المذيعة:تزوجو بعدين ؟
غيداء: لا طبعا لانو انا وقفت بوجها و جربت معا كل الطرق حتى اهتديت لطريقة نفعت معا ،وقت قالتلي انا رح اتزوجو حتى لو انت ما وافقتي عليه عملت حالي انو غبت عن الوعي و وقعت بالارض ،وقت شافتني هيك خافت علي كتير و ركضت تصحيني بالمي الباردة و انا وقتا اخدتا نقطة ضعف عندا و من وقتا تسطحت بالتخت و عملت حالي مريضة و بعد يومين رحت عند الدكتور و رجعت خبرتا بانو حالتي سيئة و معي مرض خطير و اني عم بموت وقلتلا انا يمكن موت بعد اسبوع او اسبوعين بس اعرفي انو انا ما رضيانة على زواجك من هالشخص و غضبانة عليكي و ما رح تتوفقي بحياتك ابدا
المذيعة :و نفعت هالطريقة معا ؟
غيداء:اي و يلي ساعدني اكتر انو بعد بفترة تقدملا شب عزابي و انا وافقت عليه فورا و قلتلا هيدا مناسب الك و انا بدي امن عليكي قبل ما موت و الشب فعلا كان كتير كويس و خلاها تقدم بكالوريا و تسجل جامعة و حبتو فورا و نسيت هداك المتزوج يلي تزوج على مرتو وحدة تانية وقت فقد الامل من بنتي لانو هو كان بدو يتزوج اي وحدة بس
المذيعة : سيدة غيداء هلأ حياة بناتك الاربعة انت رضيانة عليا ؟او كنتي راسمة براسك صورة مختلقة لمستقبلن ؟
غيداء:لحمدلله بكل الاحوال ،بس انا كنت حابة كلن يتعلمو و يدرسو بس لحمدلله بنتي ندى مخطوبة لشاب بحبا كتيرر و عم يحاول يطلعا من ذكريات الماضي،يعني لحمدلله الله عوضا عن الحادثة الاليمة يلي عاشتا و بنتي ناديا مبسوطة مع زوجا و صار عندا بنت منو و بنتي ابتسام مخطوبة و عم تدرس شريعة و بنتي مريم عم تدرس تربية و صار عندا ولد و لحمدلله الاربعة مبسوطين بحياتن
المذيعة:برايك شو السبب يلي خلا حياة بناتك تفرق عن حياتك ؟الحظ مثلا
غيداء:ما في شي اسمو حظ في شي اسمو قرار و حسن اختيار و اتكال على الخالق ،بناتي عاشو بجو غلط و بيئة سيئة مع اب مهمل و مستهتر و مغيب دورو للاسف ضرن اكتر ما نفعن،ما كان موجود بحياتي الا بالاسم بس و لو انا تركت بنتي ابتسام على افكارا و بنتي ندى منهارة و لو ما عرفت اتصرف بقصة بنتي ناديا و مريم ،كان ما ممكن وصلنا لهاي النتجة اليوم و لو اهلي انا ما زوجوني لهيك رجال سيء من الاول انا ما كانت حياتي هيك ،دائما لازم تكون البداية صحيحة حتى تكون النهاية صحيحة و حتى اذا انحرفت البنت او الشاب عن الطريق الصحيح لازم الاهل يرجعون بالحيلة و الذكاء ما بالصراخ و الضرب ، و الاهل لازم يكونو اصدقاء لاولادن حتى الولد يطمن و يصارح اهلو بكل شي و بنصح الاهل انو ما يزوجو بنتن تحت عمر العشرين سنة ،البنت لازم تدرس و تتعلم و تفوت جامعة لانو شهادتا سلاح بايدا و يمكن الزمن و غدرو يخليها تحتاجا الشهادة و انا لو تزوجت و معي شهادة كنت من زمان تركت زوجي و اشتغلت و صرفت على حالي و على بناتي وما كنت ربيتن بهيك جو و لا زوجتن بعمر صغير
المذيعة :هلا بعد هالعمر ما بتفكري تطلبي الطلاق من زوجك ؟
غيداء:انا ارملة ، زوجي مات من سنتين ،صار معو تلف بالكبد و الكلاوي من كتر المشروب و تعذب كتير قبل ما يموت الله يرحمو
المذيعة :منتشكرك كتير سيدة غيداء انو اعطيتينا من وقتك و شاركتينا قصتك و امتعتينا بكلامك بتحبي تختمي الحلقة بكلمات اخيرة بتوجهيا للام حصرا
غيداء:شكرا الك مدام رنا و شكرا لطاقم العمل يلي عم يتعب ليقدم برنامج توعوي بالدرجة الاولى و بحب قول للام بانو لازم تكون قوية لانو الامومة ما بس مشاعر و احساس حلو ،الامومة مسؤولية كبيرة و اعمال شاقة و مأجورةو لازم تكوني مفتحة عيونك عشرة على عشرة على الصبي و البنت لانو صرنا بزمن بخوف كتير و لانو نحن مأمنين لنربي جيل على مبادئ سليمة و شكرا مرة تانية للجميع
انتهت.