#الجزء_الرابع || #هاوية_الحب
@rwayate
كل يوم كنت احكي مع وطن ..
اشكيلو همومي ويسمعني ويفهمني ..
وطن صار تقريباً جزء مهم من حياتي .. جزء ماعد قدرت اتخلا عنو او عيش بلاه .. صار اغلا حدا بحياتي ..
بالوقت يلي كنت عم اتعلق بوطن وحب وطن .. كان مستقبلي عم يتدمر من اسامة .. و عم جهز للسفر ..
بهالوقت هاد انكتب كتابي بالمحكمة .. وتقريباً متزوجة ..
كل ماكنت احكيلو انو انا قريباً رح اتركو ورح اتزوج اسامة
كان يزعل و يحترق قلبو ..
بس بنفس الوقت كان عندو امل انو الله يساعدني ..
مرة من المرات قررنا نشوف بعض .. انا كنت رايحة مع مرت عمي يلي هي حماتي و عمتي ع دكتور العيون ..
اتفقنا انو نتلاقا هنيك ..
اول ما وصلت ع هداك المكان ، كلن فاتو ع العيادة و اعدو بستنو موعدن .. انا اخدت ابن عمتي لصغير و التلن رح اطلع اشتريلو اكلات و ارجع ..
طلعت لبرا... اتصلت بوطن لأعرف وين صار ..
قلي : لسا ماوصلت .. مطوول بدي شي ساعة ..
بوقتا كتير زعلت لان لبعد ساعة رح نكون رجعنا ع البيت ومارح نقدر نشوف بعض ..
مسكت احمد ابن عمتي و اجيت بدي ارجع ..
وصلني مسج من وطن " نورا اتطلعي وراكي "
التفتت لورايي ، شفتو ..
اول مرة بشوفو .. ضحكتو ، عيونو ..
كان في نسمات هوا قوية .. والشارع فاضي وهدوء كتير ..
ماكان في صوت مسموع .. غير صوت دقات قلبي ..
قربت لعندو شوي شوي .. سلمت عليه وسكتنا ..
بعد شوي اجت مرت عمي .. ماقدرت بعد عنو لانو رح تنتبه ..
بقيت واقفة معو .. وهو صار يسألني عن الدكتور ..
قربت حماتي وهي عم تزورني .. التلي : شوبدو ، مين هاد ..
هزيت براسي والتلا : مابعرفو ، عم يسألني ع الدكتور ..
يلله امشي لنفوت لجوااآ ..
رجعنا ع العيادة و دقات قلبي كان لازمها دكتور ليهديها ..
انبسطت بشوفتو مع اني ماحكيت معو كتير ..
استنيت لحتى اجا دورنا .. فاتو الكل وبقيت لحالي برا ..
طلعت بسرعة وقفت معو ..
حكينا بعدين التلو لازم امشي هلأ بيطلعو وبشوفونا .. التفت لأمشي .. مسكلي ايدي وقلي بحبك .. والله بحبك ..
لفيت شوي شوي .. ابتسمتلو وقلتلو و انا بحبك ..
بوقتا ماكنت سائلة عن شي ، الاحساس والحب يلي زرعو بقلبي وطن كان حب غريب و اهتمام بعمري ماحسيتو ، حتى خطيبي يلي حبيتو ماكان يهتم ةماعطاني الشي يلي بدي ياه ..
رجعنا ع البيت كنت عم فكر فيه و ابتسم .. صورتو ماعم تروح من بالي ..
وطبعاً علاقتي بأسامة علاقة اقل من رفقات ، او فيكن تقولو علاقة اشخاص عاديين ، يعني اوقات يمر اسبوع ومايحاكيني و عادي .. و بس احكي لحدا من اهلي ماحدا يرد عليي .. لان الكل مسدئو ومقتنع انو هو مهتم فيني ..
للصراحة انا ماعد همتني علاقتي بأسامة ابداً وصار حدا عادي كتير ..
بعد فترة كنت نازلة ع السوق انا ومرت عمي ..
ماكنت مخططة انو نتلاقى انا و وطن ابداً ..
اتصل فيني وسألني وين انا .. التلو لوين رايحة ..
وصلت ع السوق وبتفاجئ انو وطن كان هنيك ..
تفاجئت فيه ، رجعت شفتو مرة تانية وفرح البي ..
ضل يلحقني كل السوق ، مرت عمي كانت منتبهة ع يلي عم يصير ومنتبهة انو في سب عم يلحقني ...
كان بدي شوفو لهيك التلا رايحة اشتري شوية غراض وراجعة ..
وقفنا حكينا وضحكنا ، بس ماكملت معنا لان مرت عمي شافتنا ..
وقت رجعت سألتني عنو ، التلا مابعرف ..
اتطلعت فيني وزورتني ..
وبقيت كل الطريق عم تزورني .. كنت خايفة كتير ..
وقت وصلنا ع البيت كنت خايفة وقلبي عم يدئ بسرعة ..
عمي حازم اذا بيعرف ممكن يدبحني ..
—------------—

#الجزء_الخامس || #هاوية_الحب
@rwayate
رجعت ع البيت وانا خايفة .. بس بنفس الوقت ماتوقعت انو عمي حازم يعرفني ، لان يمكن اي بنت تتعرض لهيك موقف .. بس القصة كانت انو عمي حازم عرف .. ومرت عمي حكتلو يمكن قصدا كان انو تحميني ، لانها خايفة عليي ..
بس عمي كان صعب انو يتفهم هالموقف بالتخص اني متزوجة بالشرع وبالمحكمة ..
كنت اعدة لحالي و البيت فاضي ، اجا عمي نادالي ..
- نورااااا فوتي لجوااا ..
بوقتا حسيت رح موت .. ماعد ئدرت وقف ..
فات ع الغرفة وسكر الباب ، كان وجهو عم ينقط سم وعيونو عم تضرب نار ..
حازم : بدك توطي راسنا الله ياخدك .. والله لادبحك وموتك .. لكك انتي متجوزة ،
(( حسيت انو مالازم اضعف ولازم احكي .. قويت وحكيت))
نورا : خللصصص حاج تقولو متجوزة ، مين متجوزة ؟؟ .. متجوزة هاد الحقير يلي عم يعاملني متل الكلبة .. شو ماحكيت ماعم تسدقو مليت وماعد بدي احكي ..
حازم : لاتعيطي لكك والله بدبحك والله ..
نورا : دبحني وريحني .. خلصني من هالعيشة ، رح جبلك السكينة .. لككك خلص فهموني .. بشووو غلطت هاد يلي مفكرينة منيح وبدكن تجوزوني ياه انا كرهتووو وهو مانو منيح .. لكك بحياتو ما اهتم فيني او عاملني منيح .. عم يكذب ع الكل ..
حازم : لكك نوراااا حاج تصرخي ، شو عامللك اسامة احكي ..
بابا كان اعد وعم يبكي مو ئدران يحكي شي ..
" بوقتا حكيت كلشي ، كنت منهارة و عم اصرخ كتير ، كنت عرفانة انو هي اخر لحظة بحياتي و لانها اخر لحظة لازم احكي كل يلي بقلبي " ..
بعدين سألني عن اسمو لوطن بس مارضيت احكي .. تركني وطلع لبرا ..
رحت ع غرفتي صرت ابكي تمنيت لو دبحني وموتني ..
طبعاً اخدلي موبايلي و خطي ..
ضليت اسبوع ما اكل و منهارة .. و ماعم احكي مع حدا ..
رغم كل الظلم ووجعي من اهلي ، كان في وحع اكبر جواتي وهو شوقي الكبير لوطن .. صرلي اسبوع ماحاكيتو وماتطمنت عليه .. روحي رح تطلع ..
بعد فترة بابا نادالي اعد معو ..
ماكان بدي احكي مع حدا .. بس طلعت اعدت معو ..
ماحكيت كنت اعدة ودموعي عم ينزلو ع البطيئ بحرقة وبدون صوت ..
قلي : خلص بابا لاتبكي ..
نورا : ما ماااا ، اممم
" طبيت راسي على صدرو ضميتو وصرت ابكي و ابكي ، شتقتلووو كتير لك ياربي " ..
بعد شوي اتصلت فيني مرت عمي " حماتي " التلي نروح سوا ع السوق ، انا مابدي روح اصلاً ما الي نفس ..
كنت كل الليل مو نايمة من القلق والتفكير ، حاسة في شي بقلبي ..
وماني متطمنة .. التلو لأبي مابدي روح ماني مرتاحة ..
بس مرت عمي اصرت عليي .. وهن ماكانو بيعرفو بشي طبعاً
رحت وطول الطريق كنت خايفة وعم اتطلع بوجوه الكل .. كنت ناطرة اللحظة يلي شوف وطني فيها .. لاركد ضمو وقلو بحبك قدام الكل ..
بس بوقتا نزلت قذيفة و اتصاوبت ..
ماكنت حاسة ع شي .. حطوني بسيارة الاسعاف .. كنت غايبة عن الوعي تماماً .. بس عم قول وطن .. وطن .. عم هلووث فيه ..
بعد ماعالجوني بالمشفى رجعنا ع البيت ..
بابا : شبهااا نورااا
عمي ابو اسامة : لاتخاف اخي ، انكسرت رجلا ..
- ركد عمي حازم ليحملني .. بعدتو عني و التلو بمشي لحالي .. اتطلع فيني وقلي بسس الدم مابصير مي وبضلني عمك ..
حملني فوتني ع الغرفة ..
كان موقف ببكي كتير .. وجعي وشوقي و حزني ..
ورغم كل هالشي لما كلف خاطرو اسامة يتصل ويتطمن عليي ..
اسامة : الووو ..
نورا : هلا
اسامة : لك شو اخدكن ، ليش لتروحو .. الله يريحني منكن شو مابتفهمو ..
نورا : هلأ هيك الواحد بيتطمن ع خطيبتو
اسامة : بعرف انك منيحة ، يلا ديري بالك ع حالك .. خلص رصيدي ..
سكرت التلفون وصرت ابكي ..
—------—
#بقلم_رند_محمد
يتبع

#الحزء_السادس النهاية || #هاوية_الحب
@rwayate
بعد هالمواقف الكتيرة ..
انا كنت ناطرة سفري لعند اسامة لان مستحيل نتطلق ماحدا عم بيسدئ .. بس بابا كان الوحيد يلي مسدئ ..
حكا مع عمي و اسامة وقلن انو هالشي لازم ينتهي ..
وفعلاً بوقتا صار اللي صار و انا و اسامة تركنا والحمدلله ..
كنت نايمة موجوعة ومشتاقة ..
كل ذكرياتي مع وطن كانت عم تخطر عبالي ..
حاكيت بابا يعطيني موبايلي مشان اتسلا فيه ..
وعطاني ياه بس بدون خط يعني مافيني احكي معو ..
بس انا كان عندي خط سيرف و قدرت شغل الواتساب عليه وحاكي وطن ..
يوما حكينا للصبح وسهرنا و حسيت البي طاب وتحسنت ..
ضلينا نحكي مدة اسبوع .. بعدين هو مرض كتير ..
وكان بدو يعمل عملية لهيك بقينا اسبوع كامل ماعم نحكي .. بس كنت اتطمن عليه من ابن خالتو ..
مر فترة اسبوعين وماعد عرفت شي عن اخبار وطن ..
حتى ابن خالتو امين ماكان عم يحاكيني ويطمني عنو ،وموبايلو مسكر و ماحدا عم برد ..
نمت و انا عم ابكي .. حسيت كلشي اتدمر بحياتي ..
اتصل فيني بعد يومين وكان عم يقلي انا بحبك كتير ..
صرت ابكي من فرحتي .. بس قلي انا ماعد فيني كمل معك .. بحبك كتير بس مستحيل نكمل ..
حسيت كأنو سكين و فاتت بقلبي ..
بدو يتركني ! طيب ليش ؟؟
- وطن : انا ماعد اقدر كمل معك ، انا حياتي بين الحياة والموت و مافيني اظلمك معي ..
- نورا : لكك بحبك والله بحبك .. كيف !! مافيك تتركني .. لاتكسرني
- وطن : بتمنالك كلشي منيح ، ماعد فيني كمل ومابهون عليي فيكي لاني حبيتك ..
(( كان كلشي بيني وبين وطن )) نتهاااا ..
حالتي كانت مابتنوصف و انا موجوعة ، و مشتاقة وقلبي محروق ..
ليش يلي منحبو مالنا نصيب فيه .. ويلي منختارو ما بيكون النا .. ليش كلشي حلو فجأة بيقلب لسيئ والجنة يلي بحياتنا بلمح البصر بتتحول لجحيم ..
- اسامة تزوج بنت خالتو فدوى .. ومشان هيك تركني هاد كان السبب ، كانت هي عم تجذبو لصفها وعم تكرهو فيني .. وكسبتو فعلاً وفرقت بيناتنا بكل شي عملتو ..
حاولت ارجع اوقف ع رجليي من جديد ..
انسا وجعي .. واتناسى قلبي يلي انكسر ..
كملت دراستي .. وعشت حياتي .. وطبعاً الماضي مابينتسا بس لازم نعيش وماننتهي بغياب حدا .. بالعكس لازم نقوى اكتر ، لان في صعوبات اكبر
" وهلأ امنيتي انو رسالتي توصل لوطن اذا كان عايش بتمنى يعرف اني بحبو وبتمناه من كل قلبي ..
بتمنى يسامحني اذا غلطت بحقو و انا مسامحتو لان كسرني .. ربي يحميك اذا كنت عايش و يرحمك اذا كنت ميت " .. بحبك 💔
—--------- النهاية

قصة اليوم : #هاوية_الحب

.............
قراءة ممتعة🦋💙"
#ⴅÂÐЄĦÂ

#الجزء_الاول || .. #هاوية_الحب
@rwayate
كانت عم تطلع بعيونا حوالي البيت ، عم ترسمو بمخا بكل شغلة فيه .. حسيتا عم تتعرف ع شغلات جديدة ..
عم تركز بزواياه وكأنها رح تسكنو ..
مررت اصابيعا ع الشباك لحتى وصلت لعند قفص العصفور .. ضحكت .. و اتطلعت فيني .. فعلاً كانت صبية غريبة ..
- ممكن كاسة مي اذا بتريدي !!
- اي اكيد ، تفضلي ..
- شكراً ، بيتكن كتير هادي .. ياريت بقدر ضل عندكن اكتر ، بس زوجي مابيسمحلي وماعندي وقت ..
- ماصار شي كل ما مريتي من هالمكان تفضلي لعنا ..
- نشالله ، بس ماتعرفت عليكي منيح ..
- اسمي نورا عمري 19 سنة ..
- عاشت الاسامي يانورا ، والعمر كلو .. انا نهال اخصائية نفسية و عمري 25 ، متل ماشفتي كنت رايحة ع شغلي بس تعطلت سيارتي و الصدفة الحلوة انو جتمعت فيكي ..
- نورا : فعلاً صدفة حلوة ..
- نهال : زوجي عم يدقلي شكلو وصل لهون يلله انا رح اطلع ..
- نورا : طيب عيديا .. و رجعي زورينا
- نهال : نشالله .. يلله باي
- نورا : الله معك ..
- فتت ع غرفتي ، تمددت ع تختي و انا تعبانة كتير حاسة كل حمل العالم ع كتافي ، استغربت وقت يلي التلي نهال انو بيتكن مريح .. ماكانت بتعرف كمية الحزن يلي جواتو و الوجع ..
من لما كان عمري سنتين امي و ابي منفصلين ..
عايشة مع عمتي و اختي و ابي ضمن مشاكل عائلية ..
ابي حنون كتير وطيوب بس الله حارمو اغلا شي بحياتو وهي نعمة المشي يعني هو عاجز ..
عمتي فيروز كمان مرة طيوبة و الله ماطعما ولاد ..
بس بتعاملني انا و اختي متل ولادا تماماً ..
اما اختي دانا يلي هي سبب مشاكل البيت ..
اختي صبية بس عندا نقص اوكسجين بمخا اثر ع حياتا و خلاها تكون مختلفة عن الكل ، التعامل معا صعب شوي ..
و دايماً بتخلي الكل يعصب بسببا ..
كلشي مشاكل بالبيت كانت عليي .. من اكل وشغل وطبخ و تقريباً حاملة حمل كتير كبير .. طبعاً عدا الفقر يلي عايشينو
كل هاد ولسا ماحكيت شي ، ومع هيك نهال شافت انو بيتنا مريح !! هههه يمكن لو سكنت معنا لحتى يصير بدا مين يعالج نفسيتا ..
- غمضت عيوني و انا عم فكر انو معقول بيوم من الايام يهدا بالي وحس اني صبية متل باقي البنات ، الي حقوق متل غيري ..
صحيت بعد شوي ع صوت خناق ..
كالعادة عمتي فيروز و اختي دانا عم يتخانقو .. طلعت لعندن و انا مالي قلب احكي ..
شديت دانا ع غرفتا وسكرت عليها الباب ..
اتطلعت بعمتي و انا ساكتة همستلا : " بكفي "
ورجعت ع غرفتي ، حسيت حالي تعبانة اكتر من اللازم ومالي قلب اتحرك ..
بعد شوي رن تلفوني ..
- الو !
- مياس : اليوم رح اجي نام عندك منتسلا سوا ..
- نورا : ياريت ، والله طاقة روحي
- مياس : يلله مابطول ..
ئمت و انا منشطة ، حسيت بتفاؤول شوي اني رح اجتمع بحدا بحبو ، مياس هي بنت عمي وانا وياها متل الاخوة ..
اعدت رتبت غرفتي يلي صرلي فترة مو دائرتا ..
وكالعادة بعد ماراحت مياس ، راح البسط ورجعت لطبيعتي ولنفس الملل والروتين اليومين ..
—------------
#بقلم_رند_محمد
يتبع ..
هالقصة حقيقية و واقعية ..

#الجزء_الثاني || #هاوية_الحب
@rwayate
بعد كم يوم ..
كنت اعدة لحالي عم اشرب قهوة و مروقة ع الاخر ..
سمعت عمي و ابي عم يحكو ..
قربت ادني اكتر و ركزت سمعي ع الحكي ..
يلي فهمتو انو عمي حاطت ببالو يخطبني لابنو الكبير ..
انبسطت وقت يلي سمعت هالحكي ..
بلشت فكر ب اسامة .. وملامحو .. فعلاً هو شب ظريف
و ابن عمي يعني رح يحميني ويدير بالو عليي .. اكتر من الغريب .. وبعدين بركي بخلص من هالعيشة الصعبة يلي عايشتا
وفعلاً بعد ماراح عمي بشوي نادالي بابا ..
بابا : نورا تعي لقلك ..
نورا : نعم
بابا : شو رأيك بأسامة ابن عمك ..
نورا : سكتت وماعاد عرفت احكي .. حسيت بالخجل .. رفعت راسي بهدوء وقلتلو ، شبو اسامة ..
قلي : عندك مشكلة اذا خطبوكي بيت عمك الو ..
نورا : / ضحكت ، التلو يلي بدك ياه انت ..
بوقتا يمكن حوابي وصل لأبي .. وعرف اني موافقة ع اسامة
بعد كم يوم عرفت العيلة انو نورا و اسامة رح يخطبو قريباً ..
صراحة كنت حاسة بفرحة لاتوصف ..
بيت عمي كتير بحبوني وبعاملوني متل بنتن مياس .. ربيت معها من الطفولة .. كانت محبتن الي ومعاملتن اشبه بمعاملة اب و ام .. وفعلاً ماحاجوني لشي ..
اسامة كان مسافر بمصر ، لهيك ماكنت اقدر احكي معو كتير ، او التقي فيه ..
بعد خطبتنا بلشنا نحب بعض كتير ..
كنت ناطرة اقرب فرصة لسافر لعندو و اجتمع فيه ..
- اليوم الصبح فايئة كتير مبسوطة .. اتصلت فيني مرت عمي وعم بتقلي انو لازم نروح لعند اهلا .. و انا كنتا الكبيرة يعني المفروض اني روح ع بيت جدو لخطيبي ..
جهزت تيابي ولبست احلا شي عندي ..
وطبعاً انا حلوة وشو مابلبس بيلبقلي ..
اول ماوصلنا لعند الجماعة بتفاجئ بوجود صبايا كتير هنيك ..
مع انو ما كان في مناسبة ، كانت زيارة عادية
سلمت عليهن كلن .. يلي فهمتو انو كانت جمعة نسوان ، او بالاحرى اجتمعو نسوان الحارة ليتعرفو ع خطيبتو لأسامة ..
استقبلتني بنت خالتو لأسامة ، بابتسامة عريضة ..
قربت لعندي ، سلمت عليي بهدوء ..
كان اسمو فدوى ..
فدوى : اهلاً نورا ، تفضلي
نورا : فيكي ..
نظرات فدوى كانت عجيبة ، عم تطلع فيني من تحت لفوق وعم تتبسم كتير .. رفعت صوتا وهي عم تحكي ..
فدوى : الله يهنيكي ياخالتي ع هالكنة ، ويهنيك يا اسامة ..
استغربت ع طريقة فدوى كانت منفعلة او عم تبالغ شوي ..
بقينا اعدين عندن اكتر من ساعتين انبسطنا كتير ، هيك لحتى راحو كل النسوان .. بقيت انا و مرت عميي و بنات عمي مياس و يسرا ..
قربت لعندي فدوى وصرنا نحكي ، ماكانت تخليني قوم ساعدن بالشغل كانت صبية مذوقة كتير ..
اخدتني ع غرفتا لتورجيني شوية غراض كانت مشتريتن وقت تزوجت لان فدوى تزوجت 4 شهور وتوفى زوجها ..
اعدنا بغرفتا ، كل حديثا كان عني وعن اسامة وعم تقلي فعلاً هو محظوظ فيكي ، الله يهنيكن ببعض ..
انا حبيتا لفدوى .. حسيتا طيوبة ..
عطتني شوكولا .. و بلوزة ..
رجعنا ع البيت ونحنا تعبانين كتير من المشوار ..
كالعادة صوت عمتي و اختي دانا طالع ..
بلشت انا بشغلي .. اخدت دانا ع غرفتا وبلشت صرخ عليها .. تركتا و طلعت لبرا ..
رجعت ع غرفتي ، شلحت تيابي و اتسطحت كانت الساعة تقريباً 9 المسا ، و انا تعبانة ونعسانة كتير ..
غمضت عيوني .. كان هدوء كتير .. و اول غفلتي
حسيت في قطة سودا بغرفتي .. و شي عم يخنقني ..
يالله فئت مدايئة كتير ، ومزعوجة .. كان هالكابوس كتير بخوف ..
اعدت كل نهاري و انا صافنة .. مابعرف بشو صافنة بس ما الي قلب احكي ولا الي قلب اتحرك ..
بعد شي ساعة ، اندق الباب ..
ئمت افتح ، ماكان في غيري بل بيت .. طلعت مرت عمي ومياس فاتو ، اعدت معهن و انا ساكتة .. مو متل عادتي ..
كل مايجيبو سيرة اسامة حاول غيير لموضوع .. كل مايجيبو سيرة سفرتي كنت اتغسر وينقلب لوني ..
يمكن لاحظو عليي هالشي ..
طلعو من عنا وهن مستغربين .. انو ، نورا يلي بتموت ع قصة بتخص اسامة ، معقول عم تغيير الموضوع وقت بتجي سيرة ، ماكنت ع طبيعتي ابداً
بعد ماطلعو من عنا ، مسكت موبايلي ، اتصلت بأسامة ..
رد عليي بنشافة .. كأنو يلي بيناتنا كان شعور متبادل ..
قلي : اهلين .. وبسس ..
تخانقت معو عملنا مشكلة طويلة وبدون سبب .. ماكنا طايقين بعض وبدن سبب ..
فاء بابا على صوتي .. ارب لعندي سألني عن سبب صريخي وشوفي بيني وبين اسامة ؟؟! ..
- التلو مافي شي مشكلة صغيرة ..
رحت ع غرفتي و انا حاسة اني مخنوقة ورح مووت ..
—----------
#بقلم_رند_محمد
يتبع ..

#الجزء_الثالث || #هاوية_الحب
@rwayate
بقيت عهي الحالة اكتر من اسبوع .. و الغريب انو حتى اسامة كان ماعم يحاكيني .. قضيت الاسبوع وماسأل عني بحرف واحد .. مابعرف شو صرلو فجأة حبو تحوول لقسى و اهمال ..
ماعد حكا معي وصار يتهرب مني .. انا ماعد فيني اتحمل ضجرت .. قررت احكي معو ..
- مسكت موبايلي و اتصلت فيه ..
- نورا : الووو ... اسامة فهام شو رح قلك
- اسامة : ليكي نورا انا ماني متحمل ولا كلمة ولاطايق حالي ، لاتوجعيلي راسي ..
- نورا ؛ لك ليش هيك عم تعاملني والله حرام عليك ليش عم تهملني و كأني بنت من الشارع مو خطيبتك ورح صير مرتك ..
- اسامة : مابهمني .. يلله حلي عني مو فاضيلك ..
سكر الخط بوجهي ، صرت ابكي حسيت حالي عم بختنق ع البطيئ ، حسيت اني عم مووت بسبب حداا ..
طلعت لعند بابا اعدت معو وكنت مدايئة ، حس عليي اديش مقهورة
- بابا : شبك نورا ..
- نورا ؛ بابا ، اسامة متغير عليي ،ماعد فيني اتحملووو عم يعذبني كتير ماحدا عرفان بيلي صايبني ،و لاحدا فهمان اللي عم يصير ..
- بابا : شووفي ، احكيلي كلشي شو صاير ..
سكتت و دمعو عيوني ماقدرت الا انفجر و ابكي ، حكيتلو كلشي .. وقلبي عم يحترئ .. ماقدر يلاقيلي حل .. عرفان انو حظ النحس ملاحقنا ..
- بابا : اتصلي ب اسامة لحاكيه و اتفاهم معو ..
- نورا : يلله ..
+ بابا حاكاه لاسامة بس مافي خواص .. كان كل يوم يزيد عليي المشاكل و الكذب .. كل يوم يتهرب مني .. الكره يلي كرهني ياه ماكنت بعرف شو سببو .. حتى انا ماعاد قدرت طيقو .. طلع من قلبي ..
كل مايتصل بأهلو يقلن كلام عني .. كلام كلو كذب و انا مو عاملتو ..
ووقت يلي بدي احكي الحقيقة ماحدا يسدقني .. الكل كان يسدقو الو ..
لحد ما اجا اليوم يلي انا قررت اعتذر من حالي .. و استسمح قلبي يلي ماعرف يختار الصح ..
- بوقتا كانت كل عيلتي مجتمعة ، ابي و عماتي وعمامي و حتى اهلو ل اسامة ..
انا كنت مستسلمة و كرهانة كلشي .. كنت مو سائلة اذا بقيت عايشة او متت ..
بذكر انو كان وجهي شاحب كتير من كتر التفكير وقلة الاكل ... وجسمي نحيف كتير .. وفي هالات سودا تحت عيوني .. و تعب وكتير شغلان صعبة ..
طلعت من غرفتي و فتت ع الصالون ، اعدت مع الكل ..
حكيت بصوت عالي .. و الكل سكتو و فتلو لعندي ليعرفو شبني
- نورا : خلصص سمعوني كلياتكن .. انا ماعد اقدر كفي مع اسامة .. كلكن بتعرفو بيلي عم يعملو اسامة و باهمالو و معاملتو السيئة ، انا ماعاد طقتو انا صرت اكرهووو وماعد بدي ياه .. فهمتوووو ، بعرف مارح تسدئوني بعرف ..
- عمي " حازم " : نورا لاتخبصي عيب عليكي ، احترمي ابوكي و عمك ابو اسامة ..
- نورا : ماقللت احترام مع حدا .. بس ماحدا حاسس فيني .. كلكن مفتكريني كذابة .. "" كذابة لاني عم احكي الحقيقة "
- عمي " ابو اسامة " : لكك عمي شو عم تحكي والله سعرك بسعر مياس ويسرا ، الله يرضا عليكي شيلي هالافكار من راسك ..
- عمي حازم : اومي نئلعي ع غرفتك تضربي بهاللسان مأبيخوو .. قال شووو ماعد بدي اسامة ، عم نمثل مسلسل لانو ..
+ ضحكت من قلبي .. ضحكت ضحكة استهزاء من الكل .. رحت ع غرفتي .. و انا عرفانة انو مامشي الحال و انو يلي عملتو كان ع الفاضي ..
نمت و انا عم ابكي .. عم قول يارب خلصني .. ماعاد فيني اتحمل اكتر .. عمري 19 سنة وعايشة كل هالظلم و القهر .. يارب خلصني .. دخيلك يارب ...
"" عمي حازم كان رجال بكل معنى الكلمة .. كان يخاف علينا كتير .. وانا بحبو وهو بمون عليي ، بس كمان كان متل الكل ماسدئني وماسدئ حكيي ""
تاني يوم الصبح فئت و انا جمدانة .. ما الي قلب لشي ..
اجاني رقم غريب عالواتساب ..
كان الحوار — مرحبا ..
نورا : ياهلا ، مين معي ؟؟
الرقم : في مجال نكون اصدقاء ..
نورا : لا عيني ، مافي مجال
الرقم : طيب ليش ، الله يخليكي وافقي ..
نورا : من وين جبت رقمي ..
الرقم : هيك كنت عم اتسلا بالارقام وطلع رقمك ..
نورا : بركي انا شب ، شو عرفك اني بنت ..
الرقم : بعرف انك بنت ، من صورك و حالاتك ..
نورا : طيب ، مافيني احكي معك ، رح احظرك
الرقم : لابترجاكي ، والله انا حابب اتعرف عليكي ونكون رفئات مابدي اكتر من هيك ، طيب ليه مابدك ..
نورا : انا مخطوبة ..
الرقم : بسس رفقات ..
(( بوقتا حكيت معو ، مع انو كان شخص غريب بس فهمني كتير .. حكيتلو قصتي مع اسامة .. حسيت في مين يسمعني لو لمرة وحدة .. شكيتلو همي .. وفعلاً سمعني وهو الوحيد يلي سدئني .. "" وطن "" ، فعلاً هالوطن احتواني كتير ، وفهمني كتير )) ..
—---------------