إيام كانت عم تمشي وانا لساني وحيدة ومنزوية بغرفتي ونفس القصص تتكرر لحتى مليت وما عاد اتدخلت … ومرت الأيام وشهادة الثانوي صارت ع البواب.

دخلت من باب البيت وأنا طايرة من الفرح … بسرعة ركضت لحضن ماما وانا عم قلا: نجحت نجحت وأخيراً

غمرتني بقوة ومسحت ع راسي: الله يرضى عليكي.

نادت لبابا بأعلى صوتا واجا على عجل
ماما: بنتك نجحت وأخيراً رفعت راسنا … أول بنت بعيلتنا درست.

قرب بابا مني وباسني من راسي: الله يبيض وجهك يا بنتي.

ابتسمت بفخر وبسرعة غابت ابتسامتي لما شفت نسوان اخواتي واقفين عند الباب متل الجماد والله كلمة مبروك ما طلعت منهن !!
#مروةآغا
والحمد لله نجحت بمعدل منيح نوعاً ما وخلاني أدخل معلم صف وأتربع على عرش الكلية … ما كان هاممني شي إلا حياتي الخاصة ومستقبلي … بس يلي ما كنت حاسبة حسابو عيون الغيرة يلي عم تقدح شرار … عيون عم تتفحص وتحاول تأذي بشتى الوسائل !!

وبلشوا يدايقوني من لما نجحت بشهادة الثانوي وجبت مجموع عالي أحسن من كل الحواليي ورفعت راس أهلي كوني أول بنت دارسة بالعيلة ونسوان اخواتي ما درسوا أبداً بس "سوسن" درست معهد انجليزي ودائما بتشوف حالا فيه !
وهالشي خلا يصير في غيرة وخصوصاً لما صرت اطلع كل يوم ع الجامعة … وطبعاً بعد معاناة كبيرة حتى وافقوا اخواتي وبابا وقفهن عند حدهن ! …

كالعادة وككل يوم لبست وجهزت حالي للجامعة فتحت باب البيت وقلتلهن: يلا أنا طالعة سلام

صرخ "عابد" من بعيد: شو لوين

التفتت وقلتلو: ع الجامعة

عابد: وهيك بهالتياب؟؟

ندى: شبهن تيابي فستان طويل ومستور.

عابد: من يوم ورايح بتلبسي جلباب.

ندى: هالفستان بيشبه الجلباب بس ع الموضة.

لمحت سوسن همستلو بأذنه وبعدين مسحتلو على بلوزتو ورتبتا وهوي رجع قلي: والله صايرلك لسان أنا قلت جلباب وبس

فتحت الباب وطلعت وكنت بدي أخبطو وبعدين وقفت شوي وفكرت وسكرتو ع الهدا لحتى تعرف انها ما أثرت فيي بس أنا من جوا كنت عم فور وأغلي.

من هاليوم بلشوا يألفوا عليي قصص شي على لبسي وشي على طلعاتي وشي على أخلاقي وأخر شي وصل الأمر للشرف يلي ما كان سهل ينحكى فيه أبداً.

وبعد ثاني سنة صرت أعطي دروس خصوصية وصار معي مصاري … اشتري تياب وجوال جديد وحتى رفه معي أمي يلي ماعاد حدا أهتم فيها … ومن كتر ما انشغلت قررت جيب وحدة تساعد ماما بترتيب البيت مرتين بالأسبوع … وما كان هاممني شي هاد تعبي أنا وبستحق عوض حالي.

والحمد لله اتخرجت بالسنة الثالثة وبعد تخرجي فورا سجلت على شغل من دون علم أي حدا بالبيت قالولي قبول العمل بيبقى وقت لحتى يوافقوا عليه وأنا قلت بجرب حظي … وبعد سنة كاملة لحتى وافقو..

باليوم يلي وصلتني فيه ورقة القبول كنت خيفانة كتير قول لأهلي وأخواتي لأن بعرفهن ما رح يوافقو أبداً … رجعت ع البيت مكركبة كتير وكنت عم اجلي الجليات لما وقفت "سوسن" بقربي وبلشت تستجوبني.
سوسن: شبك ما ع بعضك.

ندى: سلامتك.

سكتت للحظة ورجعت تحكي بكلمات متقطعة: لا تكوني عشقانة … وغلطانة … وخيفانة

شهقت وبلش قلبي يرجف وهيي واقفة قدامي عم تتغمى بعيونا وكأنها صدقت كذبنها … وما لقيت إلا احكيلها شو صار معي لأخلص من شكوكا
رجعت افرك بالكاسة يلي فركتا قريب العشر مرات وقلتلا: لا شو عم تحكي أنتي … أنا بس … أنااا قدمت على شغل ووافقو عليه وخيفانة من أخواتي ما يوافقوا.

رفعت حواجبا ونزلتهن وهيي عم تسأل: شغل وين؟

ندى: ما طلعلي غير حماة أو حلب ماعرفاني شو أعمل.

سوسن: شوفي سكري ع الموضوع هالفترة لان اهلك ما ناقصهن وبعتقد مارح يوافقو تسافري.

تركتني بحيرتي وراحت وانا بقيت عم اجلي جليات الغدا.

وبنفس هاليوم بالليل سمعنا صوات أخي عابد ومرتو طالعة من غرفتهن كانت كتير عالية … أخي عم يقول لأ وهيي عم تصرخ وتعاند … وقفنا كلنا عند الباب وبابا دق دقتين لحتى طلع أخي عم يمسح العرق يلي أتجمع على وجهو !!! … وقف قدامنا ونحنا عم نسألو شبو وطلعت مرتو وهيي عم تصرخ
سوسن: شوف يا عمي أبنك لما اتجوزني قلي رح يقبل كمل دراستي واشتغل لكوّن مستقبلي وقال هلق ما عندوا نسوان يشتغلو بيرضيك هالحكي.

عابد: بكفي حكي فاضي أنا قلت لا هاد الناقص تشتغلي مع الرجال.

سوسن: لك انت وعدتنييييي … ماحاجي الله لسا ما طعمني ولاد منك وكمان بدي ابقى محبوسة بالبيت بس عم اشتغل فيكن.

رفعت عيوني واتطلعت بأهلي وماما كانت عم ترجف … اشتهيت افتح تمي واسألا عن أي شغل عم تحكي !! ماطول نهارا بغرفتا ! … بس بابا قصر الشر.

بابا: بكفي صريخ احترموا بعض واحترموني لعمى! جوزك معو حق غيران عليكي من العالم … لازم تفرحي.

سوسن: افرح ! لأ ما غيران عليي بس هوي قال ما بيقدر يشوف معي مصاري بعدين قال بهتو فيهن … كيف أنا متعلمة وهوي لاء غيران مني.

قرب منا وضربا كف ونحنا وقفنا مذهولين وماما مسكتو ومنعتو يقرب منا وبابا صار يهديه … وهيي رجعت تصرخ أكتر من قبل وتتوعدلو
سوسن: أنا بفرجيك عم تضربني والله لأشتغل أعطي دروس خصوصية ولا بس ندى بتشتغل وبصير معها مصاري ونحنا لأ وكمان بدا تسافر ع