📚قصص||روايات||منوعة📚

rwayate

#حكم_القلب
-2-
@rwayate
(بعد مرور عامين على وفاة أروى)

أسيل: لك يزن اعملك سندويشة جبنة و لا زيت و زعتر خلصني

يزن: يا مجنونة تاخرنا عالدوام

أسيل: فهمني انت شو خسران اصلا انا مديرتك بالشغل يعني مافي شي تحمل همو، مافي تطلع قبل ما تفطر

أم اسيل: ابني اسيل معها حق الها سنتين عم تعودك تفطر قبل الشغل و ما تعودت

يزن: اصلاً الحق علي بمرق اخدها معي عالدوام بس ما بهون علي خليها تطلع بالمواصلات… يلا خلصونا بقى

بهدول السنتين جرح الكل برد الا جرحي انا… بهداك الوقت الكل انهار و انا كان لازم كون السند الهن لانهن حبايب الغاليه!
كبست ع جرحي… و تركت روحي عم تصرخ
و صرت اركض من بيت اهلها لاروى لبيت يزن
واسي هدول و اسند هداك
تعاملت مع طبيب نفسي لاني كنت على وشك افقد عقلي من كتر ما كنت حمل حالي فوق طاقتي
قلتلو انو بعد وفاتها ما بكيت ابداً و حذرني انو الدموع شي ضروري و ما لازم امنع حالي من البكي و لازم فرغ مشاعري بس كان صعب كتير
كنت اشتغل بشركة كبيرة و معروفة و براتب خيالي و الي مركزي
اضطريت قدم شغل ع شركة يزن حتى اضمن كون حواليه هالفترة و فوراً قبلوني بس بربع راتبي الي كنت اخدو بس ما همني المهم و صية أروى..
و ولاء اخت اروى كنت حس حالي مسؤولة عنها و خاف عليها اكتر من حالي و امها كانت متل امي بالضبط كانت حنونه و تحبني كتيررررررر….
و بس شفت الكل وقفو ع رجليهن… حسيت هالحمل راح و حسيت انو اروى هلا مرتاحه بقبرها

اسيل: نازلة نازلة يلا
ركبت بالسيارة و اعطيتو سندويشتو

يزن: ما بدي اكول كليها انتي

اسيل: عفواً منك بس انا ما سألتك ازا بدك تاكول او لأ… مافي نقاش بهل موضوع انا مديرتك و بدك تسمع كلمتي

يزن: مديرتي بالشغل مو هون، بس رح اكلها لانك عملتيها بايدك الحلوة

اسيل: يا لطييييف شو مكولك… اجازة ساعيه

مافي هلكت و انا غطي وراك

يزن: ماشي حضرت المديرة يا لطيف شو قوية…

كنت خاف عليه كأنو ابني الايام قوت علاقتنا ببعض كتير يمكن لان كنا نتشارك ذات الوجع بس السر الي كنت مخبيتو بقلبي كان تقيل على صدري…
علاقة اروى بأخي باسل!!
كانو يحبو بعض و على وشك الارتباط قبل ما يعجب يزن فيها و يصير يحاول يحكيها و ما كان بيعرف انها مرتبطة و يزن طبعاً شب حلوو متعلم و من عيلة غنيه كتيرررر ف استغنت عن اخي و خانتو…. اخي جن بس عرف انو خسر حبيبتو و انها باعتو و كان بدو يفضحها بالصور و الرسائل الي عندو بس انا تدخلت و حذفت كل شي و حرقت كل الرسائل و حميتها منو… اخي ما تحملو عقلو سافر على اللبنان ليشتغل و انا و اروى كانت علاقتنا اصعب من انها تتحطم بعد هالموقف
مع الايام هي حبت يزن انا متاكده
لان صعب كتير الي يشوفو ما يحبو

حتى انا…
حتى انا وقعت ضحية سحرو و جاذبيتو
و بدون ما حس ع حالي
بلشت اعشق الرجال الي وصتني عليه رفيقتي!!

اسيل: الو يزن تعشيت؟

يزن: ايه تعشيت و ليكني بتختي بدي نام

اسيل: ممممم سكرت جرة الغاز؟

يزن: ايه

اسيل: قفلت الابواب؟

يزن: ايه

اسيل: جهزت خطة العمل بكرا؟

يزن: ----

اسيل: لك يزن نمت؟ الووو يا دب نمت؟ ههههه متل الصغار
يزززن؟ لك ابو الزوز؟
يزن بتعرف؟ …. انا بحبك…

و نزلت دمعتي و سكرت الخط… تاني يوم الصبح بطريقنا للشغل يزن كان وشو ما بيتفسر مقلوب قلب و معصب و انا كنت خايفه يكون سمعني و ما عم انطق بحرف
اخر شي طلعت عن سكوتي و رسمت ابتسامه باهتة لتخفي خوفي و خجلي و قلتلو لك يزن شبك هيك من وش الصبح؟

يزن: ما في شي!!

زاد خوفي و حسيت حالي عرقت.. و تلبكت..

اسيل: بلا هالاسلوب احكي شبك و خلصنا…

اتطلع فيني بطرف عينو
كانو عيونو حمر
صف السيارة ع جنب و حط راسو عالدركسيون ( مقود السيارة)
و قلي اسيل

اسيل: نعم؟

يزن:..

📚قصص||روايات||منوعة📚

rwayate

📚قصص||روايات||منوعة📚

rwayate

#حكم_القلب
-3-
@rwayate
يزن : حلمت بأروى

لهلأ لهل لحظة حروف اسمها بتزلزل كياني
بشتقلها
بحنلها
بتزكر ضحكتها
بتزكر كل صداقتنا و زكرياتنا
رجف قلبي و صحيت لحالي وخفت يكون مستقصد يقلي هاد الحكي لان سمعني امبارح
بلعت ريقي و ما قدرت امنع دمعتي و هو عيونو كانو حمر متل الجمر

اسيل : طيب لازم تكون مبسوط .. انا كتير بتمنى احلم فيها
بتعرف انا كتير اشتئتلها .. كل ليلة بدعي احلم فيها يمكن هالحلم يكفيني
اشتقت احكيلها شو بصير معي
اشتقت اتخانق انا وهي و اشتقت وقت ازعل يكون في حضن ارتمي فيه
من وقت ما راحت وانا كتير وحيده ياريت احلم فيها بس ما حلمت فيها ولا مره

يزن : انا كنت مبسوط بس وقت صحيت وما لقيتها معي وجعني قلبي
خلص اسيل لا تبكي ... بعدين انا جنبك ليش عم تقولي انك وحيده

أسيل : لا انت مو جنبي انت بعيد كتير عني
انا عنجد وحيده و لحالي ومحدا عم يفكر فيني ولا حدا حاسس انا شو موجوعه
محدا حاسس الا تربة اروى الي شربت من دمعي لشبعت
محدا بيعرف شو في بقلبي الا حجار قبرها
حجر حجر حفظوني

ما حسيت الا يزن عم يقرب مني ... رفع شعري عن وشي وضمني وقلي خلص هس
لا تحكي هيك انا معك فهمانه ؟

بهي اللحظة كنت كتير ضعيفة ... مسكتو بقوة وقلتلو لا ترركني انا ما الي غيرررك

راح هداك النهار ... و حسيت انو يزن كمان عندو مشاعر تجاهي
فكرت انو الي مخوفني هو نفسو الي مخوف يزن
انو ممكن نكون عم نخون أروى بهل طريقة !! ما بعرف شو كان عم يدور براسو

لوقت ما صار موقف ... وضح كل شي
للكل

قررنا نطلع سيران بما انو الجو ربيع ... طلعنا على مزرعة يزن انا وهو و امي و ام اروى و اخت اروى ولاء

كنا كتير مبسوطين وعم نضحك و يزن عم يعمل مشاوي ونحنا عم نفرم التبولة

كان يزن واقف عند المنقل و التفت ليحكي معنا ومانو منتبه ضربت ايدو بالمنقل وانحرقت

ما بعرف شو صرلي

صرخت صوت كأنو ايدي الي انحرقت

لا لا كأنو روحي الي انحرقت

ركضت عليه متل المجنونه و مسكت ايدو و صرت انفخ عليها وقلو صرلك شيييييييييي ؟؟ صرلك شي ؟

ضحك ضحكة بسيطة وقلي لا يا مجنونة ... ما بني شي بسيطة

اسيل : لا ليك حمرا كتيرر تعال حطلك عليها مي تعاااال

و سحبتوو و عم اسكب على ايدو مي باردة ما انتبهت الا حدا ضربني على وشي كف قوي كتيرررر

ما استوعبت بالأول انو كف

حطيت ايدي ع خدي

والتفتت لشوف مين الي ضربني وليش !!..

📚قصص||روايات||منوعة📚

rwayate

📚قصص||روايات||منوعة📚

rwayate

#حكم_القلب
-4-
@rwayate
التفتت لشوف مين الي ضربني وليش ..

كانت ولاء !! ما فهمت شي كنت متل المصدومة ما عم احكي بس كانو عيونها عم يطلع الشرار منهن

وقف يزن و وعصب كتير وقلها ولاء شوووو الي عملتييييييييه جنيتي ؟؟؟؟؟

ولاء : زعلت على الخانوم مو ؟ مو شايفها كيف عم تتحركشك
خلص بئى بكفييييييييييي بكفيييييييييييييييي كلنا شايفين شو عم تعملي وساكتين ، كلنا عم نكزب حالنا ونقول اسيل ما بتعمل هيك شي
بس انتي تجاوزتي حدودك وما عاد محترمه حالك .. شو بدك ؟ بدك تسرقي خطيب اختي قدام عيوني
؟
ردي ليييش ساااكته

كان حكيها عم ينزل علي متل الناااار

اتطلعت على امها وعلى امي والكل كان مصدوم

كنت عم ارجف و مصدومه منها ، كل شي عملتو كرمالها وهيييك بتعمل فيني ! بتضربني قدام الكل
وبتوصفني بأبشع الوصف

هيك بتعمل فيييني بعد ما كنت اقسم راتبي الي والها
جبلها تياب متل ما جيب لحالي
واسهر عليها ازا مرضت و اخدها سيرانات لتغير نفسها
اديش نامت بحضني ؟ اديش مسحت دمعتا
اديش بستها ع جبينها و غمرتها
ردتلي كل شي بكف واحد
كف واحد بس هاد الكف كان اهون علي من رد يزن عليها

يزن : ولاء انا بعمري ما زعلتك بس برحمة اروى ازا هلا ما بتعتزر لاسيل ما رح يصير خير

ولاء : ههههه لا ياه شكلك انت كمان عشقانها و خجلانين تحكولنا ... طيب خبرونا كنا منفرحلكن
الا ازا خجلانين من حالكن ها ؟

يزن : لك انتي شو عم تخبصي شووو عم تخبصيييي

ولاء : انا ما عم خبببببببص انتو الي عم تخبصو داقت فيها الدنيا تحط عينها على خطيب اختي الله يرحمها
ما ضل شب غيرو بهل دنيااا .. وانت يا استاز كيف بترضى ؟ لك مو كنت تحب اختي

يزن : اسمعي رح قلك كملتين و رد غطاهن ... اسيل متل اختي

لا شعورياً وقفت وحطيت ايدي ع خدي

اسيل : كتر خيرك حبيبتي ولاء ... شكراً عالكف انا فعلاً بستاهلو.. و متل ما قلك يزن
انا ما بعتبرو الا اخي و افكارك هي لانك لسه صغيره ومو فاهمة الحياة
انا مستحيل فكر بيزن غير انو اخي ..
اتطلعت فيه و كان الوجع جوا بقلبي مو على خدي .. اتطلعت بعيوني و عدت الجمله وقلتلو
اخي ... وبس

(( اسيل متل اختي ))
اسيل متل اختي
اسيل متل اختي
ضلت هالجملة ترن براسي اسبوع كامل
كان صوتو يتردد براسي
كنت رح جن ومو عرفانه كيف بدي اهرب منو .. كيف بدي اهرب من حبو الي مسيطر على كل ذرة فيني

وانا عم فكر رن جرس البيت .. رحت فتحت وكانت ام اروى عالباب

اسيل : اهلا وسهلا خالتي تفضلي فوتي

فاتت وعملتلها فنجان قهوة وحكينا حكي عادي و اعتزر عن تصرف ولاء وحكيها بعدين طلبت من امي تتركنا لحالنا
قامت امي وبعدا حكيت ام اروى وقالت

ام اروى : حبيبتي اسيل ... انا بعرف انك بتحبيه ليزن

صدمتني كلمتهاااا وانفعلت وصرت قلهااا لا لا ليش كلكن بتفكرو هيك

ام اروى : اهدي واسمعيني ... انتي بتشكي انو بعتبرك بنتي ؟
ولاء مراهقة ومندفعه وما عم تفكر بشكل صحيح
بس يا عمري انتي الله عوضني فيكي لتكوني بنتي
ويزن من ريحة الغالية وما بريدو يبعد عني
انا بدي اجمعكن ببعض ... بدي تكونو لبعض لارتاح
انا رح حاكي يزن بموضوعكن ... ورح افرح فيكن فهمانه يا روحي انتي ؟؟؟

📚قصص||روايات||منوعة📚

rwayate

📚قصص||روايات||منوعة📚

rwayate

#حكم_القلب
-5-
@rwayate
جربتو شعور الأختناق ؟
يديق نفسك وتحسي ما ضل هوا بالدنيا كلها ... تكوني بحاجة نفس واحد وحاسه حالك عم تموتي
و فجأة يحطولك الأوكسجين لتخادي نفس ؟

حكي ام اروى كان متل الأوكسجين !! نور جديد عم يضوي جوات البي
ما بعرف كيف كانت دمعتي عم تنزل و عم اضحك بنفس الوقت
حطيت راسي بحضنها وقلتلها انا كتير بحبو
ضلت تلعب بشعراتي وتوعدني انو كل شي رح يتصلح .. ضلت توعدني تجمعني بحبيب عمري
بس تماسكت شوي طلبت منها ما تصرحلو بموافقتي الا لما تاخد موافقتو لاطمن ووعدتني بهاد الشي

وطلعت من عنا من البيت على اساس رايحه لعندو فوراً لتحل الموضوع

حسيت الروح ردتلي كنت كتير كتير مبسوطه

صرت عد الثواني والدقايق
ما عرفت كيف الوقت رح يمضى لاسمع من تمو كلمة حبيبتي !! كنت كتير متوترة ومبسوطة
ما بدي شي من الدنيا غيرو
يا الله شو بعشئو .. كتير بحبوووو

مضي وقت منيح .. ساعه وساعتين و تلات وما وصلني خبر من ام اروى
بلشت اتدايئ و اعصابي تفلت

كنت خجلانه دئلها بس قررت احكي معها ... مسكت موبايلي ... وقبل ما اعمل شي
شفت انو يزن عم يتصل علي
وقف قلبي
ما عرفت افرح لما خاف
رديت و انا متردده

يزن : الو كيفك اسيل ؟

اسيل : انا ؟ منيحه انت كيفك

يزن : ليش من وقت الي صار بالسيران ما حكيتي معي
شو ما اشتقتيلي وليه ؟

ابتسمت و ما بعرف ليش زادت دئات البي

اسيل : اشتئتلك كتير.. بس

يزن : لا بس ولا بطيخ .. اسمعي شو انا نهيت الموضوع

اسيل : عفواً ؟ انو موضوع

يزن : اليوم اجت لعندي مرت عمي وقال بدها يانا نتجوز ههههههههههه
لك شكلهن عنجد فهمانين غلط ، قعدت معها ساعتين كاملين ع رواق وفهمتا منيح انو نحنا متل الأخوة
وما في بيناتنا شي ابداً ... بقى روقي وخليني اسمع هالضحكة الحلوة خلص كل شي انحل

اسيل : هه ... عنجد يزن ؟

يزن : ايه عنجد شبك ؟

اسيل : بتعرف انو انا كتير بكرهك ؟

يزن : حاجتك غلاظة بقى .. الي كتير ما شفتك خرج اجي اسهر عندكن ؟

اسيل : لا

يزن : اوف ليش ؟

اسيل : لانو ... لانو

يزن : ايه ؟ لانو شو ؟ ليكون ما اشتقتيلي ؟

اسيل : لا بس لانو خطيبي هلا رح يجي

سكت يزن خمس دئايئ
كنت عم اسمع نفسو و انا كان نفسي عم يزيد بسرعه .. بعدين حكى وصوتو كان مهزوز

يزن : خطيبك ؟

اسيل : ايه .. عملتا مفاجئة الكون .. وهيك كمان بترتاح عالأخير من شكهن بعلاقتنا .. و لا شو رأيك يا اخي ؟

يزن : الف مبروك .. تتهني

اسيل : الله يهنيك يارب وعئبال عندك

و فجأة رجعت الحيوية لصوتو كأنتو انتعش من جديد

يزن : هههه قلتلكن الف مرة انا ما بعد اروى ما رح اتجوز .. يلا لكن يا قطة بلا ما اخرك عن حبيب القلب

جملتو هي دمرت الأمل الي باقيلي .. اعطيتو فرصه
اعطيتو فرصه ليقلي لا انتي الي
اعطيتو فرصه ليعترف
عملت كل شي .. بس رفضني .. رفضني بكل الطرق

ماما : حبيبتي اسيل شبك ؟

اسيل : ماما ..رديتي خبر للجماعه الي طلبوني من اسبوع ؟

ماما : والله يا امي خجلت شو بدي قلهن الشب كتير معجب فيكي
هي تالت مره بيدقو بابنا وخجلت قلهن لا اجلتهن شوي

اسيل : ممتاز .. قليلهن انو نحنا موافقين ..

#يــــــتــــــبــــــع

📚قصص||روايات||منوعة📚

rwayate

📚قصص||روايات||منوعة📚

rwayate

#حكم_القلب
-6-
@rwayate
تمت الخطبة بسرعه لان الشب كان كتير مستعجل و اهلو فرحو فيني .. عزمت ام اروى و ولاء
وتعاملت معهن بشكل طبيعي و كنت قوية كتير .. قررت دوس على هالقلب الي عزبني كتير وافتح صفحة جديدة
و يمكن رب العالمين حب يهون علي مصيبتي ..
اخي باسل عملي مفاجئة ورجع من لبنان ليحضر خطبتي
كتير انبسطت برجعتوووو

ماجد .. كان اسم خطيبي
اكبر مني ب 10 سنين .. طويل و بنية جسمو ضخمة
خجول شوي ... مثقف و سمعتو متل المسك
كان مشعلي اصابعو العشرة
قعدت معو مرتين و كنا نحكي مكالمات

بهل فترة يزن اختفى من حياتي .. ما بعرف ليش ما بئى دئلي
وانا كنت كتير مجروحه منو
كتيررررررررر

فاجئني اخي باسل لما قعدنا سوا و طلب مني احكيلو عن اروى .. ترجاني قلو كل شي عنا
وقلي انو ما قدر ينساها وكمان ما قدر يسامحها

يا الله يا اروى
لو تعرفي يا رفيئتي اديش عم تعزبيني .. لو تعرفي يا حياتي شو عم اتوجع
يا ريت انا رحت بدالك .. مو كان احسن ؟
و صارحني اخي انو قدر يخبي رسالة بعتتلو هي اروى بأخر علاقاتهن مع بعض
ورجاني ياها و صار يقلي الي بتكتب هالكلمات ما بتكو عنجد بتحبني ؟
ضميتو و قلتلو ايه بتحبك .. بتحبك
ما كان فيني اجرح اخي اكتر بعد .. وما كنت عرفانه انو هالرسالة في وراها مصيبه

انا كان مكتبي بالشغل منفصل عن مكتب يزن .. و صرت روح عالدوام لحالي ف ما كان في
اي موقف يجمعنا .. لوقت ما هداك النهار اجا هو لعندي عالمكتب ..

كنت عم اشتغل على الكومبيوتر .. بس فات شميت ريحة عطرو
رجف البي
بس ما حكى شي ضل واقف عالباب
وعملت حالي لسه مشغوله ومو منتبهة مع انو كل حواسي كانت معو

يزن : احم احم .. نحن ها

اسيل : ييه يزن من ايمت انت هون فوت تفضل

يزن : كيفك يا عروس ؟

اسيل : تمام كيفك انت ؟

يزن : والله مشتئلك .. هيك ما بتسألي عني ؟

اسيل : انت الي اختفيت وحبيت اتركك ع راحتك

يزن : هلا انتي بتكرهيني ؟

اسيل : انت مجنون ..

يزن : لا احكي جد ، بتكرهيني ؟

تطلعت بعيونو ..

اسيل : بالعكس ... انت ما بتعرف شي

يزن : طيب عرفيني ؟

اسيل : ما بئى يفيد

يزن : لك صايرة تحكي بالألغاز

اسيل : هههه ما علينا .. ما بدك تجي تسلم ع باسل ؟ وصل من لبنان و امي كمان اشتائتلك

يزن : وانتي ؟

رجف البي وخبيت عيوني ..

اسيل : ايه طبعاً مو انت اخي كيف ما بدي اشتئلك

وطلعت من المكتب فوراً ..

المسا زارنا يزن .. كان اخي برا البيت .. تعشينا سوا وعملت شاي طلعت انا وياه قعدنا عالبرنده نشرب

وكنا ساكتين

يزن : بتحبيه لخطيبك ؟

اسيل :ماجد شب ما في منو بعتقد هو رح يسعدني

يزن : انا ما سالتك ازا هو منيح او لا .. سالتك بتحبيه ؟

اسيل : مممم ما بعرف ..

قام يزن من كرسيه
و قعد عالأرض جنبي ... و مسك ايدي

اسيل : شبك يزن ؟

يزن : طيب وانا ؟

اسيل : لك شبك ؟

يزن : انو وانا ؟

اسيل : انت شو ما عم افهم عليك

يزن : اسيل انا اسف كتير .. والله العظيم اسف .. انا من كل البي بح

وقبل ما يكمل الكلمة الي كنت مستعده ادفع عمري لاسمعها .. قاطعو باسل .. و شدو من تيابو و زتو بعيد عني

📚قصص||روايات||منوعة📚

rwayate