مرق اسبوع ع زواج ابراهيم وانا يئسانة من هالحياة وحزينة حاسة حالي ما الي حدا مخنوقة كتير
انا خسرتو لأبراهيم خسرتو
ماكان يمرق يوم ما ابكي فيه واتذكرو
كل شي بذكرني فيه وبحكيو
اجت امي لعندي وقالتلي نحنا رايحين نبارك لأبراهيم قومي روحي معنا
كان بدها ياني روح وشوف بعيني انو كل شي انتهى حتى ارجع لحياتي الطبيعية
بس ماقبلت روح قلتلها تعبانة
راحو اهلي وانا انفلتت بالبكي ماكان الي نفس حاكي حدا
مر شهر ع هالحالة وانا بغرفتي لا بطلع ولا بفوت واجا ابراهيم لعنا مرتين وماشفتو ابدا
كانن بنان عمي يجن يحكن معي بس مارد ولا بكلمة يئسانة ع الخالص مابدي شي من هالدنيا
ظليت هيك شهر وعشر ايام
قررت انو اطلع لان لو ضليت كنت متأكدة انو رح بصير معي مرض نفسي واتعقد
طبعا مانسيتو لعمري ابراهيم والله مابتسدئو اني حبيتو اكتر واكتر
بيوم طلعت اسهر مع اهلي وستي فتحت موضوع ابراهيم
وصارو يحكو
ام عصام. هاد اختيار امو لألو وهيك نصيبو
من حكيهم فهمت انو ابراهيم ومرتو بيتخانقو كتير ومانو حاببها وانو زواجتو غصبن عنو
انا سمعت هالحكي ورجعت النار لقلبي مابعرف افرح انو مانسيني ولا احزن عليه لانو مانو مبسوط
بعد اسبوع قالتلي ايات ابراهيم بدو يترك مرتو ماعرفت افرح لو ابكي بس هيك حسيت رجعلي الامل من اول وجديد
بعد يومين اجا لعنا ابراهيم وانا ضيفتو القهوة وكنت مبسوطة كتير بشوفتو
وماكان في حدا الا ستي قالي انو بدو يترك مرتو مشاني بعد كم يوم بس ليتفاهم هوا وابوها
بالاول ما اقتنعت بس قلي انو مستحيل يجي يوم ويحبها قال انو هي ماعاملتلو شي بس هو ماحبها
زعلت عليها كتير بس فرحت لنفسي كمان انا بحس وعندي مشاعر وبحب
ظليت مبسوطة طول اليوم
بالليل مرتو لأبراهيم خبرتو انها حامل
وانجبر انو يبقى معها ومايتركها
بس عرفت هالشي رجعلي الاكتئاب ليش هيك عم يصير معي كل ما اتأمل بشي بينتزع يمكن هيك حظي انو بعمري ما افرح
تخطيت هالشي وصرت شوفو لأبراهيم كل كم يوم
ويحاول يحكي معي ويقلي انو بحبني ومن هالحكي وعرف اني لساتني بحبو ومانسيتو
وظلينا ع هالحالة حب من بعيد لبعيد
قريب مني وبنفس الوقت بعيد عني
مرقت الايام وكل يوم حبو اكتر
ابراهيم ماكان حارم مرتو من شي كان مدللها وبيعمللها كل شي بتتمناه بس ماكان يحبها
مو لأن انا حبيبتو بحكي هيك بس عنجد ماكان يحبها وعمتي بذاتها قالت انو ابراهيم مانو مبسوط
كانت تشوفو وتزعل عليه عايش معها غصبن عنو ولما يضحك ما يضحك من قلبو عايش معها بس لأنو مجبور يعيش معها
اجا اليوم الي ولدت مرتو فيه وجابت بنت كان بدو يسميها ع اسمي بس اهلو ماقبلو
اتصل بخالتو هند الي كان يحبها كتيررر وبياخد رأيها بكل شي وسألها شو يسميها للبنت قالتلو انت ابوها وانت الي بتسميها قال اسمي ماعجب اهلي بدي انتي تختاريلي اسم ع زوقك قالتلو سميها ( آيه ) وسماهت آيه
بعد فترة شهرين سمعت كمان مرة انو علاقتهن مو زابطة يمكن لان مافي حب بينهن
حتى مرتو سمعت عنها انو مابتغار او مابتهتم فيه يعني لو يحكي مع عشر بنات غيرها عادي
كبرت المشكلة بينهم
وقررو يتطلقو
ورجع لعندي وقلي رح طلقها واجي اطلبك
ماحكيت شي لاني فقدت الامل من بعد ماصار اب
بس قررو الطلاق طلعت مرتو حامل مرة تانية
لان انا هيك حظي يمكن لانو مو نصيبي ومو مكتوبلنا انو نتزوج
تقبلت الموضوع وقلبي من جوا محترق والله كل يوم مابنام الا وانا فكر فيه وبنيت الي والو حياة حلوة بالاحلام غير عن الواقع تماما
لان ابراهيم عايش بقلبي وروحي مو مهم انو تزوج المهم اني بحبو وبحبني وهاد بكفيني
رجع الضغط عليي من قبل اهلي كل مايجي عريس لألي ارفضو واهلي معد تقبلو هالشي عمري صار 19 سنة هاد العمر عنا مستحيل البنت توصلو الا يكون عندها ولدين بس انا مكانك راوح
اجاني عريس جديد واهلي اصرو اني وافق وانا قول مستحيل اما ابراهيم او بلا الزواج كلو
امي عرفت ان
و السبب ابراهيم
حاولو يقنعوني فيه بكل الطرق لكن مستحيل والله مابيسكن قلبي غير ابراهيم ولسا عندي امل انو نكون لبعض الله كريم
صارت الناس تحكي اني كبرت ومن هالحكي كنت طنش وما اهتم
اجا اليوم الي ولدت فيه مرت ابراهيم وجابت عمر وصار ابراهيم ابو عمر
بتذكر وقت كان يمزح معي ويناديني ام عمر اييييه ع هديك الايام
صحيح صار عندو اولاد بس والله كل مايجي لعنا كنت شوف الحزن بعيونو وكنت شوف حبو لألي ابراهيم كان سادء معي بس الله يسامح الي كان السبب وافترقنا
رغم كل هالأيام الي مرقت ماقدرت انساه وشيلو من قلبي بتذكرو بحكيو بتفاصيلو وحركاتو وصوتو وضحكتو وحنيتو يا الله كل شي فيه حلو
بيوم قعدت الصبح افطرت وسألت عن امي قالولي هي عند منال
منال بتكون اختو لكبيرة لأبراهيم وهي جارتنا
رحت لعندهن وبس وصلت
المصيبة انو طلع يلي متصاوب ابراهيم واخوه وابن اخوه احمد المعتقل
بس سمعت هيك صرت متل المجنونة صرخ قدام العالم وقول وينو ابراهيم مشاااان الله قولولي شبو ابراهيم .. لك وينو ابراهيم