بكيت كتير وما رضيت اهدى.. بابا وقف وجنبي وحكالي انا مصدقك بس الشي اللي بتحكيه ما اله وجود من الاساس.. الظاهر يا بنتي انه عندك حالة نفسية او ضغوطات احنا ما بنعرفها.. صارحينا احكيلنا شو مزعلك وشو مدايقك؟؟ حكيتله مافي شي وأنا أصلا ماكنت بمر بأي ضغوطات .. الصورة والورق الي شفته بخزانتكم هوه اللي جبلي كل اللي أنا فيه.. وصرت أبكي بحرقة وماقدرت أهدى .. طلع اخوي من البيت وصفيت مع بابا وماما وداليا.. ماما حكتلي اخوكي طلع احكيلنا وصارحينا بكل شي.. انا أمنت بهاللحظة وبلشت احكيلهم شو علمت.. حكيتلهم انه ام فارس اللي بتكون ام خطيب لما صاحبتي حكتلي اخد هاد الورق على المقبرة واحفر قبر الزلمة اللي مات طبعاً بعد ماعرفت معلومات وشغلات كتير عنه من ابوه الختيار اللي التقيت فيه لأنه بعد ما رحنا عندهم انا وفارس ولما رجعت مرة تانية لأحكي معاه بطلب من أم فارس وحكالي كتير شغلات.. وانه نقتل بطريقة وحشية واخدت عنوان المقبرة ورحت بنفس الوقت اللي نقتل فيه !! عشاني حكيتلكم انها حكتلي لو ما رح اعمل هيك رح انقتل بعد اقل من شهر! .. ورحت نبشت القبر وطلعلي وحكا معي.. حكيتلهم كل شي صار وفصّلت بالكلام كل تفصيل صار وكيف ظهرلي الميت وحكا معي.. داليا قالت انتي مش طبيعية زينة اللي عم بصير معك مش طبيعي مش معقول هاد الشي كله صاير لمجرد شفتي صورة او ورق بصندوق غرفة ماما.. ماما صارت تسمي عليه وتقرأ ادعية وتبكي.. اما بابا ما صدق الكلام وعصب كتير وحكالي بكفي تخاريف انتي عم تمري بحالة نفسية وتتوهمي ..حفرتي قبر بكل اعصاب باردة كيف اجالك قلب كيف عملتي هيك .. لو حدا عرف بالشي اللي عملتيه او شافك شو رح يصير فينا احكيلي !! رح تبلينا وتسودي وجهنا.. طلع من البيت واتصل مع هاشم.. شكله قله الموضوع اللي بتمر فيه اختك مش طبيعي.. انا صرت ابكي واحلفلهم انه اللي صار حقيقة مش وهم.. وقلتلهم بطلعلي واحلف وما حدا منهم صدق.. أنا يأست وبابا ضل يسألني قبل ما يطلع عن بيت ام فارس لأنه بده يروح يحكي معها ويشوفها.. حكيت لماما بدي اضل جنبك وماتروحي لمكان خليني معك .. الزلمة وراي وجنبي وبكل مكان لاحقني.. ضليت وراها وين ماتروح ووقت ما افوت على الحمام اخليها واقفة ورا وتحكي معي حتى اتطمن .. عشت لحظات رعب بحياتي عمري ماعشتها ولا شفتها.. وصل هاشم على البيت.. حكالي بدي اعرف شو اللي عملتيه وصار يصرخ وشوي كان بده يضربني.. بابا حكاله اني نبشت القبر وماقدر يتمالك اعصابه وحكالي بدك تيجي معنا على دكتور نفسي شئتي ام أبيتي وشو ما عملتي بدك تيجي.. حكيتله انا مش مجنونة وام فارس كلامها صحيح.. في حدا غريب دخل بيتنا وحط الحجاب بغرفة ماما
يتبع..