📚قصص||روايات||منوعة📚

بس متأكدة إنه لو أبو ربيع بعرف إنه هالبيت بهالوضع ما كان خلانا نشوفه حتى.. وصعب نرجع نبيعه لأنه أي حدا رح يشتريه رح يسألنا ليه رح تبيعوه وإنتو إشتريتوه من أيام.. صرّخت وقلتلها برجع لصاحبه أنا رح أهدده ليشتريه ويرجعلنا المصاري.. قالت أمي إهدى وبكرا بنحكي مع أبو ربيع هلأ الدنيا ليل.. كانت أمي بتتطلع لناحية الشباك.. وصوت الرعد والبرق مرعب برا.. قالت شفت وحدة بتتطلع من طرف الشباك وأنا تحت عم بطق الباب.. شفت نص وجهها والنص الثاني مخبى بشعر أسود.. وبس رجعت أدق إختفت.. كانت بتخبط راسها بالزجاج بقوّة مثل المجنونة.. خبطات قوّية.. ولهيك تركتهم وركضت للبيت الثاني.. كلام المرة صحيح.. يلي صار غريب وخوّفني.. فكرتها مجنونة وبدها مني أبعد عن البيت.. بس لمّا سمعت كلام المرة فهمت.. خلينا الليلة ننام وما بدي أخوكم أرغد يعرف.. رح يخاف ويخوّف أخوه معه.. أنا رح أتصرّف.. رحت قفلت الباب بالمفتاح.. وقعدنا للصبح على أعصابنا.. (راوية حالياً).. من هاللحظة بدأت الحكاية وآصف ما كان بعرف شو مستنيه بهالشارع هوه وعيلته.. الصبح وصلني البلاغ بالجريمة وكنت جاهزة للتحقيق.. نفين جارة الدكتورة رونان بعلاقة قديمة ومتماسكة معها.. وكانت رونان بتحكيلها أخبارها.. كانت مخبرتها إنها رح تطلع مشوار سريع وتترك إبنها عندها بس هالمرة ما خبرتها لوين.. قالتلها رح أدخل أجهز نفسي وأرجع.. حسّت نفين إنه في شي مو طبيعي فيها.. أو إنها خايفة.. دخلت الشقة وإستنتها وكانت شايفة سيارتها من البلكونة لسه موجودة.. كانت عم ترنلها بس ما كانت بترد.. خافت عليها وبقيت تطرق الباب.. وبس حسّت إنه في شي غلط توترت وطلبت من زوجها يكسر الباب.. كنت بحالة تدقيق.. مسدس بإيد الضحية وعيون مفتوحة وبتتطلع بالسقف.. الثنين فوق السرير غرقانين بدمهم.. الدكتورة راسها تحت السرير وجسمها بالعكس لفوق.. وإبنها على الوسادة.. طلبت عزل لمسرح الجريمة وتصوير المكان وأخذ البصمات عن الأماكن وجمع كل الأدلة البيولوجية يلي ممكن تعطينا دليل.. قرّبت من الجثة.. وإتطلعت على رقبتها.. ما في أي آثار لأظافر أو خنق.. الخبراء المختصيين بالمعاينة كانو بياخدو الإجراءات بدقة تامة وأنا كانو عيوني عشرة على عشرة!.. مرّت ساعات بالتحقيق بمسرح الجريمة.. ووصلتنا النتائج.. ما في أي بصمات غير بصمات الضحية وإبنها بمسرح الجريمة وحتى على الأداة.. خلع الباب خارجي.. والشبابيك مسكّرة ومحميّة من برا بدون عبث.. سجل المكالمات فاضي وهالشي شكّللي علامة إستفهام.. تفريغ التلفون كان كل شي فيه طبيعي.. درجة حرارة الجسم كانت بوقت إكتشاف الجريمة باردة.. وبرغم كل الأدلة الناقصة والموجودة كان لازم الطب الشرعي ياخد إجراءاته أما تحقيقي فكان سريع وفطن.. (آصف قديماً).. تغريد طلعت على المكتب وأنا رحت لأحكي مع أبو ربيع.. خبّرني إنه ما بعرف الزلمة يلي إشترى منه البيت.. هوه شاف الإعلان بالجريدة واتفق معه.. طلبت منه يحكي مع صاحبه ليرجع يشتري البيت ويرجعلنا بيتنا.. حكالي هالشي صعب لأنه الزلمة يلي إشترينا منه البيت سافر!.. أمك حكت معي بالليل وخبرتني باللي عرفتوه.. وخافت تعملّي شي الصبح لهيك حذرتني.. وأنا قبل لتيجي إتصلت برقمه وردت بنته.. بالأول كذبتها بس أعطتني رقمه الخارجي بكندا وللأسف طلع كلامها صحيح.. أما صاحبي أولاده حطوه بدار العجزة واتحفظو على بيتكم القديم.. لأنهم ما رضيو إنه يسكن لحاله ويفضحهم بهالحي القديم بسبب سمعتهم كتجار سوق معروفين.. حاولت أخنقه وأهدده وكان بصرّخ وبلم عليّه الناس.. طلعت وتركته ورجعت للشارع العالي.. أمي صرّخت عليّه وقالتلي ليه تلفونك مغلق؟.. قلتلها صار شي؟.. قالت أيوب ببكي وبأشر لناحية الشباك كل شوي!.. وأنا مش عارفة شو فيه!.. قلتلها شو الغريب ما هوه هيك من زمان!!.. حكت لأ وضعه ما بطمّن وتوترت بسبب الكلام يلي قاله أخوه.. مبارح ما سمعو كلامنا.. ويلي سمعته منه خوّفني.. قلت لأرغد شو حكيت لأمك؟.. قال حلمت بوحدة بيضة كثير وشعرها أسود زي الليل.. باين نص وجهها.. دخلت من هاد الشباك وقفلت الباب علينا أنا وأيوب وبلعت المفتاح.. وقالت أمك أكلها الغول وأخوك آصف ذبحه السفاح.. وأختك تغريد عنا بالبيت وما رح تطلع منه.. وأنا رح أضل معكم نلعب بالبازل ونرتب البيت بالعكس!.. قمت على صوت أخي أيوب ببكي.. ويلي خوّفني إنه قام من السرير وراح بإتجاه الشباك وضل يأشّر عليه لهلأ وكأنه عرف أنا شو كنت بحلم!!.. أيوب ما بحكي.. ومتوحد وبخاف من أقل شي.. ليش ليعمل هيك؟!.. أمي قالتلي شو رأيك؟.. قلتلها هاد كلام فاضي.. عم يلعب معنا.. إنت سمعتنا مبارح وعم تضحك علينا يا قرد!.. صار يبكي وقال والله ما بضحك عليكم!.. أنا ما سمعت شي.. وكنت عم بكتب بتمارين الأسئلة الجاية لحتى ألحّقهم بمدرستي الجديدة وأيوب كان جنب الدفاية بلعب بسياراته.. بهاللحظة اندق الباب.. أمي فزعت.. كان صوت تغريد.. فتحتلها الباب.. قالت المرة يلي ساكنة فوقنا ندهتلي وعرفتني.. وقالتلي لازم تيجي أمك وأخوكي لعندي..

أكيد رح تحكيلكم شي مهم.. سألتني شو صار معي؟.. قلتلها صعب نرجع للحي.. صاحب هالبيت سافر.. مصارينا خلص ما رح ترجع!!.. شافت أيوب ببكي وبأشّر على الشباك وأرغد مصدوم.. حكت أنا ما عرفت أنام.. وهلأ وأنا عم بدخل البيت سمعت حدا عم يصفّرلي من فوق.. ما كان غيري بالشارع والشجر كان هادي وما بتحرّك من الثلوج يلي نزلت مبارح.. البيت الحجر بالفعل مسكون وكل شي سمعناه طالع منه.. نحنا لازم نلاقي حل!!.. روحو شوفو المرة وأنا رح أبقى معهم.. فتحت الباب لأطلع مع أمي وفجأة طلع بوجهنا رجال شرطة ومعهم بنت.. قالولي إنت آصف؟.. حكيتلهم أيوه أنا!.. قالتلي البنت بهدوء أنا المحققة راوية.. إتفضل معنا للتحقيق بجريمة قتل الدكتورة النفسية رونان القاضي وإبنها الصغير.. وخلّي الشرطة ياخدو إجراءاتهم الكاملة بتفتيش البيت

يتبع..

أتركك!.. إنت لسه ما بتعرف مين المحققة راوية يا آصف قنديل!.. بصيرتي عمرها ما خانتني وإحساسي ولا مرة كذبني.. قلتلها وأنا جاهز لأي شي بدك ياه.. إذا حابة خليني تحت نظرك لو هالشي رح يريحك.. حكتلي رح أطلّعك من هون بس قلتلك رح أضل وراك.. وقبل لتوصل البيت رح يكون طالع قرار بمنعك من السفر ومراقبة كل تحركاتك.. رح نعرف كل شي والأيام بينا.. طلعت ورجعت على البيت بعد ما وقفت دقيقتين أتأمل البيت الحجر يلي قبالنا.. قرّبت منه كثير.. وإتأكدت إنه ما حدا مقرّب منه من زمان بدليل شبكة العنكبوت يلي كانت على إيد الباب.. البيت مهجور من سنين وما كنت بعرف قصته ولا من أي سنة متروك!.. دخلت بيتنا لقيت واحد غريب مع مرة كبيرة بعمر أمي.. سألت أمي مين هدول؟!.. قرّبت مني وقالت شو صار؟!.. مين بتكون هالدكتورة ومن متى بتعرفها؟!.. ما دخلك بقتلها صحيح؟!.. طمّني وقلي أيوه!!.. قلتلها هالشب مين؟!.. حكت هاد زاهر إبن جارتنا ماجدة.. أجا مع أمه ليركبلنا دفاية البواري زي ما قاللنا.. سألته هالشي مقابل شو؟!.. قال ما بدك تعرفني عليك!؟.. حكيتله آصف.. قال تشرفت فيك.. حكالي مش لازم يكون في مقابل لكل شي بالدنيا.. أحياناً في ناس بتحب تساعد بدون مقابل.. لسه في ناس لبعض.. وبكفي إنه نحنا ثلاث بيوت بالشارع وما في غيرنا.. بالإضافة للبيت يلي قبالكم!.. شفت نظرات غريبة من أمه وقالت عن أي جريمة بتحكو؟!.. ومين يلي انقتلت؟!.. قالت أمي جاوبنا وريحني!.. قلتلها أنا ما بعرف شي لأجاوب.. وأنا ما بعرف هالدكتورة ولا بعمري شفتها.. في تشابه أسماء بيني وبين واحد وإنتهت القصة.. أمي حكت هلأ إرتحت.. بس مو نفسها يلي؟.. بهاللحظة سكّتتها.. كانت رح تقول إنها أجت عنا وإنها بتعرفني.. وأنا ما كان بدي تحكي أكثر!.. قلت لزاهر شو قصة البيت يلي جنبنا؟.. قال نحنا حكينا لأمك نص القصة.. بس إلك نصيب تسمع النص الثاني.. قلتله أنا بدي أسمع كل الحكاية.. دخلت تغريد وضيّفتهم شاي وقعدت.. حكتلها أمي إتأكدي إنه أخوانك بعاد عن الصالة.. قالت قفلت عليهم الباب.. أيوب بلعب بسياراته وأرغد بدرس.. قال زاهر ما يغرّك إني بشتغل بالأنتيكا.. أنا شب مثقف.. وقارء فوق الألف كتاب!!.. حتى كتب الأساطير والخيال والتاريخ القديم.. هاد البيت إله قصة قديمة باقية لهاليوم ومش راضية تموت.. البيت قديم كثير ولو بتلاحظو إنه حجر أصلي ومن النوع الأثري.. هالبيت إنبنى بثلاثينيات القرن الماضي.. أما يلي صار فيه بفترة الخمسينيات.. تقريباً أول الخمسينيات!.. لا تنصدمو.. أنا ضليت وراه لعرفت حكايته.. نحنا صرلنا ساكنين هون تقريباً عشرين سنة.. وكان عمري تسع سنين بس بدأت أفهم كلام أمي.. يعني بعُمر أخوك أيوب.. كانت بتحذرني أروح للمدرسة بإتجاهه مع إنه ما في بينا وبينه غير كم دقيقة مشي وهوه أقرب لإلها من الطريق يلي جنب بيتنا.. بس لليوم أنا بقيت أقطع الطريق الخلفي حتى على شغلي.. بس صرت بعُمر أرغد أخوك بدأت أبحث عن قصته.. وبتذكر مرة كتبت عنه موضوع تعبير.. وكل أولاد الصف ضحكو عليّه وما صدقوني.. بس الأستاذ فهمني وعرف وإستغرب كيف ساكنين فوق هالشارع لأنه بعيد عن المدرسة نص ساعة مشي.. قصة هالبيت كانت من التاريخ ولشخص معروف هون بالبلد بفترة الخمسينات.. هلأ لو أحكيلك عنه يمكن تتذكره.. حكو عنه بكتب التاريخ يلي درسناهم بالمدرسة.. قالت تغريد.. أخي آصف ما كمّل تعليمه وما كان مهتم بدراسته.. فيك تحكيلي مين بكون؟.. يمكن أنا أعرفه.. قلها ثروت باشا السفاح.. هاد لقبه بس عيلته هيّه العالي.. لا تفكّرو إنه تسمّى هالشارع هيك لأنه عالي بمنحدر فوق جبل!.. لأ الإسم مأخوذ عن ثروت العالي.. أثرى أثرياء البلد بهالفترة.. أغناهم على الإطلاق.. كان إله دور كبير بنهضة البلد إقتصادياً.. وصار وزير الدفاع.. وبعدين رئيس الوزراء.. بس ما طوّل.. ومصاريه بالنهاية راحت للجمعيات الخيرية وللحكومة.. قالت تغريد معقول؟!.. هاد الشخص درسنا عنه مرتين بفترتين.. بس كنت بحس في شي غامض بنهاية حياته.. ما كانو يحكولنا ياه.. كان في بنت معي بالمدرسة كانت دايماً تقول إنه هالشخص لاحقنا بمادة التاريخ مثل اللعنة وما كانت تحبه.. هيّه كانت غنيّة ومغرورة!.. بس شو سبب إهتمام وزارة التربية والتعليم فيه ليحطوه بكتب التاسع والعاشر؟.. قال زاهر لأنه عيلته مهمة.. كلهم أثرياء وخدمو البلد سياسياً.. مو بس هوه.. وأخوانه وجده واللي كانو قبلهم.. بس الشي الوحيد يلي ما ذكروه هوه إجرامه وجبروته وحقده على الطبقة الكادحة!.. كان سيء.. سيء وأسوء سياسي مر بتاريخ هالبلد.. كثير شباب إختفو فجأة بظروف غامضة وقالو إنه هوه قتلهم.. بتخيّل كان ينهي حياتهم لأنه ما كان بده حدا يكشف إجرامه ويحكي عنه لتضل صورته لامعه بعيون الشعب.. بهالفترة كان الشعب بسيط وراضي بالقليل ليعيش وما كانو يعرفو شخصيات وأسرار هالسياسين الدفينة.. أما الأذكياء فكانو يدارو السلطة بطريقة محنكة وذكية ليعرفو خباياها وبعدين يكشفوها للشعب..

المستحيل لرجعولهم ياه ونحنا ما رح نسكت ورح ناخد حقنا منهم!.. قال زاهر آسف آصف.. بس القانون لا يحمي المغفلين.. البيت هلأ بإسمكم وشو ما عملتو ما رح توصلو لنتيجة لأنه صاحب الشأن برا.. إتأقلمو مثلنا.. نحنا صرلنا تسعة وعشرين سنة عايشين بهالمنطقة.. ما أظن يأذوكم لأنكم ناس طيبين.. بس لا تستغربو من أي شي ممكن يصير.. لأنكم قراب منهم.. قالت تغريد.. السفاح!.. هاد اللي قاله أرغد!.. يبقى كلامكم صحيح!.. قالت أمي حلمه حقيقي!.. أنا خايفة يأذونا.. خايفة منهم!.. قالت ماجدة مو فاهمة عن شو بتحكو؟!.. قلتلها أخي أرغد مبارح حلم بالبنت يلي بتظهر على زجاج الشباك.. وذكر كلمة السفاح.. يلي قاله إنه البنت دخلت للبيت وبلعت المفتاح وحكت إنه السفاح ذبحني.. وأمي أكلها الغول.. وتغريد عندهم ومش رح تطلع!!.. نحنا كذبناه وفكرناه سمعنا ونحنا بنحكي وألف هالكلام تأليف لنطلع من البيت.. بس الظاهر إنه كلامه صحيح وما كان بكذب.. ماجدة قالت لزاهر نحنا لازم نطلع!.. زاهر قال يا أمي خلينا نحكيلهم الباقي.. قالت ما بدنا تلحقنا لعنة!.. لهون وبكفّي.. قلتلهم شو في؟!.. في لسه كلام ما قلتوه!.. حكت ماجدة أنا مرة كبيرة وتعبت بترباية هالصبي والبنتين يلي عندي.. بعّدتهم عن هالبيت حتى شارعه ما كنت بمشّيهم منه طول حياتهم!.. واليوم أجينا بس لنكمل معروفنا.. الثلج برا رجع ينزل والجو عاصف وما هان علينا تضلو هيك لأني فهمت وضعكم من أمك!.. بس لهون وبكفّي.. رحت بسرعة وقفلت الباب بالمفتاح وحطيته بجيبتي.. وقلتهم ما حدا رح يطلع من هون!.. بدي أعرف شو مخبيين.. ليش تغيّر لونك بس سمعتي بحلم أرغد؟.. شفتها بتبكي وصارت تلطم.. أمي انتفضت وتغريد بقيت تتطلع مصدومة.. حكيت لزاهر أمك ليش بتبكي؟!.. قال لأنه واضح من حلم أخوك إنه تحررو الأرواح يلي بالبيت وصارو يتنقّلو.. ويمكن أخوك شافها عنجد وفكّر نفسه بحلم.. نحنا عملنا المستحيل لنحبسهم بالبيت زمان.. بس هدول ما بطلعو إلا إذا حدا إرتكب ذنب كبير.. والكلام يلي قالته صار زمان وحقيقي يبقى أخوك صادق.. بدليل كلمة الغول!!.. صارت ماجدة تبكي أكثر وحكت لا تقول هالكلمة!.. قرّب مني زاهر وقلي إنت إرتكبت ذنب أو أذية بحق حدا؟!.. قلتله أنا ما بجاوب على شيء بخصني لأي إنسان.. حكت ماجدة إفتح الباب بسرعة وطلعنا.. اللي صار زمان رجع.. نهلة طلعت من البيت يا إبني!.. قالت تغريد البنت إسمها نهلة؟!.. صرّخ زاهر.. صح!!.. إسمها نهلة.. بنت بيضة شعرها أسود زي الليل بتخبي نص وجهها فيه.. وعندها أختين صغار بعمر بعض تقريباً.. هدول يلي إنقتلو.. إقتحمت بيتنا وخرّبت حياة أخواتي.. وحكتلهم قصص حياتهم.. بس بعد هالحلم يلي إنحكا يبقى روح نهلة وصلت هالبيت.. لأنه في واحد منكم إرتكب ذنب كبير.. وهالبنت ما بتطلع إلا إذا في شي كبير صاير!.. إنت كنت بالنيابة اليوم عم يتم التحقيق معك بقضية قتل دكتورة.. وما صرلك يوم داخل هالبيت وساكن فيه مع أهلك.. ليش لييجو الشرطة بهاليوم وياخدوك؟!.. إنت قتلتها؟!.. حكيتله همه ما قدرو ياخدو مني لا حق ولا باطل.. مين إنت لتسألني هيك سؤال؟!.. حكت ماجدة لهيك طلعت!.. في مصيبة صارت.. صرّخت أمي وحكت فهمونا ليش لتطلع!.. حكت ماجدة لأنها قالتلنا إنها قتلت زوجي عن طريق غول ورا الشجرة يلي جنب بيتهم.. زوجي طلع مرتكب ذنب وحتى نحنا ما كنا بنعرف.. بناتي عرفو منها.. واللي رعّبنا الآثار يلي كانت على رقبته.. خروم كبيرة محفورة بالجلد بدون دم.. مثل أسنان حيوان.. وجهه كان أزرق ودمه ناشف.. شرايينه سكّرت وانحبس الدم بجسمه ومات.. الدكاتره استغربو ونحنا انصدمنا.. قالو بسبب يلي صار اختنق لهيك يمكن وقع بالشارع برا البيت أو شوّه حاله.. وهالحفر من حيوان.. بس مستحيل.. الخروم ما كانت بسبب إيديه!.. هالشي صار برا بالشارع بالليل ونحنا بالبيت.. وكلام إبنك دليل قاطع إنه صاير معكم شي.. وإذا قال إنه الغول أكلك يبقى إنتي عاملة ذنب.. قالت أمي أنا شو عملت!؟.. حاولت تبكي ما قدرت.. حطّت إيدها على عيونها وحكت بطلت عارفة أبكي.. عيوني نشفو!.. وقنواتي الدمعية سكّرو.. إتطلع زاهر بأمه مصدوم.. وقلنا هالشي بأكدلنا إنك عاملة شي!.. أو إبنك وإنتي بتدفعي الثمن!.. هيك صار مع أبي!!!.. بس إنتو أحرار.. أخطائكم بتعنيكم بس هالبنت ما بتغفر.. قلي إفتحلنا الباب وطلعنا.. حكيتله آسف.. مو قلت نحنا مغفلين!.. فرجيني كيف رح تطلع من البيت يا شاطر!.. صار يصرّخ ويقول أخواتي بالبيت لوحدهم والله إذا برجع يصيرلهم شي من جديد بسببك لأقتلك!.. صرت أضحك وبهاللحظة زادت العواصف برا.. أمي حكتلي إفتحله الباب.. قلتلها عزيزة لا تتدخلي.. هدول ما بطلعو من هون قبل ليحكو كل شي عندهم!.. كانو رح يطلعو من البيت وهنه مخبيين علينا أشياء كثير.. قال زاهر ما ضل شي.. وأنا بعتذر على كلمتي.. بس إفتح الباب!.. زادت العواصف أكثر والثلج صار ينزل بغزارة.. وبهاللحظة إنارة البيت صارت ترمّش.. وسمعنا صوت شي وقع فوق الشجر برا وفجأة إنقطعت الكهربا عن كل البيت حتى عن الشوارع..

حكتلها أمي بعصبية ما عنا خيار ثاني!.. جيبي دلو وإمسحي المكتوب وأنا رح أمسح الأرض.. إذا إتطورت الأمور رح نلاقي حدا يبارك البيت ويطهّره.. إهدو!.. تغريد مسحت المكتوب.. وحكتلي رايحة أطعميهم أنا إتأخرت.. قفلت باب غرفتي.. وفتحت شباكي.. كنت شايف طرف من البيت الحجر المهجور.. وإتذكرت البازل يلي مع راوية المحققة!.. البازل يلي بإيدها كان فيه طرف لشباك.. هاد الجزء هوه الظاهر من شباكي!.. يبقى البازل موجود بغرفتي!.. الموضوع فيه لغز.. ولغز خطير ومخيف!.. هالغرفة يلي سكنتها جديد وما كنت بعرفها من قبل متمثلة بقطعة بازل صغيرة كانت موجودة بمسرح جريمة قتل أنا مُتهم فيها!.. والدم يلي على الحيط بثبت إنه في حدا لاحقني ورح يلبسني هالقضية غصب عني!.. يعني فعلاً في شي مترتب.. البيت الحجر بجيرانه يلي قبال غرفتي من شباكي هوه جزء لا يتجزأ من الجريمة يلي صارت!.. فعلاً الجريمتين بشبهو بعض مثل ما قالت راوية!.. نفس اللي صار بنفس الأداة بنفس التفاصيل!.. الأم أو الأب قتلو ولادهم وبمسدس!.. تركت الشباك مفتوح.. وطلّعت كل البازل يلي عندي.. فردتهم على الأرض.. أنا كنت ببيتي القديم بركّب صورة لبيت كبير شبه القصر بأسوار عالية ومحاوط بالحديد الفولاذي!.. هاد آخر شي ركّبته قبل لتيجي الدكتورة رونان لبيتي وتصير الجريمة بعد بيوم!.. إتطلعت على تفاصيل القطع.. واتمعنتهم.. بالفعل القصر لونه أصفر.. رجعت بذاكرتي لقبل ساعة.. القطعة يلي كانت بإيد راوية!.. هيّه قطعة من هالصورة!!!.. أكيد!.. حاولت أرتب بسرعة.. بس كانو القطع ألفين قطعة!.. ما بقدر أفكر وأرتب بس بقدر أعدّهم لأتأكد إنهم ناقصين وحدة!.. بدأت أعد.. وكل ما كنت بعِد قطعة بسمع صوت الشجر بتحرك ورا الشباك بسرعة.. والشباك بخبط بالحيط.. دخل المطر من الشباك.. ما كنت قادر أركّز بالعد.. عم أتشتت.. في صوت شي عم يمشي ويخرمش عالشجر.. كنت بغمض عيوني وبحاول أركّز.. بس الصوت كان عم يقوى.. العواصف عم تزيد برا.. تركت العد وقمت لأسكّر الشباك.. وقبل لأسكّره شفت شي طلع من الشباك ونط من جذع الشجرة على وجهي!!.. صرّخت وبعّدته.. كانت قطة كبيرة.. شبه القط البري المتوحش.. لونها أسود وبفرو طويل!!.. قرّبت من قطع البازل وبعثترهم وصارت كل قطعة بمكان.. كانت بتموّي بشراسة.. نزلت تحت السرير.. وأنا لسه بمكاني.. شفت دم عم ينزل عالأرض من الجهة الخلفية للسرير.. نزّلت راسي لتحت.. شفتها عم تاكل بشي!!.. رجعت لورا وطلعت من ورا السرير ونطّت على الشرشف.. كان بتمّها قطة صغيرة!.. كانت تحت السرير مقتولة!.. كنت مصدوم.. بعّدت لزاوية الغرفة وشرشفي اتغرّق بالدم.. نطّت من الشباك على الشجرة.. قرّبت من الشباك وإتطلعت.. شفتها صارت تحت بالشارع.. الثلج صار لونه أحمر من الدم.. والقطة راحت لورا البيت الحجر المهجور.. بيت ثروت العالي!.. قفلت الشباك وأمي فتحت الباب وشافت الشرشف.. شافتني واقف مصدوم.. قلتلها ما تسأليني شي!.. الكلام يلي قالته المحققة يلي قلتي عنها مجنونة صحيح!!.. صحيح!!.. وجودنا هون مرتّب!.. هاد يلي صار كله مرتّب.. قالت شو عم تحكي إنت!.. فهمني ليش؟!.. ليش لنيجي لهون بدون إرادتنا؟!.. مين عمل بشرشفك هيك!.. قلتلها لا تسألي شي.. إنتي يلي جبتينا.. وجودنا هون بإرادتك.. ويمكن يكون كلام زاهر صحيح!.. فهميني إنتي شو عملتي!.. انا بأكدلك إني ما قتلت بس إنتي أكيد مرتكبة ذنب لهيك لحقونا وبدهم ينتقمو منا!.. صارت تصرّخ وتقول ياربي شو بصير!!.. أنا أأذيكم؟!.. بتفكر هيك بأمك!!.. ياربي بدهم يحرموني منكم ويخربو حياتي فوق ما هيّه خربانة!.. شو أعمل أكثر!.. تعبت يارب تعبت!!.. أنا جبتكم لهون لنرتاح.. مش لأخرّب حياتكم وحياتي معكم أكثر من هيك!.. دخلت تغريد وشافت الشرشف.. قلتلها قطة إبنها مقتول.. موجود هون بغرفتي!.. ليش؟!.. نهلة بتذكرني باللي صار؟!.. أو أنا بدأت أنجن!.. صدقوني ما قتلتهم ما قتلتهم!.. ما حرمتها من إبنها ولا قرّبت منها!.. إطلعو!.. صرت بعِد بالبازل مثل المجنون.. وإكتشفت إنهم ألف وتسعميّة وتسعة وتسعين قطعة!.. في قطعة مفقودة.. ولو رتبت الصورة رح أكتشفها.. القطعة يلي كانت مع راوية من هالصورة!.. ولو دخلت وشافتهم رح تعرف إنها لإلي.. بهاللحظة رن الجرس.. كنت ضايع بين قطع البازل وسمعت صوت راوية مع رجال شرطة.. بتقلهم وهاد أمر التفتيش.. هلأ بنقدر ندخل؟!.. وين آصف!.. يا آصف!!!.. حاولت أبعّد البازل وأخفيهم!.. بس ما عرفت وين أروح فيهم!.. ما بقدر أرميهم من الشباك ولا بقدر أتركهم.. ألفين قطعة إلا وحدة!!.. طقّت أمي الباب وأنا لفّيت الشرشف مسحت الأرض فيه وحطيتهم جواته ورميتهم تحت السرير.. دخلو رجال الشرطة ومعهم راوية.. كانت بتتطلع على الغرفة.. وشافت آثار حمرة على الحيط.. نظراتها كلها ريبة.. الشرطة فتحو الخزانة وطلّعو كل شي منها.. وشالو السجادة.. أشّرت على السرير.. وحكتلهم تحته!.. شافو الشرشف وطلّعوه.. كله آثار دم.. فتحوه ولقيو البازل كلّه.. ضحكت راوية وقالت مثل ما توقعت!.. تحت السرير!..

خلونا نعرف كل شي ولا تخبّو!.. حكومتنا ما رح توقف معنا.. نحنا بس بنقدر نطلّع نفسنا من هالمصيبة.. قال زاهر أبي قتل ولد صغير وأمه.. سمّهم.. كان بشتغل بكرم فيلا نائب شعب معروف.. الزلمة كان بسافر كثير بحكم شغله وأموره مع الدبلوماسيين.. ومرته ما كانت علاقتها معه كويّسة ومش طايقة هاد الوضع.. وطلبت الطلاق.. أبي كان حاقد عليه وعاللي بعمله بالشعب هوه والنواب.. بس ما كان قادر يوصله.. إبنه كان يحب ياكل من التفاح الأحمر الموجود بالكرم.. وأبي قطفله تفاحتين بإيده وسمّهم بالمبيدات السامة.. كان بده ياكل التفاحتين ليتأكد من موته بسرعة قبل ليسعفوه بس الولد أعطى أمه تفاحة منهم وماتت معه.. أبي كان مخطط يقتله ليتزوج أمه لأنه كان مفكر لطفها معه حب وكان بستنى تطلق زوجها ويعيش بالفيلا معها ليخلص من سيطرة أمي وعصبيتها وأوامرها.. بس الثنين ماتو وما طال شي!.. الناس إتهموها بالجنون بسبب زوجها وإنها سمّت إبنها ونفسها.. نهلة عرفت الموضوع يلي حتى الشعب ما عرفه وهوه إعترفلنا.. بالليل إنتقمت منه بالغول يلي خبرتنا عنه!.. ويلي لهلأ ما بنعرف شو هوه!!.. لارا قالتلي لو أنا صرلي شي وإتدمر مستقبلي مثل أختي ما رح أسامحك ورح أقتلك!!!.. قلتلها خلينا نفكر كيف نخلص منهم لترتاحي.. قال زاهر أنا حبستهم من خلال تعويذة.. قدرت أتوصللها من كتب الأرواح يلي قرأتهم وساعدني بتنفيذها ختيار خبير بهالأمور عايش فوق جبل.. هاد من سنين طويلة.. ما بعرف لو بعده عايش!.. بهاللحظة رن الجرس.. الكل اتنفض.. زاهر راح فتح الباب.. كانت تغريد.. كانت بتلهث ومبلولة.. قالتلي شو صار معك؟!.. قلتلها فحصو الدم يلي على الشرشف وطلع مو دم بني آدمين وصدقوني إنه دم قطة!.. ولجنة التحقيق بناءاً من النيابة أمرو بخروجي لأنه البازل مش دليل إدانة كافي.. أنا طلّعت نفسي بذكائي.. ما فيهم يعملولي شي.. لا بصمتي على قطعة البازل ولا حتى شافوني بالكاميرا.. بس هدول الأشياء الغامضة يلي صارو فجأة عجّزوهم بالأخص الست المحققة راوية!.. وأظن أنهم ما رح يتركوني.. قالت تغريد صحيح ما رح يتركونا.. اليوم حكت معي المحققة راوية وطلبتني للتحقيق.. أخدت رقمي من مكتب المحاماة يلي بشتغل فيه.. قالت أمي.. هالإنسانة ما رح تتركنا بحالنا!.. حكتلها تغريد في حال صار شي رح أخلي حدا من المحاميين يساعدنا.. قال زاهر إذا ما إلك إيد بالقصة كيف قطعة البازل أجت بمسرح الجريمة؟!.. على كلامكم ويلي إستنتجته إنها القطعة إلك وإنت متأكد.. قلتله ما بعرف.. مو قادر أعرف.. ولو بعرف ما رح أحكيلك.. إنت نسيت حالك وعم تتدخل بحياتنا الشخصية!.. إستغرب من كلامي وقال نحنا بنفس المركب.. جيران مع بعض.. ويلي عملته نهلة مبارح فيكم وفينا.. دليل إنه نحنا الثنين مهددين!.. لهيك لا تتصرف معي بهالطريقة.. قالت أمي وقت تتخانقو؟!.. هلأ خلونا نفكّر كيف بدنا نعيش مرتاحين.. وشو سبب كل شي بصير معنا.. إتطلعت بجويرية.. قلتلها القطة يلي حكيتي عنها ويلي كانت عندك شبه القط البري؟!.. حكت تماماً سودة بشعر طويل.. كانت نحيفة كتير.. إنت شو عرّفك؟.. قلتلها شايفة الدم يلي على الشرشف يلي بإيدي؟!.. إتطلعت بريبة وقالت أيوه شو فيه؟!.. حكيتلها دم إبن القطة يلي بتقولي ماتت!.. لارا قالت مستحيل نحنا دفنناها ورا الشجرة يلي ورا بيتنا.. ورا هاد الشباك!.. قلتلهم القطة طلعت من الشباك مبارح وطلّعت إبنها من تحت سريري.. كان ميّت.. دمّه على الحيط وعلى الأرض.. كان ببيتنا ونحنا ما بنعرف.. وفي حدا قتله.. وبتخيّل هاد كله لتوصيل رسالة مثل ما حكيتو!.. نهلة بالبيت!.. عايشة معنا.. ومو بس روحها وروح هالقطة البريّة.. أنا بدأت أتأكد ومو أشك إنه موت الدكتورة رونان جزء من حكاية نهلة.. في شي عم يرتبط بكل شي عم يصير قدام عيوننا ويوصلنا لهالجريمة.. حتى كلامكم عن أبوكم.. أبوكم قتل ولد وأمه.. ونهلة أبوها قتلها مع أمها وأخواتها.. وهالقطة دخلت البيت وسحبت إبنها لتقلنا إنه في حدا قتل إبنها!.. ورونان ماتت قتل مع إبنها.. مو ملاحظين إنه كل الجرائم بشبهو بعض!.. قالت جويرية لأ لأنه القطة ماتت بسبب الورق يلي بلعته وأنا خبرتك بهالشي ولارا دفنتها.. يعني ما حدا قتلها!.. شفت لارا بتتطلع بخوف عليها ونزلت عيونها.. قلتلها إنتي دفنتيها؟!.. قالت لارا أيوه ثاني يوم.. بس أنا قتلتها بسكينة المطبخ!.. ودفنتها وقت كانت جويرية بالمدرسة.. أنا خبرتها إنه القطة ماتت من الورق وما اتحمّلت.. خافت جويرية منها وقالت إنتي شو عم تحكي؟!.. قتلتيها؟!!.. قالت أيوه خفت أحكيلك لتتأثري وترسبي!.. القطة حكت وكان صوتها بصوت نهلة.. وقالتلي رح أخلّي أختك ترسب ورح يمر الوقت وتعيشي نفس اللي عاشته.. هددتني!.. وأنا ما قدرت أحكيلك هالكلام بسبب سيطرتك ومن خوفي منك ولحبك للقطة.. كان بدي أكبر وأدرس وما يصير فيني مثلك لأنه بعد كل شي صار كان متوقع إنك ترسبي.. وهاد يلي

صار.. صرّخت جويرية وحاولت تعتدي عليها وقالتلها الله ينتقم منك.. يمكن عم تنتقم منا بسبب يلي عملتيه فيها!.. ماجدة بعّدتها وحكتها أختك مرضت بهاليوم وكانت رح تموت!.. نسيتي؟!!.. صرّخت وحكيتلهم بس خلص!!!.. أنا بدأت أستوعب.. قال زاهر شو فهمت من يلي صار!؟.. قلتلهم لو الكلام يلي براسي صحيح يبقى الموضوع أخطر من ما تخيلت.. حكت أمي قلنا وفهمنا.. شو ناطرنا لسه؟!.. صفنت فيهم وقلتلهم يلي عم يصير أحجية مثل لعبة هالبازل.. وخدعة بشكل مدروس.. لازم نرتبها لنفهم!.. يمكن كلامي يكون مسموع منهم بس صدقوني في شيطان عم يلعب لعبة مع كل الناس يلي عايشين بهالشارع.. وعلى مر السنين.. في لعنة أكيد عم تتكرر.. في شي عم ينعاد لنفس الأسباب.. قال زاهر فهمنا!!.. إذا إنت بهالذكاء فهمنا لأنه نحنا ضعنا!!.. قلتله أبوك قتل الولد لسبب شخصي ودارى السُلطة مع أبوه النائب ليفوز بمرته وبيته.. وبالنهاية قتل أمه بالغلط وفي حدا إنتقم منه وقتله.. الناس ما عرفو هالشي بس نهلة عرفت!.. القطة ماتت قتل ويلي قتلها لارا لأسباب كمان شخصية.. كان بدها تدرس وما يصير فيها مثلك لهيك قتلتها وإنتي لليوم فكرتي إنها ماتت بسبب قتلها لنفسها بأكلها للورق.. بس في إيد خفيّة قتلتها.. ونهلة عرفت!.. وبدليل إبنها يلي كان بغرفتي ويلي بالتأكيد حدا قتله.. السكاكين دليل!.. بقولو رونان قتلت إبنها ونفسها.. بس كل الدلائل الغامضة بتوحي إنه في إيد بالموضوع وحدا معيّن بعرفني وبده ينتقم مني لأسباب معيّنة وأكيد شخصية!.. الناس مفكرين إنها قتلت إبنها ونفسها.. وما عرفو المخبى يلي المحققة راوية عم تحاول تكشفه من خلالي.. وبذات نفسها قالت إنها لأول مرة بتستصعب جريمة لأنه في شي غامض ومع هيك ما في أدلة!.. ولو بالفعل طلع في مجرم ورا هالجريمة الغامضة يبقى رح نتوصّل للشي الأكبر.. إنه بيت ثروت باشا العالي السفاح في من وراه شي غامض.. وإنه ممكن ما يكون هوه يلي قتل عيلته مثل ما الناس فكروه لليوم إنه هوه يلي عمل هيك فيهم وبنفسه!.. نهلة بتعرف كل شي.. والمحققة راوية يمكن معها حق.. المجرم ممكن يكون قريب.. ويمكن يكون عايش معنا بهالشارع!.. قال زاهر كلامك خوّفني.. معقول ممكن يكون في ترابط لكل شي صار؟!.. قلتله الأيام رح تعرّفنا.. إذا الجريمتين القديمات والجداد كان وراهم إيد فاعلة غير يلي فعلها ولأسباب شخصية أو لأ!.. نهلة بتعرف كل شي قلتلك.. كل شي تماماً وأنا متأكد حتى يلي مو قادرة تعرفه المحققة.. وهيّه حالياً الطبقة الحاكمة والمسيطرة علينا.. ونحنا الكادحين!.. وأنا قررت لأول مرة بحياتي إني أداري السُلطة لأعرف المخبى والحقيقة كلها.. لأنه السُلطة والحقيقة حالياً بإيد نهلة ويا أما بتنهينا يا أما بننهيها.. قالت تغريد شو نعمل يعني؟!.. كيف نبعد عن شرّها؟!.. قالت أمي خايفة تأذي الولاد.. نحنا لازم نرجع على البيت قبل ليرجعو.. طلعنا من البيت وشفنا سيارة راوية بالشارع جنب البيت الثالث.. قال زاهر شو عم تعمل هالسيارة جنب بيت ست نجلاء؟!.. قلتله سيارة المحققة راوية!.. قالت أمي شو لسه بدها منّا كل يوم بتلحقنا لهون؟!.. رحنا بسرعة بإتجاه بيتنا.. وفتحنا الباب.. قعدنا على الكنب صامتين.. قالت تغريد في ورق شجر عالأرض!!.. حكت أمي الشبابيك كانت مسكرة مبارح بس النار ولعت بالسجادة.. حكت وفي شي كمان!.. هاد وسخ قطط!!.. ورق الشجر بكل مكان بالبيت!!.. رفعت إيدي وطلبت منها تسكت وما تتكلم!.. صرنا نمشي بالبيت.. وأمي تتلفت حواليها.. تغريد تتبعني وأنا بتطلع بزوايا البيت.. وسخ القطط بكل مكان.. وورق الشجر بالزوايا.. قلت بصوت واطي نهلة؟.. وكررت مرة ثانية نهلة؟.. تغريد قرّبت من غرفتها وفتحت الباب.. كانت بعيدة عني كم خطوة.. صرّخت صوت عالي ودخلت وقفلت الباب.. قلتلها شو صار؟!.. شو شفتي وليه قفلتي الباب!!.. كانت بتصرّخ وبتتنفس بسرعة.. طلبت منها تفتح وصرت بخبّط على الباب.. بس ما كانت ترد.. أمي خافت وقالتلها شو بتعملي إفتحي الباب بسرعة!!.. بهاللحظة سمعت صوت وقع بالمطبخ.. تركت أمي واقفة جنب الباب ودخلت للمطبخ.. كانو السكاكين على الأرض مصفوفين وعاملين شكل عين.. والأواني بتحرّكو بهدوء.. وصوت دندنة النغمة الحزينة طالع من ورا شباك المطبخ بصوت هادي.. قرّبت بهدوء من الشباك.. وقلت نهلة؟!.. إطلعي وإحكي معنا لا تفكرينا خايفين منك!.. شو بدك منّا؟!.. كنت بتطلّع من ورا الزجاج.. وبستنى أشوفها.. قلتلها شو بدك منّا؟!.. كان صوت الدندنة بعيد بين الشجر برا.. بس سامعه من ورا الشباك.. سمعت صوتها بأذني بتهمس من قرب وكأنها جنبي وبتقول.. بدي ياكم.. لفّيت بسرعة وانتفضت.. ما في حدا بالمطبخ غيري!.. الهوا إشتد برا.. والشجرة اللي كانت واقعة فوق الشجرة يلي جنب البيت الحجر وانقطعت الكهربا بسببها وقعت على بيتنا ودخل جذع طويل منها من شباك المطبخ.. اتكسّر الزجاج ودخلت لجوا بقوّة وأنا جنبها.. كان بيني وبينها خطوة وحدة لتقتلني!.. تركت كل شي ورجعت لعند أمي.. حكتلي شو صار جوا؟!.. شو يلي وقع؟!..

بتطلع بالليل.. سكّرت الباب وتربست الشبابيك.. اتعشينا وتغريد نيّمت أرغد وأيوب بسريرهم.. طلعت من الغرفة وقالت وأنا بحط أيوب على سريره وقع من جيبته هاد الشي!.. كان بإيدها شي صغير.. أمي قالت شو هاد؟!.. حكت يمكن بروش!.. شكله غريب وقديم.. من وين جابه؟.. وبهاللحظة سمعنا صوت أيوب ببكي.. دخلت أمي شافته واقف وكل الأغراض بالغرفة منثورة.. الأغطية والوسادات والملابس والألعاب والكتب.. ما في شي بمكانه.. الخزاين مفتوحة والأغراض تحت وفوق الخزانة وعالأرض.. كان واقف عند الشباك وبحاول يوصل للفصالة يلي بتفتحه.. وكأنه بستنجد بحدا وبدوّر على شي بين الأغراض من نظراته.. تغريد انصدمت وقالت من دقيقة حطيته بسريره.. كيف هالأغراض انتثرو هيك؟.. قرّب منها وبعيونه دمعه.. وفتح إيده.. قالتله عم تدوّر على هاد؟.. حاول ياخده منها بعّدته.. قالت أمي إعطيه ياه.. حكتلها إستني أمي.. قالتله مين أعطاك هالبروش؟.. ما كان بحكي وبمد إيده عليها.. بده ياه.. قالتله بنت؟.. حطّت شعرها على نص وجهها.. وحكتله وين شفتها؟.. مسكت إيده وفتحت الباب وطلعت.. كان برد قوي وهوا والجو رح يمطر.. وقفت بنص الشارع.. بين البيت الحجر وبين بيت نجلاء.. إتطلعت على نظراته ورفعت إيده ليأشر على البيت.. لف وجهه ناحية البيت الحجر.. وصار يضحك.. رجع فتح إيده.. أعطته ياه وكان عم يتطلع وكأنه شايف حدا جنب البيت.. الليل خيّم على الشارع وما كان في شي مبيّن غير إنارة الشارع.. وأمي كانت بتطلب من تغريد تدخل.. بس هيّه كانت عنيدة وبدها تعرف من وين جابه.. دخلته للبيت وراحت بإتجاه بيت ست نجلاء.. وانا طلبت من أمي تسكّر الباب ولحقتها ومعنا أيوب.. انفتح باب نجلاء وشفنا راوية.. قالت أهلاً شو سر هالزيارة؟!.. قلتلها كيف إنتي هون وسيارتك مو بالشارع؟!.. قالت الشرطة جابوني وسيارتي بقيت بمكان شغلي.. ما قلتلي ليه جايين؟.. قالت تغريد في شي معنا بدنا نشوف ست البيت.. دخلنا ونجلاء قاعدة مع بنتها جنب الدفاية وعم تحط الأكل على الطاولة.. قالتلها أخي معه هاد الشي.. وما عم يقول من وين جابه.. قالت رنوة أول مرة بشوفه.. هاد بروش نسائي.. بتعلق على الملابس وواضح إنه قديم.. راوية طلبت تشوفه.. طلّعت تلفونها وصوّرته.. قالت رح أتأكد من شي بكرا.. أيوب كان بصرّخ وبده ياه.. أخده من إيدها وشد عليه.. ورنوة قالت أخوكي اليوم خوّفني.. ظهر بغرفتي فجأة وكان طول الوقت عم يتطلّع بالغرفة وكأنه شايف حدا.. ولعب بشعري بطريقة غريبة.. حطه على عيوني وكأنه عم يقلّد حدا.. أنا بعرف يلي صاير بهالحي من زمان بس امي عم تبعدني عن المشاكل لراحتي النفسية وعشان وضعي الحرج.. بس أنا مو مرتاحة.. بدأت أنخنق من غرفتي.. وعم بحس طول الوقت كأني مراقبة.. في حدا جنبي وحواليه أو عم يتطلّع عليّه.. خايفة أنام.. وخايفة أطلع من البيت.. مو عارفة شو صار من بعد ما أخوكي ظهر بالبيت.. بهاللحظة أنطرق الباب.. ارتجفنا.. وأنا قلت يمكن أمي.. راحت راوية وفتحت الباب.. شفنا بنت واقفة وخايفة وبتبكي.. قالتلها راوية شو جابك إنتي لهون؟!.. كيف أجيتي!!.. قالت رنيتلك بس ما حدا كان عم يرد.. قالتها أنا أعطيتك رقم الشغل مو رقمي الشخصي.. وهلأ أنا ما بكون موجودة.. شو فيكي؟!.. حكت زوجي حاول يذبحني ويذبح إبني بالسكين.. اتغيّر وعم يتصرف تصرفات غريبة.. حاسيته إنجن وعم يشوف شبح رونان بكل مكان.. عم تقله خدولي حقي من يلي قتلوني وقتلو إبني.. وعم يحس إنه هوه يلي قتلها لهيك بده يريّح ضميره ويقتلنا.. رحت للنيابة وأخدت العنوان وسفّرت إبني مع أختي قبل ساعة للإمارات.. رايحة تحضر مؤتمر إعلامي لشهر كونها صحفية.. وما أمنّت على نفسي بالبيت.. بدي أبقى معك.. قلت لراوية مين بتكون؟.. حكتلي نفين جارة المغدروة.. قعدت جنب رنوة وحكتلها ست نجلاء بتنامي عنا الليلة.. وبكرا ان شاء الله بتلاقي حل.. تغريد قالت نحنا لازم نرجع على البيت مو لازم نترك أمي وأرغد لحالهم.. كنا بنتطلع على نفين بإستغراب وواضح إنها خايفة.. رجعنا على البيت وأنا بسأل تغريد.. ليه لزوجها يعمل هيك؟.. يحاول يقتلهم بنفس الطريقة يلي اتكررت الجرائم فيها!!.. واضح إنها مرعوبة.. ما في وحدة بتترك إبنها وبتسفّره بعيد وبتيجي بهالشكل إلا إذا في شي عنجد صحيح بكلامها!.. قالت ما بعرف أنا إحترت.. هالجريمة عم تلحقنا وكل حدا كان قريب منها عم يقرّب منا لهالشارع.. وصلنا البيت وفتحنا الباب.. ما شفنا أمي بالصالة.. نادت عليها تغريد ودخلنا للغرفة.. كانت أمي بغرفة أرغد.. أرغد واقف وسريره مكشوف وعم يتطلع عليها ويبكي.. وهيّه شايلة كل ساعات البيت وعم ترميهم من الشباك بإتجاه البيت الحجر.. قلت لأرغد شو صار؟.. قال كانت عم تحاول تطلّعني للبيت الحجر وقالتلي عم يستنوك.. بعدين مسكت الساعات ورمتهم من الشباك.. قرّبت منها وقلتلها ليه عملتي هيك؟.. عزيزة؟!.. إتطلعي فيني.. مسكت آخر ساعة ورمتها من الشباك.. قفلته وقلتلها شو صار؟.. ليه عم تعملي هيك؟.. قالت عشان ما نحس بالوقت.. سنة ال52 كانت صعبة..

ومن هالوقت مزعت قميصي ودفنته بالشارع.. ووعدت نفسي أقطع الوقت وما أحس فيه.. تعرف ليش؟.. لأني متت.. قلتلها مين؟.. مين يلي مات؟.. حكت أنا.. الساعة سبعة وستة وعشرين دقيقة المسا خلص كل شي.. شفتها بتقلّب عيونها للسقف وبإتجاه الشباك.. وبتحاول تفتحه.. قلتلها بس!!.. تركتك ما فيكي شي.. شو صرلك؟.. شفتي حدا؟.. ضحكت وقالت شفته بتطلّع عليه هناك.. قلتلها وين هناك؟.. أشّرت على الممر بإتجاه باب الحمام.. وقالت رجع السفاح.. رجع ورح يقتلكم وإنت أول واحد!.. ورجع يقتلنا وإحنا أصلاً متنا.. متنا يا آصف.. يلي صار زمان رح يتكرر بهالبيت.. رح تقتلهم.. زي ما قتلت رونان.. ضحكت أمي بصوت عالي وتغريد إتطلعت عليّه بنظرات غريبة.. وقالتلي شو قصدها عن شو عم تحكي؟.. عم تتطلع على باب الحمام.. شو شايفة مين هناك ليه عم تتصرف هيك!!.. بترجاك شو هالكلام؟!.. إنت رح تأذينا وإنت قتلت؟!.. قلتلها أسكتي!!.. مو أمي يلي بتحكي.. في حدا جواها.. في شي صار من لمّا طلعنا.. شفتها بتتطلع على أيوب.. وقرّبت منه وأخذت البروش.. أيوب صار يبكي.. وهيّه كانت بتحسس بأصابعها فوق البروش بهدوء.. وقالت القميص يلي دفنته ورا البيت.. أيوب طلّعه اليوم.. برافو حبيبي.. مبسوطة إنك عم تساعدنا.. ولسه بريفان وجيلان رح يحكولكم تتمة القصة.. بس بطريقتهم الخاصة.. قلتلها مين بريفان ومين جيلان؟.. قالت بناتي التوأم الصغار.. أما نهلة فهيّه هلأ عند بيت ماجدة.. إشتاقتلهم لأنها كانت تحبهم زمان.. بس همّه حاولو يقتلوها حتى بعد ما ماتت!!.. مسكت إيد أمي وقلتلها.. عزيزة إتطلعي عليّه.. شو صار بس طلعنا؟.. قالت عزيزة هلأ جوا بيتنا.. عم تتعرّف على فايزة ولبابة ووتين.. قلتلها مين؟.. مين هدول؟.. وليه عم تتطلعي للممر.. شو شايفة؟.. قالت هناك رح يقتلني.. شفتها بتبكي.. وقالت رح يقتل ثريا.. رجع.. رجع من جديد!!.. بهاللحظة إنفتح باب الحمام.. وإنفتح شباكه.. ودخل هوا قوي.. وسكّر بقوة!!!!.. قالت سمعني ورجع دخل للحمام!!.. روح طلّعه.. طلّعه وقلّه يبعد عني وعن بناتي.. قلتلها مين ثروت باشا؟!.. صرّخت وقالت لا تجيبلي إسمه.. مو قادرة أنسى.. الساعة سبعة وستة وعشرين دقيقة.. دفنت القميص ومتت.. ثريا ماتت.. قلتلها إنتي ثريا؟.. حكت صح.. ثريا العالي مرته لثروت.. تغريد قالت خلينا نعمل شي!.. أمي بتروح منّا.. طلبت منها تسكت وقلت لأمي.. يبقى عزيزة بالبيت هلأ؟.. حكت قلتلك بالبيت!!.. هناك جوا.. أنا ثريا.. أكثر إنسانة إنظلمت.. روح إلحقه طلع من الشباك.. حكيتلها ثروت؟.. قالت لأ.. مش ثروت.. قلتلها مو ثروت يلي كان هون وإنتي خايفة منه؟.. صرّخت وقالت لأ.. لأاااا.. قلتلها مين؟!.. بهاللحظة إنطرق باب البيت.. طلبت من تغريد تمسك أمي.. وتبقى مع أرغد وأيوب.. الطرق كان قوي.. تغريد قالت رجلّيه عم يهتزو.. مسكت إيد أرغد وأيوب وكانت بتتطلع على الباب خايفة.. رحت وفتحت الباب.. شفت جويرية واقفة عالباب بتتطلع عليّه بهدوء بالعتمة وشعرها على نص وجهها وزاهر وماجدة ولارا بالشارع عم يركضو.. إتطلعت عليهم وضحكت وقالت مع إني بلعت المفتاح بس بياع الأنتيكا قدر يفتح الباب بطريقته ويطلعهم.. حكتلي دخلني وسكّر الباب.. حاولت أبعدها بس كانت أقوى مني وفتحته ودخلت.. شفتها بتدخل لجوا.. وزاهر وصل مع أمه وأخته لارا وقلي خلينا نلحقها.. بسبب صدمتنا فيها تركنا الباب مفتوح.. وانجمعنا كلنا بالغرفة يلي بتنام فيها تغريد مع أرغد وأيوب.. كانت جويرية حاضنة أمي.. والثنتين صامتين وشادين على بعض.. زاهر قال لجويرية إرجعي هاد مو بيتك.. صح مو بيتي وأنا مو أختك.. أنا نهلة.. أختك جويرية بالبيت مع عزيزة.. قلها وشو بدك منا؟!.. خلينا نتواجه هلأ وفهمينا!.. قالت بصوتها مو بصوت نهلة.. في أرواح انظلمت بسببكم.. وفي روح شريرة بينكم.. نحنا خايفين منها.. بدها تأذي وتقتل وتخرّب الدنيا.. أجت لهالشارع لتخرّب كل شي.. وتقتلكم واحد واحد.. عم بنبهكم إنه يلي صار ممكن يتكرر.. قلتلها مين؟.. عن مين قصدك؟.. إتطلعت أمي فيني وقالت ثريا إنظلمت.. وفي أم إنظلمت مثلها.. بس نحنا خايفين.. قال زاهر لا تخافو قولو ليش ظهرتو من جديد ومين يلي ظلم مين؟.. قالت وهيّه مدمّعة.. رونان.. رونان ما إنتحرت.. رونان إنقتلت.. والقاتل مو بعيد.. والجاي أكبر وأعظم.. جويرية صرّخت وهيّه بترجف وقالت لا تقولي.. نحنا دخلنا أجسامهم لحتى نحكي هالكلام ونشوف إذا رح ننقتل أو لأ.. معقول يهونو بهالسهولة؟.. معقول أنا أهون؟!.. بس حتى لو قتلتونا رح نرجع.. أنا قلت برجفة صوت.. فيكم تتطمنو نحنا ما رح نأذيكم.. بس قولو مين قتل رونان؟!.. قالت جويرية أسكت.. إنت كله منك.. إبعد عنّا.. شفتهم بتطلعو عليّه وتغريد قالت ما بتعملها صح آصف؟.. قالت جويرية نحنا خايفين نحكي.. من كثير أشياء.. بس بنعرف كل شي.. وباقي أهل البيت رح يوضحولكم يلي صار وتوصلكم الرسالة.. لتعرفو إنه السفاح واحد مهما تغيّرت الشخوص والأوقات.. بهاللحظة إنفتح الشباك.. سمعنا صوت بنتين عم يبكو..

وبعدين إتأكدت إنهم مشيو من جنب بيتنا بإتجاه الشجرة وكان واضح إنه المطر أخفى الأثر لأنه جويرية وقعت تحت مكان مظلل ومن بعدها بكون المكان مكشوف تماماً.. كنت ورا البيت وتغريد لحقتني وقالتلي شو في؟.. قلتلها في شباك صغيرة ورا الحيط.. أول ما حاولت أقرّب إيدي لأفتحه لجوا.. سمعت صوت بحكيلي عم تدوّر علينا؟.. إتطلعت قدامي شفت أرغد ماسك إيد أيوب وواقفين بآخر طريق بيتنا.. وأرغد لابس كندرة رجالية سودة كبيرة.. قرّبت منه أنا وتغريد وحكيتله وين كنت مبارح؟!.. قال ما بعرف.. يمكن مكان ما كنت إنت واقف!.. سألته لمين هالكندرة؟!.. قال أيوب أعطاني ياها.. شلّحته ياها شفت رجليه مشققين وبنزل منهم دم.. وواضح إنه كان بركض.. أخدتها ودخلته للبيت وأمي حضنتهم.. بقيت تغريد تتفحص الكندرة وقالت مهترية وقديمة!!.. سألتها البروش لسه معك؟!.. قالت خبيته ورح أخبّي هالكندرة.. انا حاسة كل شي بصير ليوصلنا لشي!.. طقت راوية الباب.. وشافت الولاد مستغربة.. وبقيت بتتطلع عليّه وبتقول زاهر عم يهددك.. الشرطة بالبيت باخدو أقوال أمه وأخته لأنهم منهارين من مبارح.. وعم يهدد يقتلك!.. قلتلها أنا ما قتلتها.. كنت بدوّر على أخواني وإنتي موجودة وشهدتي!.. ما كان معي أي أداة جريمة!.. خلص بكفي!.. أنا متلك مصدوم ولو بده يهدد يجي بوجهي هون ويحكي.. وقتها أنا رح أدافع عن نفسي وعن عيلتي وأقتله وأنا مش خايف.. دفاع عن النفس وما فيكي تحاكمينا.. قالت كيف ماتت جويرية؟.. وليش لتكون جنبها؟!.. قالت أمي أنا مش متذكرة شي.. كل يلي متذكرته إني كنت مع أرغد عم بحطه بالسرير لينام.. ومن بعدها شعرت بحركة بالصالة.. رحت لأشوف مين.. شعرت بإيدي بتتحرك لوحدها.. وفي حدا نفخ بوجهي.. كان هوا بارد.. ورحت أتأكد إذا الباب مسكّر كويّس ومن بعدها اهتز توازني ولمحت عيني على الساعة.. وأول شي فكّرت فيه أرميها من شباك أرغد.. ومن بعدها ما عرفت شو صار أبداً.. قالت راوية.. لو ما شفت جويرية شو عملت بعد ما فتحنا الباب عليكم وقبل لتموت كنت رح أقلك برافو بتستاهلي الأوسكار على أدائك المذهل.. بس أنا هلأ مخربطة.. وموت البنت جنني!!.. قلتلها كانت رح تحكي شي قبل ما تكون بوعيها وبعد ما شكيت إنها بوعيها وأنا جنبها بس ما سمعت.. ماتت ومن بعدها أجا زاهر وشافني.. قالت وجود أخوانك هلأ بالذات غريب.. رح أضل أشك.. ورح أضل أشك!!.. لأنه كل شي عم يصير عم يشككني!.. قرّبت منهم وقالت لأرغد وين كنت مبارح؟.. قلها مو متذكر شي.. يمكن حوالين البيت أو جواته.. أنا مو متذكر.. لقيت نفسي جنب بيتنا وشايف أخي آصف بدوّر عليه مع تغريد وأنا كنت لابس كندرة كبيرة عليّه.. قالتله وينها؟!.. لف وجهه بإتجاه الباب.. وراوية شافتها محطوطة.. قالت لتغريد إعطيني ياها لو سمحتي.. جابتها وأخدتها.. وصوّرتها بتلفونها.. قالت أنا جاي أأكدلكم اليوم إنه البروش طلع لمدام ثريا زوجة ثروت العالي.. شوف هالصور بتلفوني.. شفت مرة جهمة لابسة لبس قديم بصورة عائلية.. واقفة مع زلمة

قصير أصلع بشوارب عريضة ووجه كبير.. وبنتين صغار شعرهم قصير.. وبنت طويلة بالنص شعرها على نص وجهها.. قلتلها هدول همّه!.. هي عيلة العالي؟!.. قالت بس لسه في أفراد منهم مفقودين بالصورة.. يلي عرفته إنه مو بس هدول كانو عايشين معهم.. قلتلها صحيح.. أمي قالت مبارح في فايزة وفي لبابة ووتين.. هدول مين يا ترى؟.. قالت عم ببحث.. أنا هلأ عاملة تحرياتي لأعرف كل شي عن هالعيلة.. وهلأ إتأكدنا إنه البروش لهالست.. بس ليش طلبت من هالولد يطلّعه من التراب؟!.. وكيف دخل بيت ست نجلاء.. وليش؟!.. قلتلها يبقى هلأ عم تتأكدي إنه السر بالعيلة مش فينا.. قالت وعندي شكوك إنه قصتكم وقصتهم جزئين لحكاية وحدة.. هالعيلة ما رح تترككم.. وموت جويرية أكبر دليل إنه المجرم موجود هون.. إتطلعت راوية بتغريد وقالتها بدي أحقق معك مرة ثانية.. بسبب اللي صار مع أمك مبارح وإختفاء أخوانك.. قالت إنتي شفتي كل شي مبارح.. ليه ليتحقق معنا؟!.. وشفتي إني بقيت موجودة معكم بالشارع ودوّرت على أخواني مع الشرطة.. قلتلها لأ يا تغريد مش مصدقة كلامي.. يمكن شاكة إنه أنا وإنتي أخفينا أخواننا لسبب.. قالت راوية إعطيني البروش.. وجهزي نفسك رح تلاقي سيارة الشرطة برا.. قالت تغريد أنا عندي شغل بالمكتب بعد شوي وما في وقت إلا لأطعمي أخواني وأطلع على شغلي.. حكت وأنا ما رح أعطلك.. دخلت تغريد وأعطتها البروش.. وبهاللحظة أيوب صار يبكي ويتطلع على الشباك.. طبطبت على ظهره وقالته بس حبيبي إهدى.. قرّبت مني وقالتلي.. ما رح أصدق إنه الأرواح ممكن يقتلو ولو زاهر وأمه أقنعوكم إنه في غول ساكن هالشارع وإنتقم من أبوهم من خلال هالعيلة!.. إبتسمت وطلعت.. وأمي صارت تضرب على وجهها وقالت رح تضل وراك لتسجنك بدون ذنب!.. ما رح تتركنا.. قلتلها خليها.. إذا هيّه حابة تلعب معنا خلينا نلعب معها.. كنت معهم بالبيت وتغريد طلعت مع الشرطة.. الشارع هادي والسما صافية.. وسيارة شرطة ثانية عند بيت زاهر.. في سيارة كانت جاية من بعيد.. تكسي!.. إستغربت مين ممكن يكون جاي؟!.. يلي عرفته إنه بيت ماجدة ما بعرفو حدا.. ومش ممكن يكون حدا جاي يعزيهم.. كانت السيارة بتمشي ببطئ وأنا بتطلع عليها.. قرّبت لعندي.. ونزل منها بنت.. حكتلي حضرتك ساكن هون؟!.. قلتلها صحيح نحنا ساكنين هون مين إنتي؟!.. نزلت بنت ثانية من السيارة وحكو للتكسي إرجعلنا بعد ساعة.. قرّبو مني.. حكتلي وحدة.. أنا أيلول.. باحثة بمجال الماورائيات.. قالت الثانية وأنا هبة.. باحثة بنفس المجال.. عم ندرس دكتوراة.. وموضوع بحثنا عن الخوارق والماورئيات وكل شي من ما وراء الطبيعة من وجهة نظر الناس.. يعني إذا الناس ممكن يصدّقو هيك أشياء أو لأ.. وهالشارع مادة زخمة لهيك موضوع.. قالت للبنت هبة هاد هوه البيت!.. قلتلها بيت ثروت العالي؟.. الظاهر إنكم قارئين عنه ودارسين كثير كويّس لحتى متأكدين إنه هاد البيت.. حكت أيلول أشهر ونحنا عم نقرأ عنه وعن أصحابه ويلي سكنوه بس ما قدرنا نعرف النهاية يلي آلت لأصحاب هالبيت.. معقول ثروت باشا العالي قتلهم؟!.. هيك بقولو.. لهيك أطلقو عليه بعد ما مات لقب السفاح.. بسبب شخصيتة القوية وجبروته.. حاولت تقرّب منه قلتلها وقفي.. إنتو جايين بكل سهولة تبحثو وتشوفو بدون ما تعرفو يلي صاير؟.. حكت أيلول على حد علمي إنه ما صار شي من بعد ما إنترك هالبيت.. وكل البيوت هون عايشين بسلام بس الضجة جاية من جواه.. نحنا جينا من فترة طويلة وكان هالبيت هاد مهجور.. إنتو متى سكنتو؟.. قلتلها الكلام رح يطول.. إدخلو للبيت قبل ليشوفكم حدا.. دخّلتهم للبيت وحكينا.. قالت هبة لهيك سيارة الشرطة برا.. قالت لأيلول.. الموضوع خطير وما توقعنا يكون عم يصير لهلأ بهالتفاصيل!!.. معقول بدك نكمّل.. قالت أيلول هاد المطلوب.. يكون واقعي وحقيقي وبخوّف.. بدي أبحث ميدانياً عن شريحة كبيرة من الناس يلي سمعو عن هالبيت وأهله وأشوف شو بعرفو.. لازم أبحاثنا توصل للعالمية بمصداقية كبيرة.. ونوثّق كل شي بالصور.. حكت هبة وكيف والبيت مشمّع بالشمع الأحمر؟.. وكيف وفي قضايا قتل عم تصير؟.. قلتلهم عليكم نور.. إنتو داخلين دائرة الخطر وجايين لمكان الدنيا والعة فيه.. البنت يلي إنقتلت مبارح حطت ألف سؤال قبال عيون الشرطة وهالمحققة يلي ما بدها تتركنا.. سكنت بالشارع جنب ست كبيرة إسمها نجلاء لتشوف كل شي بعينها وتتأكد.. والموضوع مش بهالسهولة.. حكت هبة لأيلول كيف نتراجع؟!.. ما بقيلنا شي.. والدكاترة أثنو على الموضوع لأنه فيه جانب سياسي.. أشهر طويلة عم نقرأ ونراجع ونبحث عن هالبيت وآخر شي كل شي ينقلب بلحظة!.. حكت أيلول أنا ما رح أتراجع.. وبدي أبحث عنه.. قلتلها هشش.. يمكن يكونو سامعينك.. نهلة بتعرف كل شي.. وروحها بكل مكان.. أخواتها التوأم مبارح أخدو أخواني ورجعوهم الصبح.. بقولو إنهم مش متذكرين شي.. أو يمكن دخلو البيت وهوه مقفول!.. أما أمهم ثريا روحها لبست جسم أمي.. وأمي كانت مغيّبة عن الوعي.. وحكتلنا ثريا إنه روحها بقيت بالبيت..

ولا عارف أفهمه.. لشو حابين يوصلونا.. قالت نفين لإلك.. بدهم يكشفو جريمتك.. روح رونان عم تلاحقنا أنا وزوجي.. وبدها حقّها!.. إنت يلي قتلتها.. وكل شي صار وعم يصير عم يدور حواليك.. كيف قدرت تخبّي عن الشرطة؟.. ضحكت وقلتلها وإنتي مين لتقدميلي تهمة؟.. إذا الشرطة ما مسكو عليّه شي مين إنتي لتحكي هالكلام؟!!.. كلامك محسوب عليكي.. وإتهام ثاني رح أخليكي تندمي وحياتك.. قالت بتهددني؟.. هزيت براسي وقلت أيوه بهددك.. إذا ما سكتتي رح يكون إلي معك كلام ثاني.. خافت مني ودخلت لجوا.. وقالتلي رنوة ليه هيك عم تحكي معها؟.. هيّه خايفة وتركت بيتها وإبنها وأجت لهون لتحتمي بالمحققة وفينا.. قرّبت منها وقلتلها.. رنوة أنا حاسس إنه الأرواح بدهم يوصلولك إنتي بالذات رسالة.. لو عرفتي شي ما تخافي تقولي.. حياتنا كلنا بخطر.. نحنا عايشين بشارع واحد وبمركب واحد.. يا بنعيش كلنا يا بنغرق سوا.. قالت وليش أنا؟.. حكيتلها ما بعرف.. بس هاد إحساسي.. المكان يلي حلمتي فيه كان صحيح.. أخواني كانو فيه.. يبقى أحلامك صحيحة وفيها نجاة وخير.. شفتها مرتبكة وبتتطلع حواليها.. قالت كيف أأمنلك؟.. حكيتلها إنتي كمان شاكّه فيني؟.. شكلي شكل مجرم؟.. حكت ما بعرف.. أنا ما بطلع من البيت أبداً من سنين ومع هيك مو خالصه.. شو بدهم مني؟.. قلتلها رح نعرف.. ورح نعرف ليه إنتي بالذات.. ورح تأمنيلي.. تركتها وطلعت لقيت راوية بوجهي عم تدخل للبيت.. قالتلي إنت شو عم تعمل هون؟.. لا تفكّر إنه إنقفل التحقيق.. هلأ إنفتحت قضية جديدة.. مسدس كاتم صوت!.. كاتم صوت يا آصف.. عرفنا هالشي من الطلق يلي بجسمها بعد التشريح.. ياه شو هالجرأة.. إنقتلت بين كل عناصر الشرطة يلي كانو موزعين بالشارع وبينّا كلنا.. فتشنا بيتك من شوي وحواليه وما لقينا شي.. يا ترى وين ممكن يكون المسدس؟.. قلتلها واثقة إني المجرم؟.. بتحكي بثقة عالية ورفعة راس.. مو كأنه زاد الموضوع عن حدّه وصرت أنا المتهم الوحيد بكل هالحفلة؟.. حكت لسه ما إنتهينا.. شددت الحراسة.. ورح أرجع أحقق مع الكل.. وما رح أتركك.. وعد.. إحساسي ما بخيب يا آصف.. إتطلعت عليها وإبتسمت بهدوء وتركتها ومشيت.. طلعت من البيت ورن تلفوني.. كانت أيلول.. حكتلي أنا وهبة رح نيجي بالليل.. ما بنكر من إني خفت من يلي صار.. بس ما بتصدق لو أقلك إني كنت بستنى هالشي يصير من زمان.. بحثت كثير عن هالقصص بس ولا مرة شفت بعيوني.. وكلام أمك ما خوّفني.. يلي خوّفني الساعة يلي صارت بإيدها فجأة!.. لازم نشوف بعيوننا أكثر وندقق وبوعدك أساعدك.. إذا قدرنا نكشف يلي صاير زمان ببيت ثروت العالي بالشكل الصحيح رح تقدر تفهم شو بدهم منك وشو علاقة ظهورهم بالجريمة يلي إنت متهم فيها.. حكيتلها بستناكي.. قالت قبل لتغرب الدنيا رح أكون معكم أنا وهبة.. قفلت الخط ورجعت على البيت.. الغيوم عم تزداد سواد.. وواضح إنه في شتوة قويّة المسا مع برد لاسع.. هدوء تام بالشارع.. قرّبت من البيت وركّزت بالشمع الأحمر.. دققت كويّس.. حسّيت إنه متآكل.. أنا ما لمسته!.. في حدا عم يحاول يدخل البيت!.. باللحظة يلي كنت بدقق فيها سمعت صوت صفرة.. لفيت وجهي ما لقيت حدا.. المكان فاضي.. حطيت إيدي على الشمع الأحمر لأشوف ليش نصه رايح وفجأة شعرت بحدا مسك إيدي.. شعرت بمسكة قويّة شدّت على إيدي وشلّتها.. أجيت أصرّخ في إيد إنحطت على تمي.. ما في شي مرئي ما عم بشوف شي بس عم بحس.. شعور بشد على إيدي وبعصرها.. ومو قادر أتحرّك.. وإيدي بترجع.. سمعت صوت كمان صفرة.. وصوت الشجر إشتد.. هوا قوي!!.. قوي كتير!!.. رجّعت راسي لفوق.. شفت رجل عم تمشي على جذع شجرة.. مشت بسرعة.. لفيت راسي بإتجاه الشجرة.. شفت أمي.. أمي واقفة على جذع الشجرة جنب البيت الحجر.. واقفة مثل طير بسلاسة وخفة.. ويلي رعبني عيونها الواسعة السودة ووجهها الأحمر.. وشعرها المتطاير.. كانت بملامح خشنة.. وعلى وجهها شعر خفيف وحبة خال كبيرة.. قالت الليلة رح تموت قبال عينك لو ما تركت روحها.. رح أخلّصك منها.. إبعدو عن حياتنا.. وإبعدها عن عيلتي!!!.. كانت بنفس صوت أمي بس خشن ومحشرج وقوي!!.. كانت بتتنطط فوق جذع الشجرة وبتضحك ولسه بشعر بالإيد بتشد إيدي وماسكيتني بقوة وعلى تمّي.. الإيدين صارو يبعدوني.. ويرجعوني للبيت بشكل عكسي.. وأمي بترقص فوق الجذع وبتهرب للبيت.. سمعت صوت شباك البيت الحجر فتح.. ودخلت لجوا بخفة وأنا إرتميت جنب باب بيتنا.. خبط جسمي بالباب وسمعت صوت طيور فوق راسي.. غربان ظهرت فجأة وطارت وورق الشجر نزل بقوة وإهتز.. قدرت أصرّخ.. وكنت بتنفس بصعوبة.. إنفتح باب بيتنا.. شفت أمي واقفة.. حكتلي آصف ليه مرمي جنب البيت؟.. كانت لابسة نفس الملابس يلي شفتهم من شوي فوق الشجرة.. كنت مرعوب وببلع ريقي.. المنظر كان مخيف وبتحذير قوي.. هالشخص روح شريرة.. عرفت وكشفت كل شي.. إنه العيلة دخلو حياتنا وقرّبو منا.. وبدهم يكشفو شي عن حياتهم وعن حياتنا.. عرف كل شي..

والثقافة بالمدارس.. قال ليش وهوه سفاح؟!.. نسي الموضوع بس أنا دخلت حياته وذكّرته فيه.. وقدمتله خدمة زي ما قلتلك.. قلّي إعرفي يلي أنا ما قدرت أعرفه.. وإبحثي من خلال هالمعلومات وبالناس يلي كانو بحياة هالرمز المهم.. قلتلها يعني نركّز على فايزة وبنتها والخدامة أكثر من ثروت العالي وبناته؟!.. قالت أيلول تماماً.. أنا تواصلي معه رح يكون بالسر ورح يبقى يساعدني.. بس كيف بدنا نوصل للحقيقة وهوه ما بعرف كثير؟!.. حكيتلها من الأرواح.. روح فايزة هلأ جوا جارتنا ماجدة.. وروح ثريا ما عم تترك أمي.. نهلة بدأت تختفي لسبب نحنا مش عارفينه.. يمكن قدرت تقنع أمها وهالمرة يوصلولنا الرسائل من خلال أجساد الأمهات.. أو حتى أحلام عم تشوفهم بنت مقعدة معها شلل.. بس إختفائها إله سبب أكيد.. قالت هبة يعني من كلامك عن يلي صار قدرت أعرف الشخصيات يلي بهالعيلة ويمكن أشياء بتربطهم.. حفظتهم تماماً.. بس هلأ صار لازم نربط الأحداث من كلام الأرواح لنوصل لنتيجة.. المرايا والحذاء.. القميص والبروش.. وحتى الساعات!!.. أمك لمّا رمت الساعة كانت ملامحها مرعوبة.. في شي مخوّفها منهم.. قالت أيلول صحيح.. بالأخص إنه ثريا يلي كانت عم تحكي معنا.. مرته لثروت.. كنا قاعدين سوا وتغريد مع أرغد وأيوب بالغرفة وأمي معهم.. كنا بقمة التركيز.. كانت الساعة ستة ونص المسا.. وبهالوقت الليل حل.. قلتلهم عن يلي شفته الصبح.. الروح الشريرة يلي حذرتني بهيئة أمي.. ملامح هبة تغيّرت.. وقالت لأيلول كيف نبقى لليل؟.. حكت أيلول الكاميرا معي ورح نرصد كل شي.. رح نصوّر أي شي رح يصير.. لا تخافي الشرطة دائماً هون بالشارع.. لأنه هالمحققة ما رح تتركهم.. والتكسي على الساعة ثمنية رح يجي.. أنا دفعتله كثير وقلتله يمكن نتأخر ساعة.. يعني ممكن نبقى للتسعة أكثر شي!.. ما تخافي وقوّي قلبك.. طلعت تغريد من غرفتها وقالت أنا لازم أطلع.. حكيتلها لوين؟.. رن تلفونها.. قالت أيوه رافي.. الشارع يلي على الشمال.. في شجر سرو كثير جنبه.. خليك دغري.. بتلاقي بيتنا بآخر الشارع بعد بيتين واحد عاليمين وواحد على الشمال.. قفلت الخط وقالت هاد رافي المحامي صاحب المكتب يلي بشتغل فيه.. مو قلتلك إني قلتله عن القضايا؟.. هوه حب يشوف المحققة راوية ويحكي معها.. من حظنا إنه في ناس واقفين معنا وعم يساعدونا.. رح نشوفها وبعدين نطلع لمكان هادي.. الشب طلبني للزواج من شهر وبده يعرف ردّي.. قلتلها ومو المفروض يتعرّف علينا؟!.. قالت رح يتعرّف ورح يساعدنا.. بس إنت شايف إنه هاد وضع يدخل بيتنا فيه؟!.. هوه شاف أخلاقي وقلي ما رح ألاقي متلك.. بس أنا من شهر مو عارفة أحكيلكم بس هلأ أمي عرفت.. قلتلها أنا بوثق فيكي.. وفيكي تشوفيه وتشوفي حياتك.. أنا بعرف إنك تعبتي معنا.. قالت شكراً آصف.. وطلعت من البيت.. قالت هبة أختك معها حق.. المفروض تلاقو محامي شاطر يوقف معكم بدل ما هالمحققة عم تاخدكم وتجيبكم متل ما بدها.. قلتلها أختي رح تعرف تتصرّف.. انا بوثق فيها ودائماً بتطلعنا من المصايب.. رنّيت لزاهر وقلتله يجي على البيت.. دقايق وكان هون.. أعطيته باقي مصاري الدفاية يلي ركبها واتعرف على هبة وأيلول.. وأيلول سألته أسئلة عن يلي صار الصبح.. قال أمي تحوّلت وصارت بدها تكسّر المرايا يلي بالبيت بدون سبب.. وقالت فايزة بتعرف كل شي وعارفة شو تعمل.. بس هلأ رجعت طبيعية ومو متذكرة شي.. أنا خايف على أختي لارا وعليها!!.. قالتله أيلول لأنك خايف عليهم لازم توقف معنا وتعرف إنه نحنا كمان جايين هون لنساعدكم ونكشف هالقصة يلي صرلها سنين طويلة.. أكيد المقابل رح يكون أبحاثنا بس.. يعني مو طالبين شي منكم.. بدنا نوصل للدكتوراة ونقدم هالرسالة عالمياً.. لأنه كل دكاترة قسمنا متشوقين يعرفو اللي ما حدا قدر يعرفه وحاطين كل أملهم فينا.. نحنا رح نساعدكم وإنتو رح تساعدونا.. قال زاهر بس أنا ثقتي بهالإنسان مو كبيرة.. كل شي عم بصير برجعني لنقطة البداية.. عدم الثقة.. قلتله أنا صح كنت أراجع الدكتورة رونان لأني تعبان نفسياً بس أنا ما وصلت لمرحلة الجنون.. والكلام يلي قلتلي ياه اليوم أنا نسيته.. قالت أيلول شو مصلحة آصف يقتل أختك؟!.. فكّر بعقلك.. قال يمكن لأنها بدأت تكشف لعبته وقتله للدكتورة.. يمكن لأنه خاف على نفسه من كلامها.. قالوله إنه هوه يلي قتلها!.. قلتله إنت ما شفت نظراتهم.. ما شفت كيف كانو يتطلعو هيّه وأمي.. الأرواح الشريرة بتأثر عليهم.. وحتى لهاللحظة كانو خايفين.. فكّر بكلامهم منيح.. لأنه في تخبط كبير.. وفي تراجع.. بحكو شي وبتراجعو عنه.. في خوف وتخوّف من شي رح يصير لقدام.. بس ما قدرت أعرفه.. قالت أيلول وهاد يلي رح نعرفه.. قال زاهر ياريتهم ضلو لسه محبوسين.. ياريت ما مات الختيار الحاجب.. قالت أيلول مين؟!.. قال هاد ختيار ساعدني من سنين لأسجنهم بالبيت من بعد يلي عملته نهلة فينا.. إستخدمت تعويذة قلّي إنها من جن خيّر.. وبعدناهم فيها..

إنقلبت حياتنا من بعد القطة يلي ماتت لهيك ما قدرت أتخيّل إني أخسر أمي أو وحدة من أخواتي وهلأ كله صار!!.. بهاللحظة دخلت القطة السودة من جوا وقعدت على الكنبة!.. زاهر إنتفض وقال نفسها!!.. هيّه!!.. كيف رجعت دخلت لبيتكم؟!.. هبة خافت وبعّدت وقالت شو فيها هالقطة؟!.. قلتلها حكايتها من حكايتهم.. ما بنعرف لو ماتت أو لأ.. أو هيّه روحها أو فيها روح منهم!.. أيلول حكتلها لا تخافي.. قال زاهر بعصبية كيف رجعت دخلت البيت؟.. حكيتله وطّي صوتك.. خلينا نحكي بهدوء.. إتهيألي إنه إنفتح باب البيت الحجر.. وطلعت مرة وذكرت إسم فايزة.. أنا حاسس إنها هيّه.. ومن بعدها شفت القطة عم تخرمش رجلي.. وتركتها وجيت لبيتكم ولمّا دخلنا البيت أنا وإنت وإتهمتني بالجنون كانت جنب تغريد فوق الكنبة.. قال زاهر بس أنا ما شفتها.. ما شفتها إلا هلأ!.. قلتله يعني ما لمحتها على الكنبة جنبهم؟!.. قال لأ.. صدقني لأ.. شفت أخوانك وأمك وأختك بياكلو على الطاولة والوضع هادي لهيك ما صدقتك ورحت بسرعة.. بس ما شفتها.. أيلول شدّت إيد هبة وقالتلها سجّلي الكلام على تلفونك.. ما بدنا يفوتنا شي.. وخليكي مركزة.. قلت لزاهر أنا مستغرب متلك.. بس أوعك ترجع تتهمني بالجنون أو التوهّم.. أوعك!.. سامحتك مرة.. بس مرة ثانية ما تلوم غير نفسك!.. قال زاهر لأيلول شفتو إنه ثقتي فيه عدم.. كلامه وتهديده دائماً بخوّفني.. قالت لازم نهدى.. ونستغل هالمعلومات لنوصل لنتيجة.. روح فايزة قريبة من ماجدة ويمكن تبقى تقرّب منها.. وروح ثريا قريبة من عزيزة.. وكلام يلي ساعدني بهالوراق بأكدلني إنه الحقيقة من عيلة ثروت وبالأخص مع يلي مع عيلته.. بس أنا خايفة المحققة راوية تأثر علينا وتخرّب كل شي بالأخص إنه ما معنا تصريح أو إثبات.. بس وقتها أنا ما رح أسكت.. قلتلها وشو رح تعملي؟!.. قالت رح أخلّي الأقوى منها يأثر عليها.. قلتلها لهالدرجة إنتي واصلة؟.. وبتعرفي سياسيين مهمين ليأثرو على هيك محققة جرائم جنائية رتبتها عالية؟!.. قالت لأ.. رح أخلّي الجن يتدخّل.. رح نسحرها.. ونبعدها عنا.. والجن يلي ساعد زاهر زمان.. قادر إنه يكشفلنا باقي الوراق ويساعدنا.. صرّخت هبة إنتي شو عم تحكي!!.. إنتي أكيد إنجنيتي!!!.. قالت لأ.. بس ما رح أخلّي هيك وحدة تخرّب عليّه تعب وأبحاث سنين.. اليوم أجينا بالسر بس بكرا ما رح نقدر نكمّل.. ويلي ساعدني ما رح يورط حاله أكثر.. يعني لازم يكون في داعم قوي ليساعدنا.. حاولت هبة تطلع.. قلتلها لسه بكير.. الساعة ما صارت سبعة.. قالت أيلول لزاهر.. بدنا نلاقي واحد مثل الختيار الحاجب.. قال زاهر الختيار مات بتاريخ وتوقيت قريب كثير من اللي صار زمان.. وغيره ما قدرت أعرف.. حكت أيلول رح ألاقي.. بس إنتو أوثقو ببعض ولا تزيدو الطين بلة.. بهاللحظة سمعنا صوت صفقة.. صفقة قويّة.. إتطلعنا ببعض.. وقالت أيلول مين بصفق؟!.. دخلت أمي بهدوء.. وقالت برافو عليكم.. حذرتكم ومع هيك ما هديتو.. قلتلكم إطلعو من هاللعبة وما قبلتو.. إنتو قدنا؟.. قد يلي رح يصير؟.. راوية عرفت بوجودكم هلأ.. ويلي خايفين منه رح يصير.. رح تمنعكم وتخرّب عليكم كل يلي رح تعملوه.. والنهاية رح تكون خراب.. إطلعو هلأ.. معكم خمس دقايق قبل لتوصل البيت وتشوفكم.. إهربو من الشارع ولا ترجعو.. لأنه لو صارت الساعة سبعة وستة وعشرين دقيقة.. وحدة منكم رح تنقتل.. وروح ثانية رح تروح بسببكم وإنتو رح تحملو ذنبها.. زي ما غيركم حمل ذنبنا لليوم

يتبع..