة كل ليلة و تريح حالك من اللفة كل يوم.
مؤيد : هاللفة عم اخد راتب عليها .
حسام : اديش راتبك يعني ؟
مؤيد : 12 ألف ليرة .
حسام : بس ؟؟ طيب اجر الختم و بالليلة الوحدة بتاخد 5 ألاف يعني اذا اجرتو 3 مرات بالشهر بتاخد 15 ألف اكتر من تعبك كلو بالشهر .
مؤيد : طيب شو بدك تعمل فيه ؟
حسام : بختم اللحمة عنك و تاني يوم بتضل بمكتبك لا بتلف ولا بتتعب .
مؤيد : لا لا بعدين بصير راتبي حرام يلي باخدو من البلدية .
حسام : شو حرام يا زلمي ما انت عم تصحى 6 الصبح مشان تروح على شغلك اي هي لحالا بدها راتب ، فكر منيح مؤيد ما بتندم .

*كملت جولتي عالمدابح و حكي حسام ما راح عن بالي اقنعني بحكيو وهيك بقدر أمن طلبات سلام كلها و بوفي ديوني ...

بالليل اتصلت بحسام .
مؤيد : كيفك حسام .
حسام : تمام الحمدلله .
مؤيد : مشان الموضوع يلي حكيت معي الصبح فيه .
حسام : اي ؟
مؤيد : انا موافق واذا بدك هلأ بجبلك الختم .
حسام : يا عيني عليك اي جيبو هلأ .
مؤيد : بس بشرط .
حسام : تفضل .
مؤيد : ال5 ألاف بتقبضني ياهن وقت اعطيك الختم .
حسام : موافق .
مؤيد : يلا لكن شوي وبكون عندك .
سلام : لوين رايح ؟
مؤيد : شوي وبرجع حبيبتي ما بتأخر .
سلام : مؤيد عيد ميلادي بكرا ما تنسى .
مؤيد : ماني نسيان يلا باي .

كانت الساعة 10 بالليل عطيت الختم لحسام و قبضت 5 الاف ليرة .
حسام : الساعة 1 تعال على نفس المكان خود الختم .
مؤيد : ماشي سلام .
حسام : الله معك .

كملت طريقي و رحت عالصايغ جبت خاتم دهب بال5 الاف و رجعت عالبيت .

مؤيد : سوسو سلومة وينك حبيبتي .
سلام : اي انا بالمطبخ .
مؤيد : كل عام و انتي بخير يا احلى مرة بالعالم هي هديتك .
سلام : شو هي ؟
مؤيد : افتحيها و شوفي .
سلام : اممم حلو هالخاتم بس رفيقتي جايبة احلى منو وانت اكيد رح تشتريلي متل خاتم رفيقتي .
مؤيد : اه اي اي ان شاء الله .
سلام : من وين جبت حقو ولا قلك ما بهمني انت رجال البيت و واجبك تدبر مصاري .
مؤيد : اي صح واجبي .

الساعة وحدة رحت جبت الختم و رجعت عالبيت كانت سلام نايمة و عم تهلوس ...
مؤيد : حبيبتي شبك .
سلام : بردانة بردانة كتير مؤيد .
مؤيد : رح غطيكي ، حرارتك مرتفعة .
سلام : غطيني غطيني .

نطرت للصبح و ما نزلت حرارة سلام بعدين اخدتها عالمشفى ...

مؤيد : شو دكتور ليش الحرارة ماعم تنزل ؟
الدكتور : زوجتك معاها حمى قوية ولازم تاخد دوا التهاب لمدة 40 يوم ، هاد الدوا روح جيبو و انا عطيتا خافض حرارة .
مؤيد : ماشي دكتور يعطيك العافية .

صرت كل ليلة اجر الختم عن طريق حسام و مضى شهر ...

سلام : وين كنت ؟
مؤيد : كنت بشغل .
سلام : شغل الساعة 10 بالليل ! كل ليلة عندك شغل الساعة 10 بالليل و بترد بتروح الساعة 1 هلأ بدك تفهمني مين هي يلي عم تروح لعندها .
مؤيد : شو هالحكي سلام عم قلك شغل .
سلام : كذاب كذاب مبين من عيونك مين هي يلي سرقتك مني ميييييييين .
مؤيد : يا حبيبتي اقعدي لفهمك شو الشغل ، انتي مو ملاحظة انا معي مصاري كتير وشو ما بدك عم جبلك ؟
سلام : اي ملاحظة لا تكون عم تسرق .
مؤيد : لا لا استغفر الله انا كل يلي عم اعملو عم اجر ختم البلدية بالليلة 5 الاف ليرة للمدابح
سلام : ايوا .
مؤيد : بس ما تحكي لحدا مشان ما يفهمو الموضوع غلط .
سلام : ليش انت حاسس انو فيه غلط ؟
مؤيد : لا يعني بصراحة ما بعرف .
سلام : انت اجرتو انو يختمو اللحمة .
مؤيد : اي اللحمة الصالحة بس مشان ما ضل افتل تاني يوم .
سلام : اي ما حرام .
مؤيد : الحمدلله هلأ ريحتيني .
سلام : مؤيد بدي خبرك خبر حلو .
مؤيد : شو ؟
سلام : انا عالاغلب حامل .
مؤيد : عنجد عم تحكي .
سلام : اي عالاغلب ما متاكدة .
مؤيد : يا رب ، بكرا الصبح رح اخدك عالدكتور .

استنيت يطلع الضو بفارغ الصبر و طلعت سلام حامل فرحتي ما كانت واسعة الدنيا .
سلام : خايفة .
مؤيد : من شو ؟
سلام : انا كنت عم اخد دوا التهاب .
مؤيد : اي شو يعني ؟
سلام : والدكتور قال الي شهر و نص حامل خايفة يكون دوا الالتهاب اثر عالجنين .
مؤيد : ما تخافي ان شاء الله ما بكون صرلو شي وبكل الاحوال خلينا نروح لعند الدكتور يلي كتبلك دوا الالتهاب و نخبرو .

الدكتور : رح اكتبلك على دوا التهاب عيارو خفيف بما انك حامل .
سلام : ما بأثر عالجنين ؟
الدكتور : لا لا ما بأثر معافاية ان شاء الله .
مؤيد : الله يعافيك دكتور .

طلعنا من العيادة ...
سلام : يلا خدني اشتريلي حلو .
مؤيد : من عيوووني و مناخد حلو لعند امي كمان .
سلام : اي ماشي

يتبع...
#بقلم_فتاة_من_ورق

#نبضي_أمل
#الجزء_الثالث
#بقلم_فتاة_من_ورق

بعد 3 شهور بلشت جيب تياب البيبي كنت اختار اغلى شي بالسوق و اشتريه ...

مؤيد : سلام .
سلام : اي حبيبي .
مؤيد : جبت امي معي .
سلام : اهلا وسهلا مرت عمي .
ام مؤيد : اهلين فيكي يا بنتي .
سلام : شو لايمت بقيانة عنا مرت عمي ؟
ام مؤيد : وقت تملي مني بروح .
مؤيد : شو هالحكي امي هاد بيتك .
سلام : اي صح مرت عمي هاد بيتك ، مؤيد عبي البراد .
مؤيد : ليش لحق يفضى ؟
سلام : اي و جيب حلو و فواكه للسهرة .
مؤيد : حاضر .
سلام : مرت عمي تعالي شوفي تياب البيبي يلي اشتريتهن .
ام مؤيد : اي يلا .
مؤيد : وانا بدي شوفن كمان .
سلام : انت كل شوي بتشوفن .
مؤيد : اي فرحان فيهن .
سلام : شوفي مرت عمي شوفي ارخص قطعة ب3 الاف ليرة .
ام مؤيد : ما شاء الله .
مؤيد : انا رايح جيب الاغراض يلي طلبتيهن سلام .
سلام : اي الله معك .
ام مؤيد : لك بنتي من وين عم تجيبو كل هالمصاري يعني راتبك و راتب مؤيد ما بيطلعو 30 الف .
سلام : والله يا مرت عمي لو مؤيد ماعم يأجر ختم البلدية ما لقيتي معنا الليرة هلأ .
ام مؤيد : شوووووو عم يأجر ختم البلدية ؟
سلام : اي شوفيها ، باجرو و بيختمو اللحمة يعني احسن ما هو يروح يختمهن و يتعب كل يوم .
ام مؤيد : لك شو عم تحكي انتي مالكن هيك كلو حرام بحرام .
سلام : ليش مرت عمي ؟
ام مؤيد : بالمدابح في كتير لحم فاسد و منن بموتو قبل الدبح وهدول يلي عم يستاجرو الختم عم يختمو اللحمة الفاسدة و ببيعوها ل اللحاميين بسعر اللحمة الصالحة .
سلام : لا مستحيل مرت عمي .
ام مؤيد : اذا ما بتخلي مؤيد يبطل هالشغلة بيتكن ماعاد دوسو و ماعاد اكل من اكلكن ، يلا سلام .
سلام : لوين مرت عمي .
ام مؤيد : ما بقعد ببيت بيصرف من مال الحرام .
طلعت و خبطت الباب و راها .
سلام : اي الله لا يردك بالناقص من هالجية .

نطرت مؤيد لما رجع و خبرتو بكلشي ...

مؤيد : ليش لتحكيلاااا .
سلام : هي قالتلي منين عم تجيبو ، شو قلا لقينا كنز ؟
مؤيد : الله يهديكي رح سجل هالبيت باسمك لانو اذا عرف المدير رح يخبر الشرطة و يحبسوني و يصادرو املاكي .
سلام : يعني هي الشغلة حرام .
مؤيد : ما بعرف بس انا ماعاد اقدر اتراجع لاني صرت اجر الختم لمعامل الكولا كمان .
سلام : لا تشغل بالك حبيبي انت عم تعطيهن الختم على اساس انو يختمو الشي الصالح بس يعني انت بريت ذمتك .
مؤيد : وانا هيك عم قول .
سلام : شو بدنا نعمل مشان امك ؟
مؤيد : انا بكرا بروح و براضيها بكلمتين .
سلام : ماشي

مؤيد : يا امي خلص بكفي بكي .
ام مؤيد : انا هيك ربيتك ؟ طول عمري بحذرك من مال الحرام .
مؤيد : يا امي يا حبيبتي انا اجرتو على اساس انو يختمو الشي الصالح شو ذنبي اذا هن ختمو الشي الفاسد ساعتها هن بيكسبو الحرام ما انا .
ام مؤيد : انت وهن عم تكسبو الحرام ولو ما عرفان انو هالشي غلط ما كنت خبيت و كنت رحت وحكيت للمدير .
مؤيد : شو بدك هلأ امي ؟ شو بيرضيكي ؟
ام مؤيد : ماعاد تأجر الختم .
مؤيد : ما بقدر لانو هي الطريقة الوحيدة بجيب منها مصاري كتير و بنفذ كل طلبات سلام .
ام مؤيد : اي ماشي بيتك ماعاد دوسو بحياتي و مصاري منك ماعاد اخد يلا الله معك .
مؤيد : عم تقلعيني ؟
ام مؤيد : فهما كيف ما بدك .
مؤيد : ماشي امي يلا سلام .

مضيت الشهور و امي عاشت مع اخي مؤمن و عيلتو مع انو مؤمن ما معو يطعمي ولادو وكلن كانو رافضين ساعدهن بالمصروف .

سلام : شوف شو حلوة بنتنا بتشبهك كتير نسخة عنك .
مؤيد : يا بابا يا عسل انتي ، حجمها صغير كتير .
سلام : ههه اي يعني عمرها كم ساعة كيف بدك ياها تكون .
مؤيد : شيلي الغطا عنها لنشوف حجمها بدون غطا .

*فكيت اللفة عنها اول ما تطلعنا عليها اختفت ضحكتنا انا و مؤيد .

سلام : مؤيد مؤيد وين ايدها لبنتي .
مؤيد :........
سلام : مؤيد روح شوف الدكتورة يلي ولدتنييي ليش بنتي ما الها ايد .
*كانت صدمة كبيرة النا رغم كل جمال بنتي يلي بان من عمر كم ساعة بس ما عندها غير ايد وحدة يلي هي الايد اليسار .

الدكتورة : انا كنت بدي خبرك بس قلت على مهل شوي ، عندي سؤالين الك .
سلام : اسألي .
الدكتورة : انت صورتي شي مرة وانتي حامل ؟
سلام : لا اتفقنا انا و مؤيد يكون جنس الجنين مفاجاة النا .
الدكتورة : السؤال التاني انتي اخدتي ادوية لما كنتي حامل ؟
سلام : اي اخدت دوا التهاب بس ما كنت بعرف اني حامل .
الدكتورة : لهاد السبب بنتك ما اكتمل نمو ايدها اليمين بالنهاية كلو قضاء و قدر من رب العالمين ، تربى بعزكن متل القمر هالبنت .

*بكيت كتير على بنتي و تمنيت لو اني متت وما اخدت ولا حبة دوا .

ام مؤيد : يا روح ستك انتي ، شايف يا ابني هاد اول عقاب من رب العالمين الك .
مؤيد : شو ؟
ام مؤيد : واذا رح تضل تأجر الختم ربك رح يزيد عقابو الك ، بنتكن ضحية اكلكن لمال الحرام و الناس يلي تسممو من اللحم الفاسد خطيتهم برقبتك و برقبة كل حدا شد على ايدك .

*ما اقتنعت بحكي امي وحسيتها عم تحكي هيك بس مشان بطل تأجير الختم ، اخدت بنتي و رجعتها عالبيت .

س

#نبضي_أمل
#الجزء_الرابع
#بقلم_فتاة_من_ورق

صارت أمل تكبر سنة بعد سنة و يكبر زعلنا عليها بعد امل صار عندي ولدين احمد و اسعد ... وضل مؤيد عم يأجر الختم وكان كل اسبوع يوصلنا دبيحة عالبيت هي غير المصاري .

سلام : يلا حبيبتي خليني رتب شعراتك مشان ياخدك ابوكي عالروضة .
امل : ماما لا تربطيلي شعراتي خليهن هيك يطيرو بالهوا .
سلام : اي من عيوني .
امل : احمد و اسعد ايمتا بدن يروحو معي عالروضة .
سلام : لساتهن صغار كتير .
امل : اي وانا صغيرة .
مؤيد : جاهزة امل .
امل : اي بابا جاهزة .

كان اول يوم الي بالروضة ودعني ابي و راح ، اغلب الولاد عم يبكو و انا قاعدة عم اتفرج عليهن مستغربة و مو فهمانة شو القصة .

رهان : خدي لوني معي .
امل : معي الوان .
رهان : اي خلينا نلون صورة الاميرة .
حملت شنتايتي بايدي اليسار و صرت طالع الالوان منها .
رهان : يييي وين ايدك التاني ؟
امل : اكلها العصفور .
رهان : ايمتا اكلها ؟
امل : ما بعرف .
رهان : يعني رح تضلي بايد وحدة ؟ انا عندي ايدتين .
امل : لا انا بس اكبر بتكبر ايدي و بتصير متلك .

صرت اكبر و تكبر صداقتي برهان صارت الي الرفيقة و الاخت وما نفترق عن بعض ... وصرنا بصف السابع .

امل : رهان تروحي معي لعند ستي ؟
رهان : ليش انتي بتضلي بتروحي و ستك ما بتجي لعندكن ؟
امل : ما بعرف هي بتقلي بتعب من المشي ، يلا نروح ؟
رهان : اي منروح .

*كنا ماشيين انا و رهان و انفكت عقدة البوت نزلت و صرت حاول اعقدهن ببعض بايد وحدة .

رهان : انا بعقدلك ياهن .
امل : لا لا مافي داعي .
رهان : انا وانتي خوات مافي فرق بيناتنا .
امل : شكرا الك .

سالم : اختي بنتك امل صارت صف سابع شو رأيك نسفرها و نركبلها ايد صناعية .
سلام : بتقدر تحركها للايد الصناعية ؟
سالم : للأسف لا ، بس ايد منظر .
سلام : طيب موافقة بالعطلة منسفرها و منركب الايد .

ام مؤيد : كيفهم اخواتك ؟
امل : الحمدلله بسلمو عليكي .
ام مؤيد : اليوم مافي تروحو انتي و رفيقتك الا لتتغدو عندي .
امل : الله يخليلنا ياكي يا ستي .
مؤمن : الاميرة هون .
امل : عمووو كيفك .
مؤمن : مشتقلك كتير انتي كيفك و كيف اهلك ؟
امل : الحمدلله عمو جيب مرتك و ولادك و ستي و تعالو لعنا .
*تطلعو عمي و ستي ببعض لما حكيت هالجملة و رجع تطلع فيني عمي و ابتسم ابتسامة مصطنعة .
مؤمن : ان شاء الله عمي بس افضى بجيبهن و بجي .

ما كنت افهم شو السر يلي مانعهم من زيارتنا رغم حبهن الكبير الي وما كنت افهم ليش ابي ما يساعد عمي مع انو ابي غني كتير و عمي حالتو على قدو و يا دوب عايشين .

بعد شهرين سافرت على بلد تاني و ركبت فيها الايد الاصطناعية مع انو ما بستفاد منها شي بس كنت مبسوطة فيها كتير صرت متل كل بنات صفي بايدتين .
احمد : شو حلوة ايدك الجديدة امل .
اسعد : خلينا نسلم عليكي بايدك الجديدة .
امل : هههه خلص تركوها هلأ بتخرب ، رح البس هي الاسوارة بايدي الجديدة شو رايكن فيها ؟
اسعد : حلوة كتير .

كنت اضحك مع انو جواتي حزن كبير ... مرت السنين و صرت حادي عشر و اجا ابشع يوم بحياتي ...

كنت عم ادرس سمعت صوت خبط قوي عالباب ، ركضت و فتحت الباب ...
الضابط : هون بيت مؤيد ال****
امل : اي هون خير ؟
الضابط : هو موجود هلأ ؟
امل : اي بس نايم دقيقة لصحيه .
الضابط : بسرعة .

امل : بابا بابا .
مؤيد : اي شبك ؟
امل : الشرطة عالباب و بدهن ياك .
سلام : ولي ولي عليي .

كنت واقفة جنب الباب و عم راقب بعيوني وانا ساكتة كيف كلبشو ايدين ابي ...
امل : تركو ابي لوين اخدينوووو .
مؤيد : امل فوتي عالبيت و سكري الباب .
الضابط : امشي ولا امشي .

امل : امي فهميني شوفي ليش اخدو ابي .
سلام :.......
امل : يا امي احكي لا تضلي ساكتة .
سلام : شو يلي بدك ياني احكيه حاسبين حساب هاللحظة من قبل ما تخلقي .
امل : شو يعني امي ؟
احمد : امي فهمينا نحنا ماعاد صغار .
اسعد : ابي شو عامل ؟

تصادرت كل املاك ابي و صارت ملك الدولة ضل بيتنا و كم محل ما اخدتهن الدولة لانهن باسم امي ، و انحكم على ابي 3 سنين سجن ... صارت كل الناس تحكي بسيرتنا .

رهان : معقول رح نفترق يا رفيقتي ما كنت متخيلة انو رح يجي هاليوم .
امل : الحياة جبرتنا نبعد عن بعض .
رهان : رح اشتقلك كتير .
امل : وانا اكتر يا اختي خلص مسحي دموعك و ركزي بدراستك هي السنة مهمة .
رهان : وانتي كمان ركزي بدراستك و انتبهي على حالك .

باعت امي كل الاملاك يلي باسمها و انتقلنا على حارة بعيدة سجلنا بمدارس جديدة و استأجرنا بيت ... بلشت بسنة البكلوريا درستها ادبي ، تناسيت موضوع ابي مع انو ابي اغلى من روحي حبي الو ما بينوصف وخاصة لاني نسخة عنو نفس عيونو و شكلو و حركاتو .

يتبع...
#بقلم_فتاة_من_ورق

#نبضي_أمل
#الجزء_الخامس_الأخير
#بقلم_فتاة_من_ورق

خلصت البكلوريا و نجحت فيها وكلو بسبب الأمل يلي كنت عم انبض فيه رغم كل الظروف السيئة المحيطة فيني .

سلام : جهزي حالك امل .
امل : ليش ؟
سلام : بدنا نروح نزور ابوكي .

جهزت حالي و رجعتلي كل الاحداث الماضية كيف انحبس ابي و عرفت حقيقة شغلو ... قعدنا بغرفة انا و امي و ابي كنت عم انظرلو نظرة عتاب شو عملت بحالك يا ابي ؟ وشو عملت فينا ؟ وكيف خليت الناس تنظرلنا بعد ما عرفو حقيقتك .

مؤيد : سلام خدي الولاد و سافري برات البلد و سجلي امل بالجامعة .
سلام : وانت ؟
مؤيد : باقيلي سنة و نص و بطلع من السجن و بلحقكن ما لازم تبقو بهالبلد .
امل : برأيك هاد حل بابا ؟
*تطلع فيني ابي و لمعت بعينو دمعة و اجا لعندي و حضني و صار يبكي .
مؤيد : سامحيني يا بنتي بعرفك مقهورة من تصرفي و حكيي بس هاد الحل الوحيد لتعيشو .

سافرنا على بلد تاني ، كانو اخواتي مبسوطين انو بهالبلد ما حدا بيعرفنا و ما حدا بيعرف ابي لحتى يعايرونا فيه ، سجلت بالجامعة بكلية الحقوق و كملت بناء مستقبلي ...

امل : ستي طمنيني عنك .
ام مؤيد : والله بخير مشتاقتلكن كتير .
امل : ونحنا اكتر يا ستي ، بدي اسالك عم تزوري ابي ؟
ام مؤيد : اي عم زورو انا و عمك كل اسبوع .
امل : الله لا يحرمنا منك .
ام مؤيد : ماعاد باقيلو شي لتنتهي محكوميتو و بيجي لعندكن .
امل : ستي تعالي معو .
ام مؤيد : لا حبيبتي انا مرتاحة عند عمك و ماعاد باقيلي بهالعمر شي .
امل : الله يطول عمرك .

الاخطاء لما بتكون من شخص غالي و قريب مننساها و منغفرلو و مندعي رب العالمين يغفرلو ، كانت احلى لحظة هي اللحظة اللي اجتمعنا فيها مع ابي ، فتح ابي محل و صار يشتغل فيه و بعد 4 سنين تخرجت انا من الجامعة وكانت فرحتي مو واسعة الدنيا .

امل : بدي مكتب و حط قارمة كبيرة مكتب المحامية امل مؤيد .
مؤيد : ان شاء الله يا بنتي رح دورلك على مكتب واستاجرلك مكتب قريب من محلي .
احمد : اسمعوني .
سلام : تفضل عم نسمعك .
احمد : اليوم شفت اعلان كتير مهم بتركيا عم يركبو ايد صناعية و بتقدري تحركيها كأنها ايدك الاساسية .
امل : عنجد ؟
احمد : اي مسكي شوفي الاعلان .
صرت اقرأو واللمعة بانت بعيوني من الفرحة ...
امل : شو رأيكن ؟
سلام : كيف بدنا نتأكد انو هالاعلان صحيح ؟
احمد : في رقم عالاعلان .
اسعد : هات انا بتصل و بتأكد .
تأكدنا وطلع الاعلان صح بنفس الوقت رجعت لغيت الفكرة لانو ماكان مع اهلي مصاري لهالعملية .

مؤيد : غالية كتير و شفتي امل كيف غيرت رأيها .
سلام : بنتي و بعرفها اكتر من حالها هي رايدة بس لغت الفكرة مشان المصاري انا رح احكي مع اخواتي يبعتولي مصاري و اعملها العملية .

سافرنا على تركيا و ركبت الايد كنت عم اضحك من قلبي وانا عم حركها ... تواصلنا مع الدكاترة باللغة الانجليزية وقلنا قعدتنا مؤقتة بس القدر شاء انو تكون قعدتنا ابدية بتركيا لما الدكتور يلي ركبلي الايد طلب ايدي من اهلي .

سلام : بس هو تركي .
مؤيد : بس دكتور ما تنسي .
سلام : انا برأيي نشوف امل شو بتقول .
امل : انا بقول غصب عنو رح علمو العربي .
سلام : هههههه يعني موافقة .
امل : متل ما بدكن .
احمد : اي يعني على اساس هي عم تعمل حالها خجلانة و متل ما بدنا .
اسعد : معناها انا ما موافق .
امل : لك انت شو دخلك اه انا قصدي متل ما بدهن امي و ابي .
مؤيد : انا موافق يا بنتي .

تزوجت الدكتور ربي عوضني عن ايدي بايد تانية و عوضني عن الحكي يلي سمعتو من كتير ناس اني بلا ايد بزوج مافي احن منو بالدنيا كلها ...

امل : انت ليش اخترتني انا من بين كل بنات العالم .
عبد الله : لانك احلى و الطف من كل بنات العالم كلو ، البراءة يلي بنظرة عيونك لحالها بتكفي .
امل : بس انت بايدك ركبتلي الايد الصناعية .
عبد الله : ايديي التنتين الك و كلني الك بس هالجملة ماعاد تحكيها مرة تانية لانو وجودك بحياتي اهم من اي شي .
وربي توج زواجنا ببنت متل القمر وخلقة تامة .

مهما مرينا بصعوبات لازم نضل عم ننبض بالأمل و نضل متفائلين و أملنا بالله كبير ، رب العالمين لو اخد مننا شي و حرمنا منو بس بنفس الوقت بيعوضنا عن هالشي بشغلات احسن و تسعدنا و تنسينا وجعنا .

#نبضي_أمل
#قصة_واقعية
#إنتهت
#بقلم_فتاة_من_ورق